ដំណើរទស្សនកិច្ចនេះមានគោលបំណងស្វែងយល់ពីបញ្ហាប្រឈមទាក់ទិនដីធ្លី និងដំណោះស្រាយនៅក្នុងខេត្តប៉ែកឦសាន។
មន្ត្រីតំណាងអង្គការសង្គមស៊ីវិលមួយចំនួននៅខេត្តរតនគិរី បានលើកយកបញ្ហាទំនាស់ដីធ្លី បញ្ហាចុះបញ្ជីដីធ្លីសហគមន៍ជនជាតិដើមជាកម្មសិទ្ធិសមូហភាព និងផលប៉ះពាល់ស្ដីពីការកសាងទំនប់វារីអគ្គិសនីសេសានក្រោម២ នៅខេត្តស្ទឹងត្រែង ជម្រាបជូនលោកឯកអគ្គរាជទូតអង់គ្លេស ប្រចាំប្រទេសកម្ពុជា ដើម្បីឲ្យជួយស្វែងរកដំណោះស្រាយ។
លោកឯកអគ្គរាជទូតនៃចក្រភពអង់គ្លេស ម៉ាក ហ្គូតឌីង (MARK GOODING) បានមកបំពេញទស្សនកិច្ចផ្លូវការនៅខេត្តរតនគិរី នៅថ្ងៃអង្គារ ទី១៩ ខែកុម្ភៈ ឆ្នាំ២០១៣ ក្នុងដំណើរទស្សនកិច្ចមកកាន់ខេត្តភាគឦសានចំនួនពីរផ្សេងទៀត មានខេត្តស្ទឹងត្រែង និងខេត្តក្រចេះ ចាប់ពីថ្ងៃទី១៩ ដល់ថ្ងៃទី២១ ខែកុម្ភៈ ឆ្នាំ២០១៣។
អ្នកសម្របសម្រួលអង្គការបណ្ដាញការពារទន្លេបី លោក មាច មៀន មានប្រសាសន៍បញ្ជាក់ថា ដំណើរទស្សនកិច្ចនេះមានសារប្រយោជន៍សម្រាប់ប្រជាពលរដ្ឋអ្នករងផល ប៉ះពាល់តាមដងទន្លេ បណ្ដាលមកពីការកសាងទំនប់វារីអគ្គិសនីជាច្រើនពីប្រទេសខ្សែទឹកខាង លើ និងជាពិសេសគម្រោងសាងសង់ទំនប់វារីអគ្គិសនីសេសានក្រោម២ នៅខេត្តស្ទឹងត្រែង នាពេលឆាប់ៗនេះ។
លោកបន្តថា បទបង្ហាញស្ដីពីផលប៉ះពាល់ទាំងអស់ត្រូវបានផ្តល់ជូនមន្ត្រីស្ថានទូតស្វែងយល់ និងជួយរកដំណោះស្រាយ៖ «ផល ប៉ះពាល់ទំនប់នៅវៀតណាម គឺមិនមានដំណោះស្រាយ មិនមានយន្តការណាបន្ធូរបន្ថយខ្សែទឹកខាងក្រោមទាល់តែសោះ ក្នុងប្រទេសខ្មែរយើងហ្នឹង ហើយចំណុចទី២ ខ្ញុំនិយាយពីពាក់ព័ន្ធផែនការអភិវឌ្ឍន៍ទំនប់សេសានក្រោម២»។
ចំណែកមន្ត្រីជាន់ខ្ពស់ផ្នែកអង្កេតសមាគមអាដហុក (ADHOC) លោក ប៉ែន ប៊ុណ្ណារ៍ មានប្រសាសន៍បញ្ជាក់ថា បញ្ហាទំនាស់ដីធ្លី និងបញ្ហាចុះបញ្ជីដីធ្លីសហគមន៍ជនជាតិដើមភាគតិច ក៏បានលើកជូនមន្ត្រីស្ថានទូតជ្រាប និងជួយស្វែងរកដំណោះស្រាយដូចគ្នា។
លោកបន្តថា ដំណើរទស្សនកិច្ចនេះ គឺជាផ្នែកសំខាន់របស់សហគមន៍អន្តរជាតិ ក្នុងការស្វែងយល់ការពិតកំពុងកើតមាននៅមូលដ្ឋាន៖ «ទាំងអង្គការ សមាគមខ្មែរលើ សមាគមអាដហុក អង្គការអាយស៊ីអេសអូ (ICSO) ហើយសហគមន៍រងគ្រោះផ្ទាល់បង្ហាញពីការព្រួយបារម្ភ។ អ្នកទាំងអស់គ្នាបានសូមឲ្យលោកឯកអគ្គរដ្ឋទូតហ្នឹង ជួយយ៉ាងណាជំរុញឲ្យរាជរដ្ឋាភិបាលជួយដោះស្រាយទំនាស់ដីធ្លីដែលកើត មកយូរហើយ និងជំរុញល្បឿនចុះបញ្ជីដីធ្លីជាសមូហភាព»។
កាលពីថ្ងៃទី១៥ ខែកុម្ភៈ កន្លងទៅនេះ រដ្ឋសភាជាតិបានអនុម័តពង្រាងច្បាប់ស្ដីពីការសាងសង់ទំនប់ វារីអគ្គិសនីសេសានក្រោម២ ខណៈពេលដែលតំណាងប្រជាពលរដ្ឋរស់នៅតាមដងទន្លេសេសាន ទន្លេស្រែពក និងទន្លេសេកុង បានដាក់ញត្តិសុំឲ្យស្ថាប័ននេះបញ្ឈប់គម្រោងសាងសង់ទំនប់នេះវិញ។
ឯកអគ្គរាជទូតអង់គ្លេស លោក ម៉ាក ហ្គូតឌីង មានប្រសាសន៍បញ្ជាក់ថា លោកចាប់អារម្មណ៍ពីបញ្ហាប្រឈមទាក់ទិនបញ្ហាដីធ្លី និងដំណោះស្រាយកន្លងមក។ លោកបន្តថា បំណងរបស់លោកមកកាន់ខេត្តរតនគិរី ក៏ដើម្បីស្វែងយល់ពីឱកាសស្ដីពីការវិនិយោគ បញ្ហាទេសចរណ៍ ការអភិវឌ្ឍជាដើម។
លោក ម៉ាក ហ្គូតឌីង៖ «ជាដំណើរទស្សនកិច្ចលើកដំបូងរបស់គាត់មក ខេត្តរតនគិរី ហើយគាត់មានការចាប់អារម្មណ៍ខ្លាំង។ គាត់ចង់ដឹងពីជីវភាពផ្នែកសេដ្ឋកិច្ច និងជីវភាពរស់នៅរបស់ប្រជាជននៅខេត្តរតនគិរី ព្រោះគាត់បានទៅខេត្តផ្សេងៗដែរក្នុងប្រទេសកម្ពុជា គឺគាត់ចង់ដើរឲ្យបានជុំវិញប្រទេសកម្ពុជា។ គាត់ចង់ណែនាំខ្លួនគាត់ទៅប្រជាជនកម្ពុជា ផងដែរ»។
រាជរដ្ឋាភិបាលអង់គ្លេស បានផ្តល់មូលនិធិជាង ៦លានដុល្លារ ក្នុងវិស័យដោះមីននៅកម្ពុជា ក្នុងនោះថវិកាមួយផ្នែកត្រូវបានផ្តល់សម្រាប់គម្រោងដោះមីននៅ ខេត្តរតនគិរី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។