ជនបរទេស​ជិត២​ពាន់​នាក់ ​កំពុង​ជាប់ពន្ធនាគារ​នៅ​កម្ពុជា

ដោយ ម៉ៅ សុធានី
2020-07-18
អ៊ីម៉ែល
មតិ
Share
បោះពុម្ព
សាលាដំបូង​រាជធានី​ភ្នំពេញ។ រូប​ថត​ថ្ងៃ​ទី​២៧ ខែ​មេសា ឆ្នាំ​២០១៦។
សាលាដំបូង​រាជធានី​ភ្នំពេញ។ រូប​ថត​ថ្ងៃ​ទី​២៧ ខែ​មេសា ឆ្នាំ​២០១៦។
RFA

ជនបរទេស​ចំនួន​ជិត ២​ពាន់​នាក់ (.៨៧៤) កំពុង​ជាប់ឃុំ​ក្នុង​ពន្ធ​គារ​នៅ​ទូទាំង ប្រទេស គិត​ត្រឹម​ខែ មិថុនា ឆ្នាំ​២០២០​នេះ។

របាយការណ៍​លទ្ធផល​ការងារ​បូកសរុប ប្រចាំ​ឆមាស​ទី​១ និង​លើក​ទិសដៅ​បន្ត របស់​អគ្គនាយកដ្ឋាន​អន្តោប្រវេសន៍ កាលពី​ព្រឹក​ថ្ងៃ​ទី​១៧ ខែ​កក្កដា បង្ហាញ​ថា ក្នុងចំណោម​ជនបរទេស​ទាំង ៤៥​សញ្ជាតិ ដែល​កំពុង​ជាប់​ឃុំឃាំង​ទាំងអស់​ចំនួន ១​ពាន់ ៨​រយ ៧៤​នាក់​នោះ គឺ​មាន​ស្ត្រី​២៤៩​នាក់​។ របាយការណ៍​បន្ត​ថា អ្នក​ជាប់ឃុំ​ច្រើន​ជាងគេ គឺ​ជនជាតិ​វៀតណាម (Vietnamese) ដែល​មាន​សរុប ៧៤៩​នាក់ បន្ទាប់មក​ជនជាតិ​ចិន (Chinese) ៧២៧​នាក់ ជនជាតិ​នីហ្សេរីយ៉ា (Nigerian) ៧៣​នាក់ និង​ជនជាតិ​ថៃ (Thai) ៦៨​នាក់ ព្រមទាំង​ជនជាតិ​ផ្សេងៗ​ជាច្រើន​ទៀត។

បច្ចុប្បន្ន កម្ពុជា​មាន​ជនបរទេស​ស្នាក់នៅ​ប្រមាណ​២០​ម៉ឺន​នាក់ ក្នុង​នោះ​១១​ម៉ឺន​នាក់ ជា​ជនបរទេស​មិនមែន​អន្តោប្រវេសន៍ និង​ចំនួន​៩​ម៉ឺន​នាក់​ផ្សេងទៀត គឺជា​ជនបរទេស​អន្តោប្រវេសន៍។

របាយការណ៍​ដដែល​ប​ន្ត​ថា ចាប់ពី​ឆ្នាំ ២០១៤ ដល់​ខែ​មិថុនា ឆ្នាំ​២០២០​នេះ អគ្គនាយកដ្ឋាន​អន្តោប្រវេសន៍ បាន​បណ្ដេញ​ចេញ​ជនបរទេស​ដែល​មក​រស់នៅ​និង​ធ្វើការ​ដោយ​ខុសច្បាប់ សរុប​ចំនួន​ជាង ១​ម៉ឺន ៧​ពាន់ ២​រយ​នាក់ (១៧,២៣០​នាក់​) ក្នុង​នោះ ស្ត្រី ជិត ៣​ពាន់​នាក់ (,៩៧១) ស្មើនឹង ១០៤​សញ្ជាតិ។

នៅ​ទន្ទឹម​នេះ ជនបរទេស​កំពុង​ស្នាក់​នៅ​កន្លែង​ត្រៀម​បណ្ដេញ​ចេញ នៅ​មណ្ឌល​ភ្នំពេញ សៀមរាប និង​ខេត្ត​ព្រះសីហនុ មាន​សរុប​ចំនួន​៩៣​នាក់ ក្នុង​នោះ​ស្រី្ត​៨​នាក់ គឺ​មាន​២០​សញ្ជាតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

 

ព័ត៌មាន (0)
Share
គេហទំព័រ​ទាំងមូល