យុវជន​ម្នាក់​ត្រូវ​បាន​ចាប់​ខ្លួន​ដោយ​សង្ស័យ​ថា លួច​​ហ្វេសប៊ុក​អ្នកដទៃ​ផ្ញើ​សារ​ឆបោក​ខ្ចី​លុយ

ដោយ អាស៊ីសេរី
2019-06-01
អ៊ីម៉ែល
មតិ
Share
បោះពុម្ព
គេហទំព័រ​ហ្វេសប៊ុក​របស់​នាយកដ្ឋាន​ប្រឆាំង​បទល្មើស​បច្ចេកវិទ្យា ចុះផ្សាយ​ពី​ជនសង្ស័យ​ឈ្មោះ គ្រួច ស៊ីឆៃ ករណី​លួច​គណនីហ្វេសប៊ុក​គេ។
គេហទំព័រ​ហ្វេសប៊ុក​របស់​នាយកដ្ឋាន​ប្រឆាំង​បទល្មើស​បច្ចេកវិទ្យា ចុះផ្សាយ​ពី​ជនសង្ស័យ​ឈ្មោះ គ្រួច ស៊ីឆៃ ករណី​លួច​គណនីហ្វេសប៊ុក​គេ។
រូប​ពីគេហទំព័រ​ហ្វេសប៊ុក​របស់​នាយកដ្ឋាន​ប្រឆាំង​បទល្មើស​បច្ចេកវិទ្យា

សមត្ថកិច្ច​ប្រឆាំង​បទល្មើស​បច្ចេកវិទ្យា និង​ប៉ូលិស​មូលដ្ឋាន​ប៉ុស្តិ៍​ទឹកល្អក់​ទី​២ ខណ្ឌ​ទួលគោក បាន​ឃាត់ខ្លួន​បុរស​ម្នាក់ សង្ស័យ​ពាក់ព័ន្ធ​ករណី លួច​ចូល​ទៅ​ប្រើប្រាស់​គណនី​ហ្វេសប៊ុក (Facebook) របស់​អ្នកដទៃ ហើយ​ផ្ញើ​សារ​ទៅ​ខ្ចី​លុយ​មិត្តភ័ក្ដិ របស់​ម្ចាស់​គណនី​ហ្វេសប៊ុក ដោយ​បង្គាប់​ឱ្យ​ផ្ញើ​លុយ​តាម​ក្រុមហ៊ុន​វេរ​ប្រាក់។

គេហទំព័រ​ហ្វេសប៊ុក​របស់​នាយកដ្ឋាន​ប្រឆាំង​បទល្មើស​បច្ចេកវិទ្យា ចុះផ្សាយ​ថ្ងៃ​ទី​៣១ ឧសភា ថា ជនសង្ស័យ​ឈ្មោះ គ្រួច ស៊ីឆៃ ភេទ​ប្រុស អា​យុ​២២​ឆ្នាំ មុខរបរ មិន​ពិតប្រាកដ ត្រូវ​បាន​ឃាត់ខ្លួន កាលពី​ថ្ងៃ​ទី​៣០ ខែ​ឧសភា នៅ​សង្កាត់​ទឹកល្អក់​ទី​២ តាម​បណ្ដឹង​របស់​ជនរងគ្រោះ ដែល​រង​ការ​លួច​គណនី​ហ្វេសប៊ុក។

សមត្ថកិច្ច​អះអាង​ថា ជនសង្ស័យ បាន​សារភាព​ធ្លាប់​ឆបោក​ប្រាក់ តាមរយៈ​ការ​លួច​ចូល​ទៅ​ប្រើប្រាស់​គណនី​ហ្វេសប៊ុក​បែបនេះ ២០០​គណនី​ហើយ ក្នុង​នោះ​ជាង ៥០​គណនី ជនសង្ស័យ​ទទួល​បាន​ជោគជ័យ គឺ​ទទួល​លុយ​ដែល​គេ​ផ្ញើ​ទៅ​ឱ្យ។ នេះ​ជា​ករណី​លើក​ទី​១ ដែល​សមត្ថកិច្ច​អះអាង​ថា ចាប់​ជនសង្ស័យ​លួច​គណនី​ហ្វេសប៊ុក​អ្នកដទៃ ដើម្បី​ផ្ញើ​សារ​ឆបោក ឱ្យ​មាន​ការ​ផ្ញើ​ប្រាក់​មក​ឱ្យ​ខ្លួន តាម​ក្រុមហ៊ុន​ផ្ញើ​លុយ។ កន្លងមក សមត្ថកិច្ច​ធ្លាប់​បង្ក្រាប​ករណី ជនខិលខូច​ប្រើប្រាស់​គណនី​ក្លែងក្លាយ ឬ ឈ្មោះ​រូបភាព ជា​ជនបរទេស ដើម្បី​ផ្ញើ​សារ​ទៅ​ឆបោក​ឱ្យ​ផ្ញើ​លុយ តាម​ធនាគារ​ឱ្យ​ខ្លួន។

សមត្ថកិច្ច​រំលឹក​ឱ្យ​ប្រជាពលរដ្ឋ អ្នកប្រើប្រាស់​បណ្ដាញ​សង្គម​ហ្វេសប៊ុក ត្រូវ​ប្រុងប្រយ័ត្ន​ចំពោះ ករណី មានការ​ផ្ញើ​សារ​តាម​បណ្ដាញ​សង្គម ឬ​ផ្ញើ​សារ​តាម​ប្រព័ន្ធ​អ៊ីនធឺណិត ដោយ​ខ្ចី​ប្រាក់ ឬ​ទាមទារ​ឱ្យ​ផ្ញើ​ប្រាក់ ដើម្បី​ឈ្នះ​រង្វាន់ ឬ​ទទួល​បាន​មរតក​អ្វីមួយ ហើយ​គេ​តម្រូវ​ឱ្យ​ផ្ញើ​ប្រាក់​ទៅ​លេខ​ទូរស័ព្ទ ដែល​មិនមែន​ជា​លេខ​របស់​ម្ចាស់​គណនី​ហ្វេសប៊ុក ព្រោះ​នេះ អាច​ជា​ករណី​ឆបោក។

អាស៊ីសេរី មិន​អាច​សុំ​ការ​បញ្ជាក់​បន្ថែម​ពី​អ្នកនាំពាក្យ​អគ្គស្នងការ​នគរបាល​ជាតិ លោក ឆាយ គឹមខឿន បានទេ ជុំវិញ​ករណី លួច​គណនី​ហ្វេសប៊ុក ដើម្បី​ឆបោក​ប្រាក់​នេះ។ ប៉ុន្តែ​គេហទំព័រ​ហ្វេសប៊ុក​របស់​នាយកដ្ឋាន​ប្រឆាំង​បទល្មើស​បច្ចេកវិទ្យា អះអាង​ថា កំពុង​កសាង​សំណុំរឿង​បញ្ជូន​ទៅ​តុលាការ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល