តុលាការ​កំពូល​នឹង​ប្រកាស​សាលដីកា​រឿង​ក្តី​លោក រ៉ាត់ រត្នមុនី នៅ​ថ្ងៃ​ទី១៥ កក្កដា

ដោយ សុជីវី
2020-07-02
អ៊ីម៉ែល
មតិ
Share
បោះពុម្ព
លោក រ៉ាត់ រត្នមុនី សកម្មជន​សិទ្ធិ​ការងារ លើក​បង្ហាញ​ភាព​រឹងមាំ​ពេល​នគរបាល​បណ្ដើរ​ចូល​សវនាការ​នៅ​តុលាការ​កំពូល នៅ​ថ្ងៃ​ទី១៥ ខែកក្កដា ឆ្នាំ២០២០។
លោក រ៉ាត់ រត្នមុនី សកម្មជន​សិទ្ធិ​ការងារ លើក​បង្ហាញ​ភាព​រឹងមាំ​ពេល​នគរបាល​បណ្ដើរ​ចូល​សវនាការ​នៅ​តុលាការ​កំពូល នៅ​ថ្ងៃ​ទី១៥ ខែកក្កដា ឆ្នាំ២០២០។
រូប៖ គេផ្ដល់ឱ្យ

តុលាការ​កំពូល​​នឹង​ប្រកាស​សាលដីកា​រឿង​ក្តី​សកម្មជន​សិទ្ធិ​ការងារ លោក រ៉ាត់ រត្នមុនី នៅ​ពាក់​កណ្ដាល​ខែ​កក្កដា ក្រោយ​បញ្ចប់​សវនាការ​នៅ​ថ្ងៃ​ទី១ កក្កដា។ អ្នក​ការពារ​សិទ្ធិមនុស្ស​ស្នើឱ្យ​តុលាការ​ជាន់ខ្ពស់​មួយ​នេះ ​ផ្តល់​យុត្តិធម៌​ដល់​លោក រ៉ាត់ រត្នមុនី ព្រោះ​លោក​មិន​បាន​ប្រព្រឹត្ត​កំហុស​អ្វី​ឡើយ។

សហ​មេធាវី​ការពារ​ក្តី​ឱ្យ​លោក រ៉ាត់ រត្នមុនី លោក សំ ទិត្យសីហា ឱ្យ​អាស៊ី​សេរី​ដឹង​ថា សវនាការ​នេះ​មិន​មាន​ការ​ចូល​រួម​ពី​ភាគី​ដើម​បណ្ដឹង​នោះ​ទេ ដែល​ធ្វើ​ឱ្យ​បាត់​ប្រយោជន៍​សម្រាប់​កូន​ក្តី​របស់​លោក​ ក្នុង​ការ​សួរ​​ដេញដោល​ចំពោះ​មុខ។ ម្យ៉ាងវិញទៀត សាក្សី​សំខាន់​មួយ​រូប​ដែល​អាច​បញ្ជាក់​ពី​ភាព​ស្អាតស្អំ​របស់​កូន​ក្ដី​លោក ឈ្មោះ អ៊ុន ស្រីពេជ្រ ក៏​តុលាការ​មិន​បាន​ហៅ​មក​សួរ​នាំ​ដែរ។ មេធាវី​សមាគម​អាដហុក (ADHOC) រូប​នេះ​ថ្លែង​ទៀត​ថា ខាង​តំណាង​មហាអយ្យកា​បាន​ធ្វើ​សេចក្តី​សន្និដ្ឋាន​ដាក់​បន្ទុក និង​បន្ត​ចោទ​ប្រកាន់​​កូន​ក្ដី​របស់​លោក​ដដែល។

ទោះ​ជា​បែប​នេះ​ក្តី លោក សំ ទិត្យសីហា សង្ឃឹម​ថា ក្រុម​ប្រឹក្សា​ជំនុំ​ជម្រះ​តុលាការ​កំពូល​នឹង​ផ្តល់​យុត្តិធម៌​ដល់​កូន​ក្ដី​របស់​លោក ព្រោះ​គាត់​មិន​បាន​ប្រព្រឹត្ត​កំហុស​ដូច​ការ​ចោទ​ប្រកាន់​ឡើយ។ លោក​បក​ស្រាយ​ថា កូន​ក្តី​របស់​លោក​ត្រឹម​តែ​ជា​អ្នក​បកប្រែ​ឱ្យ​សារព័ត៌មាន RT (Russia Today) របស់​រុស្ស៊ី មិន​មែន​ជា​អ្នក​សម្រេចចិត្ត​ក្នុង​ការ​ផលិត​ភាពយន្តឯកសារ “ម្ដាយ​ខ្ញុំ​ លក់​ខ្ញុំ” នោះ​ឡើយ។ ជាពិសេស លោក​ថា កូន​ក្តី​របស់​លោក​មិន​បាន​ផ្តល់​លុយ​ឱ្យ​តួអង្គ ដើម្បី​និយាយ​ប្រឌិត​សាច់​រឿង​ ដូច​ការ​ចោទ​ប្រកាន់​របស់​អាជ្ញាធរ​នោះ​ទេ៖ «ការ​ប្រកាស​សាលដីកា​នៅ​ក្នុង​ថ្ងៃ​ទី១៥ ខែ​កក្កដា ឆ្នាំ២០២០ ក្នុង​នាម​ខ្ញុំ​ជា​មេធាវី​ការពារ​សិទ្ធិ​ឱ្យ​លោក រ៉ាត់ រត្នមុនី សង្ឃឹមថា ក្រុមប្រឹក្សា​ជំនុំ​ជម្រះ​​នឹង​ពិចារណា​ផ្ដល់​នូវ​យុត្តិធម៌​ពិត​ប្រាកដ​មួយ​ជូន​ដល់​លោក រ៉ាត់ រត្នមុនី។ ទោះបី​ជា​គាត់​បាន​អនុវត្ត​ទោស​ក្នុង​ពន្ធនាគារ​ដោយ​មិន​ទាន់​បាន​ស្វែង​រក​ការពិត​គ្រប់គ្រាន់ ក៏​គាត់​នៅ​តែ​ចង់​បាន​នូវ​អ្វី​ដែល​ហៅ​ថា យុត្តិធម៌​សម្រាប់​ខ្លួន​គាត់»

ប្រធាន​សហព័ន្ធ​សហជីព​កម្មករ​សំណង់​កម្ពុជា (CCTUF) ​លោក រ៉ាត់ រត្នមុនី ត្រូវ​បាន​អាជ្ញាធរ​ថៃ​​​​ចាប់ខ្លួន​ បញ្ជូន​មក​ឱ្យ​អាជ្ញាធរ​កម្ពុជា កាល​ពី​ចុង​ឆ្នាំ២០១៨ នៅ​ពេល​លោក និង​គ្រួសារ​កំពុង​​ព្យាយាម​សុំ​ទិដ្ឋាការ​ទៅ​ប្រទេស​ហូឡង់ (Netherland) ដើម្បី​គេច​ចេញ​ពី​ការ​ធ្វើ​ទុក្ខ​បុក​ម្នេញ។ អាជ្ញាធរ​ខ្មែរ​បាន​ចោទ​លោក​ថា បាន​ផ្ដល់​លុយ​ឱ្យ​ប្រភព ដើម្បី​និយាយ​ប្រឌិត​សាច់​រឿង នៅ​ក្នុង​ភាពយន្ត​ឯកសារ “ម្ដាយ​ខ្ញុំ លក់​ខ្ញុំ” ប៉ុន្តែ​តួអង្គ​ម្នាក់​នៅ​ក្នុង​ភាពយន្ត​ឯកសារ​នោះ ឈ្មោះ អ៊ុន ស្រីពេជ្រ ធ្លាប់​អះអាង​ប្រាប់​អាស៊ី​សេរី​ថា អ្វី​ដែល​នាង​និយាយ គឺ​ជា​រឿង​ពិត​ផ្ទាល់ខ្លួន មិន​មាន​ការ​ផ្ដល់​លុយ​កាក់​ឱ្យ​និយាយ​កុហក​នោះ​ឡើយ៖ «​នេះ​ជា​រឿង​ការពិត​របស់​ខ្ញុំ ខ្ញុំ​លាក់​ទុក​ក្នុង​ចិត្ត​ជា​យូរ​ហើយ ខ្ញុំ​ចង់​បញ្ចេញ​ឱ្យ​ធូរ​ក្នុង​អារម្មណ៍​របស់​ខ្ញុំ​ ហើយ​​លោក​គ្រូ​មុនី ក៏​គាត់​អត់​មាន​ត្រូវ​​ខុស​អ្វី​ដែរ ព្រោះ​មុន​ពេល​សម្ភាស គាត់​និយាយ​ដែរ​ថា ហ៊ាន​ត​ទល់ ឬ​អត់? ខ្ញុំ​ថា ខ្ញុំ​ហ៊ាន​ ខ្ញុំ​អត់​ដែល​ខ្លាច​អ្វី​ផង។ ខ្ញុំ​ចង់​ឱ្យ​អាជ្ញាធរ​ និង​ក្រុម​ប៉ូលិស​ដោះ​លែង​លោក​គ្រួ​ខ្ញុំ​វិញ​ទៅ ព្រោះ​គាត់​អត់​មាន​ធ្វើ​រឿង​​ខុស​ឆ្គង ឬ​ក៏​សូក​លុយ​ឱ្យ​គេ​ថត​រឿង​និយាយ​ប្រឌិត​ទេ ព្រោះ​រឿង​នេះ​ជា​រឿង​ការពិត»

ទោះ​ជា​បែប​នេះ​ក្តី តុលាការ​ក្រុង​ភ្នំពេញ​បាន​កាត់​ទោស​លោក រ៉ាត់ រត្នមុនី ឱ្យ​ជាប់​ពន្ធនាគារ ២ឆ្នាំ ពី​បទ “ញុះញង់​ឱ្យ​មាន​ការ​រើសអើង” ហើយ​តម្រូវ​ឱ្យ​លោក​​បង់​សំណង​ដល់​ដើម​បណ្ដឹង ដែល​ជា​តួអង្គ​ម្ដាយ​កូន​នៅ​ក្នុង​ភាពយន្ត​ឯកសារ​នោះ ចំនួន​ជិត ២ម៉ឺន​ដុល្លារ​អាមេរិក។ សាលា​ឧទ្ធរណ៍​ភ្នំពេញ​បាន​តម្កល់​សេចក្ដី​សម្រេច​នេះ​ទុក​ជា​បាន​ការ​ដដែល ទោះ​ជា​សវនាការ​ធ្វើ​ឡើង​ដោយ​គ្មាន​ការ​ចូល​រួម​ពី​ភាគី​ដើម​បណ្ដឹង​ក៏ដោយ។

ប្រធាន​សហភាព​សហជីព​កម្ពុជា លោក រ៉ុង ឈុន មាន​ប្រសាសន៍​ថា ​​លោក រ៉ាត់ រត្នមុនី មិន​បាន​ប្រព្រឹត្ត​កំហុស​ដូច​ការ​ចោទ​ប្រកាន់​ឡើយ។ លោក​ជឿ​ថា ការ​ផ្ដន្ទាទោស​សហការី​របស់​លោក​រូប​នេះ​​ពី​សំណាក់​តុលាការ​ក្រុង​ភ្នំពេញ និង​សាលាឧទ្ធរណ៍​ភ្នំពេញ​នោះ ជា​រឿង​លម្អៀង និង​រង​ឥទ្ធិពល​នយោបាយ។ លោក​បន្ថែម​ថា ប្រសិន​បើ​តុលាការ​កំពូល​សម្រេច​ក្តី​នេះ​ដោយ​ឯករាជ្យ នោះ​លោក រ៉ាត់ រត្នមុនី នឹង​ទទួល​បាន​យុត្តិធម៌​វិញ៖ «យើង​មើល​ឃើញ​ថា គាត់​ពុំ​មាន​កំហុស​ឆ្គង​អ្វី​ទេ គ្រាន់តែ​ជា​អ្នក​បកប្រែ​ឱ្យ​អ្នក​សារព័ត៌មាន ហើយ​បែរ​ជា​អាជ្ញាធរ​​ និង​តុលាការ​ឃុំ​ខ្លួន​គាត់​មក​ដល់​ពេល​នេះ ហើយ​មិន​ផ្ដល់​សេរីភាព​ឱ្យ​គាត់​ឡើងវិញ ហើយ​ខ្ញុំ​គិត​ថា នៅ​ពេល​ថ្ងៃ​១៥ នេះ​ តុលាការ​កំពូល​នឹង​ផ្ដល់​យុត្តិធម៌​ជូន​គាត់»

គិត​ត្រឹម​ដើម​ខែ​កក្កដា​នេះ លោក រ៉ាត់ រត្នមុនី បាន​ជាប់​ឃុំ​ក្នុង​ពន្ធនាគារ​ព្រៃស​អស់​រយៈពេល​ជាង ១៨ខែ​មក​ហើយ ស្រប​ពេល​ទោស​ក្នុង​ពន្ធនាគារ​របស់​លោ​ក​មាន​រយៈពេល ២៤ខែ។ ប្រពន្ធ​របស់​លោក គឺ​អ្នក​ស្រី ឡុង គីមហ៊ាង ដែល​ជា​អតីត​សកម្មជន​សិទ្ធិ​លំនៅឋាន បាន​នាំ​កូន​ប្រុស​តូច​អាយុ​ជាង ២ឆ្នាំ ​រត់​ភៀសខ្លួន​ទៅ​ប្រទេស​ថៃ កាល​ពី​ខែ​ឧសភា ឆ្នាំ២០១៩ ក្រោយ​ពេល​មាន​​​​ជន​​មិន​​ស្គាល់​មុខ​​តាម​​ឃ្លាំមើល​សកម្មភាព​របស់​អ្នកស្រី និង​មាន​ស្ត្រី​មិន​​ស្គាល់​អត្តសញ្ញាណ​មួយ​ក្រុម​ទៀត ​បាន​ចេញ​មក​អុក​ឡុក​រំខាន​ការ​​តវ៉ា​របស់​អ្នកស្រី​នៅ​មុខ​ស្ថានទូត​រុស្ស៊ី ទី​ដែល​អ្នក​​ស្រី​បាន​​លើក​​បដា​តវ៉ា​ជា​រៀង​រាល់​សប្ដាហ៍ ដើម្បី​ស្នើសុំ​អន្តរាគមន៍​​ឱ្យ​​មាន​ការ​ដោះ​លែង​ស្វាមី។ ទីភ្នាក់ងារ​អង្គការ​សហប្រជាជាតិ​ទទួល​បន្ទុក​​ជន​​ភៀស​ខ្លួន​ប្រចាំ​នៅ​ប្រទេស​ថៃ (UNHCR Thailand) បាន​​ផ្ដល់​ឋានៈ​ជា​ជន​​ភៀស​ខ្លួន​ដល់​អ្នក​​ស្រី និង​​កូន​ប្រុស ដើម្បី​ទទួល​បាន​កិច្ច​គាំពារ​ផ្នែក​សុវត្ថិភាព និង​ជំនួយ​សប្បុរសធម៌​មួយ​ចំនួន​ទៀត។

សង្គម​ស៊ីវិល​ជាតិ និង​អន្តរជាតិ នៅ​តែ​ទាមទារ​ឱ្យ​អាជ្ញាធរ​កម្ពុជា​ទម្លាក់​ចោល​បទ​ចោទ​ប្រកាន់ និង​ដោះលែង​លោក រ៉ាត់ រត្នមុនី ឱ្យ​មាន​សេរីភាព​វិញ ដោយសារ​តែ​លោក​មិន​ទទួល​បាន​សវនាការ​ប្រកប​ដោយ​យុត្តិធម៌​ឡើយ៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល