ក្រុមហ៊ុន​រ៉ែ​មាស​ចំនួន៣ នៅ​ខេត្ត​ព្រះវិហារ​បន្ត​ពង្រីក​អាជីវកម្ម​រ៉ែ​មាស ប៉ះពាល់​ដី​ស្រែ​ពលរដ្ឋ ២០គ្រួសារ​ទៀត

ដោយ សន ចាន់រដ្ឋា
2022.01.04
Share on WhatsApp
Share on WhatsApp
ក្រុមហ៊ុន​រ៉ែ​មាស​ចំនួន៣ នៅ​ខេត្ត​ព្រះវិហារ​បន្ត​ពង្រីក​អាជីវកម្ម​រ៉ែ​មាស ប៉ះពាល់​ដី​ស្រែ​ពលរដ្ឋ ២០គ្រួសារ​ទៀត ទីតាំង​អាជីវកម្ម​រ៉ែមាស នៅ​តំបន់​ភ្នំ​លុង​នៃ​ឃុំ​រម្យទម ស្រុក​រវៀង ខេត្ត​ព្រះវិហារ កាល​ពី​ខែ​ឧសភា ២០១៧។
រូប៖ ចលនាមាតាធម្មជាតិ

ក្រុមហ៊ុន​វិនិយោគ​អាជីវកម្ម​ចម្រាញ់​រ៉ែ​មាស ចំនួន៣ នៅ​ខេត្តព្រះវិហារ នៅតែ​បន្ត​ពង្រីក​ផ្ទៃ​ដី​ធ្វើ​អាជីវកម្ម​រ៉ែ​មាស​របស់​ខ្លួន​ប៉ះពាល់​ដី​ស្រែ​ចម្ការ​បង្ក​បង្កើន​ផល​របស់​ពលរដ្ឋ​ជាច្រើន​គ្រួសារ​ទៀត ធ្វើ​ឱ្យ​វិបត្តិ​ដីធ្លី​កាន់​តែ​រាល​ធំ​ឡើង។ អ្នកភូមិ​បាន​ទម្លាក់​កំហុស​បញ្ហា​នេះ លើ​អាជ្ញាធរ​ខេត្ត​ព្រះវិហារ​ថា គ្មាន​សមត្ថភាព​ការពារ​សុវត្ថិភាព​ដីធ្លី​ជូន​ពលរដ្ឋ។

ពលរដ្ឋ​រស់នៅ​ភូមិ​ចំនួន៤ គឺ​ភូមិ​ស្វាយ​ដំណាក់ ភូមិ​រំដេង ភូមិ​ត្រពាំង​ទន្ទឹម និង​ភូមិ​អូរ​ទ្រ​លោក ឃុំ​រមទម ស្រុក​រវៀង កំពុង​ជជែក​ពិភាក្សា​គ្នា​ស្វែង​រក​ដំណោះស្រាយ​វិវាទ​ដីធ្លី ក្នុង​ករណី​ក្រុមហ៊ុន ស៊ិន សាន (Xinshan) បន្ត​ហ៊ុមព័ទ្ធ និង​បោះ​របង​រំលោភ​យក​ដីស្រែ​ចម្ការ​របស់​អ្នកភូមិ ១០០ហិកតារ​ទៀត​ដើម្បី​ពង្រីក​អាជីវកម្ម​រ៉ែ​មាស​នៅ​តំបន់​ភ្នំ​លុង​នៅ​រយៈ​ពេល​ជាង ១សប្តាហ៍​ចុង​ក្រោយ​នេះ។

អ្នកភូមិ​អះអាង​ថា នៅ​មាន​ក្រុមហ៊ុន​ពីរ​ទៀត ពាក់ព័ន្ធ​រំលោភ​យក​ដី​ពលរដ្ឋ គឺ​ក្រុមហ៊ុន ឌែលខម ខេមបូឌា (Delcom Cambodia) និង​ក្រុមហ៊ុន គីម ជាធួន គ្រុប (Kim Gia Thuan Group Co., Ltd.)

តំណាង​ពលរដ្ឋ​នៅ​ឃុំ​រមទម លោក ទុយ ឆេង ប្រាប់​វិទ្យុ​អាស៊ី​សេរី នៅ​ថ្ងៃ​ទី៤ មករា​ថា ក្រុមហ៊ុន​ស៊ិនសាន បាន​ហ៊ុមព័ទ្ធ​របង​បំពាន​ដី​ស្រែ​ចម្ការ​របស់​អ្នក​ភូមិ ២០គ្រួសារ​ទៀត ឋិត​រស់​នៅ​ភូមិ​ត្រពាំង​ទន្ទឹម​ហើយ​មក​ទល់​ពេល​នេះ​ក្រុម​ពលរដ្ឋ​បាន​ពឹង​អាជ្ញាធរ​ខេត្ត​ព្រះវិហារ ឱ្យ​ជួយ​ដោះស្រាយ តែ​គ្មាន​បាន​ផល​ទេ។

លោក​បន្ត​ថា បច្ចុប្បន្ន​ក្រុមហ៊ុន​បាន​ប្រើ​កម្លាំង​យោធា​ជា​ច្រើន​នាក់ កាង​ការពារ មិន​ឱ្យ​ពលរដ្ឋ​ចូល​ទៅ​អាស្រ័យផល​លើ​ដី​ស្រែ​ចម្ការ​របស់​ខ្លួន។ រីឯ​ក្រុមហ៊ុន​ឌែលខម ខេមបូឌា (Delcom Cambodia) និង​ក្រុមហ៊ុន ស៊ិន សាន បាន​ពុះ​ចែក​តំបន់​ភ្នំ​លុង​ម្ខាង​ម្នាក់ ដើម្បី​ធ្វើ​អាជីវកម្ម​រ៉ែ​មាស ទ្រង់ទ្រាយ​ធំ​ប៉ះពាល់​ដី​ស្រែ​អ្នកភូមិ​កើន​ឡើង​សរុប ២៣០គ្រួសារ​ហើយ​មក​ទល់​ពេល​នេះ៖ «ទៅ​ធ្វើ​ដី​ចម្ការ​ ប៉ូលិស​ទាហាន​ខិត​ មិន​ឱ្យ​ធ្វើ​ទេ ទល់​មក​ដល់​ថ្ងៃ​នេះ បើ​គេ​គេ​ឈូស​បាន​មួយ​សេរី។ ទៅ​ស្រុក និង​ខេត្ត​ក៏​គេ​មិន​ឃើញ​ដោះ​ស្រាយ​ដែរ»

តំណាង​ពលរដ្ឋ​រូប​នេះ​បន្ថែម​ថា អ្នកភូមិ​អស់​សង្ឃឹម​ចំពោះ​ទង្វើ​របស់​អាជ្ញាធរ​ខេត្ត​ព្រះវិហារ ដែល​ព្រងើយ​កន្តើយ​មិន​ដោះ​ស្រាយ​បញ្ហា​ប្រឈម​របស់​ពលរដ្ឋ ក្នុង​រឿង​ជម្លោះ​ដីធ្លី​នេះ ខណៈ​ដែល​សំណុំ​រឿង​ចាស់ៗ មិន​ទាន់​ដោះ​ស្រាយ​រួច​ផង​ស្រាប់តែ​ក្រុមហ៊ុន​បាន​បន្ត​រំលោភ​បំពាន​ម្ដង​ហើយ​ម្ដង​ទៀត។

លោក​បន្ថែម​ថា ពលរដ្ឋ​ជាង ១០០គ្រួសារ​រស់​នៅ​ភូមិ​អូរ​ទ្រ​លោក​កំពុង​ដេក​យំ ព្រោះ​បាត់បង់​ដី​ស្រែ​ចម្ការ​ដោយសារ​ក្រុមហ៊ុន គីម ជាធួន គ្រុប (Kim Gia Thuan Group Co., Ltd) ប្រើ​គ្រឿង​ចក្រ​ឈូស​ឆាយ រំលោភ​យក ដើម្បី​ពង្រីក​ផ្ទៃ​ដី​ធ្វើ​អាជីវកម្ម​ចម្រាញ់​រ៉ែ​មាស។

វិទ្យុ​អាស៊ី​សេរី​មិន​ទាន់​អាច​ទាក់ទង​សុំ​ការ​បំភ្លឺ​រឿង​នេះ ពី​តំណាង​ក្រុមហ៊ុន ឌែលខម ខេមបូឌា (Delcom Cambodia) លោក សរ សេរីវិចិត្រ បាន​នៅ​ឡើយ​ទេ នៅ​ថ្ងៃ​ទី៤ មករា ដោយ​ទូរស័ព្ទ​ហៅ​ចូល​ច្រើន​ដង តែ​គ្មាន​អ្នក​លើក។ ចំណែក​តំណាង​ក្រុមហ៊ុន គីម ជាធួន គ្រុប (Kim Gia Thuan Group Co., Ltd.) និង​ក្រុមហ៊ុន ហ៊ិន ស៊ិនសាន ក៏​អាស៊ី​សេរី​មិន​ទាន់​អាច​ទាក់ទង​បាន​ដែរ។

ពលរដ្ឋ​មាន​ជម្លោះដីធ្លី​ម្នាក់ទៀត​រស់នៅ​ភូមិ​រំដេង លោកស្រី យឹម ផាត ត្អូញ​ថា នៅ​គ្រា​ដែល​ក្រុមហ៊ុន ស៊ិន សាន ហ៊ុមព័ទ្ធ​របង​រំលោភ​យក​ដី​ស្រែ​ចម្ការ​អ្នក​ភូមិ មាន​កម្លាំង​យោធា​រាប់​សិប​នាក់ ហាម​ពលរដ្ឋ​មិន​ឱ្យ​ចូល​ទៅ អាស្រ័យផល​លើ​ដី​ចម្ការ​របស់​ខ្លួន​នោះ​ទេ​ជា​ច្រើន​ថ្ងៃ​មក​ហើយ។ លោកស្រី​ប្រាប់​ថា គ្រួសារ​លោកស្រី មាន​ដី ១៨ហិកតារ ត្រូវ​ក្រុមហ៊ុន​រំលោភ​យក​ទាំង​ស្រុង ហើយ​បច្ចុប្បន្ន​អ្នកស្រី​មិន​អាច​ចូល​ទៅ​ដីចម្ការ​បង្ក​បង្កើន​ផល​របស់​ខ្លួន​បាន​នោះ​ទេ។ លោកស្រី​បារម្ភ​ថា អ្នកភូមិ​រាប់​រយ​គ្រួសារ​នឹង​ប្រឈម​ជីវភាព​លំបាក​ខ្លាំង​ដោយ​គ្មាន​ដី​ដាំដុះ ប្រសិនបើ​រដ្ឋាភិបាល​មិន​រក​យុត្តិធម៌​ជូន​ពលរដ្ឋ​នោះ​ទេ៖ «អា​ចាស់​មិន​ទាន់​ដោះស្រាយ​ចេញ ​គេ​យក​អា​ថ្មី​ទៀត គេ​មិន​នឹក​ឃើញ​ ទុក្ខ​លំបាក​ពលរដ្ឋ ​គេ​មិន​នឹក​ឃើញ។ គេ​ធ្វើ​បាប​ពលរដ្ឋ​ឱ្យ​ស្លាប់​បណ្ដោយ កុំ​ឱ្យ​ងើប​មុខ​តវ៉ា មិន​បាច់​ងាប់​ទៅ​ណា ក៏​គេ​មិន​យក​ចិត្ត​ទុក​ដាក់។ ដើរ​បាន​តែ​ត្រឹម​អស់​លុយ ប្លង់​រឹង​ខ្លះ និង​ប្លង់​ទន់​ខ្លះ ហើយ​ឥឡូវ​វាយ​ស្រឡះ បោះ​របង​ដល់​ភ្នំ​ហើយ»

វិទ្យុ​អាស៊ី​សេរី​មិន​ទាន់​អាច សុំ​ការ​បំភ្លឺ​រឿង​នេះ ពី​អភិបាលខេត្ត​ព្រះវិហារ លោក ប្រាក់ សុវណ្ណ និង​អ្នក​នាំ​ពាក្យ​ក្រសួង​រ៉ែ លោក យស មុនីរ៉ាត់ បាន​នៅ​ឡើយ​ទេ នៅ​ថ្ងៃ​ដដែល​នេះ។

រីឯ​អភិបាល​ស្រុក​រវៀង លោក ហោ ប៊ុនហ៊ួ ក៏​មិន​អាច​ទាក់ទង​បាន​ដែរ នៅ​ថ្ងៃ​ដដែល​នេះ។

ប៉ុន្តែ​មេឃុំ​រមទម លោក សោម មុត បដិសេធ​មិន​បំភ្លឺ​រឿង​នេះ​ទេ ដោយ​លោក​បញ្ជាក់​យ៉ាង​ខ្លី​ថា លោក​មិន​ទទួល​ព័ត៌មាន​នេះ។

ចំណែក​ឯ​មន្ត្រី​រាជការ​ម្នាក់​ថ្លែង​សុំ​មិន​បញ្ចេញ​ឈ្មោះ​បាន​ផ្ញើ​សារ​មក​វិទ្យុ​អាស៊ី​សេរី​ថា ក្រុមហ៊ុន ឌែលខម ខេមបូឌា បាន​ផុត​អាជ្ញាប័ណ្ណ​ធ្វើ​អាជីវកម្ម រ៉ែ​មាស​ហើយ ហើយ​ឥឡូវ​កំពុង​ស្នើសុំ​អាជ្ញាប័ណ្ណ​បន្ត ដោយ​ធ្វើការ​សិក្សា​ហេតុ​ប៉ះពាល់​បរិស្ថាន។ លើស​ពី​នេះ​ទៀត កន្លង​ទៅ​ក្រុមហ៊ុន និង​អាជ្ញាធរ បាន​ធ្វើការ​ប្រជុំ​ជាមួយ​ពលរដ្ឋ ប៉ុន្តែ​ការ​ប្រជុំ​នោះ​ទៀត​សោត គឺ​ធ្វើ​ឡើង​ជាមួយ​ពលរដ្ឋ​រស់​នៅ​ក្នុង​តំបន់​ផ្សេង មិន​មែន​ប្រជុំ​ជា​មួយ​ពលរដ្ឋ​ក្នុង​តំបន់​ដែល​រង​ផល​ប៉ះពាល់​នោះ​ទេ។

ជុំវិញ​រឿង​នេះ​អ្នក​នាំ​ពាក្យ​សមាគម​អាដហុក (Adhoc) លោក ស៊ឹង សែនករុណា សង្កេត​ឃើញ​ថា ពលរដ្ឋ​ជាច្រើន​គ្រួសារ បាន​ដាក់​ពាក្យ​ប្តឹង​ឱ្យ​អាជ្ញាធរ​ដោះ​ស្រាយ​ជា​ច្រើន​លើក ប៉ុន្តែ​មិន​ទទួល​បាន​ដំណោះស្រាយ​ជាច្រើន​ឆ្នាំ​មក​ហើយ ផ្ទុយ​ទៅ​វិញ​ការ​រំលោភ​ដីធ្លី​ពលរដ្ឋ​នៅតែ​បន្ត​កើន​ឡើង​ឥត​ឈប់​ឈរ​ធ្វើ​ឱ្យ​វិបត្តិ​ដីធ្លី​កាន់​តែ​រីក​ធំ​ឡើង​ពី​មួយ​ឆ្នាំ​ទៅ​មួយ​ឆ្នាំ។ ប្រការ​នេះ លោក​វាយ​តម្លៃ​ថា ស្ថាប័ន​ពាក់ព័ន្ធ​នៅ​ខេត្ត​ព្រះវិហារ​ខ្វះ​ការ​ទទួល​ខុស​ត្រូវ ក្នុង​ការ​រក​ដំណោះស្រាយ​វិវាទ​ដីធ្លី​ជូន​ពលរដ្ឋ ធ្វើ​ឱ្យ​ពលរដ្ឋ​ខាត​បង់​ពេល​វេលា និង​ធនធាន​ស្វែង​រក​យុត្តិធម៌​តាម​ស្ថាប័ន​រដ្ឋ៖ «ត្រូវ​ពន្លឿន​ក្នុង​ការ​ដោះស្រាយ​ចៀស​វាង​ អូស​បន្លាយ​ចៀសវាង​មួយ​រឿង​ហើយ ចូល​មួយ​រឿង​ទៀត ​វា​កាន់​តែ​បង្ហាញ​ឱ្យ​សហគមន៍​អន្តរជាតិ​គេ​ពិនិត្យ​ឃើញ​ថា ស្ថាប័ន​ទាំង​អស់​នេះ គឺ​មិន​មាន​ សមត្ថភាព​ដោះស្រាយ និង​អនុវត្ត​តួនាទី​របស់​ខ្លួន ឱ្យ​បាន​ល្អ​ត្រឹមត្រូវ​នោះ​ទេ»

សេចក្ដី​រាយការណ៍​ពី​ប្រជា​សហគមន៍​ឲ្យ​ដឹង​ថា តំបន់​ភ្នំ​លុង​មាន​ផ្ទៃ​ដី ១.២៦២ហិកតារ ដែល​សំបូរ​ដោយ​រ៉ែ​មាស​ក្រោម​នៅ​ដី​ ត្រូវ​បាន​ក្រុមហ៊ុន​ឯកជន​ធំៗ ចំនួន៣ ពុះ​ចែក​គ្នា​ធ្វើអាជីវកម្ម​ដោយ​លាក់លៀម។ រីឯ​ក្រុមហ៊ុន បាន​ជួល​ក្រុម​ទាហាន​គំរាម​កំហែង​អ្នក​ភូមិ និង​រឹតត្បិត​អ្នក​ខាង​ក្រៅ​មិន​ឲ្យ​ចេញ​ចូល​តំបន់​នោះ។

ក្រៅ​ពី​នេះ​ មាន​ក្រុមហ៊ុន​ចិន​ និង​វៀតណាម​ជា​ច្រើន​ទៀត​បាន​ជ្រក​ក្រោម​​ស្លាក​ក្រុម​ហ៊ុនទាំងនេះ និង​ជួល​អ្នក​មាន​អំណាច​កាង​អាជីវកម្ម​ឲ្យ​ខ្លួន​ដែរ។ ទន្ទឹម​នឹង​នេះ​ តំបន់​នោះ​មាន​ទាហាន​នៅ​ឈរ​ចាំ​ផ្លូវ ដើម្បី​ហាម​ឃាត់​ពលរដ្ឋ​ ឬ​អ្នក​សារព័ត៌មាន​ មិន​ឲ្យ​ចូល​ទៅ​ទី​នោះ។

មន្ត្រី​សម្រប​សម្រួល​សមាគម​អាដហុក ខេត្ត​ព្រះវិហារ លោក ឡោ ចាន់ សង្ស័យ​ថា អាជ្ញាធរ​ខេត្ត​ព្រះវិហារ មាន​ជាប់​ពាក់ព័ន្ធ​ការ​ឃុបឃិត​គ្នា​ជា​ប្រព័ន្ធ រំលោភ​យក​ដី​ពលរដ្ឋ បាន​ជា​មិន​អើពើ​ដោះស្រាយ​បញ្ហា​នេះ៖ «ឃើញ​ភាព​ជាក់​ស្ដែង​ក្រុមហ៊ុន​មួយ​ចំនួន​នៅ​ខេត្ត​ព្រះវិហារ​នេះ​ បាន​យក​កង​កម្លាំង​យក​ទៅ​ធ្វើ​ផល​ប្រយោជន៍​ផ្ទាល់​ខ្លួន ​ចំណែក​កង​កម្លាំង​ក៏​អ៊ីចឹង​ដែរ​ ដើម្បី​ផល​ប្រយោជន៍​ផ្ទាល់ខ្លួន​បាន​បម្រើ​ក្រុមហ៊ុន​មួយ​ចំនួន​ ដូច្នេះ ​បើ​យើង​និយាយ​គោលការណ៍​ច្បាប់ វា​ខុស​ហើយ​បង​ ពី​ព្រោះ​កង​កម្លាំង​របស់​រដ្ឋ ស៊ី​ប្រាក់​ខែ​ពី​ពលរដ្ឋ»

មន្ត្រី​សង្គម​ស៊ីវិល​រូប​នេះ​បន្ថែម​ថា ពលរដ្ឋ​មាន​ជម្លោះ​ដីធ្លី​ជាមួយ​ក្រុមហ៊ុន​រ៉ែ​មាស ភ័យ​ខ្លាច​ពី​សុវត្ថិភាព ​នៅ​គ្រា​ដែល​មន្ត្រី​យោធា​មួយ​ចំនួន ដែល​យាម​ការពារ​ឲ្យ​ក្រុមហ៊ុន​តែង​គំរាម​កំហែង​ពួក​គាត់។ លោក​ថា អ្នក​ភូមិ​រាយការណ៍​ប្រាប់​ថា មន្ត្រី​យោធា​ទាំង​នោះ​ជា​កូន​ចៅ​របស់ លោក ហ៊ីង ប៊ុនហៀង មេ​បញ្ជាការ​រង​កង​អង្គរក្ស​លោក ហ៊ុន សែន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ពលរដ្ឋ​ខ្មែរ​អាមេរិក​កាំង​ម្នាក់​​យក​ស្បែក​ជើង​គប់​លោក ​ហ៊ុន សែន​ ក្នុង​ពេល​ជួប​អ្នក​គាំទ្រ​នៅ​សហរដ្ឋអាមេរិក
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល