អង្គការលីកាដូចេញសេចក្ដីថ្លែងការណ៍ ព្រួយបារម្ភថា ការផ្ដល់ដីសម្បទានសេដ្ឋកិច្ចថ្មីនាំឲ្យមានជម្លោះ។
អង្គការលីកាដូថា ក្រុមហ៊ុន ធី.អេស.អិម.ដាប់បែលយូ.ឯក ទទួលបានដីសម្បទានសេដ្ឋកិច្ចនេះលើផ្ទៃដីទំហំ៩៧៨៨ហិកតាពីរដ្ឋ។ ក្រុមហ៊ុនបានសាងសង់ផ្លូវទំហំ៥០ម៉ែត្រដើម្បីចូលទៅដីសម្បទានសេដ្ឋកិច្ចនាំឲ្យប៉ះពាល់ដល់ដីស្រែចំការដំណាំកសិកម្មជាច្រើនរបស់ពលរដ្ឋ។ ជាងនេះទៅទៀតពលរដ្ឋរងគ្រោះរស់នៅក្នុងតំបន់មិនទទួលបានព័ត៌មានពីក្រុមហ៊ុនក្នុងការសាងសង់ផ្លូវនោះទេ។ពួកគាត់ប្រមាណ៤០០គ្រួសាររស់នៅក្នុងស្រុកអូរស្វាយសែនជ័យ ស្រុមសៀមប៉ាង និងស្រុកសេសាន ខេត្តស្ទឹងត្រែង។
សេចក្ដីថ្លែងការណ៍ដដែលបន្តថាចាប់ពីថ្ងៃ៩ ខែវិច្ឆិកា ឆ្នាំ២០២២ ដល់ថ្ងៃទី៤ ខែមករា ពលរដ្ឋនៅភូមិអ៊ីប៊ុ ឃុំបុរីអូស្វាយសែនជ័យ ស្រុកអូស្វាយសែនជ័យ បានប្រមូលផ្ដុំគ្នាហាមឃាត់ការសាងសង់ផ្លូវ៥០ម៉ែត្រនោះ៥លើករួចមកហើយ។
នាយិកាទទួលបន្ទុកកិច្ចការក្រៅតំបន់នៃអង្គការលីកាដូអ្នកស្រី ណាលី ពីឡូកស្នើដល់រដ្ឋាភិបាលឲ្យផ្ដល់ព័ត៌មានជុំវិញការផ្ដល់ដីសម្បទានសេដ្ឋកិច្ចថ្មីនេះជូនពលរដ្ឋនិងដោះស្រាយជម្លោះដែលកំពុងមានដោយសន្តិវិធីនិងយុត្តិធម៌។
ពាក់ព័ន្ធករណីនេះអ្នកនាំពាក្យរដ្ឋាភិបាលនៃទីស្ដីការគណៈរដ្ឋមន្ត្រីលោក ផៃ ស៊ីផាន ប្រាប់អាស៊ីសេរីថាអាជ្ញាធរបានដោះស្រាយសម្រាប់ពលរដ្ឋរងគ្រោះប៉ុន្មានដងមកហើយលើកលែងតែអ្នកចំណូលថ្មីនោះទេ។ លោកបន្ថែមថាអ្វីដែលអង្គការសង្គមស៊ីវិលលើកឡើងគ្រាន់តែជាបរិមាណនោះទេមិនយល់អ្វីទៅដែលហៅថាការធ្វើរបាយការណ៍ដោយគុណភាពនោះទេ។
នាយកទទួលបន្ទុកកិច្ចការទូទៅនៃអង្គការលីកាដូលោក អំ សំអាត មានប្រសាសន៍ថា អនុក្រឹត្យស្ដីពីដីសម្បទានសេដ្ឋកិច្ចដែលមានលក្ខខណ្ឌហើយក្នុងនោះប្រជាពលរដ្ឋត្រូវដឹងលក្ខខណ្ឌមួយចំនួនរួមមានការវាយតម្លៃផលប៉ះពាល់បរិស្ថានការពិគ្រោះយោបល់ជាមួយអាជ្ញាធរមូលដ្ឋានឬប្រជាពលរដ្ឋមូលដ្ឋានជាចុងក្រោយត្រូវដោះស្រាយនិងសម្របសម្រួលជាមួយពលរដ្ឋមុននឹងអនុវត្ត។ លោកបន្តថា មកដល់ពេលនេះមានពលរដ្ឋប្រមាណ៤រយគ្រួសារហើយរងគ្រោះដោយសារការធ្វើផ្លូវទំហំ៥០ម៉ែត្រទៅលើដីសម្បទាននោះ។ លោកបន្ថែមថា លោកព្រួយបារម្ភដល់ពលរដ្ឋដែលរងគ្រោះនិងស្នើសុំយ៉ាងទទូចដល់អាជ្ញាធរពាក់ព័ន្ធធ្វើការដោះស្រាយជូនពលរដ្ឋឲ្យពួកគាត់ទទួលយកបាន។
វិទ្យុអាស៊ីសេរីនៅមិនអាចទាក់ទងទៅកាន់អ្នកនាំពាក្យក្រសួងបរិស្ថាន លោក នេត្រ ភក្ត្រាដើម្បីសុំការអត្ថាធិប្បាយបន្ថែមបានទេនៅថ្ងៃទី១៦ខែមករានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។