អ្នកគាំទ្រគណបក្សប្រជាជនកម្ពុជា មានទំនាស់ដីធ្លីជាមួយអ្នកមានទ្រព្យធនចំនួន ១០នាក់ តំណាងឲ្យ ១៥គ្រួសារ នៅស្រុកម៉ាឡៃ ខេត្តបន្ទាយមានជ័យ នៅព្រឹកថ្ងៃទី២០ មករា នាំគ្នាទៅដល់ទីស្នាក់ការសមាគមការពារសិទ្ធិមនុស្សអាដហុក (ADHOC) ដើម្បីឲ្យជួយអន្តរាគមន៍ទៅអាជ្ញាធរពាក់ព័ន្ធ យកដីមកដាំដុះដោះស្រាយជីវភាពគ្រួសារប្រចាំថ្ងៃ។ ការសុំអន្តរាគមន៍នេះ ធ្វើឡើងបន្ទាប់ពីពួកគាត់ត្រូវបានតុលាការ ចេញដីកាកោះហៅជុំវិញរឿងទំនាស់ដីធ្លីនេះ។
ជំទប់ទី២ ឃុំបឹងបេង ស្រុកម៉ាឡៃ មកពីគណបក្សកាន់អំណាច និងជាតំណាងប្រជាពលរដ្ឋ អ្នកស្រី សុំ អូន មានប្រសាសន៍ពីទីស្នាក់ការសមាគមការពារសិទ្ធិមនុស្សអាដហុក ខេត្តបន្ទាយមានជ័យ ថា ដីសម្បទានសង្គមកិច្ចដែលរដ្ឋាភិបាលចែកឲ្យពលរដ្ឋក្រីក្រកាលពីឆ្នាំ២០១១ ក្នុងមួយគ្រួសារ ២ហិកតារ ចំនួន ១៥គ្រួសារនោះ ពួកគាត់បានដាំដុះរយៈពេល ១ឆ្នាំ ស្រាប់តែអ្នកមានទ្រព្យធននៅក្រុងប៉ោយប៉ែត ម្នាក់ឈ្មោះ លោក សយ សុខុម ត្រូវរ៉ូវគ្នាជាមួយអាជ្ញាធរមូលដ្ឋាន ធ្វើប្លង់រំលោភយកដី និងប្ដឹងទៅតុលាការ គំរាមកំហែងពួកគាត់ ធ្វើឲ្យពួកគាត់មិនអាចដាំដុះនៅលើដីបានឡើយ៖ «ដីរបស់ពួកខ្ញុំ បើអត់មានអ្នកជួយទេ ខ្ញុំមិនដឹងទៅពឹងពាក់កន្លែងណា មានតែសំណូមពរទៅថ្នាក់លើឲ្យគាត់ជួយ ព្រោះដីពួកយើងខ្ញុំស្របច្បាប់»។
ប្រជាពលរដ្ឋបានទទួលដីកាកោះហៅពីសាលាដំបូងខេត្តបន្ទាយមានជ័យ ចំនួនបីលើកជាបន្តបន្ទាប់ ហើយដីកាចុងក្រោយឲ្យពួកគាត់ចូលទៅបំភ្លឺនៅតុលាការ នៅថ្ងៃទី២០ ខែមករា ឆ្នាំ២០១៦។
ឆ្លើយតបនឹងការចោទប្រកាន់នេះ លោក សយ សុខុម អះអាងថា ដីនោះជាកម្មសិទ្ធិរបស់លោកមានប័ណ្ណកាន់កាប់ត្រឹមត្រូវ តែប្រជាពលរដ្ឋទាំងនោះ បានទៅកាន់កាប់លើដីរបស់ខ្លួនដោយខុសច្បាប់។ លោកបញ្ជាក់ថា រឿងនេះលោកមិនចង់ប្ដឹងទៅតុលាការនោះទេ ប៉ុន្តែដោយសារប្រជាពលរដ្ឋមិនព្រមចាកចេញពីដី៖ «ខ្ញុំឈប់យោគយល់ឲ្យពួកគាត់ហើយ ព្រោះគាត់នាំគ្នារករឿងខ្ញុំតែរហូតមកអ៊ីចឹង។ ខ្ញុំនិយាយល្អជាមួយពួកគាត់តាំងពីអើយមកម្ល៉េះ តែគាត់គិតថា ខ្ញុំជាមនុស្សមានបុណ្យស័ក្ដិធំដុំអី តាមពិតខ្ញុំជាមនុស្សធម្មតាដូចគេដូចឯងសោះ»។
ផ្ទៃដីដែលមានបញ្ហាចំនួន ៣០ហិកតារ ស្ថិតនៅចំណុចរនាមដូនសំ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ដីនេះមានទំនាស់គ្នាដោះស្រាយមិនចេញជាង ៣ឆ្នាំមកហើយ។
មេឃុំទួលពង្រ លោក ទឹម ម៉ន បញ្ជាក់ថា ដីនេះអាជ្ញាធរស្រុកពិតជាបានបែងចែកទៅឲ្យប្រជាពលរដ្ឋក្រីក្រចំនួន ១៥គ្រួសារប្រាកដមែន ប៉ុន្តែលោកថា ដីនោះមានទំនាស់ដោយសារម្ចាស់ដីគឺជាសាច់ញាតិរបស់ លោក សយ សុខុម ទាមទារយកដីនោះពីប្រជាពលរដ្ឋវិញ៖ «ដីនោះបើទុកជាសម្បត្តិជារួម ម្ចាស់ដើមគេមិនតវ៉ាអីទេ តែដល់ឲ្យទៅជារបស់បុគ្គលផ្ទាល់អ៊ីចឹង ម្ចាស់គេក៏វិញទៅ»។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក ខេត្តបន្ទាយមានជ័យ លោក ស៊ុំ ច័ន្ទគា ស្នើឲ្យអាជ្ញាធរពាក់ព័ន្ធ ធ្វើការស៊ើបអង្កេតរឿងទំនាស់នេះឲ្យបានច្បាស់លាស់ ដើម្បីផ្ដល់យុត្តិធម៌ជូនប្រជាពលរដ្ឋឲ្យបានឆាប់រហ័ស ដើម្បីសម្រួលឲ្យពួកគាត់យកដីនោះទៅដាំដុះដោះស្រាយជីវភាពគ្រួសារប្រចាំថ្ងៃ៖ «ដីនេះប្រជាពលរដ្ឋធ្វើការកាប់ឆ្ការស្អាត បែរទៅជាអ្នកមានលុយមានអំណាច ទៅដណ្ដើមយកពីពួកគាត់ទៅវិញ។ វាជារឿងមិនត្រឹមត្រូវឡើយ»។
ពលរដ្ឋម្នាក់ឈ្មោះ លោក យ៉ាន សឿត ក្នុងចំណោម ១០នាក់ ត្រូវទៅបំភ្លឺនៅតុលាការតាមដីកាកោះហៅនៅព្រឹកថ្ងៃទី២០ មករា ដដែល។ តុលាការបានប្រាប់ពួកគាត់ឲ្យចាកចេញពីដីទំនាស់ ដោយយោងតាមដីការក្សាការពារចុះថ្ងៃទី២៧ ខែកុម្ភៈ ឆ្នាំ២០១៥។ ប្រជាពលរដ្ឋអះអាងថា ពួកគាត់ពុំបានដឹងពីដីការក្សាការពារនោះឡើយ។ ពួកគាត់បានសម្រេចដាក់ពាក្យប្ដឹងទៅតុលាការ ឲ្យផ្អាកដីការក្សាការពារនោះ ដើម្បីដោះស្រាយតាមផ្លូវច្បាប់បន្តទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។