អតីតអ្នកយកព័ត៌មានអាស៊ីសេរី២នាក់ គឺលោក អ៊ួន ឈិន និងលោក យាង សុធារិន្ទ បានត្រឡប់ទៅជួបជុំគ្រួសារវិញ បន្ទាប់ពីត្រូវបានដោះលែងអោយមានសេរីភាពវិញ កាលពីល្ងាចថ្ងៃអង្គារ៍ ទី២១ ខែ សីហា។
ការដោះលែងនៅពេលនេះគ្រាន់ជាការសម្រេចអោយនៅក្រៅឃុំបណ្ដោះអាសន្ន ខណៈអ្នកទាំង២ ជាប់ចោទចោទពីបទផ្ដល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិ ដែលអ្នកច្បាប់ និងអង្គការសិទ្ធិមនុស្សជាបទចោទគ្មានមូលដ្ឋានច្បាប់។
ទាំងលោក អ៊ួន ឈិន និងលោក យាង សុធារិន្ទ រំពឹងថា តុលាការដែលទើបសម្រេចដោះលែងអ្នកទាំង២អោយមានសេរីភាពនោះ នឹងទម្លាក់ចោលរាល់បទចោទទាំងអស់ ដើម្បីអោយពួកគេទទួលបានសេរីភាពពិតប្រាកដ។
ថ្លែងប្រាប់តាមទូរស័ព្ទនៅក្នុងកម្មវិធីផ្សាយវិទ្យុអាស៊ីសេរី កាលពីយប់ថ្ងៃទី២១ ខែសីហា អតីតនិពន្ធនាយកអាស៊ីសេរី លោក យាង សុធារិន្ទ អោយដឹងថា តាំងពីដំបូងមកលោកតែងព្យាយាមបង្ហាញតុលាការហើយថា ពួកលោកពិតជាគ្មានកំហុស ដូចការចោទប្រកាន់ឡើយ។ លោកថា ការសម្រេចយ៉ាងណាគឺជាតួនាទីរបស់តុលាការ។ «»
ចំណែកលោក អ៊ួន ឈិន អតីតអ្នកគ្រប់គ្រងផ្នែកវីដេអូរបស់អាស៊ីសេរីអោយដឹងដែរថា នឹងបន្តធ្វើការងារជាមួយមេធាវី ដើម្បីទទួលបានសេរីភាពពេញលេញ។
ដីការបស់ចៅក្រមស៊ើបសួរនៃសាលាដំបូងក្រុងភ្នំពេញ លោក ពេជ្រ វិជ្ជាធរ បានសម្រេចអោយអ្នកទាំង២បាននៅក្រៅឃុំបណ្ដោះអាសន្ន ប៉ុន្តែឋិតក្រោមការត្រួតពិនិត្យតាមផ្លូវតុលាការ។ ដីកាដដែលពន្យល់ថា ការត្រួតពិនិត្យនេះគឺដើម្បីធានាវត្តមានរបស់អ្នកទាំង២ ដែលជាជនជាប់ចោទទុកជូនតុលាការចាត់ការតាមនីតិវិធី ក្នុងនោះអ្នកទាំង២ត្រូវអនុវត្តតាមការបង្គាប់របស់ចៅក្រមមួយចំនួនរួមមាន៖ ត្រូវឆ្លើយតបនឹងការកោះហៅពីគ្រប់បុគ្គលដែលចាត់តាំងដោយចៅក្រមស៊ើបសួរ មិនត្រូវផ្លាស់លំនៅឋានដោយគ្មានការអនុញ្ញាតពីចៅក្រមស៊ើបសួរ មិនត្រូវចេញទៅក្រៅប្រទេស ត្រូវបង្ហាញខ្លួននៅសប្ដាហ៍ទី១ ជារៀងរាល់ខែ នៅប៉ុស្ដិ៍នគរបាលស្ទឹងមានជ័យ។ ប្រសិនបើមិនបានអនុវត្តតាមការបង្គាប់នេះទេ អ្នកទាំង២អាចនឹងត្រូវចាប់ខ្លួនឡើងវិញ។
លោក អ៊ួន ឈិន និងលោក យាង សុធារិន្ទ ត្រូវបានអាជ្ញាធរក្រុងភ្នំពេញចាប់ខ្លួន កាលពីពាក់កណ្ដាលខែវិច្ឆិកា ឆ្នាំ២០១៧ ហើយត្រូវបានតំណាងអយ្យការអមតុលាការក្រុងភ្នំពេញចោទប្រកាន់ពីបទផ្តល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិ តាមមាត្រា៤៤៥នៃក្រមព្រហ្មទណ្ឌ។ អ្នកទាំងពីរអាចប្រឈមមុខនឹងការជាប់ពន្ធនាគាររហូតដល់១៥ឆ្នាំ ប្រសិនបើតុលាការសម្រេចថា អ្នកទាំងពីរពិតជាមានទោសមែននោះ។
គិតត្រឹមថ្ងៃដែលត្រូវបានដោះលែង អ្នកទាំងពីរបានជាប់ឃុំក្នុងពន្ធនាគារព្រៃស អស់រយៈពេល ២៨០ថ្ងៃ ឬជាង៩ខែដោយមិនទាន់ទទួលបានការជំនុំជម្រះនៅឡើយ។
ការចាប់ខ្លួន និងចោទប្រកាន់អតីតបុគ្គលិកអាស៊ីសេរីទាំងពីររូបនេះ បានធ្វើឱ្យរបបលោក ហ៊ុន សែន ទទួលរងការរិះគន់ពីសហគមន៍ជាតិ និងអន្តរជាតិជាច្រើន។ អង្គការសង្គមស៊ីវិលជាតិ និងអន្តរជាតិបានថ្កោលទោសចំពោះចំណាត់ការផ្លូវច្បាប់លើអ្នកទាំងពីរ ដោយពួកគេចាត់ទុកថា នេះជាការចោទប្រកាន់ដោយគ្មានភស្តុតាង និងមូលដ្ឋានច្បាប់ត្រឹមត្រូវ។
ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សក្នុងទីក្រុងហ្សឺណែវ ប្រទេសស្វីស បានអំពាវនាវឲ្យរបបលោក ហ៊ុន សែន ដោះលែងអ្នកទោសនយោបាយ អ្នកកាសែត អ្នកការពារសិទ្ធិមនុស្ស និងពលរដ្ឋដែលបានបញ្ចេញមតិ។
នាយកប្រតិបត្តិទទួលបន្ទុកកិច្ចការតំបន់អាស៊ី របស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប្រ៊ែដ អាដាម (Brad Adams) ចូលរួមត្រេកអរ ជាមួយក្រុមគ្រួសារអ្នកទាំងពីរ ដែលបានចេញពីពន្ធនាគារ បានវិលទៅជួបជុំក្រុមគ្រួសារ និងកូនៗរបស់ពួកគាត់វិញ។ ប៉ុន្តែលោក ប្រ៊ែដ អាដាម នៅតែខកចិត្ត ចំពោះការឃុំខ្លួន និងចោទប្រកាន់អ្នកទាំងពីរ ទាំងអយុត្តិធម៌បែបនេះ៖ «ពួកគាត់ទាំងពីរ គ្មានរឿងអ្វីដែលត្រូវគេចាប់ខ្លួន តាំងពីដំបូងមកម្ល៉េះ ព្រោះពួកគាត់គ្មានប្រព្រឹត្តិកំហុសអ្វីទាំងអស់ ហើយការចោទប្រកាន់លើពួកគាត់ទៀតសោត គឺជាការប្រឌិតឡើង ដើម្បីធ្វើបាបពួកគាត់ប៉ុណ្ណោះ។ គ្រាន់តែធ្វើជាអ្នកកាសែត និងរាយការណ៍ព័ត៌មានពិត តើមានកំហុសអី ? ដូច្នេះ ចំពោះលោក ហ៊ុន សែន ឲ្យតែនរណាធ្វើជាអ្នករាយការណ៍ព័ត៌មានឲ្យអាស៊ីសេរី នៅស្រុកខ្មែរ គឺដឹងតែមានទោសទាំងអស់ ឲ្យគាត់ចង់ចាប់»។
លោក ប្រ៊ែដ អាដាម បន្តថា ការដោះលែងឲ្យនៅក្រៅឃុំបណ្ដោះអាសន្ននេះ គឺ ជាល្បែងរបស់លោក ហ៊ុន សែន ក្នុងការបន្តការគំរាមកំហែងដល់អ្នកទាំងពីរ និងអ្នកសារព័ត៌មានឯទៀតឲ្យនៅបន្តភ័យខ្លាចរហូត និងថានៅពេលណាដែលលោក ហ៊ុន សែន មិនសប្បាយចិត្តគាត់អាចឲ្យគេចាប់ខ្លួនអ្នកទាំងពីរម្ដងទៀត។ លោកស្នើឲ្យរបបលោក ហ៊ុន សែន ទម្លាក់ចោលរាល់ការចោទប្រកាន់ក្លែងក្លាយមកលើអ្នកទាំងពីរ ដើម្បីឲ្យពួកគាត់ មានសេរីភាពវិញពេញបរិបូរណ៍ដូចដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។