តុលាការកំពូលបន្តរក្សាបទចោទលើសមាជិកបក្សប្រឆាំងលោក គង់ ម៉ាស់
2020.07.15
តុលាការកំពូល សម្រេចតម្កល់សាលដីកាផ្ដន្ទាទោសរបស់សាលាឧទ្ធរណ៍ភ្នំពេញលើសមាជិកគណបក្សសង្គ្រោះជាតិ លោក គង់ ម៉ាស់ ទុកជាបានការដដែល នៅព្រឹកថ្ងៃទី១៥ ខែកក្កដា។ មេធាវីការពារក្ដី និងសង្គមស៊ីវិល យល់ថាសេចក្ដីសម្រេចរបស់តុលាការជាន់ខ្ពស់មួយនេះ មិនមានជំហរឯករាជ្យ។
ប្រធានក្រុមប្រឹក្សាជំនុំជម្រះនៃតុលាការកំពូល លោក យូរ ឧត្តរា អះអាងថា ការសម្រេចបន្តរក្សាបទចោទ និងបន្តឃុំខ្លួនសមាជិកបក្សប្រឆាំង លោក គង់ ម៉ាស់ នៅក្នុងពន្ធនាគារព្រៃសតទៅទៀតនេះ ដោយសារសេចក្ដីសម្រេចរបស់សាលាឧទ្ធរណ៍ភ្នំពេញកន្លងមក មានសំអាងហេតុត្រឹមត្រូវ និងគ្រប់គ្រាន់តាមផ្លូវច្បាប់។ ការប្រកាសសាលដីកានេះ ធ្វើឡើងដោយគ្មានវត្តមានលោក គង់ ម៉ាស ដូច កាលពីថ្ងៃបើកសវនាការដែរ។
មេធាវីការពារក្ដីឲ្យលោក គង់ ម៉ាស់ គឺលោក សំ សុគង់ លើកឡើងថា សេចក្ដីសម្រេចរបស់តុលាការកំពូលនេះ គឺអយុត្តិធម៌ចំពោះកូនក្តីរបស់លោក។ លោកបន្តថា រឿងនេះ មិនគួរមានការ ចោទប្រកាន់តាំងពីដំបូងមកម៉្លេះ ព្រោះកូនក្ដីរបស់លោក គ្រាន់តែបង្ហោះសាររិះគន់ភាព អសកម្មភាពរបស់ថ្នាក់ដឹកនាំរដ្ឋាភិបាល ក្នុងនាមជាអ្នកនយោបាយ និងស្របតាមច្បាប់ប៉ុណ្ណោះ៖ «អង្គហេតុ ឬការដែលលោក គង់ ម៉ាស់ គាត់បានធ្វើនេះ គឺមិនមែនជាបទល្មើសដូចការចោទប្រកាន់ទេ តែគ្រាន់តែការប្រើប្រាស់សិទ្ធិសេរីភាពជាពិសេសសិទ្ធិក្នុងការបញ្ចេញមតិ ហើយនិងសិទ្ធិជួបជុំដោយសន្តិវិធីដែលមានបញ្ញត្តិក្នុងរដ្ឋធម្មនុញ្ញមាត្រា៤១ និង ៤២។ ក្នុងប្រទេសប្រជាធិបតេយ្យគឺការរិះគន់ទៅថ្នាក់ដឹកនាំជារឿងធម្មតា ហើយការរិះគន់នោះ ថ្នាក់ដឹកនាំ គួរតែពិចារណាដោះស្រាយនិងឆ្លើយតបទៅតាមបញ្ហាដែលពួកគាត់រិះគន់ជាជាងចាប់ពួកគាត់ឲ្យទទួលទោស»។
ប្រពន្ធរបស់លោក គង់ ម៉ាស់ គឺលោកស្រី កុល សាត ថ្លែងថា សាលាដីការបស់តុលាការកំពូលនេះ គឺមិនអាចទទួលយកបានឡើយ ហើយធ្វើឲ្យលោកស្រី បាត់បង់ជំនឿទាំងស្រុងលើតុលាការគ្រប់ជាន់ថ្នាក់នៅកម្ពុជា៖ «នៅសុខៗចាប់ប្ដីរបស់ខ្ញុំដាក់គុកជិតពីរឆ្នាំហើយយើងប្តឹងច្រើនកន្លែងច្រើនលើកច្រើនសារហើយនៅតែដដែលអ៊ីចឹង ដូច្នេះសម្រាប់ខ្ញុំអស់ជំនឿទៅលើតុលាការហើយ»។
នគរបាលរាជធានីភ្នំពេញ បានចាប់ខ្លួនលោក គង់ ម៉ាស់ ជាសមាជិកក្រុមការងារគណបក្សសង្គ្រោះជាតិខេត្តស្វាយរៀង កាលពីថ្ងៃទី១៦ ខែមករា ឆ្នាំ២០១៩។ លោកជាប់ទោស ២ករណី គឺទី១ សាលាដំបូងរាជធានីភ្នំពេញ ផ្ដន្ទាទោសឲ្យជាប់ពន្ធនាគារ ១៨ខែ ពីបទប្រមាថ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមបណ្ដឹងរបស់អគ្គស្នងការនគរបាលជាតិ លោក នេត សាវឿន។ ចំណែកករណីទី២ តុលាការខេត្តស្វាយរៀងបានកាត់ទោសលោកឱ្យជាប់ពន្ធនាគារ ១៥ថ្ងៃ ពីបទបរិហារកេរ្តិ៍ និងញុះញង់ឱ្យពលរដ្ឋស្អប់អ្នករាជការសាធារណៈ តាមបណ្ដឹងរបស់អតីតអភិបាលស្រុករមាសហែក លោក ពេញ ជា។ សំណុំរឿងប្រឆាំងលោក គង់ ម៉ាស់ នេះ កើតឡើងក្រោយពេលលោកបង្ហោះ សារលើហ្វេសប៊ុក (Facebook) ទាក់ទងនឹងយុទ្ធនាការម្រាមដៃស្អាតមុនការបោះឆ្នោតឆ្នាំ២០១៨ និងមតិរិះគន់ជុំវិញការដឹកនាំបែបអសកម្មរបស់រដ្ឋាភិបាល និងមន្ត្រីរបបលោក ហ៊ុន សែន។ អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក ស៊ឹង សែនករុណា មានប្រសាសន៍ថា ការវិនិច្ឆ័យលើរឿងក្ដីដែលពាក់ព័ន្ធនឹងអ្នកនយោបាយ ដូចជា ករណីលោក គង់ ម៉ាស់ នេះ គឺតុលាការមិនមានជំហរឯករាជ្យនោះឡើយ។ លោកព្រួយបារម្ភថា ការផ្ដន្ទាទោសឲ្យអ្នកនយោបាយប្រឆាំងរូបនេះជាប់ពន្ធនាគារជិតពីរឆ្នាំដោយសាររឿងបញ្ចេញមតិតាមហ្វេសប៊ុក អាចធ្វើឲ្យសហភាពអឺរ៉ុប មើលឃើញពីការរំលោភសិទ្ធិមនុស្ស និងសិទ្ធិនយោបាយបន្ថែមទៀត ហើយសម្រេចចិត្តដកប្រព័ន្ធអនុគ្រោះពន្ធ EBA ២០ភាគរយជាផ្លូវការពីកម្ពុជា នៅថ្ងៃទី១២ ខែសីហា ខាងមុខ៖ «យើងតែងតែកត់សម្គាល់បែបនេះ អ៊ីចឹងហើយរឿងរ៉ាវនៃសកម្មជននយោបាយទាំងអស់នេះ បើសិនជាស្ថានភាពនយោបាយនៅតែស្ថិតក្នុងភាពអាប់អួបែបនេះ មិនអាចមានភាពល្អប្រសើរសម្រាប់អ្នកដែលជាប់ឃុំដោយសាររឿងនយោបាយ ដែលអាចមានសេរីភាពឬការទម្លាក់ចោលការចោទប្រកាន់អីទៅរួចទេ ប៉ុន្តែបើស្ថានភាពនយោបាយធូរស្រាល យើងឃើញហើយថា មានការដោះលែង ឬអន្តរាគមន៍សឹងតែគ្រប់រឿងបើគេចង់ដោះស្រាយ»។
មេធាវី សំ សុគង់ ឲ្យដឹងថា គិតត្រឹមពាក់កណ្តាលខែកក្កដានេះ លោក គង់ ម៉ាស់ បានជាប់ឃុំក្នុងពន្ធនាគារព្រៃស (ម១) ជាង ១៧ខែហើយ ហើយកូនក្តីរបស់លោក អាចនឹងត្រូវដោះលែងឲ្យមានសេរីភាព នៅថ្ងៃទី៣ ខែសីហាខាងមុខ បន្ទាប់ពីអនុវត្តទោសគ្រប់ចំនួនកំណត់ទាំងពីរសំណុំរឿង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។