តំណាងរាស្ត្ររបស់គណបក្សសង្គ្រោះជាតិ ដែលត្រូវក្រុមអង្គរក្ស លោក ហ៊ុន សែន វាយឲ្យរងបួសកាលពីចុងឆ្នាំ២០១៥ នឹងប្ដឹងទៅសាលាឧទ្ធរណ៍ប្រឆាំងទាស់សាលក្រមរបស់សាលាដំបូងរាជធានីភ្នំពេញ ដែលសម្រេចផ្ដន្ទាទោសជនជាប់ចោទ ៣នាក់ ឲ្យជាប់ពន្ធនាគារ ៤ឆ្នាំ តែអនុវត្តទោស ១ឆ្នាំ។
សាលក្រមរបស់សាលាដំបូងរាជធានីភ្នំពេញ នឹងផ្ដល់លទ្ធភាពឲ្យអង្គរក្សទាំងបីនាក់របស់លោក ហ៊ុន សែន ប្រមាណតែ ៨ខែទៀត អាចនៅក្រៅឃុំ ខណៈពួកគេត្រូវបានឃុំខ្លួននៅពន្ធនាគារ កាលពីដើមខែកុម្ភៈ ឆ្នាំ២០១៦ បន្ទាប់ពីបានចូលខ្លួនសារភាព។
ចៅក្រមសាលាដំបូងរាជធានីភ្នំពេញ លោក ហេង សុខណាង ចោទប្រកាន់លើបុរសទាំង៣ ថា បានប្រព្រឹត្តហិង្សាមានស្ថានទម្ងន់ទោសលើតំណាងរាស្ត្រ គង់ សភា និងលោក ញ៉យ ចំរើន។ ប៉ុន្តែ លោកចៅក្រមមិនបានចោទប្រកាន់លើបទធ្វើឲ្យខូចខាតមានស្ថានទម្ងន់ទោសទេ ដោយសំអាងថា គ្មានការបញ្ជាក់ណាមួយថា ជនជាប់ចោទទាំងបីរូប គឺលោក ចាយ សារិទ្ធ លោក ម៉ៅ ហឿន និងលោក សុត វណ្ណនី ធ្វើឲ្យខូចខាតរថយន្តរបស់តំណាងរាស្ត្រ។
នៅក្នុងបន្ទប់សវនាការនៅព្រឹកថ្ងៃទី២៧ ខែឧសភា ពុំមានវត្តមានតំណាងរាស្ត្រដែលជាជនរងគ្រោះទាំងពីររូបទេ ខណៈជនជាប់ចោទទាំងបីរូបឈស្ដាប់ការប្រកាសរបស់តុលាការដោយទឹកមុខធម្មតា។ ចំណែកសាច់ញាតិរបស់អ្នកទាំងបីរូប ក៏មិនបានបង្ហាញការភ្ញាក់ផ្អើលនៅចៅក្រមប្រកាសផ្ដន្ទាទោសឲ្យជាប់គុក ៤ឆ្នាំ និងតម្រូវជនជាប់ចោទទាំងបីនាក់បង់ប្រាក់ចំនួន ៨០លានរៀន ទៅតំណាងរាស្ត្រទាំងពីររូប ព្រមទាំងឲ្យពួកគេម្នាក់ៗបង់ប្រាប់ចំនួន ៦លានរៀលជួនរដ្ឋ។
ក្រោយការប្រកាសសាលក្រុម អង្គរក្សរបស់លោក ហ៊ុន សែន ទាំងបីរូប មិនបានឆ្លើយតបនឹងសំណួររបស់ក្រុមអ្នកសារព័ត៌មានទេ។ ប៉ុន្តែ ក្នុងចំណោមសាច់ញាតិអ្នកទាំងនោះ ម្ដាយរបស់លោក សុត វណ្ណនី គឺលោកស្រី សុខ យី អាយុ ៨០ឆ្នាំ ដែលចូលរួមស្ដាប់សាលក្រមដែរនោះថា លោកស្រីមិនជំទាស់ការសម្រេចរបស់តុលាការទេ៖ «អត់អីទេ ខ្ញុំអត់មានថាអីទេ ស្រេចតែគេ (តុលាការ) ចុះ។ គេធ្វើយ៉ាងម៉េចធ្វើតាមតែគេចុះ»។
ស្រដៀងគ្នានេះដែរ បងប្រុសលោករបស់ លោក ចាយ សារិទ្ធ ដែលសុំមិនបញ្ចេញឈ្មោះ ថា សាលក្រមនេះយុត្តិធម៌សម្រាប់ប្អូនលោក៖ «អត់អីទេ យុត្តិធម៌តាមច្បាប់!»។
ជនជាប់ចោទទាំងបីនាក់ទទួលស្គាល់ថា ពួកគេវាយតំណាងរាស្ត្រព្រោះអ្នកតំណាងរាស្ត្រហៅពួកគេថា "អាយ៉ងយួន"។ ប៉ុន្តែពួកគេបដិសេធមិនបានធ្វើឲ្យខូចខាតរថយន្តរបស់តំណាងរាស្ត្រទេ។
តំណាងរាស្ត្រគណបក្សសង្គ្រោះជាតិ លោក គង់ សភា ថាការសម្រេចបែបនេះ ព្រោះតុលាការស្ថិតក្រោមគំនាបរបស់អ្នកនយោបាយ៖ «បច្ចុប្បន្នប្រជាពលរដ្ឋយើងដឹង ហើយថា ប្រព័ន្ធតុលាការមិនឯករាជ្យ ស្ថិតក្នុងក្រោមបក្សនយោបាយ ប្រធានតុលាការមួយចំនួនជាមន្ត្រីអចិន្ត្រៃយ៍របស់បក្ស អ៊ីចឹងហើយបង្ហាញពីការលំអៀង»។
លោកមេធាវី សំ សុគង់ ចាត់ទុកសាលក្រមរបស់ចៅក្រមនៃអយ្យការអមសាលាដំបូងរាជធានីនៅពេលនេះ ថា ជារឿងអយុត្តិធម៌សម្រាប់កូនក្ដីលោក ហើយលោកនឹងប្ដឹងទៅសាលាឧទ្ធរណ៍បន្តទៀត៖ «ប្រកាសសាលក្រមដែលផ្ដន្ទាទោស ជនជាប់ចោទ ឲ្យជាប់ពន្ធនាគារ ៤ឆ្នាំ តែអនុវត្តទោស ១ឆ្នាំក្នុងពន្ធនាគារ និងការទម្លាក់បទចោទធ្វើឲ្យខូចខាតមានស្ថានទម្ងន់ទោសនោះ នេះជាសេចក្ដីសម្រេចមួយដែលមិនអាចទទួលយកបានទេ»។
ករណីហិង្សាលើតំណាងតំណាងរាស្ត្រទាំងពីររូប កើតឡើង បន្ទាប់ពីមានបាតុកម្មដែលព្យាយាមទម្លាក់លោក កឹម សុខា ពីអនុប្រធានទី១ រដ្ឋសភា នៅមុខវិមានរដ្ឋសភា កាលពីថ្ងៃទី២៦ ខែតុលា ឆ្នាំ២០១៥។ ក្រុមបាតុករដែលគ្នាជាង ២០នាក់ បានទាញតំណាងរាស្ត្រទាំងពីររូបចេញពីក្នុងឡាន វាយទាត់ធាក់តាមអំពើចិត្ត នៅច្រកខាងត្បូងនៃវិមានរដ្ឋសភា ក្បែរស្ថានទូតអូស្ត្រាលី។
តំណាងរាស្ត្រទាំពីររូបសាលក្រុមរបស់តុលាការនៅពេលនេះ ដូចជាការលេងសើចចំពោះការផ្ដន្ទាទោសនេះ។ ពួកគេថា បើគេយកករណីមន្ត្រីគណបក្សសង្គ្រោះជាតិ លោក មាជ សុវណ្ណារ៉ា មន្ត្រីជាន់ខ្ពស់នៃគណបក្សសង្គ្រោះជាតិ ត្រូវបានតុលាការក្រុងភ្នំពេញ កាត់ទោសជាប់ពន្ធនាគារចំនួន ២០ឆ្នាំ ពីបទចូលរួម និងដឹកនាំចលនាកុប្បកម្ម ដែលបានប្រព្រឹត្តនៅទីលានប្រជាធិបតេយ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។