តុលាការខេត្តព្រះសីហនុ សម្រេចបិទការស៊ើបអង្កេត ករណីជម្លោះដីធ្លី ពាក់ព័ន្ធនឹងអតីតមន្ត្រីគណបក្សសង្គ្រោះជាតិ លោក ឆាយ រដ្ឋ និងសកម្មជនសិទ្ធិការងារលោក ទេព សុផា។ ភរិយាអតីតមន្ត្រីគណបក្សសង្គ្រោះជាតិរូបនេះ ព្រួយបារម្ភថា ស្វាមីរបស់ខ្លួន ពិបាកទទួលបានយុត្តិធម៌ ព្រោះការចោទប្រកាន់នេះ មានជាប់ពាក់ព័ន្ធនឹងរឿងនយោបាយ។
ភរិយារបស់លោក ឆាយ រដ្ឋ លោកស្រី សំ សារ៉ាត់ ឱ្យអាស៊ីសេរីដឹងថ្ងៃទី២៣ ខែកុម្ភៈ ថា លោកស្រីនៅតែព្រួយបារម្ភថា ការអនុវត្តនីតិវិធី របស់តុលាការបែបនេះ ដូចជាលឿនពេក។ លោកស្រីបន្តថា សំណើសុំនៅក្រៅឃុំរបស់ស្វាមីលោកស្រី តុលាការមិនទាន់បានឆ្លើយតបផង ស្រាប់តែពេលនេះ ប្រកាសថា បិទការស៊ើបសួរទៅហើយ៖ «រឿងព្រួយបារម្ភតែងមានហើយ ដោយសារក្រោយការបិទការស៊ើបសួរអាចដំណើរការក្តីរបស់គេលើកទៅជំនុំជម្រះ ប៉ុន្តែអ្វីដែលខ្ញុំសង្ឃឹមទុកឱ្យតុលាការឆ្លើយតបអាចនៅក្រៅឃុំ»។
តាមនីតិវិធីនៅពេលបិទការស៊ើបអង្កេត តុលាការខេត្តនឹងរកពេលវេលាសមរម្យមួយ ដើម្បីជំនុំជម្រះក្តីលើសំណុំរឿងនេះ។
កាលពីថ្ងៃទី២៣ ខែមករា តុលាការខេត្តព្រះសីហនុសម្រេចឃុំខ្លួន និងចោទប្រកាន់មន្ត្រីគណបក្សសង្គ្រោះជាតិ លោក ឆាយ រដ្ឋ និងសកម្មជនសិទ្ធការងារលោក ទេព សុផា ថា ពួកគេបានបោះបង្គោលហ៊ុមព័ទ្ធដី ដាក់សញ្ញាសម្គាល់ ក្នុងគោលបំណងកាន់កាប់ជាកម្មសិទ្ធិ និងរារាំងបង្ក គ្រោះថ្នាក់របួសស្នាមដល់មន្ត្រីការពារ និងអភិរក្សធម្មជាតិ ក្នុងការចុះអនុវត្តមុខនាទី និងភារកិច្ចរបស់ខ្លួន តាមមាត្រា៦១នៃច្បាប់ស្ដីតំបន់ការពារធម្មជាតិ។
លោកស្រី សំ សារ៉ាត់ ប្រាប់ថា កាលពីពេលសមត្ថកិច្ចចាប់ខ្លួនស្វាមីលោកស្រី អភិបាលរងខេត្តព្រះសីហនុ លោក ស្រ៊ុន ស្រ៊ន បានស្រែកថា ស្វាមីលោកស្រី ជាមន្ត្រីបក្សប្រឆាំង ដែលពួកគេតាមរកមុខយូរហើយ។
អ្នកសម្របសម្រួលរបស់អង្គការសិទ្ធិមនុស្សអាដហុក (Adhoc) នៅក្រុងព្រះសីហនុ លោកស្រី ជៀប សុធារី ដែលតាមដានដំណើររឿងនេះ ឱ្យអាស៊ីសេរីដឹងថា បើទោះអតីតមន្ត្រីបក្សប្រឆាំង មានដីក្នុងតំបន់ជម្លោះនេះមែន ប៉ុន្តែពួកគេមិនមែនជាអ្នកដឹកនាំ ដែលបង្កជម្លោះនោះទេ។ ទាក់ទងនីតិវិធីរបស់តុលាការនៅពេលនេះលោកស្រីយល់ថា បើឆាប់មានការជំនុំជម្រះ ក៏ជាការល្អដែរ ដើម្បីបញ្ជាក់ ថាពួកគេនឹងត្រូវមានទោស ឬគ្មានទោស៖ «គេបញ្ចប់សំណុំរឿងនេះដាក់ទៅជម្រះក៏ល្អម្យ៉ាងដែរព្រោះអីអាចដឹងថា មានជាប់ទោសពីបទយ៉ាងម៉េចមានទោសកម្រិតណាអាចប្ដឹងទាស់ទៅឧទ្ធរណ៍ទៀត»។
លោក ឆាយ រដ្ឋ អតីតមន្ត្រីគណបក្សសង្គ្រោះជាតិ ធ្លាប់ត្រូវតុលាការខេត្តព្រះសីហនុ ចោទប្រកាន់ម្ដងរួចមកហើយកាលពីឆ្នាំ២០១៧ ពីបទញុះញង់។ កាលណោះតុលាការសម្រេច ឱ្យលោកជាប់ពន្ធនាគាររយៈ៨ខែ។ ប៉ុន្តែទាំងសង្គមស៊ីវិល និងភរិយាលោក ឆាយ រដ្ឋ ហៅការចោទប្រកាន់ លើអតីតមន្ត្រីបក្សប្រឆាំងម្ដងហើយសម្តើងទៀតលើករណីដីធ្លីនេះ ថាជារឿងនយោបាយច្រើនជាងករណីជម្លោះដីធ្លី៕