មន្ត្រីសង្គមស៊ីវិល ស្នើឲ្យរដ្ឋាភិបាលកម្ពុជា ជួយសម្របសម្រួលដល់ស្ត្រីខ្មែរម្នាក់ ដែលវៀតណាមនឹងកាត់ទោសប្រហារជីវិតដោយសារតែជួញដូរគ្រឿងញៀន ទៅប្រទេសវៀតណាម។ សំណើនេះបន្ទាប់ពីសារព័ត៌មានរបស់វៀតណាមមួយ បានចុះផ្សាយកាលពីថ្ងៃទី៣១ ខែកក្កដា ថាតុលាការ ខេត្ដតាយនិញ (Tay Ninh) ប្រទេសវៀតណាម បានកាត់ទោសប្រហារជីវិតទៅលើស្ដ្រីដែលជាជនជាតិខ្មែរ អាយុ២៧ឆ្នាំម្នាក់ ដោយសារការលួចយកសារធាតុញៀនប្រភេទ មេតំហ្វេតាមីន (Methaphetamine) ទម្ងន់ជិត ៥គីឡូក្រាម (៤៩៤៣ក្រាម) ចូលប្រទេសវៀតណាម។
នាយករងទទួលបន្ទុកផ្នែកឃ្លាំមើលសិទ្ធិមនុស្សរបស់អង្គការលីកាដូលោក អំ សំអាត ប្រាប់អាស៊ីសេរីថា រដ្ឋាភិបាលកម្ពុជាគួរតែធ្វើឲ្យមានកិច្ចសម្របសម្រួលណាមួយដើម្បីជួយដល់ពលរដ្ឋខ្មែររូបនេះ៖ «ប្រទេសវៀតណាមគេមានច្បាប់របស់គេដែរ ទាក់ទងនឹងបញ្ហានៃប្រហារជីវិត ពាក់ព័ន្ធនឹងគ្រឿងញៀន តែទោះជាយ៉ាងណាក៏ដោយក្នុងនាមគាត់ជាពលរដ្ឋខ្មែរដែរ ខ្ញុំយល់ថាត្រូវតែមានការជួយទៅតាមលទ្ធភាព របស់ស្ថានទូត និងស្ថានកុងសុលដែលប្រចាំនៅប្រទេសវៀតណាម ដើម្បីសម្របសម្រួលបញ្ហាហ្នឹងទៅតាមលទ្ធភាព ដែលអាចធ្វើទៅបានក្នុងនាមកិច្ចការពារពលរដ្ឋខ្មែរយើង»។
សារព័ត៌មានដដែលបន្ដថា អាជ្ញាធរវៀតណាម បានឃាត់ស្ដ្រីពលរដ្ឋខ្មែររូបនេះ និងចាប់បានគ្រឿងញៀនទាំងនោះ នៅច្រកចេញចូលអន្តរជាតិ ម៉ុក បៃ (Moc Bai) នៅក្នុងខេត្ដតាយនិញ (Tay Ninh) ជាប់ខេត្តស្វាយរៀងរបស់កម្ពុជា កាលខែធ្នូ ឆ្នាំ២០១៩ កន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។