ពលរដ្ឋមកពីសហគមន៍មានជម្លោះដីធ្លីក្នុងខេត្តកោះកុង និងសាច់ញាតិនាំគ្នាធ្វើយុទ្ធនាការតាមបណ្ដាញសង្គមហ្វេសប៊ុកស្នើឱ្យលោកនាយករដ្ឋមន្ត្រី ហ៊ុន សែន អន្តរាគមន៍ទៅតុលាការដោះលែងសកម្មជនដីធ្លីចំនួន០៩នាក់ ឱ្យមានសេរីភាពវិញ។
ការអំពាវនាវនេះធ្វើឡើងនៅពេលដែលសកម្មជនទាំង ៩នាក់ កំពុងជាប់ពន្ធនាគាររយៈពេលជិតមួយសប្ដាហ៍មកហើយ ដោយត្រូវបានតុលាការក្នុងខេត្តកោះកុង សម្រេចឱ្យពួកគេជាប់ឃុំនៅក្រោមបទចោទដ៏ពេញនិយម គឺបទញុះញង់ ដោយសារតែពួកគេស្វះស្វែងរកដំណោះស្រាយបញ្ហាជម្លោះដីធ្លី។
សំណើរបស់ប្រជាសហគមន៍ និងសាច់ញាតិអ្នកជាប់ឃុំនេះធ្វើឡើងតាមរយៈវីដេអូ ដែលពួកគេផូសនៅលើបណ្ដាញសង្គមហ្វេសប៊ុក ដោយចាប់ផ្ដើមពីថ្ងៃទី៥ ខែកក្កដា។
វីដេអូទាំងនោះបង្ហាញពីក្រុមពលរដ្ឋ និងសាច់ញាតិរួមទាំងក្មេងៗតូចៗផងបានជួបជុំគ្នា លើកបដា ដែលមានរូបថតសកម្មជនទាំង៩នាក់ និងសារដែលមានន័យសេចក្ដីស្នើឱ្យតុលាការខេត្តកោះកុងដោះលែង និងទម្លាក់ចោលរាល់ការចោទប្រកាន់លើពួកគាត់។
យុវជន សុវណ្ណ ជាកូនប្រុសរបស់លោកស្រី ផាវ ញ៉ឺង សកម្មជនដីធ្លីនៅឃុំជីខក្រោម ស្រុកស្រែអំបិលអំពាវដល់លោកនាយករដ្ឋមន្ត្រី ឱ្យលោកអន្តរាគមន៍ជួយដោះលែងម្ដាយមកវិញ ព្រោះគាត់ដឹងច្បាស់ថា ម្ដាយតស៊ូរាល់ថ្ងៃនេះគឺដើម្បីតែដំណោះស្រាយបញ្ហាដីធ្លី។
យុវជន សុវណ្ណ៖ «បើសិនជាបាត់បង់ដីធ្លីហើយ មានក្រុមគ្រួសារ មានអ្នកចាប់ខ្លួនទៀត អ៊ីចឹងក្រុមគ្រួសារ វេទនាមែនទែន នៅក្នុងសហគមន៍ខ្ញុំ។ អ៊ីចឹងខ្ញុំសុំឱ្យសម្ដេច ថ្នាក់ដឹកនាំផ្សេងៗ និងតុលាការខខេត្តកោះកុងដោះលែងម៉ាក់ខ្ញុំ ក៏ដូចជាក្រុមគ្រួសាររបស់ខ្ញុំផ្សេងៗទៀតឱ្យចេញពីពន្ធនាគារ និងទម្លាក់ការចោទប្រកាន់គាត់ឱ្យមានសេរីភាពវិញ ហើយអត់មានលក្ខខណ្ឌអ្វីទាំងអស់ ព្រោះអីគាត់អត់បានសុខទេ។ ខ្ញុំសង្ឃឹមថា សម្ដេចនឹងបានឃើញវីដេអូនេះ នឹងថ្នាក់ដឹកនាំផ្សេងៗនឹងដោះលែងម៉ាក់ខ្ញុំ»។
កាលពីថ្ងៃទី២៩ ខែ មិថុនា អាជ្ញាធរក្នុងខេត្តកោះកុងបានចាប់ខ្លួនសកម្មជនដីធ្លីចំនួនជាង១០ នាក់ នៅពេលរារាំងក្រុមពលរដ្ឋសហគមន៍មិនឱ្យធ្វើដំណើរទៅដាក់ញត្តិនៅភ្នំពេញ។ បន្ទាប់មកតុលាការខេត្តកោះកុងសម្រេចឃុំខ្លួនសកម្មជនដីធ្លី៩នាក់ រួមទាំងកុមារាអាយុ ១ឆ្នាំ ៣ខែម្នាក់ផង នៅពន្ធនាគារ ដោយចោទប្រកាន់ពីបទញុះញង់ឲ្យប្រព្រឹត្តិបទឧក្រិដ្ឋជាអាទិ៍យោងមាត្រា៤៩៤ និង៤៩៥ នៃក្រមព្រហ្មទណ្ឌ។ ក្រុមសកម្មជនដីធ្លីទាំងនេះបានព្យាយាមឡើងទៅដាក់ញត្តិនៅ ស្នើសុំអន្តរាគមន៍ពីរដ្ឋមន្ត្រីក្រសួងយុត្តិធម៌លោក កើត ឫទ្ធិ ឱ្យទម្លាក់ការចោទប្រកាន់លើតំណាងសហគមន៍របស់ពួកគាត់ចំនួន ៣០នាក់។ អ្នកទាំង៩នាក់នោះជាសកម្មជន ដែលតែងចេញមុខការពារប្រយោជន៍ប្រជាសហគមន៍ និងស្វែងរកដំណោះស្រាយដល់សហគមន៍ចំនួន៤ ដែលមានជម្លោះដីធ្លីរ៉ាំរ៉ៃនៅក្នុងខេត្តកោះកុង។
ប្ដីរបស់លោកស្រី យី គន្ធា ដែលកំពុងជាប់ឃុំពន្ធនាគារខេត្តកោះកុង លោក ធី លាង រៀបរាប់ថាប្រពន្ធពុំមានកំហុសដូចការចោទប្រកាន់ទេ។លោកទទូចឱ្យមានការដោះលែងប្រពន្ធ និងសកម្មជនដទៃទៀត។
លោក ធី លាង៖ «សូមឱ្យតុលាការដោះលែងពួកគាត់ ដោយអត់មានលក្ខខណ្ឌអីទាំងអស់ ព្រោះគាត់អត់មានកំហុសអីទេ។ គ្រាន់តែការទៅដាក់ញត្តិរបស់គាត់ហ្នឹង គឺគាត់ធ្វើទៅតាមនីតិវិធីច្បាប់ ដែលកំណត់មកឱ្យព្រោះរឿងដាក់ញត្តិនេះ បើគាត់មានទុក្ខតាមធម្មតា គាត់ត្រូវតែដាក់ញត្តិ ដើម្បីទម្លាក់ការចោទប្រកាន់របស់តុលាការខាងខេត្តកោះកុង»។
វិទ្យុអាស៊ីសេរីនៅមិនអាចទាក់ទងសុំការបំភ្លឺ ពីអ្នកនាំពាក្យសាលាដំបូងខេត្តកោះកុងលោក ស៊ូ សុវណ្ណារ៉ា បានទេ នៅថ្ងៃទី៥ ខែកក្កដា។
ក្រៅពីផ្ញើសារទាមទារឱ្យដោះលែងសកម្មជនទាំង៩នាក់ ដែលជាប់ឃុំ ក្រុមសហគមន៍ និងសាច់ញាតិអ្នកជាប់ឃុំក៏បានរៀបរាប់ពីការលំបាកក្នុងគ្រួសារ និងសហគមន៍របស់ពួកគេក្រោយពេលអ្នកទាំង៩នាក់ជាប់ឃុំ ព្រោះអ្នកជាប់ឃុំទាំងនោះភាគច្រើនជាបង្គោលក្នុងការរកស៊ីចិញ្ចឹមគ្រួសារ និងមើលថែកូនតូចៗក្នុងគ្រួសារ។ ជាមួយគ្នានេះក៏មានអ្នកមានជំងឺប្រចាំកាយ ដែលត្រូវការថ្នាំព្យាបាលជារៀងរាល់ថ្ងៃថែមទៀតផង។
យុវជន វាសនា លើកឡើងទាំងរលីងរលោងទឹកភ្នែកនឹងអាណិតម្ដាយគឺលោកស្រី ផាវ ញ៉ឺង ដែលទើបតែចេញពីមន្ទីរពេទ្យបានមួយអាទិត្យនៅក្រោយការវះកាត់ ហើយថែមទាំងមានកូនតូចអាយុជាងមួយខួបនៅជាមួយផង។
យុវជន វាសនា៖ «ពួកយើងត្រូវការតែមួយរស់ទេរាល់ថ្ងៃនេះ ប៉ុន្តែបែរជាអត់បានរស់ស្រួលហើយបែរជានៅជាប់ពន្ធនាគារយ៉ាងលំបាកទៀត។ ជាក់ស្ដែងដូចម៉ាក់ខ្ញុំអីជាប់ពន្ធនាគារហើយ ឥឡូវមានអាប្អូនតូចខ្ញុំអាយុមួយខួបជាងនៅជាមួយទៀត គឺវេទនាណាស់ ហើយម៉ាក់ខ្ញុំមានជំងឺទៀតទើបតែវះកាត់បានប្រហែលមួយអាទិត្យទេ ហើយចូលក្នុងពន្ធនាគារ។ ពន្ធនាគារមិនមែនស្រួលទេ មានកូនតូចទៀត សួរថា តើឱ្យគាត់រស់នៅរបៀបណា ឱ្យពួកខ្ញុំនៅខាងក្រៅរស់នៅរបៀបណា?»។
ទាក់ទងនឹងបញ្ហាដីធ្លីនៅក្នុងខេត្តកោះកុងនេះ ពលរដ្ឋរាប់ពាន់គ្រួសារបានបាត់បង់ដីធ្លី ដោយសារការផ្ដល់ដីសម្បទានសេដ្ឋកិច្ចរបស់រដ្ឋាភិបាល ទៅឱ្យឧកញ៉ា និងអ្នកមានអំណាច ក្នុងនោះ មានលោក លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា និងជាប្រធានសមាគមឧកញ៉ា ព្រមទាំងលោក ហេង ហ៊ុយ មន្ត្រីជាន់ខ្ពស់ក្រសួងមហាផ្ទៃ។ ពលរដ្ឋដែលមានទំនាស់ដីធ្លីជាមួយអ្នកមានអំណាចទាំងនេះ បានចេញតវ៉ា និងដើរដាក់ញត្តិរាប់មិនអស់ជាច្រើនឆ្នាំមកហើយ ប៉ុន្តែពួកគាត់មិនត្រឹមតែមិនបានដំណោះស្រាយទេប៉ុណ្ណោះទេ តែថែមទាំងធ្វើឱ្យពួកគេកាន់តែធ្លាក់ខ្លួនក្រីក្រ អ្នកខ្លះធ្លាក់ខ្លួនឈឺ និងអ្នកខ្លះទៀត ជាប់បណ្ដឹងនៅតុលាការទៀតផង។ លើសពីនេះ កាលពីខែមីនា បុរសពិការជើងម្ខាងម្នាក់បានស្លាប់ អំឡុងពេលតវ៉ាសុំដំណោះស្រាយនៅសាលាខេត្តកោះកុង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។