សាលាដំបូងរាជធានីភ្នំពេញ កាលពីរសៀលថ្ងៃទី០១ ខែមីនា បានកាត់ទោសជនជាតិ ចិន២នាក់ ឱ្យជាប់គុកអស់មួយជីវិត ក្នុងករណីជួញដូរគ្រឿងញៀន។ បុរសជនជាប់ចោទទាំងពីរនាក់នោះ ម្នាក់គឺជាជនជាតិចិនដីគោក និងម្នាក់ទៀត ជនជាតិចិនតៃវ៉ាន់។ សមត្ថកិច្ចនាយកដ្ឋានសន្តិសុខផ្ទៃក្នុង នៃក្រសួងមហាផ្ទៃ បានឃាត់ខ្លួនអ្នកទាំងពីរ កាលពីខែកក្កដា ឆ្នាំ២០១៨ ក្នុងពេលពួកគេរង់ចាំទទួលគ្រឿងញៀន ដែលផ្ញើពីប្រទេសអាល្លឺម៉ង់ នៅប៉ុស្តិ៍ប្រៃសណីយ៍កម្ពុជា។ ក្នុងពេលនោះសមត្ថកិច្ចបានដកហូតគ្រឿងញៀន ចំនួនជាង ១០គីឡូក្រាម។ សមត្ថកិច្ចឱ្យដឹងថា ការប្រើប្រាស់និងជួញដូរគ្រឿងញៀនកំពុងកើនឡើង។
ក្នុងរបាយការណ៍ស្នងការនគរបាលរាជធានីភ្នំពេញបង្ហាញថា ក្លឹបកម្សាន្ត និងបារបារាំង ចំនួនជាង ១ពាន់២រយកន្លែងបានប្រើប្រាស់គ្រឿងញៀន ហើយម្ចាស់ក្លឹបកម្សាន្ត ជាង ១ពាន់កន្លែង បានធ្វើកិច្ចសន្យាបញ្ឈប់ការប្រើប្រាស់គ្រឿងញៀន។
កាលពីថ្ងៃទី២៣ ខែកុម្ភៈ សមត្ថកិច្ចក៏បានរកឃើញគ្រឿងញៀន ប្រភេទថ្នាំគ្រាប់ និងប្រភេទទឹក ជាង៥០ គីឡូក្រាម ក្នុងពេលប្រតិបត្តិការចុះចាប់ និងឃាត់ខ្លួន ជនសង្ស័យពាក់ព័ន្ធករណីគ្រឿងញៀនជាង ៣០០នាក់ នៅក្លឹបកម្សាន្តរ៉ក់ (Rock)។ ជនសង្ស័យទាំងដោះលែងទាំងអស់លើកឡើងតែមួយចំនួនតូចត្រូវបានបញ្ជូនទៅតុលាការ។ ទោះបីជាយ៉ាងណា មន្ត្រីសង្គមស៊ីវិល និងពលរដ្ឋមើលឃើញថា រូបភាពនៃការបង្ក្រាបរបស់សមត្ថកិច្ចគ្រាន់ជាការឃាត់ខ្លួនជនរងគ្រោះតែប៉ុណ្ណោះ។ ពួកគេចង់ឱ្យសមត្ថកិច្ចឃាត់អ្នកនៅពីក្រោយករណីនៃការជួញដូរគ្រឿងញៀនទាំងនោះ៕