សមត្ថកិច្ចបានបញ្ជូនជនជាតិចិន ៣នាក់ និងខ្មែរម្នាក់ ទៅសាលាដំបូងរាជធានីភ្នំពេញ កាលថ្ងៃទី២៨ ខែសីហា មិ្សលមិញ ពាក់ព័ន្ធការដឹកជញ្ជូនគ្រឿងញៀនឆ្លងដែនពីអាហ្វ្រិកខាងត្បូង (South Africa) ចូលមកកម្ពុជា។
គេហទំព័ររបស់អគ្គស្នងការនគរបាលជាតិ ឲ្យដឹងថា កាលពីថ្ងៃទី១៩ ខែសីហា កម្លាំងជំនាញនៃមន្ទីរប្រឆាំងគ្រឿងញៀន បានសហការជាមួយគយ និងរដ្ឋាករប្រចាំឃ្លាំងទំនិញ (CARGO) នៃអាកាសយានដ្ឋានអន្តរជាតិភ្នំពេញ បានធ្វើការត្រួតពិនិត្យកញ្ចប់បញ្ញើមិនប្រក្រតី ដែលផ្ញើពីទីក្រុង ចូហេនណេសប៉ើក(JOHANNESBURG) ប្រទេសអាហ្វ្រិកខាងត្បូង ចូលមកកម្ពុជា តាមរយ:ក្រុមហ៊ុន ឌីអេចអិល (DHL)។ កញ្ចប់បញ្ញើនោះ បានបង្កប់លាក់សារធាតុញៀន(រាវ)ប្រភេទ កេតាមីន (KETAMINE ) ក្នុងដបជ័រពណ៌ស ម៉ាកអាឡូ ជែល (ALOE GEL) ចំនួន ៦០ដប។
កម្លាំងជំនាញមន្ទីរប្រឆាំងបទល្មើសគ្រឿងញៀនបានបន្តការស៊ើបអង្កេតឈានទៅបង្ក្រាបនិងចាប់ខ្លួនមនុស្សចំនួន ៤នាក់ និងសារធាតុញៀន កេតាមីន(KETAMIE) ៦០ដប ទម្ងន់ ៥ គីឡូក្រាម នៅចំណុចមុខផ្ទះមួយ ស្ថិតនៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី២៥ ខែសីហា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។