តុលាការ​កំពូល​គ្រោង​ប្រកាស​សាលដីកា​លើ​សំណុំ​រឿង​លោក គង់ ម៉ាស់ នៅ​សប្ដាហ៍​ក្រោយ

ដោយ ហេង រស្មី
2020-07-08
អ៊ីម៉ែល
មតិ
Share
បោះពុម្ព
លោក គង់ ម៉ាស់ សកម្មជន​គណបក្ស​សង្គ្រោះ​ជាតិ នៅ​មុន និង​ក្រោយ​ពេល​ជាប់​ឃុំ​ឃាំង។
លោក គង់ ម៉ាស់ សកម្មជន​គណបក្ស​សង្គ្រោះ​ជាតិ នៅ​មុន និង​ក្រោយ​ពេល​ជាប់​ឃុំ​ឃាំង។
រូប៖ លោកស្រី កុល សាត ភរិយា​លោក គង់ ម៉ាស់

តុលាការ​កំពូល នឹង​ប្រកាស​សាលដីកា​លើ​សំណុំ​រឿង ប្រមាថ និង​ញុះញង់​ឱ្យ​ប្រព្រឹត្ត​បទឧក្រិដ្ឋ​ជា​អាទិ​របស់​សមាជិក​បក្ស​ប្រឆាំង​លោក គង់ ម៉ាស់ នៅ​ថ្ងៃ​ទី១៥ ខែ​កក្កដា​សប្ដាហ៍​ក្រោយ ។ មេធាវី​ការពារ​ក្តី និង​ប្រពន្ធ​លោក គង់ ម៉ាស់ ​​​រំពឹង​ថា​ តុលាការ​កំពូល នឹង​ទម្លាក់​ចោល​បទ​ចោទ​ប្រកាន់ និង​ដោះ​លែង​លោក គង់ ម៉ាស់ ​​មាន​​សេរីភាព​ឡើង​វិញ។

ប្រធាន​ក្រុម​ប្រឹក្សា​ជំនុំជម្រះ​នៃ​តុលាការ​កំពូល ​លោក ​យូរ ​ឧត្តរា  ​បាន​បើក​សវនាការ​លើ​បណ្តឹង​ សាទុក្ខ​របស់​សមាជិក​បក្ស​ប្រឆាំង​លោក​ គង់ ​ម៉ាស់ ​នៅ​ព្រឹក​ថ្ងៃ​ទី៨​ ខែ​កក្កដា ​ដោយ​អវត្តមាន​លោក គង់ ​ម៉ាស់។ នៅ​ក្នុង​បន្ទប់​សវនាការ​នេះ ​តុលាការ ​មិនបាន​សួរ​ដេញដោល​អ្វី​នោះ​ទេ ដោយ​គ្រាន់តែ​អនុញ្ញាត​ឲ្យ​តំណាង​អយ្យការ និង​តំណាង​មេធាវី​ការពារ​ក្តី​ជន​ជាប់​ចោទ ​ឡើង​ធ្វើ​សេចក្ដី​សន្និដ្ឋាន​ម្ដង​ម្នាក់​ប៉ុណ្ណោះ។

តំណាងអយ្យការអមតុលាការកំពូល លោក​ ជុំ ​សំបាន​ ស្នើសុំឲ្យ​តុលាការ​បន្តរក្សា​បទចោទ​ប្រកាន់ លើលោក​​គង់ ​ម៉ាស់​ ដដែល​ ដោយសន្និដ្ឋានថា​ សេចក្តី​សម្រេចរបស់​សាលាឧទ្ធរណ៍ក្រុងភ្នំពេញ និងសាលាដំបូង​រាជនីភ្នំពេញកន្លងទៅ ត្រឹមត្រូវ​តាមនីតិវិធីច្បាប់ ​ហើយលោក ​គង់ ម៉ាស់ ​ខ្លួនឯង ក៏បានទទួលស្គាល់ថា ​ពិតជាបានធ្វើសកម្មភាព​បង្ហោះសារ​រិះគន់រដ្ឋាភិបាល​ប្រាកដមែន។

ចំណែក​មេធាវី​ការពារ​ក្តីឲ្យ ​លោក​ គង់​ ម៉ាស់​ គឺ​លោក ​សំ ​សុគង់​ នៅ​តែ​បន្ត​ទាមទារ​ឲ្យ​តុលាការ​ កំពូល ​លុបចោល​សេចក្ដី​សម្រេច​របស់​តុលាការ​ជាន់​ទាប ​ហើយ​ទម្លាក់​ចោល​ការ​ចោទ​ប្រកាន់ និង​ដោះលែង​កូន​ក្ដី​របស់​លោក​ឲ្យ​មាន​សេរីភាព​ឡើង​វិញ។ មេធាវី​រូប​នេះ​យល់​ថា សកម្មភាព​របស់​កូន​ក្តី​លោក​មិន​ចូល​ក្នុង​អំពើ​ញុះញង់​ ឬ​បង្ក​ឲ្យ​មាន​ភាព​ចលាចល​ណា​មួយ​ ដូច​ការ​ចោទ​ប្រកាន់​នោះ​ទេ គឺ​គ្រាន់​តែ​បញ្ចេញ​មតិ​រិះគន់​បែប​ស្ថាបនា ដែល​ធានា​ការពារ​ដោយ​ច្បាប់​ជាតិ​ និង​អន្តរជាតិ​ប៉ុណ្ណោះ៖ «កូន​ក្ដី​មាន​ការ​ទទួល​ស្គាល់​ថា មាន​ការ​ផុស​រូបភាព និង​សរសេរ​ពាក្យពេចន៍​តាម​បណ្ដាញ​សង្គម​ហ្វេសប៊ុក (facebook) គឺ​ជា​រិះគន់​ទៅ​ខាង​រដ្ឋាភិបាល និង​ថ្នាក់​ដឹក​នាំ​តាម​បែប​ស្ថាបនា ក៏​ដូច​ជា​ក្នុង​សង្គម​ប្រជាធិបតេយ្យ»

នគរបាល​រាជធានី​ភ្នំពេញ បាន​ចាប់ខ្លួន​លោក គង់ ម៉ាស់ ជា​សមាជិក​ក្រុមការងារ​គណបក្ស​សង្គ្រោះ​ជាតិ​ខេត្ត​ស្វាយរៀង កាលពី​ថ្ងៃ​ទី​១៦ ខែ​មករា ឆ្នាំ​២០១៩។ សាលាដំបូង​រាជធានី​ភ្នំពេញ ផ្ដន្ទាទោស​ឱ្យ​ជាប់​ពន្ធនាគារ ១៨​ខែ​ពី​បទ​ប្រមាថ និង​ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍ តាម​បណ្ដឹង​របស់​អគ្គស្នងការ​នគរបាល​ជាតិ លោក នេ​ត សាវឿន បន្ទាប់ពី​លោក​បាន​សរសេរ​សារ​បង្ហោះ​នៅ​តាម​បណ្ដាញ​សង្គម​ហ្វេសប៊ុក។ សារ​ដែល​លោក​បង្ហោះ​នោះ រួម​មាន យុទ្ធនាការ​ម្រាម​ដៃ​ស្អាត​កាលពីមុន​បោះ​ឆ្នោត សារ​រិះគន់​អំពី​ភាព អសកម្ម​មួយ​ចំនួន​របស់​រដ្ឋាភិបាល ​និង​ករណី​ចុង​ក្រោយ​រឿង​តម្លៃ​កសិផល​ចុះថោក​ក្រោយ ពី​សហភាព​អឺរ៉ុប​យក​ពន្ធ​អង្ករ​កម្ពុជា​ជា​ដើម។

ប្រពន្ធ​របស់​លោក ​គង់ ម៉ាស់ ​គឺ​លោកស្រី កុល សាត ថ្លែង​ថា ការ​ចាប់ និង​ការ​ចោទ​ប្រកាន់​ប្តី​លោក ​គឺ​ពាក់ព័ន្ធ​នឹង​រឿង​នយោបាយ​ មិនមែន​ជា​ការ​អនុវត្ត​ច្បាប់​នោះ​ទេ។ លោកស្រី​​រំពឹង​ថា ​តុលាការ​ កំពូល ​គួរតែ​មាន​សេចក្ដី​ក្លាហាន​ទម្លាក់​ចោល​បទចោទប្រកាន់​ទាំង​គ្មាន​មូលដ្ឋាន​ ដើម្បី​ផ្តល់​យុត្តិធម៌ និង​សង​ភាព​ស្អាតស្អំ​ដល់​ប្តី​លោក​ស្រី​ឡើង​វិញ ខណៈ​ប្ដី​លោកស្រី ជាប់​ពន្ធនាគារ​ទាំង​អយុត្តិធម៌​ជាង ​១៧ខែ​មក​ហើយ៖ «តុលាការ​គួរ​តែ​ដោះ​លែង​គាត់​ចេញ ហើយ​តាម​ពិត​គាត់​នៅ​សល់​តែ​ប៉ុន្មាន​ថ្ងៃ​ទៀត​ទេ តែ​យើង​ដាក់​បណ្ដឹង​នេះ ដើម្បី​បញ្ជាក់​ពី​ភាព​ស្អាតស្អំ​របស់​យើង។ សម្រាប់​ខ្ញុំ គាត់​ជាប់​ជិត ២ឆ្នាំ​ហើយ ដូច្នេះ​វា​ពិបាក​ណាស់​សម្រាប់​ពួក​ខ្ញុំ»

អ្នក​នាំ​ពាក្យ​សមាគម​ការពារ​សិទ្ធិមនុស្ស ​អាដហុក (ADHOC) លោក​ ស៊ឹង​ សែនករុណា បញ្ចេញ​ទស្សនៈ​ថា សំណុំរឿង​ដែល​មាន​ចរិត​នយោបាយ​បែប​នេះ ​តុលាការ​កំពូល​​ប្រហែល​ជា​គ្មាន​សេចក្តី​ក្លាហាន​ទម្លាក់​ចោល​បទ​ចោទប្រកាន់​ និង​ដោះ​លែង​លោក​ គង់ ​ម៉ាស់ ​នោះ​ទេ ​ទោះ​បី​ជា​ដឹង​ថា សមាជិក​បក្ស​ប្រឆាំង​រូប​នេះ គ្មាន​កំហុស​ក៏​ដោយ៖ «ប្រសិន​ជា​តុលាការ គោរព​នូវ​សិទ្ធិ​ទទួល​បាន​យុត្តិធម៌​សម្រាប់​គាត់ ខ្ញុំ​គិត​ថា តុលាការ ត្រូវ​ទម្លាក់​ចោល​នូវ​បទ​ចោទ​ប្រកាន់ ដើម្បី​ឲ្យ​គាត់​មាន​សេរីភាព​ក្នុង​នាម ជា​ពលរដ្ឋ​ឡើង​វិញ ហើយ​មិន​គួរ​ណា​បន្ត​ឃុំ​ខ្លួន​ទៀត​ទេ។ ប្រសិន​បើ​អនុវត្ត​ច្បាប់​ឲ្យ​បាន​ត្រឹមត្រូវ​មែនទែន​នោះ គឺ​ទម្លាក់​នូវ​បទ​ចោទ​ប្រកាន់​ហើយ គួរ​តែ​ពិនិត្យ​មើល​នៅ​ការអនុវត្ត នីតិវិធី​ខាង​អាជ្ញាធរ​ពាក់ព័ន្ធ​ដែល​ចាត់​វិធានការ​ទៅ​លើ​រឿង​របស់​គាត់ ដែល​មិន​បាន​ត្រឹម​ត្រូវ​នោះ​ទៀត ដើម្បី​ធ្វើ​ឲ្យ​សាធារណជន​ជាតិ និង​អន្តរជាតិ មើល​ឃើញ​ថា គេ​កំពុង​ធ្វើ​កំណែ​ទម្រង់​ដោយ មិន​ប្រកាន់ ឬ​រើសអើង​និន្នាការ​នយោបាយ»

រហូត​ដល់​ថ្ងៃ​នេះ  លោក​ គង់​ ម៉ាស់​ កំពុង​ជាប់​ឃុំ​ក្នុង​ពន្ធនាគារ​ព្រៃ​ស ​(ម១) ជាង ១៧ខែ​ហើយ​ ហើយ​លោក​នឹង​អនុវត្ត​ទោស​​គ្រប់​ចំនួន​កំណត់​ នៅ​ថ្ងៃ​ទី១៩​ ខែ​កក្កដា​ខាង​មុខ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល