ក្រុមសមត្ថកិច្ចខេត្តកោះកុងបានបណ្ដេញក្រុមគ្រួសារ និងពលរដ្ឋមានទំនាស់ដីធ្លី ចេញពីទីតាំងនៅក្បែរតុលាការ ខណៈពួកគាត់បានប្រមូលផ្ដុំគ្នាទាមទារឱ្យដោះលែងអ្នកតំណាងទាំង៩នាក់។ មន្ត្រីសង្គមស៊ីវិល ចាត់ទុកវិធានការរបស់ក្រុមសមត្ថកិច្ច ថា ជាការធ្វើទារុណកម្មផ្លូវចិត្តពលរដ្ឋ។
ក្រុមពលរដ្ឋមានទំនាស់ដីធ្លីជាង៣០នាក់ ក្នុងនោះ មានទាំងប្រពន្ធនិងប្ដី រួមទាំងកូនតូចៗ របស់សកម្មជនដីធ្លីនៅខេត្តកោះកុង ទើបជាប់ឃុំទាំង៩នាក់ បានប្រមូលផ្ដុំគ្នានៅក្បែររោងមួយក្នុងទីលានបាល់ទាត់ ដែលមានចម្ងាយប្រហែល១០០ម៉ែត្រ ពីតុលាការខេត្តកោះកុង ដើម្បីតវ៉ាឱ្យតុលាការទម្លាក់ការចោទប្រកាន់ និងដោះលែងអ្នកទាំង ៩នាក់នោះវិញ។
លោក សួស ថែត អាយុ៤២ឆ្នាំ ប្រាប់អាស៊ីសេរីនៅថ្ងៃទី២ កក្កដា ទាំងអួលដើមកថា លោកពុំបានសម្រាកអស់ពេញមួយយប់ ដោយសារនៅអង្គុយចាំបក់មូសឱ្យកូនទាំងបីនាក់ដេក ក្នុងនោះមានកូនភ្លោះប្រុសស្រីអាយុទើប៣ឆ្នាំ នៅក្បែរសំយាបផ្ទះគេ បន្ទាប់ពីត្រូវបានក្រុមសមត្ថកិច្ចបណ្ដេញពួកលោកមិនឱ្យបោះតង់សម្រាកនៅក្បែរតុលាការ កាលពីម៉ោងជាង៩យប់ថ្ងៃទី២ កក្កដា។ លោក សួស ថែត បាននាំកូនតូចៗទាំង៣នាក់ មកជួបមុខប្រពន្ធ គឺលោកស្រី យឿ ស្រីម៉ៅ ជាអ្នកតំណាងម្នាក់ក្នុងចំណោមទាំង៩នាក់ ដែលត្រូវបានតុលាការខេត្តកោះកុងចោទប្រកាន់ និងឃុំខ្លួននៅពន្ធនាគារ។
លោក សួស ថែត៖ «កូនៗសម្រាកបានខ្លះ ដោយសារវាយំរកម៉ែវា។ ពេលវាភ្ញាក់មក វាយំ អ៊ីចឹង!យើងលួងៗវា ឱ្យវាដេក។ ប៉ុន្តែ វាដេកបានតិចណាស់ ដោយសារវាយំរកម៉ែវាពេក។ យើងអង្គុយបក់ឱ្យកូនដេក ខ្លាចមូសខាំ»។
ចំណែកលោកស្រី ប៊ិច ឆែត ប្រពន្ធលោក ហេង ជ័យ ដែលត្រូវបានតុលាការចោទប្រកាន់ និងឃុំខ្លួននៅពន្ធនាគារដែរនោះ លើកឡើងថា ក្រុមសាច់ញាតិនិងពលរដ្ឋទាំងជាង៣០នាក់ បានចេញទៅសុំសំយាបផ្ទះគេស្នាក់នៅ បន្ទាប់ពីក្រុមសមត្ថកិច្ច២០ទៅ៣០នាក់ ជិះរថយន្តចំនួន៣គ្រឿង រួមទាំងអភិបាលរងខេត្តកោះកុងម្នាក់ផង បានចុះគំរាមកំហែងចាប់អ្នកផ្សេងទៀត ដាក់ពន្ធនាគារ ប្រសិនបើក្រុមលោកស្រី មិនបំបែកការប្រមូលផ្ដុំគ្នានៅក្បែរតុលាការ។ លោកស្រី អំពាវនាវឱ្យតុលាការដោះលែងប្ដីឱ្យមានសេរីភាពវិញ ខណៈលោកស្រីចេញមកតវ៉ានៅពេលនេះ គឺទុកកូនតូចៗចំនួន២នាក់ នៅជាមួយយាយ ហើយម្នាក់កំពុងកើតមានជំងឺផ្លូវដង្ហើម។
លោកស្រី ប៊ិច ឆែត៖ «អត់មានតម្រុយអីមួយថា ដោះលែងទេ ហើយណាមួយ ខ្ញុំរកមេធាវីអត់បានទៀត។ ខ្ញុំមិនដឹងទាក់ទងទៅខាងណា»។
កាលពីថ្ងៃទី៣០ មិថុនា តុលាការខេត្តកោះកុង សម្រេចឃុំខ្លួនតំណាងពលរដ្ឋមានទំនាស់ដីធ្លីចំនួន៩នាក់នៅពន្ធនាគារខេត្ត ក្នុងនោះមានទាំងលោកស្រី ផាវ ញើង ដែលទើបចេញពីមន្ទីរពេទ្យវះកាត់ជំងឺប្រចាំកាយបានបីថ្ងៃ រួមទាំងកូនប្រុសលោកស្រី ដែលមានអាយុទើប១ ខួប ៣ខែ។ តុលាការបានចោទប្រកាន់ពួកគាត់ ពីបទញុះញង់នាំឱ្យប្រព្រឹត្តិបទឧក្រិដ្ឋជាអាទិ៍ ដែលអាចប្រឈមជាប់ពន្ធនាគារពី៦ ខែទៅ ២ឆ្នាំ និងពិន័យជាប្រាក់ពី ១លានរៀល ទៅ៤លានរៀល។
ការចោទប្រកាន់នេះ បន្ទាប់ពីក្រុមពលរដ្ឋទាំង៩នាក់ រួមទាំងសមាជិកមួយចំនួនទៀត បាននាំគ្នាជិះរថយន្តយកញត្តិមកដាក់នៅក្រសួងយុត្តិធម៌នៅរាជធានីភ្នំពេញ ប៉ុន្តែ ត្រូវបានក្រុមសមត្ថកិច្ចរារាំង និងឃាត់ខ្លួននៅតាមផ្លូវកាលពីថ្ងៃទី២៩ មិថុនា ហើយបានបញ្ជូនពួកគាត់ទៅតុលាការ។ ពួកគាត់ព្យាយាមយកញត្តិទៅដាក់នៅក្រសួងយុត្តិធម៌ ដើម្បីទាមទារឱ្យតុលាការទម្លាក់ការចោទប្រកាន់លើសមាជិកពួកគាត់ចំនួន ៣០នាក់ ដែលរងការចោទប្រកាន់ពាក់ព័ន្ធនឹងការចេញតវ៉ាស្វែងរកដំណោះស្រាយរឿងដីធ្លី។
ជុំវិញការបណ្ដេញពលរដ្ឋ និងក្រុមគ្រួសារមិនឱ្យប្រមូលផ្ដុំនៅក្បែរតុលាការនេះ វិទ្យុអាស៊ីសេរី មិនអាចសុំការបកស្រាយពីស្នងការនគរបាលខេត្តកោះកុងលោក គង់ មនោ និងអភិបាលរងខេត្តកោះកុងលោក លោក សុខ សុទ្ធី បានទេនៅថ្ងៃទី២ កក្កដា។
អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជា (CCHR) លោក វណ្ណ សុផាត លើកឡើងថា ការបណ្ដេញពលរដ្ឋមិនឱ្យប្រមូលផ្ដុំនៅក្បែរតុលាការ ជាការរំលោភសិទ្ធិបញ្ចេញមតិរបស់ពលរដ្ឋ ហើយការសម្លុត និងគំរាមកំហែង ចាប់ដាក់ពន្ធនាគារ ជាការបំបាក់ស្មារតី និងធ្វើទារុណកម្មផ្លូវចិត្តពលរដ្ឋ។ លោកបន្តថា ពលរដ្ឋទាំងនោះ បានរងភាពអយុត្តិធម៌និងរងគ្រោះផ្ទួនៗ គឺពួកគាត់រងគ្រោះដោយសារបាត់បង់ដីធ្លី និងពុំអាចរកប្រាក់ចំណូលផ្គត់ផ្គង់គ្រួសារហើយ ត្រូវមករងគ្រោះប្រឈមទៅនឹងការសម្លុត គំរាមកំហែង និងការចាប់ចងដាក់ពន្ធនាគារ ពីសមត្ថកិច្ចថែមទៀត។
លោក វណ្ណ សុផាត៖ «អ៊ីចឹង!យើងចង់ស្នើសុំអាជ្ញាធរ(គោរពសិទ្ធពលរដ្ឋ)បើសិនពួកគាត់គ្រាន់តែនៅមុខតុលាការ គាត់មិនទាំងមានប្រើអំពើហិង្សា ឬសកម្មភាពអីទេ គ្រាន់ស្នើសំណូមពរតុលាការលើកលែងការចោទប្រកាន់ អាហ្នឹងវាជាសិទ្ធិរបស់ប្រជាពលរដ្ឋ ដែលចែងនៅក្នុងរដ្ឋធម្មនុញ្ញ»។
ក្រុមសាច់ញាតិរបស់អ្នកជាប់ឃុំទាំង៩ បានព្យាយាមស្នើសុំជួបមុនប្ដី ប្រពន្ធ និងម្ដាយរបស់ពួកគាត់ ដើម្បីសួរសុខទុក្ខ និងផ្ដល់ថ្នាំសង្កូវ ដោយសារពុំបានជួបមុខគ្នាតាំងពីត្រូវសមត្ថកិច្ចឃាត់ខ្លួនកាលពីថ្ងៃទី២៩ មិថុនា ប៉ុន្តែការស្នើសុំនោះ ត្រូវបានមន្ត្រីពន្ធនាគារបដិសេធ។ ក្រុមសាច់ញាតិអះអាងថា ទោះបីសមត្ថកិច្ចមិនឱ្យជួបជុំគ្នានៅក្បែរតុលាការ ពួកគាត់នឹងមិនត្រឡប់ទៅផ្ទះវិញឡើយ ដរាបណា តុលាការមិនដោះលែងអ្នកទាំង៩នាក់ ឱ្យមានសេរីភាពវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។