មន្ត្រីសង្គមស៊ីវិលជំរុញមានវិធានការផ្លូវច្បាប់លើមន្ត្រីនគរបាលខេត្តព្រៃវែង ៧នាក់ ដែលប្រើហិង្សា និងយកលុយពីជនសង្ស័យករណីគ្រឿងញៀន
2020.07.29
លោក នេត្រ សាវឿន អគ្គស្នងការនគរបាលជាតិ។
រូប៖ ហ្វេសប៊ុកលោក នេត្រ សាវឿន
មន្ត្រីសង្គមស៊ីវិលជំរុញឲ្យមានវិធានការផ្លូវច្បាប់ លើមន្ត្រីនគរបាល ៧នាក់ នៅខេត្តព្រៃវែង ដែលបានប្រើហិង្សានិងយកលុយពីជនសង្ស័យពេលចុះបង្ក្រាបករណីគ្រឿងញៀននៅខេត្តនេះ។ សំណើនេះ ស្របពេល ដែលអគ្គស្នងការនគរបាលជាតិ លោក នេត សាវឿន សម្រេចផ្អាកការងារមន្ត្រីនគរបាលទាំងនោះជាបណ្ដោះអាសន្ន។
មន្ត្រីសង្គមស៊ីវិលផ្នែកសិទ្ធិមនុស្ស ស្វាគមន៍ចំពោះចំណាត់ការរបស់អគ្គស្នងការនគរបាលជាតិ។ អ្នកសម្របសម្រួលនៃសមាគមអាដហុកប្រចាំខេត្តព្រៃវែង អ្នកស្រី អ៊ាង គឹមលី ឱ្យដឹងថា កន្លងមកពលរដ្ឋបានត្អូញត្អែរពីបញ្ហាគ្រឿងញៀននៅក្នុងខេត្តនេះ។ អ្នកស្រីស្នើទៅអគ្គស្នងការនគរបាលជាតិ ឬក្រសួងមហាផ្ទៃត្រូវមានវិធានការម៉ឹងម៉ាត់ និងដាក់ទណ្ឌកម្មធ្ងន់ធ្ងរ លើមន្ត្រីដែលអនុវត្តច្បាប់ប៉ុន្តែប្រព្រឹត្តល្មើសច្បាប់បែបនេះទៅវិញ៖ «កាលណាមន្ត្រីល្មើសការដាក់ទោសច្រើនជាងប្រជាពលរដ្ឋដោយសារគាត់យល់ដឹងពីច្បាប់គាត់យល់ដឹងច្រើនជាងប្រជាពលរដ្ឋមួយទៀតគាត់ធ្វើជាគំរូឱ្យពលរដ្ឋបានឃើញថា មន្ត្រីដែលធ្វើខុសមានទោសពិតជាមានទោសដូចច្បាប់បានចែងមែន»។
សំណើមន្ត្រីសង្គមស៊ីវិលបែបនេះ ក្រោយពីអគ្គស្នងការដ្ឋាននគរបាលជាតិកាលពីថ្ងៃទី២៧ ខែកក្កដា បានចេញសេចក្ដីសម្រេចដាក់វិន័យមន្ត្រីនគរបាលជាតិ នៃស្នងការដ្ឋាននគរបាលខេត្តព្រៃវែង ៧នាក់ ដោយចោទប្រកាន់ថា បានធ្វើប្រតិបត្តិការបង្ក្រាបគ្រឿងញៀន ផ្ទុយពីក្រមសីលធម៌វិជ្ជាជីវ: និងវិន័យរបស់កងកម្លាំងនគរបាលជាតិ ថែមទាំងបង្កឲ្យមានរបួសស្នាមដល់ជនសង្ស័យ។
គេហទំព័រនៃអគ្គស្នងការដ្ឋាននគរបាលជាតិដកស្រង់សម្ដីអគ្គស្នងការនគរបាលជាតិ លោក នេត សាវឿន ចុះផ្សាយថា ការដាក់វិន័យដោយផ្អាកការងារបណ្ដោះអាសន្ននេះ ជាជំហានទី១ ប៉ុណ្ណោះ។ មេប៉ូលិសជាន់ខ្ពស់រូបនេះអះអាងថា លោកបានបញ្ជាឲ្យនាយកដ្ឋានបុគ្គលិកធ្វើការស្រាវជ្រាវ និងស៊ើបអង្កេតបញ្ជាក់បន្តទៀត ដើម្បីឈានទៅដល់ការដាក់វិន័យតាមទម្ងន់ទោស ឬក៏ការអនុវត្តច្បាប់។
មន្ត្រីនគរបាលដែលត្រូវបានផ្អាកការងារទាំងនេះ មានតួនាទីចាប់ពីមន្ត្រីប្រឆាំងគ្រឿងញៀន រហូតដល់ស្នងការរងទទួលបន្ទុកប្រឆាំងគ្រឿងញៀនក្នុងខេត្តព្រៃវែង។
របាយការណ៍ប៉ូលិសឱ្យដឹងថា ក្រុមមន្ត្រីនគរបាលទាំងនេះ បានប្រើហិង្សា និងយកលុយពីជនសង្ស័យពេលចុះបង្ក្រាបករណីគ្រឿងញៀននៅខេត្តព្រៃវែង ចំនួន ២លើក លើកទី១ នៅកាលពីថ្ងៃទី១៦ ខែកក្កដា និងលើកទី២ កាលពីថ្ងៃទី២០ ខែកក្កដា។
អាស៊ីសេរីបានព្យាយាមសុំការបំភ្លឺបន្ថែមលើសំណុំរឿងនេះពីអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ស្នងការនគរបាលខេត្តព្រៃវែង លោក ព្រំ សន្ធរ នៅថ្ងៃទី២៩ ខែកក្កដា ប៉ុន្តែទូរស័ព្ទហៅចូលគ្មានអ្នកទទួល។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គឹមអេង យល់ថា ទង្វើរបស់ក្រុមនគរបាលដូច្នេះ ជាការរំលោភច្បាប់និងធ្វើឱ្យប៉ះពាល់ដល់សុវត្ថិភាពសង្គមធ្ងន់ធ្ងរ។ មន្ត្រីសង្គមស៊ីវិលរូបនេះ ជំរុញឱ្យមានការបញ្ជូនមន្ត្រីដែលជាប់សង្ស័យ ទៅស្ថាប័នតុលាការស៊ើបអង្កេត និងចាត់ការតាមផ្លូវច្បាប់។ លោកថា ប្រសិនបើរកឃើញថាអ្នកទាំងនោះ បានប្រព្រឹត្តបទល្មើសមែននោះគួរដាក់ទោសតាមច្បាប់និងត្រូវបណ្ដេញចេញពីក្របខ័ណ្ឌ៖ «យើងចង់ឃើញថាមន្ត្រីទាំងអស់ហ្នឹងមិនត្រឹមបញ្ឈរជើងទេបាទត្រូវដាក់ទោសទណ្ឌគាត់បាទហើយម៉្យាងទៀតការដាក់ទោសទណ្ឌហ្នឹងមិនគួរដល់ពេលគាត់អនុវត្តន៍ចប់សព្វគ្រប់មិនគួរឱ្យគាត់មកធ្វើមន្ត្រីវិញទេបាទ»។
លោក យង់ គឹមអេង ជំរុញអគ្គស្នងការនគរបាលជាតិ លោក នេត សាវឿន ឬរដ្ឋមន្ត្រីក្រសួងមហាផ្ទៃ លោក ស ខេង ថា ត្រូវមានវិធានការដូចគ្នា លើមន្ត្រីនគរបាលទាំងអស់ ដែលប្រព្រឹត្តបទល្មើសដូច្នេះ ខណៈកន្លងមក ក៏ធ្លាប់មានការរិះគន់ថា មន្ត្រីជាន់ខ្ពស់នគរបាលជាតិមួយចំនួន ជាប់ពាក់ព័ន្ធ នឹងបទល្មើសគ្រឿងញៀន។ កន្លងមកក៏មានអ្នកប្រើប្រាស់បណ្ដាញសង្គមខ្លះរិះគន់ថា សមត្ថកិច្ចមួយចំនួន ធ្វើជាអ្នកចាប់គ្រឿងញៀនផង និងជាអ្នកជួញដូរគ្រឿងញៀនផង។ ប៉ុន្តែអ្នកទាំងនោះភាគច្រើនត្រូវសមត្ថកិច្ច កោះហៅព្រមាន និងត្រឹមឱ្យធ្វើលិខិតសូមទោសប៉ុណ្ណោះ។
ទោះបីជាយ៉ាងណា អគ្គស្នងការនគរបាលជាតិ លោក នេត សាវឿន មិនទាន់ចាត់វិធានការផ្លូវច្បាប់លើមន្ត្រីទាំងនោះនៅឡើយ ប៉ុន្តែលោកតម្រូវឱ្យអ្នកទាំង ៧នេះ ត្រូវបង្ហាញខ្លួនរៀងរាល់ម៉ោងការងារ នៅការិយាល័យបុគ្គលិកនៃស្នងការនគរបាលខេត្តព្រៃវែង ដើម្បីរង់ចាំការសម្រេចជាថ្មី។
របាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន ឱ្យដឹងថា ក្នុងឆមាសទី១ ឆ្នាំ២០២០ នេះ សមត្ថកិច្ចកម្ពុជាបង្ក្រាបបទល្មើសគ្រឿងញៀនបានជាង ៥ពាន់ករណី (៥.៤៦៣) និងបានឃាត់ខ្លួនមនុស្សចំនួនជិត ១ម៉ឺន ១ពាន់នាក់ (១០.៨៧៧) ក្នុងនោះមានជនបរទេស ១៧៧នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ