សហដើមបណ្ដឹងម្នាក់ ជាប្រធានសហភាពសហព័ន្ធសហជីពជាតិកម្ពុជា (CCTU) និង ទីប្រឹក្សាក្រសួងការងារ លោក ជួន មុំថុល កំពុងពិចារណា ជាមួយមេធាវី ថាគួរបន្តប្ដឹង ទីប្រឹក្សាសហព័ន្ធសហជីពសេរីកម្មករ លោក ជា មុនី ឡើងឧទ្ធរណ៍ ឬទេ ក្រោយពេលចៅក្រមស៊ើបសួរសាលាដំបូងរាជធានីភ្នំពេញ សម្រេចលើកលែងការចោទប្រកាន់ លោក ជា មុនី ពីបទញុះញង់ឲ្យសហភាពអឺរ៉ុប ដាក់ទណ្ឌកម្ម លើរដ្ឋាភិបាល លោក ហ៊ុន សែន។
សហដើមបណ្ដឹងម្នាក់ ក្នុងចំណោម១២០សហជីព ដែលស្និទ្ធនឹងរបបក្រុងភ្នំពេញ លោក ជួន មុំថុល ប្រាប់ថា ការសម្រេចលើកលែងទោសឲ្យ លោក ជា មុនី ជាឆន្ទានុសិទ្ធិរបស់ចៅក្រម ហើយលោក ត្រូវតែគោរព។ ប៉ុន្តែ លោកនឹងជជែកជាមួយមេធាវីសិនថា គួរដាក់ពាក្យប្ដឹងឧទ្ធរណ៍ឬអត់៖ « ធម្មតាយើងប្ដឹង អ្នកប្ដឹង មានសិទ្ធិប្ដឹងហើយ។ ប៉ុន្តែចៅក្រមមានសិទ្ធិមើលថា តើភស្តុតាង វត្ថុតាងដាក់បន្លុកគ្រប់គ្រាន់អត់។ តែចៅក្រមមានឆន្ទានុសិទ្ធិសម្រេច។ សំណួរ៖តើនឹងប្ដឹងឧទ្ធរណ៍ ឬទេ ? ឆ្លើយ៖ មកដល់ពេលនេះ មិនទាន់នឹកថាម៉េចទេ។ ប៉ុន្តែចំពោះខ្លួនខ្ញុំ គិតថា ចាំមើលគេស្រួលបួល ខ្ញុំទាក់ទងមេធាវី»។
ចៅក្រមស៊ើបសួរសាលាដំបូងរាជធានីភ្នំពេញ លោក សេង រិទ្ធី កាលពីថ្ងៃទី២៨ ខែធ្នូ ឆ្នាំ២០១៨ បានជូនដំណឹងថា ក្រោយស៊ើបសួរចប់សព្វគ្រប់តាមនីតិវិធី ក៏បានសម្រេចលើកលែងការចោទប្រកាន់ លោក ជា មុនី ពីបទញុះញង់ឲ្យប្រព្រឹត្តិបទល្មើសជាអាទិ តាមមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ។
អនុប្រធានសហព័ន្ធសហជីពសេរីកម្មករនៃព្រះរាជាណាចក្រកម្ពុជា លោក ម៉ាន់ សេងហាក់ ឲ្យដឹងថា ខាងសហជីព ទើបទទួលបានសេចក្ដីជូនដំណឹងនេះ នៅថ្ងៃទី២០ កុម្ភៈ។ សហជីពរូបនេះ យល់ថា ចៅក្រមស៊ើបសួរ រកមិនឃើញបទល្មើស ដោយសារលោក ជា មុនី គ្មានទោសតាំងពីដំបូង។ លោក ម៉ាន់ សេងហាក់ ថា បើទោះ លោក ជា មុនី ស្នើឲ្យសហភាពអឺរ៉ុប ឆាប់ដាក់ទណ្ឌកម្មលើរដ្ឋាភិបាល ក៏ការលើកឡើងបែបនេះ ធ្វើឡើងក្រោយពេលលោក ហ៊ុន សែន ដែរ៖ «លោក ជា មុនី ពុំមានធាតុផ្សំ ដើម្បីដាក់បន្ទុកទេ។ អ៊ីចឹង មានន័យថា គាត់ជាមនុស្សស្អាតស្អំ។ ម្យ៉ាងវិញទៀត សហភាពអឺរ៉ុបគេដាក់ទណ្ឌកម្មយើង។ មកដល់ពេលនេះ យើងកំពុងតាមដានយ៉ាងដិតដល់។ ប៉ុន្តែសម្រាប់ខ្ញុំផ្ទាល់គិតថា សហភាពអឺរ៉ុបអាចដក EBA សម្រាប់រដ្ឋាភិបាល»។
អាស៊ីសេរី មិនអាចសុំការបញ្ជាក់ពី ទីប្រឹក្សាសហព័ន្ធសហជីពសេរីកម្មករនៃព្រះរាជាណាចក្រកម្ពុជា លោក ជា មុនី បានទេ នៅថ្ងៃទី២១ កុម្ភៈ។ ប៉ុន្តែ លោក ម៉ាន់ សេងហាក់ ប្រាប់ថាបច្ចុប្បន្ន លោក ជា មុនី កំពុងនៅក្នុងប្រទេសកម្ពុជា ក្រោយពេលលោកបានភៀសខ្លួនចេញក្រៅប្រទេស មួយរយៈ កាលពីចុងឆ្នាំ២០១៧។
កាលពីចុងឆ្នាំ២០១៧ ក្រុមមេដឹកនាំសហជីពស្និទ្ធនឹងរបបក្រុងភ្នំពេញ យ៉ាងតិច ១២០នាក់ បានព្រួតគ្នា ដាក់បណ្ដឹង ប្រឆាំង លោក ជា មុនី ពីបទញុះញង់ឲ្យសហភាពអឺរ៉ុបដាក់ទណ្ឌកម្មរបបក្រុងភ្នំពេញ។ បណ្ដឹងនេះ ធ្វើឡើងបន្ទាប់ពី លោក ជា មុនី បញ្ចេញមតិតាមប្រព័ន្ធផ្សព្វផ្សាយថា បើសហភាពអឺរ៉ុបដាក់ទណ្ឌកម្មលើរដ្ឋាភិបាលលោក ហ៊ុន សែន អ្នករងគ្រោះ គឺរដ្ឋាភិបាលលោក ហ៊ុន សែន។ ដូច្នេះ លោក ហ៊ុន សែន គួរងាកមករកផ្លូវចរចាបញ្ចប់វិបត្តិនយោបាយជាមួយគណបក្សប្រឆាំង។ លោក ជា មុនី បន្តថា ការដាក់សម្ពាធជាបន្តបន្ទាប់របស់សហគមន៍អន្តរជាតិមកលើរដ្ឋាភិបាលលោក ហ៊ុន សែន ពីព្រោះរដ្ឋាភិបាលនេះបានចាប់ខ្លួនប្រធានគណបក្សប្រឆាំង រំលាយគណបក្ស សង្គ្រោះជាតិ និងបានរំលោភសិទ្ធិមនុស្ស ដែលធ្វើឲ្យប៉ះពាល់ដំណើរប្រជាធិបតេយ្យនៅកម្ពុជា។
ប្រធានសហភាពការងារកម្ពុជា លោក អាត់ ធន់ ហៅការលើកលែងការចោទប្រកាន់លើលោក ជា មុនី ជាសញ្ញាល្អមួយ សម្រាប់បើកផ្លូវឲ្យសហជីពរូបនេះ មានឱកាសចូលរួម ជួយការពារផលប្រយោជន៍ឲ្យកម្មករវិញ និងជាផ្នែកមួយ នៃសំណើរបស់សហភាពអឺរ៉ុប តម្រូវឲ្យរដ្ឋាភិបាលស្ដារលទ្ធិប្រជាធិបតេយ្យឡើងវិញ។ លោក អាត់ ធន់ ក៏ស្នើសុំតុលាការឲ្យទម្លាក់បទចោទប្រកាន់លើមេដឹកនាំសហជីពឯករាជ្យដទៃផ្សេងទៀតដែរ៖ «មានន័យថា វាជាសញ្ញាមួយល្អ ដែលរដ្ឋាភិបាលកាលមុន លោកនាយករដ្ឋមន្ត្រីខ្លួនឯងប្រកាសថា នឹងដោះស្រាយសហជីព នឹងដកឲ្យអស់បណ្ដឹង ទម្លាក់ចោល ឬក៏ឲ្យវាចប់រឿង។ តែវាមិនចប់។ ប៉ិនឥឡូវនេះ យើងឃើញករណី លោក ជា មុនី នេះគឺ សញ្ញាល្អ ខាងតុលាការទម្លាក់ចោលបាន។ អ៊ីចឹង វាជាសញ្ញាល្អ ហើយសហគមន៍អឺរ៉ុបត្រូវហើយ ឲ្យតែយើងបានធ្វើទៅតាមការស្នើរបស់គេ តាមកិច្ចព្រមព្រៀងរបស់គេ ទោះបីរូបភាពយ៉ាងម្ដេចក៏ដោយ ជាការទាក់ទាញទឹកចិត្តរបស់គេ»។
ក្រៅពីទាមទារឲ្យលើកលែងការចោទប្រកាន់ប្រឆាំងលើមេដឹកនាំសហជីព សហភាពអឺរ៉ុប ក៏តម្រូវឲ្យរបបលោក ហ៊ុន សែន ដោះលែងប្រធានគណបក្សប្រឆាំង លោក កឹម សុខា បើកសេរីភាពឲ្យគណបក្សប្រឆាំងធ្វើសកម្មភាពនយោបាយពេញទីឡើងវិញ ផ្ដល់នីតិសម្បទាឲ្យមន្ត្រីគណបក្សសង្គ្រោះជាតិ ទាំងអស់វិញ និងបញ្ឈប់សកម្មភាពធ្វើទុក្ខបុកម្នេញ លើអង្គការសង្គមស៊ីវិល ប្រព័ន្ធផ្សព្វផ្សាយឯករាជ្យជាដើម ដោយគ្មានលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។