តំណាង​រាស្ត្រ​បក្ស​ប្រឆាំងរិះគន់​ថា ​រដ្ឋ​សភា​ឯក​បក្ស​​​កែ​រដ្ឋធម្មនុញ្ញ ដោយ​ឥត​ប្រយោជន៍ ព្រោះ​មិន​ហ៊ាន​ជំទាស់​ចិត្ត​លោក ហ៊ុន សែន

ដោយ ទីន ហ្សាការីយ៉ា
2021-10-25
Share
តំណាង​រាស្ត្រ​បក្ស​ប្រឆាំងរិះគន់​ថា ​រដ្ឋ​សភា​ឯក​បក្ស​​​កែ​រដ្ឋធម្មនុញ្ញ ដោយ​ឥត​ប្រយោជន៍ ព្រោះ​មិន​ហ៊ាន​ជំទាស់​ចិត្ត​លោក ហ៊ុន សែន ក្រុម​តំណាង​រាស្ត្រ​រដ្ឋសភា​ឯក​បក្ស ១១១នាក់ រួម​ទាំង​លោក​នាយក​រដ្ឋមន្ត្រី ហ៊ុន សែន ផង ​អនុម័ត​គាំទ្រ​​សេចក្ដី​ព្រាង​ច្បាប់​ស្ដីពី​វិសោធនកម្ម​រដ្ឋធម្មនុញ្ញ​ កំណត់សញ្ជាតិ​តែខ្មែរមួយ​សម្រាប់​អ្នក​ដឹកនាំ នៅ​ក្នុង​សម័យ​ប្រជុំលើកទី៦ នា​ថ្ងៃ​ទី២៥ ខែតុលា ឆ្នាំ២០២១។
រូប៖ ហ្វេសប៊ុកលោក ហេង សំរិន ប្រធានរដ្ឋសភា

តំណាង​រាស្ត្រ​បក្ស​ប្រឆាំងរិះគន់​ថា រដ្ឋ​សភា​ឯក​បក្ស កែ​រដ្ឋធម្មនុញ្ញ​ដោយ​​ឥត​ប្រយោជន៍ ព្រោះ​តែ​មិន​ហ៊ាន​ជំទាស់​ចិត្ត​លោក ហ៊ុន សែន។ អ្នក​វិភាគ​បារម្ភ​ថា ការ​កែ​ច្បាប់​ក្នុង​រូបភាព​សងសឹក​គ្នា​នេះ នឹង​បណ្ដាល​ឱ្យ​ជាតិ​កាន់​តែ​បែក​បាក់​ទៅ។

បើ​ទោះ​ជា​​ការ​កែ​រដ្ឋធម្មនុញ្ញ​កំណត់​សញ្ជាតិ​មេដឹកនាំ​ អាច​ប្រព្រឹត្តិ​ទៅ​យ៉ាង​រលូន​ក្នុង​យ៉ាង​ណា​ក៏​ដោយ ក៏​ក្រុម​អ្នក​រិះគន់ មើល​ឃើញ​ថា វា​មិន​អាច​ក្លាយ​ជា​ច្បាប់​ល្អ និង​មាន​ផល​ប្រយោជន៍​សម្រាប់​ជាតិ​​បាន​ដែរ។

តំណាង​រាស្ត្រ​រដ្ឋសភា​ជាប់​ឆ្នោត​របស់​គណបក្ស​សង្គ្រោះ​ជាតិ ដែល​កំពុង​រស់​នៅ​ប្រទេស​អូស្ត្រាលី​ លោក ងឹម ញ៉េង មិន​គាំទ្រ​នឹង​វិសោធនកម្ម​នេះ​ទេ។ លោក​ថា ការ​កែ​ច្បាប់​ដែល​ធ្វើ​ឲ្យ​ខាត​បង់​ដល់​ប្រយោជន៍​ជាតិ​បែប​នេះ ជា​ការ​បង្កើត​ភាព​អាម៉ាស់​សម្រាប់​សភា​ឯក​បក្ស​ក្នុង​របប​ក្រុង​ភ្នំពេញ៖ «ស​បញ្ជាក់​ឲ្យ​ឃើញ​ថា​ស្ថាប័ន​រដ្ឋសភា ដែល​កើត​ចេញ​ពី​ការ​បោះ​ឆ្នោត​ក្លែងក្លាយ​ហ្នឹង គឺ​ជា​ស្ថាប័ន​ទីងមោង​ ធ្វើ​តាម​តែ​អ្វី​ដែល​ជន​ផ្ដាច់ការ​បញ្ជា។ មិន​មែន​ធ្វើ​តាម​ឆន្ទៈ​របស់​ប្រជាពលរដ្ឋ ធ្វើ​តាម​ឆន្ទៈ​របស់​តំណាង​រាស្ត្រ​ដែល​តំណាង​ឲ្យ​ជាតិ​ទេ គឺ​ធ្វើ​តាម​តែ​ឆន្ទៈ​របស់​ជន​ផ្ដាច់​ការ»

ក្រុម​តំណាង​រាស្ត្រ​រដ្ឋសភា​ឯក​បក្ស ១១១នាក់ រួម​ទាំង​លោក​នាយក​រដ្ឋមន្ត្រី ហ៊ុន សែន ផង នៅ​ថ្ងៃ​ទី២៥ តុលា បាន​អនុម័ត​គាំទ្រ​​សេចក្ដី​ព្រាង​ច្បាប់​ស្ដីពី​វិសោធនកម្ម​រដ្ឋធម្មនុញ្ញ​មាត្រា ១៩ថ្មី មាត្រា ៨២ថ្មី មាត្រា ១០៦ថ្មី(មួយ) មាត្រា ១១៩ថ្មី មាត្រា ១៣៧ថ្មី និង​ច្បាប់​ស្ដីពី​ធម្មនុញ្ញ​បន្ថែម សំដៅ​ធានា​នូវ​ដំណើរ​ការ​ជា​ប្រក្រតី នៃ​ស្ថាប័ន​ជាតិ ត្រង់​មាត្រា៣ និង​មាត្រា៤ ដើម្បី​កំណត់​ឲ្យ​អ្នក​កាន់​តំណែង​នាយក​រដ្ឋមន្ត្រី ប្រធាន​រដ្ឋសភា ប្រធាន​ព្រឹទ្ធសភា និង​ប្រធាន​ក្រុមប្រឹក្សា​ធម្មនុញ្ញ មាន​សញ្ជាតិ​ខ្មែរ​តែ​មួយ​គត់។

គេហទំព័រ​រដ្ឋសភា ចុះ​ផ្សាយ​ថា​ ការ​ធ្វើ​វិសោធនកម្ម​លើក​នេះ​ ដើម្បី​ធានា​ និង​ការពារ​ឯករាជ្យ​ជាតិ អធិបតេយ្យ បូរណភាព​ទឹកដី ផល​ប្រយោជន៍ជាតិ និង​ប្រឆាំង​រាល់​ការ​ជ្រៀតជ្រែក​ពី​បរទេស​ចូល​ក្នុង​កិច្ចការ​ផ្ទៃក្នុង​របស់​ជាតិ។ ប៉ុន្តែ​បំណង​ពិត​ប្រាកដ​តែ​មួយ​គត់​​នៃ​ច្បាប់​នេះ គឺ​លោក ហ៊ុន សែន ធ្លាប់​បញ្ជាក់​ថា​លោក​ចង់​​​បិទ​ផ្លូវ​មេ​ដឹក​នាំ​បក្ស​ប្រឆាំង លោក សម រង្ស៊ី មិន​ឲ្យ​មាន​ឱកាស​បាន​ធ្វើ​ជា​នាយករដ្ឋមន្ត្រី។ ទោះ​ជា​យ៉ាង​ណា លោក សម រង្ស៊ី ប្រកាស​ថា​​​ការ​ធ្វើ​បែប​នេះ​មិន​អាច​រារាំង​លោក​បាន​ទេ ព្រោះ​លោក​នឹង​លា​សញ្ជាតិ​បារាំង ប្រសិន​បើ​ដល់​ពេល​វេលា​ចាំបាច់។

ជុំវិញ​​ការ​អនុម័ត​សេចក្ដី​ព្រាង​​​វិសោធនកម្ម​រដ្ឋធម្មនុញ្ញ និង​រដ្ឋធម្មនុញ្ញ​បន្ថែម​នេះ វិទ្យុ​អាស៊ី​សេរី មិន​អាច​សុំ​ការ​បញ្ជាក់​ពី​​អ្នក​នាំ​ពាក្យ​រដ្ឋសភា​លោក ឡេង ប៉េងឡុង បាន​ទេ នៅ​ថ្ងៃ​ទី២៥ តុលា។ រដ្ឋសភា ក៏​មិន​ទាន់​បាន​ប្រកាស​ថា​នឹង​បញ្ជូន​វិសោធនកម្ម​ច្បាប់​នេះ ទៅ​ព្រឹទ្ធសភា​បន្ត​នៅ​ពេល​ណា​ដែរ។ តែ​យ៉ាង​ណា​ ស្ថាប័ន​ក្រុម​ប្រឹក្សា​ធម្មនុញ្ញ​ បាន​ទូល​ថ្វាយ​ព្រះ​មហាក្សត្រ​ថា ការ​កំណត់​សញ្ជាតិ​ខ្មែរ​តែ​មួយ​ក្នុង​ធម្មនុញ្ញ គឺ​អាច​ធ្វើ​ទៅ​បាន។

ក្រុម​ឃ្លាំមើល ក៏​ជឿ​ជាក់​វិសោធនកម្ម​រដ្ឋធម្មនុញ្ញ និង​ធម្មនុញ្ញ​បន្ថែម​នេះ នឹង​អាច​ចូល​ជា​ធរមាន​ក្នុង​ពេល​ឆាប់ៗ​នេះ​តាម​ការ​ចង់​បាន​របស់​លោក ហ៊ុន សែន តែ​ច្បាប់​នេះ​នឹង​មិន​បាន​ជួយ​បម្រើ​ដល់​ផល​ប្រយោជន៍​ជាតិ​ទេ។

អនុ​ប្រធាន​ក្រុម​អ្នក​វិភាគ​វ័យ​ក្មេង​លោក ហេង ច័ន្ទរស្មី មើល​ឃើញ​ថា ការ​កែ​ច្បាប់​យ៉ាង​តក់​ក្រហល់​ដើម្បី​ផ្ចាញ់​ផ្ចាល​គ្នា នឹង​បង្កើត​ជា​បញ្ហា​បណ្ដាល​ឱ្យ​ជាតិ​កាន់​តែ​បែក​បាក់​បន្ថែម​ទៀត។ លោក​យល់​ថា ភារកិច្ច​របស់​មេដឹកនាំ​ស្ថាប័ន​កំពូល​របស់​ជាតិ​ទាំង ៤ស្ថាប័ន មិន​ពាក់ព័ន្ធ​នឹង​ការ​មាន​សញ្ជាតិ​មួយ ឬ​ច្រើន​ទេ តែ​អ្វី​​ដែល​សំខាន់​គឺ ការ​អនុវត្ត​ការងារ​ឲ្យ​មាន​ប្រសិទ្ធិភាព និង​ភាព​ឯករាជ្យ​របស់​ស្ថាប័ន​ខ្លួន​ កុំ​ឲ្យ​ចំណុះ​ក្រោម​អំណាច​រដ្ឋាភិបាល៖ «ពួកគាត់​មាន​សញ្ជាតិ​តែ​មួយ​មែន។ ប៉ុន្តែ បើ​សិន​ជា​ស្ថាប័ន​ទាំង​នោះ មិន​ឯករាជ្យ​ស្រប​តាម​ស្ថាប័ន​រដ្ឋ​ធម្មនុញ្ញ​បាន​ចែង​ថា​អំណាច​ទាំង៣ ត្រូវ​តែ​ដាច់​ដោយ​ឡែក​ពី​គ្នា ឧទាហរណ៍។ អ៊ីចឹង​បើ​ស្ថាប័ន​ទាំង​អស់​មិន​ឯករាជ្យ មិន​រឹង​មាំ​ដោយ​ខ្លួន​ឯង ខ្ញុំ​គិត​ថា ការ​បម្រើ​ផល​ប្រយោជន៍​ជាតិ វា​កម្រិត​ទៅ​តាម​ហ្នឹង»

រដ្ឋ​សភា​ធ្លាប់​វិសោធនកម្ម​រដ្ឋ​ធម្មនុញ្ញ​យ៉ាង​ហោច​ណាស់ ១០ដង​ហើយ ចាប់​តាំង​ពី​ឆ្នាំ១៩៩៣ មក។ ការ​វិសោធនកម្ម​ច្រើន​ដង​បែប​នេះ បណ្ដាល​ឲ្យ​ច្បាប់​កំពូល​ចុះ​ទន់​ខ្សោយ និង​ត្រូវ​រង​ការ​រិះគន់​ថា ជា​ឧបករណ៍​នយោបាយ​សម្រាប់​គណ​បក្ស​កាន់​អំណាច ជា​ជាង​ច្បាប់​ដែល​បម្រើ​ឲ្យ​ផល​ប្រយោជន៍​ប្រជាជាតិ​ខ្មែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល