រដ្ឋសភានឹងបើកកិច្ចប្រជុំនៅថ្ងៃទី២៥ ខែវិច្ឆិកា ដើម្បីបោះឆ្នោតជ្រើសរើសលោក ជាម យៀប ជាអនុប្រធានទី១ នៃរដ្ឋសភា ជំនួសលោក ងួន ញ៉ិល ដែលបានទទួលមរណភាព។
តំណាងរាស្ត្រមណ្ឌលព្រៃវែងនៃគណបក្សប្រជាជនកម្ពុជា និងជាប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភាលោក ជាម យៀប ប្រាប់កាសែតក្នុងស្រុក (ភ្នំពេញប៉ុស្តិ៍) ថា ការជ្រើសតាំងរូបលោកជាបេក្ខជន សម្រាប់តំណែងអនុប្រធានទី១ នៃរដ្ឋសភាជំនួសលោក ងួន ញ៉ិល នេះ គឺជារឿងធម្មតា ដើម្បីបំពេញបន្ថែមឱ្យស្របទៅតាមរចនាសម្ព័ន្ធរបស់រដ្ឋសភា។ លោកប្ដេជ្ញាថា លោកនឹងជួយរដ្ឋសភាកម្ពុជាឱ្យគោរព និងអនុវត្តទៅតាមរដ្ឋធម្មនុញ្ញ និងបទដ្ឋានដែលស្ដីអំពីតួនាទី និងភារកិច្ចរបស់ខ្លួនឱ្យបានល្អប្រសើរ។
ទាក់ទងនឹងការជ្រើសតាំងលោក ជាម យៀប នេះ មន្ត្រីជាន់ខ្ពស់នៃគណបក្សប្រជាជនមួយចំនួនបានសាទរ និងថា លោកស័ក្ដិសមបំផុត ព្រោះជាបុគ្គលដែលបានធ្វើជាមន្ត្រីគណបក្សប្រជាជនកម្ពុជាតាំងពីឆ្នាំ១៩៧៩ រហូតមកដល់បច្ចុប្បន្ន និងមានស្នាដៃធំជាច្រើន។ ប៉ុន្តែលោក ជាម យៀប កន្លងមកធ្លាប់មានកេរ្តិ៍ឈ្មោះមិនល្អទាក់ទងនឹងករណីបង្កគ្រោះថ្នាក់ចរាចរណ៍ ដែលអ្នកបើករថយន្តរបស់លោក បានបើកបុកមនុស្ស ហើយបើករត់គេច ដោយមិនចុះជួយជនរងគ្រោះ បណ្ដាលឲ្យប្រពន្ធជនរងគ្រោះស្លាប់ និងប្ដីរងរបួសធ្ងន់។ នៅក្នុងហេតុការណ៍នោះលោក ជាម យៀប ក៏ជិះនៅក្នុងរថយន្តដែលបើករត់នោះដែរ។
ទាក់ទងរឿងសំណុំរឿងគ្រោះថ្នាក់នេះ មន្ត្រីគ្រប់គ្រងកម្មវិធីសិទ្ធិការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់អង្គការសង់ត្រាល់ (CENTRAL) លោក ឃុន ថារ៉ូ យល់ថា នេះគឺជាតួនាទីកំពូលរបស់រដ្ឋ ជាស្ថាប័ននីតិប្បញ្ញត្តិដែលមានតួនាទីក្នុងការអនុម័តច្បាប់ និងធានានូវការអនុវត្តច្បាប់ ដែលថ្នាក់ដឹកនាំស្ថាប័ននេះ គួរតែជាបុគ្គលដែលសក្ដិសម៖ «បើសិនជាបុគ្គលដែលគាត់បានប្រព្រឹត្តបទល្មើសហើយគាត់ដែលត្រូវបានចោទប្រកាន់ដោយតុលាការនូវបទល្មើសដែលគាត់បានប្រព្រឹត្តហើយក្លាយទៅជាថ្នាក់ដឹកនាំស្ថាប័ននីតិបញ្ញត្តិមួយនោះ ខ្ញុំគិតថា វាគឺជាមិនមានភាពស័ក្ដិសម ហើយវាបង្ហាញទៅសាធារណៈថា នៅពេលដែលបុគ្គលមួយដែលមិនមានភាពស័ក្ដិសម ហើយក៏មានបទល្មើសហើយមិនត្រូវបាន តុលាការឲ្យស៊ើបអង្កេតហើយផ្ដន្ទាទោសទៅក្លាយទៅជាស្ថាប័នមួយដែលដឹកនាំនៅក្នុងការអនុម័តច្បាប់ ដើម្បីប្រជាពលរដ្ឋទូទៅគោរព និងអនុវត្ត។ បទល្មើសព្រហ្មទណ្ឌមិនអាចដោះស្រាយបញ្ចប់ដោយការសម្របសម្រួលជាសំណងរដ្ឋប្បវេណីទេ ទោះបីជាដោះស្រាយសម្របសម្រួលសំណងរដ្ឋប្បវេណីក៏បទល្មើសព្រហ្មទណ្ឌបណ្ដឹងអាជ្ញាហ្នឹង វានៅតែមានសុពលភាពអ៊ីចឹង » ។
កាលពីថ្ងៃទី២២ ខែវិច្ឆិកា ឆ្នាំ២០១៣ មានករណីគ្រោះថ្នាក់ចរាចរណ៍ដែលពាក់ព័ន្ធនឹងរថយន្តរបស់លោក ជាម យៀប បានកើតឡើងនៅចំណុចស្ពានព្រែកយួន ស្រុកកៀនស្វាយ ខេត្តកណ្ដាល បណ្ដាលឲ្យបុរសឈ្មោះ មឿន ថា អាយុ ២៦ឆ្នាំជាប្ដី រងរបួសធ្ងន់ និងប្រពន្ធឈ្មោះ ពិន សុភា មានផ្ទៃពោះ ២ខែស្លាប់ ពេលបញ្ជូនមកដល់មន្ទីរពេទ្យកាល់ម៉ែត្រ។
ក្រោយពីរថយន្តរបស់លោកបុកមនុស្សស្លាប់ និងឱ្យរបួសមក លោក ជាម យៀប បានដោះស្រាយផ្ដល់សំណងជាលុយជូនជនរងគ្រោះ។ ប៉ុន្តែរហូតមកដល់ពេលនេះ គ្មានការស៊ើបអង្កេតពីអាជ្ញាធរកម្ពុជា ដើម្បីឱ្យស្របតាមច្បាប់ចរាចរណ៍កម្ពុជាទេ។
នាយកប្រតិបត្តិទទួលបន្ទុកកិច្ចការតំបន់អាស៊ី នៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វច្ឆ (Human Rights Watch) លោក ប្រ៊ែដ អាដាម (Brad Adams) ធ្លាប់លើកឡើងថា ប្រសិនបើលោកនាយករដ្ឋមន្ត្រី ហ៊ុន សែន ចង់ដោះស្រាយបញ្ហាសុវត្ថិភាពលើដងផ្លូវ និងចង់បង្ហាញថា លោកពិតជាមានឆន្ទៈបញ្ចប់និទ្ទណ្ឌភាពលើមន្ត្រីជាន់ខ្ពស់មែននោះ លោក ហ៊ុន សែន គួរធានាថា ការស៊ើបអង្កេតមួយត្រូវបានបង្កើតឡើង ចំពោះករណីបុកហើយរត់ ដែលពាក់ព័ន្ធនឹងរថយន្ត លោក ជាម យៀប នេះ។
ផ្អែកតាមច្បាប់ចរាចរណ៍កម្ពុជា លោក ជាម យៀប អាចមានទោសជាប់ពន្ធនាគារដល់ទៅ ៣ឆ្នាំ ព្រោះថា បើទោះជាលោក ជាម យៀប មិនមែនជាអ្នកបើកបរក្ដី ក៏គាត់បានគេចចេញពីកន្លែងកើតហេតុ ដោយមិនបាននាំយកជនរងគ្រោះទៅមន្ទីរពេទ្យភ្លាមៗ។ មន្ត្រីអង្គការសង្គមស៊ីវិលនិយាយថា មូលហេតុមួយដែលធ្វើអោយនីតិរដ្ឋនៅកម្ពុជា ចុះទន់ខ្សោយ គឺដោយសារតែអ្នកមានលុយ និងមានអំណាច ជារឿយៗ តែងផ្ដល់ប្រាក់ទៅឱ្យជនរងគ្រោះ ឬពេលខ្លះគំរាមកំហែងពួកគេឲ្យនៅស្ងៀមស្ងាត់ និងមិនឱ្យសហការជាមួយសមត្ថកិច្ច ក្នុងការដំណើរការស៊ើបអង្កេតជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។