ជនជាតិដើមភាគតិចកួយ នៅស្រុកជ័យសែន ខេត្តព្រះវិហារ ថា កងកម្លាំងទាហាន ប្រដាប់ដោយកាំភ្លើង នៅខេត្តព្រះវិហារ បានបម្រើផលប្រយោជន៍ឱ្យក្រុមហ៊ុនចិន ឈ្មោះ ហេង ហ្វូ (Hengfu Group Sugar Industry) ដើរគំរាមបាញ់ ពលរដ្ឋមិនឱ្យប្រមូលផលស្រូវនៅលើដីដែលកំពុងអាស្រ័យផល។ ទាហានទាំងនោះចោទពលរដ្ឋថា អាស្រ័យផលលើដីក្រុមហ៊ុនដោយខុសច្បាប់ហើយបង្ខំឱ្យពួកគាត់ធ្វើកិច្ចសន្យាឈប់អាស្រ័យផលលើដីនោះបន្តទៀត។
រដូវកាលប្រមូលផលស្រូវរបស់អ្នកភូមិជនជាតិដើមភាគតិចកួយ រស់នៅឃុំតស៊ូ ស្រុកជ័យសែន នៅឆ្នាំនេះ គឺពុំសូវប្រព្រឹត្តទៅរលូននោះទេ ព្រោះមានបញ្ហារកាំរកូស ជាមួយ តំណាងក្រុមហ៊ុនចិន ម្នាក់ឈ្មោះ ឈៀង គង់នៅ។ ថ្មីៗនេះ លោក ឈៀង គង់នៅ បានប្រើប្រាស់កម្លាំងទាហាន ប្រដាប់ដោយកាំភ្លើង ដើរគំរាមពលរដ្ឋ មិនឱ្យប្រមូលផលស្រូវ នៅលើដីកំពុងអាស្រ័យផល ហើយគំរាមដកហូត វត្ថុមាន តម្លៃ របស់ពួកគាត់ថែមទៀតផង។
ជនជាតិដើមភាគតិចកួយរស់នៅភូមិសំរោង ឃុំតស៊ូ ស្រុកជ័យសែន លោកស្រី ហួត ម៉ាលី ប្រាប់ វិទ្យុអាស៊ីសេរី នៅថ្ងៃទី២៣ ខែតុលា ថា នៅថ្ងៃទី២២ ខែតុលា មានកងកម្លាំង ទាហានចំនួន២នាក់ ប្រដាប់ដោយកាំភ្លើង បានមកគំរាមប្ដីលោកស្រី និងអ្នកភូមិ ២គ្រួសារទៀត មិនឱ្យប្រមូលផលស្រូវ ដែលពួកគាត់កំពុងអាស្រ័យផល។ ទាហានក៏បានគំរាម ដកហូតម៉ាស៊ីនច្រូតស្រូវ របស់អ្នកភូមិ យកទៅទុកនៅកសិដ្ឋានរបស់ក្រុមហ៊ុនប្រសិនបើពួកគាត់ មិនព្រមធ្វើកិច្ចសន្យាបញ្ឈប់ការស្រ័យផលលើដីនេះទៀត នៅឆ្នាំក្រោយ។
ទោះជាយ៉ាងណា លោកស្រី ហួត ម៉ាលី ឱ្យដឹងថា ដីទាំងនេះ គឺជាកម្មសិទ្ធិរបស់ពលរដ្ឋ ដែលបានអាស្រ័យផលជាយូរមកហើយ។ លោកស្រីបន្តថា មកដល់បច្ចុប្បន្ន មានពលរដ្ឋ ជាង៤០គ្រួសារ បានអាស្រ័យផលលើដីនេះវិញ ក្រោយពីក្រុមហ៊ុនស្ករអំពៅចិន ហេង ហ្វូ បានក្ស័យធន ជាច្រើនឆ្នាំមកហើយ។
លោកស្រី ហួត ម៉ាលី៖«គំរាមនឹងហើយ ទាហានទាំងពីរនាក់ គាត់កាន់កាំភ្លើងទាំងពីរនាក់ ហើយ គាត់ទៅប្រាប់ថាប្រសិនបើអត់បង់លុយ គាត់នឹងចាប់ម៉ាស៊ីន ហើយ ប្រសិនជាផ្ដិតមេដៃ ប្រគល់ដីឱ្យគេទៅ គេក៏អត់ឱ្យបង់លុយដែរ។ គេថាប្រសិនបើនៅតែរឹងរូស មេដៃក៏ ផ្ដិត លុយក៏មិនបង់ គេក៏មិនឱ្យម៉ាស៊ីនច្រូតទៅវិញដែរ។ ខ្ញុំសូមស្នើឱ្យរដ្ឋាភិបាលឱ្យគាត់ ចេញប័ណ្ណកម្មសិទ្ធិដីធ្លីឱ្យប្រជាពលរដ្ឋដែលគាត់បានបាត់បង់ដី ឱ្យគាត់បាន បានសុខសាន្ត។ រាល់ថ្ងៃពួកគាត់ធ្វើទាំងជួបហានិភ័យ គាត់ធ្វើទាំងការព្រួយបារម្ភ គាត់ប្រឈមរហូត ហើយអ្នកដែលទន់ខ្សោយ ធ្វើអត់ចំណេញទេ»។
វិទ្យុអាស៊ីសេរីពុំអាចទាក់ទងអភិបាលខេត្ត ព្រះវិហារ គឹម រិទ្ធី និងអភិបាលរងខេត្ត លោក យឹម បញ្ញា ដើម្បីឆ្លើយតបជុំវិញ រឿងនេះ បានទេនៅថ្ងៃទី២៣ ខែតុលា ដោយហៅទូរស័ព្ទចូល តែគ្មានអ្នកទទួល។ រីឯតំណាងក្រុមហ៊ុន លោក ឈៀង គង់នៅ ក៏មិនអាចទាក់ទងបាននៅថ្ងៃដដែលនេះ។
ទោះជាយ៉ាងណា អភិបាលស្រុកជ័យសែន លោក យក់ សំភឿង បានប្រាប់វិទ្យុអាស៊ីសេរី នៅថ្ងៃដដែលនេះយ៉ាងខ្លីថា ករណីទាហានទៅគំរាមកំហែងពលរដ្ឋមិនឱ្យ ប្រមូលផលស្រូវនេះ លោកបានបញ្ជាឱ្យអាជ្ញាធរឃុំចុះពិនិត្យហើយថាតើ រឿងនេះពិត ឬក៏អត់។ លោកមិនទាន់ដឹងថា នឹងដោះស្រាយបែបណានៅឡើយ ដោយ នៅចាំប្រមូលព័ត៌មានគ្រប់ជ្រុងជ្រោយជាមុនសិន។
លោក យក់ សំភឿង៖«ខ្ញុំបានឱ្យមេឃុំ(មេឃុំតស៊ូ)ចុះទៅមើលសិនណា។ តាមពិត យើងមើលភស្តុតាងជាក់ស្ដែងសិន។ ចាំមើលខ្ញុំធ្វើការសិនណា»។
ការគំរាមកំហែង និង បង្ខំឱ្យអ្នកភូមិធ្វើកិច្ចសន្យាពីសំណាក់កម្លាំងទាហានជា បន្តបន្ទាប់ នេះ ធ្វើឡើង ក្រោយពេលដែលអភិបាលរងខេត្ត លោក យឹម បញ្ញា កាលពីដើមខែតុលា បានដឹកនាំអាជ្ញាធរភូមិឃុំ និងតំណាងក្រុមហ៊ុន លោក ឈៀង គង់នៅ ចុះជួបពលរដ្ឋមកពីភូមិបុស្ស និងភូមិ ប្រើសក្អក ឃុំម្លូព្រៃពីរ ស្រុកឆែប ជាង១០០នាក់។ ក្នុងជំនួបនោះ អភិបាលរងខេត្ត លោក ឃឹម បញ្ញា និងតំណាងក្រុមហ៊ុន លោក ឈៀង គង់នៅ បានគំរាមឱ្យពលរដ្ឋធ្វើកិច្ចសន្យា ឈប់អាស្រ័យផលលើដីនោះទៀត ដោយថា ដីនោះ គឺជាដីរបស់ក្រុមហ៊ុន។
អ្នកភូមិឱ្យដឹងថា ក្រោយពីជំនួបនោះមក មានកម្លាំងទាហាន និងប៉ូលិស ប្រដាប់ដោយកាំភ្លើង សហការជាមួយបក្ខពួក លោក ឈៀង គង់នៅ ដើរបញ្ចុះបញ្ចូល និងគំរាមកំហែងពលរដ្ឋឱ្យធ្វើកិច្ចសន្យា ប្រគល់ដីឱ្យទៅភាគីក្រុមហ៊ុន។ រីឯពលរដ្ឋណាមិនព្រមធ្វើកិច្ចសន្យា នឹងត្រូវប្រឈមចំពោះមុខច្បាប់ ហើយត្រូវដកហូតទ្រព្យមានតម្លៃ ដូចជាគោយន្ត និងម៉ាស៊ីនច្រូតស្រូវជាដើម។
ជាក់ស្ដែងកាលពីទី១៩ ខែតុលា គោយន្តរបស់អ្នកភូមិបុស្ស ឃុំម្លូព្រៃពីរ ចំនួន ៣គ្រឿង ត្រូវបាន បក្ខពួក លោក ឈៀង គង់នៅ សហការជាមួយកម្លាំងទាហាន២នាក់ ប្រដាប់ដោយកាំភ្លើង ចុះមកដកហូតគោយន្ត ពលរដ្ឋយកទៅទុកនៅកសិដ្ឋានរបស់ក្រុមហ៊ុន អំឡុងពេលដែលពួកគាត់កំពុងតែដកដំឡូងមី ស្ថិតនៅលើដីកំពុងមានវិវាទ។ រហូតមកដល់ពេលនេះ អ្នកភូមិ ទាំងនោះ ពុំទាន់ទទួលបានគោយន្ត មកប្រើប្រាស់វិញនៅឡើយ ដោយសារតែមិនព្រមធ្វើកិច្ចសន្យា ឱ្យក្រុមហ៊ុន។
ទាក់ទិនរឿងនេះ អ្នកសម្របសម្រួលនៃសមាគមការពារសិទ្ធិមនុស្សអាដហុក (Adhoc) ប្រចាំខេត្តព្រះវិហារ លោក ម៉ៃ វុទ្ធី ប្រាប់វិទ្យុអាស៊ីសេរីថា ករណីទាហាន និងបក្ខពួក លោក ឈៀង គង់នៅ ដើរគំរាមពលរដ្ឋ មិនឱ្យអាស្រ័យផលលើដីដែលអ្នកភូមិធ្លាប់អាស្រ័យផលនេះគឺជាទង្វើខុសច្បាប់ និងរំលោភសិទ្ធិពលរដ្ឋធ្ងន់ធ្ងរ។
លោកបន្ថែមថា ករណីវិវាទដីធ្លីនេះ ពុំបញ្ឈប់បានដោយងាយៗនោះទេ ព្រោះថាកន្លងទៅ ការដោះស្រាយវិវាទដីធ្លី រវាងពលរដ្ឋ និងក្រុមហ៊ុនចិន អាជ្ញាធរពាក់ព័ន្ធហាក់បង្ហាញការគាំទ្រ ទៅភាគីក្រុមហ៊ុន ថា ជាអ្នកឈ្នះ ដែលជាហេតុ ធ្វើឱ្យពួកគេបានចិត្ត ដើរគំរាមកំហែង និង ប្រើអំពើ ហិង្សា មកលើ ពលរដ្ឋតាមអំពើចិត្ត។
លោក ម៉ៃ វុទ្ធី៖«ខ្ញុំមើលឃើញថា វាជារូបភាពមួយគំរាមកំហែងប្រជាពលរដ្ឋ ។ ខ្ញុំគិតថាករណីនេះ អាជ្ញាធរខេត្តគួរតែដោះស្រាយឱ្យបានសមរម្យដល់ប្រជាពលរដ្ឋ ដែលពួកគាត់ បានអាស្រ័យផលលើដីនេះជាយូរយារមកហើយ។ នៅពេលពួកគាត់ចាប់ផ្ដើមប្រមូលផលស្រូវ បែរជាឃើញខាងអាជ្ញាធរគំរាមកំហែង ពួកគាត់មិនឱ្យពួកគាត់ទៅអាស្រ័យផល ហើយយើងឃើញដកហូតគោយន្តពួកគាត់ទៅទុក ដោយខុសច្បាប់ អត់ឃើញមានការដោះស្រាយអ្វីឱ្យជាក់លាក់»។
ពលរដ្ឋរស់នៅឃុំតស៊ូ ស្រុកសែនជ័យ មានជាង ៤០គ្រួសារ ហើយកំពុងអាស្រ័យផលលើដីជាង២០០ហិកតារ ដែលកំពុងមានវិវាទជាមួយ ក្រុមហ៊ុនស្ករអំពៅចិនហេង ហ្វូ បើទោះជា ក្រុមហ៊ុន បានក្ស័យធនជាច្រើនឆ្នាំមកហើយក្ដី ប៉ុន្តែនៅដើមឆ្នាំ២០២៤ ស្រាប់តែមានបុគ្គល ឈ្មោះ ឈាង គង់នៅ អះអាងថា ជាតំណាង ក្រុមហ៊ុន ហើយដើរគំរាមកំហែង ពលរដ្ឋមិនឱ្យអាស្រ័យផលលើដីនោះទៀត ដោយបង្ខំឱ្យ ពលរដ្ឋធ្វើកិច្ចសន្យា ចំណែកផលទទួលបានពីការប្រមូលផល ស្រូវឆ្នាំនេះ ត្រូវបែងចែក ៥០ភាគរយឱ្យទៅក្រុមហ៊ុន ដើម្បីជាថ្នូរកុំឱ្យពួកគេប្ដឹងទៅតុលាការពីបទកាន់កាប់ដីដោយខុសច្បាប់។
ប្រជាពលរដ្ឋស្នើឱ្យរដ្ឋាភិបាល លោក ហ៊ុន ម៉ាណែត គួរតែកោះហៅភាគីក្រុមហ៊ុន និងពលរដ្ឋ ដើម្បី ដោះស្រាយ វិវាទដីធ្លីនេះឡើងវិញ ដោយឈរលើគោលការណ៍យុត្តិធម៌។ ពលរដ្ឋថា ដីទាំងនោះ អ្នកភូមិបានអាស្រ័យផលជាយូរមកហើយ ចំណែកក្រុមហ៊ុន ក៏បានក្ស័យធនហើយដែរ ដូច្នេះ រដ្ឋាភិបាល គួរតែពិចារណា ប្រគល់ដីទាំងនោះឱ្យពលរដ្ឋកាន់កាប់ឡើងវិញ ដោយស្របច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។