ព្រះរាជអាជ្ញា​ចោទ​ស្ត្រី​ដែល​យក​កាំបិត​ឆូត​មុខ​ក្មេង​ស្រី អាយុ​៥​ឆ្នាំ ពី​បទ​ទារុណកម្ម និង​អំពើ​ឃោរឃៅ

ដោយ ខែ សុណង
2020-07-18
អ៊ីម៉ែល
មតិ
Share
បោះពុម្ព

តំណាង​អយ្យការ​អម​សាលាដំបូង​រាជធានី​ភ្នំពេញ បាន​សម្រេច​ចោទប្រកាន់​ស្ត្រី ដែល​យក​កាំបិត​ឆូត​មុខ​ក្មេង​ស្រី អាយុ​៥​ឆ្នាំ ពី​បទ​ទារុណកម្ម និង​អំពើ​ឃោរឃៅ ដែល​ប្រឈម​ការ​ជាប់​ពន្ធនាគារ ពី​១០​ឆ្នាំ ទៅ​២០​ឆ្នាំ​។ អ្នកឃ្លាំមើល​សិទ្ធិ​កុមារ ស្វាគមន៍ ចំពោះ​បទចោទប្រកាន់​នេះ។

ឪពុក​របស់​ក្មេង​ស្រី​រងគ្រោះ គឺ លោក ញ៉ង់ វ៉ាន់នី ប្រាប់​អាស៊ីសេរី​ថា លោក​អាច​កាត់បន្ថយ​ការ​ឈឺ​ចាប់​ក្នុង​ចិត្ត​បាន​ខ្លះ នៅ​ពេល​ដឹង​ថា មានការ​ចោទប្រកាន់​ស្ត្រី​ដៃដល់។ តែ​យ៉ាងណា លោក​ចង់​ឱ្យ​មន្ត្រី​តុលាការ​ចោទប្រកាន់​ស្ត្រី​រូប​នោះ ឱ្យ​ធ្ងន់ធ្ងរ សម​នឹង​ទង្វើ​របស់​ខ្លួន៖ «សម្រាប់​ខ្ញុំ​មិន​ជា​នេះ​ទេ ដោយសារ​វា​ជាប់​តិច​ឆ្នាំ​ពេក ចង់​និយាយ​អ៊ីចឹង​អូន ព្រោះ កុមារ​ម្នាក់​មិន​ដឹង​អ្វី វា​តិច​ពេក។ ទី​១ កូន​ខ្ញុំ​គាត់​មិន​ដឹង​អ្វី ចង់​និយាយ​ថា ស្មារតី​គាត់​នៅចាំ​ខ្លះ ចុះ​ទម្រាំ​គាត់​ធំ តើ​គាត់​គិត​ឃើញ​រឿង​ហ្នឹង គាត់​តក់ស្លុត​ប៉ុនណា ហើយ​យ៉ាង​ម្ដេច​? ហើយ​ខ្លោចចិត្ត អារម្មណ៍​របស់​គាត់​។ អ៊ីចឹង​ណា​។ ចិត្ត​ខ្ញុំ​ចង់បាន​លើស​ហ្នឹង ប៉ុន្តែ​បើ​ថា​ច្បាប់ ក្នុង​ច្បាប់ ដែល​មាន​ការ​ចោទប្រកាន់​ប៉ុនណា មិន​ដឹង​ថា យើង​ទាមទារ​លើស​ហ្នឹង​ទៀត​បាន​អត់​? ខ្ញុំ​អត់​ដឹង​ពី​ច្បាប់​ហ្នឹង ច្បាស់លាស់​ផង»

លោក​ឱ្យ​ដឹង​ថា គ្រូពេទ្យ​មិនទាន់​អាច​សន្និដ្ឋាន​បាន​ថា មុខរបួស​ស្នាម​កាំបិត ឆូត​លើ​មុខ​កូនស្រី​របស់​លោក អាច​នឹង​ជាសះស្បើយ​នៅ​ពេល​ណា​ទេ​។ តែ​លោ​កថា កូនស្រី​របស់​លោក មាន​ស្មារតី​ល្អ ធម្មតា​ឡើងវិញ​ហើយ និង​កំពុង​សម្រាក​ព្យាបាល​ក្នុង​មន្ទីរពេទ្យ​កុមារ​ជាតិ នៅ​រាជធានី​ភ្នំពេញ​។​

ស្ត្រីជន​សង្ស័យ​ឈ្មោះ លីវ ប៊ុនធឿន អាយុ ៤៣​ឆ្នាំ បាន​យក​កាំបិត​អារ​មុខ ច្រមុះ និង​ដងខ្លួន កុមារី​ម្នាក់​អាយុ​៥​ឆ្នាំ កាលពី​ថ្ងៃ​ទី​១៦ កក្កដា នៅ​បុរី​ពិភពថ្មីឈូក​វ៉ា​២ ស្ថិតនៅ​ខណ្ឌ​ពោធិ៍​សែន​ជ័យ​។ ក្រោយ​កើតហេតុ​ភ្លាមៗ នគរបាល​ខណ្ឌ​ពោធិ៍​សែន​ជ័យ បាន​ចុះ​ចាប់ខ្លួន​ស្ត្រីជន​ដៃដល់ និង​ធ្វើ​របាយការណ៍ បញ្ជូន​ទៅ​តុលាការ កាលពី​ថ្ងៃ​ទី​១៧ កក្កដា​។ របាយការណ៍​ប៉ូលិស បង្ហាញ​ថា ស្ត្រី​ជន​ដៃដល់​សារភាព​ថា ពិតជា​បាន​ឆូត​មុខ​ក្មេង​ស្រី រងគ្រោះ​ពិតមែន ដោយសារ ខឹង​ក្មេង​ស្រី​រងគ្រោះ គប់​កូន​តូច​របស់​ខ្លួន របួស​ក្បាល។

អាស៊ីសេរី មិន​អាច​សុំ​ការ​បញ្ជាក់​ករណី​នេះ ពី​អ្នកនាំពាក្យ​តំណាង​អយ្យការ​អម​សាលាដំបូង​រាជធានី​ភ្នំពេញ លោក គុជ គឹមឡុង បានទេ នៅ​ថ្ងៃ​ទី​១៨ កក្កដា ដោយសារ​លោក​មិន​ទទួល​ទូរស័ព្ទ។ ប៉ុន្តែ សារព័ត៌មាន​ក្នុងស្រុក បាន​ស្រង់​សំដី លោក គុជ គឹមឡុង បញ្ជាក់​ថា ស្ត្រី​ជន​ដៃដល់​ត្រូវ​បាន ចោទប្រកាន់​ពី​បទ​ប្រព្រឹត្ត​អំពើ​ឃោរឃៅ និង​ទារុណកម្ម មាន​ស្ថាន​ទម្ងន់​ទោស​។ បទល្មើស​នេះ នឹង​ត្រូវ​ផ្តន្ទាទោស ដាក់​ពន្ធនាគារ​ពី ១០​ឆ្នាំ ទៅ​២០​ឆ្នាំ។

ប្រធាន​គាំទ្រ​កុមារ​ប្រចាំ​ប្រទេស​កម្ពុជា នៃ​អង្គការ​អង្គភាព​ការពារ​កុមារ (CPU) អ្នកស្រី សោម វឌ្ឍនា ស្វាគមន៍​ចំពោះ​វិធានការ​របស់​អាជ្ញាធរ និង​ថ្កោលទោស​ចំពោះ​ការ​ប្រើ​អំពើ​ឃោរឃៅ លើ​កុមារី​រងគ្រោះ​។ អ្នកស្រី​ថា ស្ថាប័ន​អ្នកស្រី​កំពុង​ជ្រោមជ្រែង​ផ្នែក​ច្បាប់ តាមរយៈ​ការ​ផ្ដល់​មេធាវី ធ្វើជា​តំណាង​កុមារី​រងគ្រោះ​៖ «ម្សិលមិញ​យើង​បាន​យក​មេធាវី ទៅ​ជួប​គ្រួសារ​ជនរងគ្រោះ​ហ្នឹង ដើម្បី​ផ្ដិតមេដៃ​ពឹង​ពាក់​មេធាវី​រួចហើយ​។ អ៊ីចឹង មេធាវី​គាត់​កំពុង​រៀបចំ​ដាក់​ទៅ​តុលាការ​... ពួក​ខ្ញុំ​ដែល​ការពារ​កុមារ​ហ្នឹង គឺ​មិន​អាច​ទទួល​បាន ដោយសារ​គាត់​បាន​ធ្វើ​អំពើ​ហិង្សា​ធ្ងន់ធ្ងរ​ពេក ទៅលើ​ជនរងគ្រោះ​ជា​ក្មេង​អនីតិជន​។ អ៊ីចឹង យើង​មិន​អាច​ឈរ​មើល ហើយក៏​មិន​គាំទ្រ​។ យើង​បាន​សហការ​ជាមួយ​ក្រុមប្រឹក្សា​ជាតិ​ដើម្បី​កុមារ​ហ្នឹង ថ្កោលទោស​ទៅលើ​គាត់​ហ្នឹង​ដូចគ្នា»

កាលពី​ថ្ងៃទី​១៧ កក្កដា ក្រុមប្រឹក្សា​ជាតិ​ដើម្បី​កុមារ បាន​ចេញ​សេចក្ដីថ្លែងការណ៍​ថ្កោលទោស​អំពើ​ហិង្សា​ឃោរឃៅ​នេះ និង​អំពាវនាវ​ឱ្យ​ស្ថាប័ន​អនុវត្ត​ច្បាប់ ពិសេស​តុលាការ​ចាត់វិធានការ​ឱ្យ​បាន​តឹងរ៉ឹង។

របាយការណ៍​អង្គការ​យូនីសេហ្វ (UNICEF) ចេញផ្សាយ​កាលពី​ខែ​សីហា​ឆ្នាំ​២០១៩ រក​ឃើញ​ថា កុមារ​នៅ​ប្រទេស​កម្ពុជា ស្ថិត​ក្នុង​ស្ថានភាព​ងាយ​រងគ្រោះ ដូចជា រង​ការ​វាយ​ដំ​ធ្ងន់ធ្ងរ​ផ្នែក​រាងកាយ ការបំពាន​ផ្លូវចិត្ត ការរំលោភ​ផ្លូវ​ភេទ ការ​ជួញដូរ និង​ការ​កេងប្រវ័ញ្ច​កម្លាំង​ពលកម្ម ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល