ពលរដ្ឋ​មាន​វិវាទ​ដីធ្លី​នៅ​បឹង​តាមោក​ដើរ​ចេញពី​អង្គប្រជុំ​ ក្រោយពេល​​អាជ្ញាធរ​ខណ្ឌ​ព្រែក​ព្នៅ​គំរាម​ឱ្យ​រុះ​រើ​ផ្ទះ

ដោយ សុ ជីវី
2024.03.06
ពលរដ្ឋ​មាន​វិវាទ​ដីធ្លី​នៅ​បឹង​តាមោក​ដើរ​ចេញពី​អង្គប្រជុំ​ ក្រោយពេល​​អាជ្ញាធរ​ខណ្ឌ​ព្រែក​ព្នៅ​គំរាម​ឱ្យ​រុះ​រើ​ផ្ទះ ពលរដ្ឋមានជម្លោះដីធ្លី​នៅតំបន់បឹងតាមោក ខណ្ឌ​ព្រែកព្នៅ លើកបដាតវ៉ាតាមដងផ្លូវក្បែរផ្ទះ កាលពីថ្ងៃទី៥ មីនា ២០២៤។
រូប​៖ ពលរដ្ឋ​ផ្តល់ឱ្យ

ពលរដ្ឋ​មាន​វិវាទ​ដីធ្លី​នៅ​បឹង​តា​មោក ជាង ១០០នាក់ នាំគ្នា​ដើរ​ចេញ​ពី​អង្គ​ប្រជុំ​អំឡុង​ពេល​អាជ្ញាធរ​ខណ្ឌ​ព្រែកព្នៅ​ហៅ​ពួក​គាត់​ ទៅ​ចរចា​រឿង​ដីធ្លី។ ពួក​គាត់​ថា​ អាជ្ញាធរ​ពុំ​បាន​ ចរចា​រក​ដំណោះស្រាយ​នោះ​ទេ ផ្ទុយ​ទៅ​វិញ បែរ​ជា​គំរាម​ពួក​គាត់ ឱ្យ​រុះរើ​ផ្ទះ​ចេញ​ជា​បន្ទាន់ បើ​ពុំ​ចង់​មាន​បញ្ហា។

ពលរដ្ឋ​មាន​វិវាទ​ដីធ្លី​នៅ​បឹង​តា​មោក លើក​ឡើង​ថា​ អាជ្ញាធរ​ខណ្ឌ​ព្រែក​ព្នៅ ​គ្មាន​ឆន្ទៈ​ដោះ​ស្រាយ​រឿង​ដីធ្លី ដោយ​យុត្តិធម៌​នោះ​ទេ ក្រៅពី​ការ​គំរាម​ពួក​គាត់​គ្រប់​រូប​ភាព។ ជាក់​ស្ដែង​នៅ​ថ្ងៃ​ទី៦ ខែ​មីនា ​អាជ្ញាធរ​បាន​ហៅ​ពួក​គាត់​ទៅ​ចរចា​នៅ​សាលា​ខណ្ឌ ប៉ុន្តែ ពុំ​រក​ដំណោះស្រាយ​ឡើយ បែរ​ជា​គំរាម​កំហែង​បន្ថែម។

ពលរដ្ឋ​រងគ្រោះ​ដីធ្លី នៅ​បឹង​តា​មោក លោកស្រី យន គឹមយឿន ប្រាប់​វិទ្យុ​អាស៊ី​សេរី​នៅ​ថ្ងៃ​ទី៦ ខែមីនា​ថា ពួកគាត់​បាន​នាំ​គ្នា​ជាង ១០០នាក់ ទៅ​សាលាខណ្ឌ​ព្រែក​ព្នៅ តាម​ការ​កោះ​ហៅ​របស់​អាជ្ញាធរ។ ប៉ុន្តែ ជំនួប​នោះ ពុំ​មាន​លទ្ធផល​អ្វី​នោះ​ទេ ដោយសារ​តែ​ពួក​គាត់​នាំ​គ្នា​ដើរ​ចេញ​ពី​អង្គរ​ប្រជុំ ព្រោះ​មិន​ចង់​ស្ដាប់​ការ​គំរាម​កំហែង។

លោកស្រី យន គឹមយឿន៖ «ទង្វើ​នេះ​វា​អយុត្តិធម៌​សម្រាប់​ពួក​ខ្ញុំ ជា​អ្នក​ក្រ ចង់​ជិះ​ជាន់​ពួក​ខ្ញុំ។ គោលដៅ​គេ ដោះស្រាយ មិន​មែន​ជា​ការ​ដោះស្រាយ​ទេ គេ​ចង់​ប្រាប់​ពួក​ខ្ញុំ​នឹង​រស់​នៅ​លើ​ដី​គេ ឱ្យ​ពួក​ខ្ញុំ​នឹង​ស្ងប់​ចិត្ត វា​មិន​មែន​ជា​ការ​ស្ងប់​ចិត្ត បែរ​ជា​ក្ដៅ​ក្រហាយ ​ឆេះឆួល ព្រោះ​ពួក​ខ្ញុំ​រស់​នៅ​លើ​ដី​នេះ ជាង ៣០ឆ្នាំហើយ»

វិទ្យុ​អាស៊ី​សេរី​ពុំ​អាច​ទាក់ទង​អភិបាល​រាជធានី​ភ្នំពេញ លោក ឃួង ស្រេង និង​អភិបាល​ខណ្ឌ​ព្រែក​ព្នៅ លោក ធឹម សំអាន ដើម្បី​ឆ្លើយតប​រឿង​នេះ​បាន​ទេ នៅ​ថ្ងៃ​ទី៦ ខែមីនា។

ទោះ​យ៉ាង​ណា​ក្ដី នៅ​ថ្ងៃ​ទី៦ ខែមីនា​ដដែល អភិបាល​ខណ្ឌ​ព្រែកព្នៅ លោក​ ធឹម សំអាត ​បាន​ប្រាប់​សារព័ត៌មាន​ក្នុង​ស្រុក ដោយ​ស្នើ​ដល់​ពលរដ្ឋ​រស់នៅ​ជាប់​បឹង​តា​មោក ឱ្យ​មក​ទទួល​យក​ប្លង់​ដី ដូរ​ទៅ​កន្លែង​ថ្មី ដែល​អាជ្ញាធរ​រៀបចំ​ឱ្យ ព្រោះ​មិន​ឱ្យ​ពលរដ្ឋ​នៅ​លើ​ដី​នោះ​ទៀ​ទេ។ ការ​ថ្លែង​នេះ គឺ​អំឡុង​ពេល ដែល​អាជ្ញាធរ​ចែក​ប័ណ្ណ​កម្មសិទ្ធិ ដល់​ពលរដ្ឋ ២៦គ្រួសារ ដែល​ព្រម​ទទួល​ដំណោះស្រាយ​របស់​អាជ្ញាធរ។

ចំណែក​ពលរដ្ឋ​រង​គ្រោះ​ដីធ្លី​ជាង ១០០គ្រួសារ ដែល​មិន​ព្រម​ទទួល​យក​ដី តាម​ការ​រៀបចំ ​របស់​អាជ្ញាធរ​នោះ ពួកគាត់​ទទូច​ឱ្យ​អាជ្ញាធរ​ពាក់ព័ន្ធ បញ្ឈប់​ការ​ធ្វើ​ទុក្ខបុកម្នេញ ហើយ​ឱ្យ​ពួក​គាត់​រស់​នៅ​លើ​ដី​នោះ​ត​ទៅ​ទៀត ព្រោះ​ពួក​គាត់​មិន​ចង់​ទៅ​កន្លែង​ថ្មី​ទេ។

ការ​កោះ​ហៅ ពលរដ្ឋ​មាន​វិវាទ​ដីធ្លី​ពី​សំណាក់ អាជ្ញាធរ​ខណ្ឌ​ព្រែក​ព្នៅ​ឱ្យ​ទៅ​ជួប​ចរចា​នេះ ក្រោយ​ពី​ទី​ប្រឹក្សា​គណបក្ស​កម្លាំង​ជាតិ គឺ​លោក រ៉ុង ឈុន បាន​ចុះ​សួរ​សុខ​ទុក្ខ​ពលរដ្ឋ កាល​ពី​ថ្ងៃ​ទី៥ ខែមីនា។ លោក រ៉ុង ឈុន បាន​សន្យា​ថា នឹង​ដាក់​សំណើ​ទៅ​រដ្ឋាភិបាល ដើម្បី​ស្នើ​ឲ្យ​ចេញ​ប័ណ្ណ​កម្មសិទ្ធិ​ជូន​ពលរដ្ឋ ហើយ​បញ្ឈប់​ការ​ធ្វើ​ទុក្ខ​បុក​ម្នេញ រំលោភ​បំពាន​ដីធ្លី​ពួក​គាត់​ត​ទៅ​ទៀត។ ទាក់ទិន​បញ្ហា​នេះ អ្នក​សម្រប​សម្រួល​គម្រោង​ធុរកិច្ច និង​សិទ្ធិ​មនុស្ស​របស់​មជ្ឈមណ្ឌល សិទ្ធិ​មនុស្ស​កម្ពុជា (CCHR) លោក វណ្ណ សុផាត មាន​ប្រសាសន៍​ថា អាជ្ញាធរ​គួរ​តែ​បញ្ឈប់​ការ​ធ្វើ​ទុក្ខបុកម្នេញ និង​ចោទ​ប្រកាន់​លើ​ពលរដ្ឋ​ថា ជា​ក្រុម​ញុះញង់ ហើយ​ងាក​មក​ដោះស្រាយ​បញ្ហា​ជូន​ពលរដ្ឋ​វិញ។​

លោក វណ្ណ សុផាត៖ «ខ្ញុំ​ថា បើ​រដ្ឋាភិបាល​មើល​ឃើញ​វីដេអូ​ហ្នឹង គឺ​វេទនា។ វេទនា​ភ្នែក ឬ​មួយ​ថា លោក​មិន​មើល​ម៉េច​ខ្ញុំ​មិន​ដឹង​ប៉ុន្តែ​បើ​សិន​ខ្ញុំ​មើល​វិញ ប្រសិន​បើ​ថា​លោក​ដោះស្រាយ​ឱ្យ​រួច​ទៅ​ប្រជាពលរដ្ឋ​ប៉ុន្មាន​គ្រួសារ​ហ្នឹង​នោះ ​ហើយ​ដី​ដូច​មិនបាន ៤ហិកតារ​ទេ អ៊ីចឹង​មាន​អី​ដែល​ថា​ដោះស្រាយ​មិន​បាន ប្រសិន​បើ​រដ្ឋាភិបាល​មាន​ឆន្ទៈ​ក្នុង​ការ​ដោះស្រាយ កុំ​ទុក! អ៊ីចឹង​ទៅ ដូច​ថា ធ្វើ​ទុក្ខ​វេទនា​គាត់​អ៊ីចឹង​ទៅ»

ជម្លោះ​ដីធ្លី​រ៉ាំរ៉ៃ របស់​ពលរដ្ឋ​រស់នៅ​បឹង​តាមោក កើត​ឡើង​ក្រោយ​ពី​អតីត​នាយក​រដ្ឋមន្ត្រី លោក ហ៊ុន សែន ប្រគល់​ដី​នៅ​តំបន់​នោះ ឱ្យ​ទៅ​អ្នក​មាន​លុយ​មាន​អំណាច សម្រាប់​ប្រើប្រាស់​ក្នុង​គោលដៅ​ផ្សេងៗ ជា​បន្ត​បន្ទាប់ ចំណែក​ពលរដ្ឋ ត្រូវ​បាន​បណ្ដេញ​ទាំង​បង្ខំ។ បើ​ទោះ​ជា​ពលរដ្ឋ​ទាំង​នោះ ព្យាយាម​តវ៉ា និង​ដើរ​ដាក់​ញត្តិ​រាប់​មិន​អស់ នៅ​តាម​ក្រសួង​ស្ថាប័ន​ថ្នាក់​ជាតិ ដើម្បី​ស្វែងរក​ការ​អន្តរាគមន៍​ក្ដី ប៉ុន្តែ មិន​ទទួល​បាន​ដំណោះស្រាយ ឡើយ  និង​ថែម​ទាំង​ទទួល​រង​ការ​ធ្វើ​ទុក្ខបុកម្នេញ ការ​យាយី រង​អំពើ​ហិង្សា ពី​សំណាក់​អាជ្ញាធរ និង ការ​ចោទ​ប្រកាន់​ពី​តុលាការ​ រហូត​ដល់​ពលរដ្ឋ​ខ្លះ​ត្រូវ​បង្ខំ​ចិត្ត​ចាក់​ចេញ​ពី​ប្រទេស​ដើម្បី​សុវត្ថិភាព​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។