លោក ហ៊ុន សែន ឱ្យ​តុលាការ​ចាត់​វិធានការ​ដោយ​មិន​លើកលែង​ករណី​គ្រឿងញៀន​នៅ​រ៉ក់

ដោយ សុ ជីវី
2019-03-12
អ៊ីម៉ែល
មតិ
Share
បោះពុម្ព
លោក គិត ធាង ម្ចាស់​អាជីវកម្ម​ក្លឹប​កម្សាន្ត រ៉ក់
លោក គិត ធាង ម្ចាស់​អាជីវកម្ម​ក្លឹប​កម្សាន្ត រ៉ក់
រូបពី​ហ្វេសប៊ុក៖ Royal Finanancial Corp

មេដឹកនាំ​របប​ក្រុងភ្នំពេញ លោក ហ៊ុន សែន ណែ​នាំ​ឱ្យ​ចៅក្រម និង​ព្រះរាជអាជ្ញា​ចាត់វិធានការ ដោយ​គ្មាន​ការលើកលែង​ករណី​គ្រឿងញៀន​នៅ​មណ្ឌល​កម្សាន្ត​រ៉ក់ (Rock)។ ការ​ថ្លែង​របស់​លោក ហ៊ុន សែន នេះ​ស្រប​ពេល​ដែល​ចៅក្រម​សាលាដំបូង​រាជធានី​ភ្នំពេញ សម្រេច​ឃុំខ្លួន លោក គិត ធាង ម្ចាស់​អាជីវកម្ម​ក្លឹប​កម្សាន្ត​រ៉ក់ បណ្ដោះអាសន្ន ពាក់ព័ន្ធ​សំណុំរឿង​គ្រឿងញៀន​ជិត​៥០ គីឡូក្រាម នៅ​ក្លឹប​កម្សាន្ត​របស់​លោក។

មេដឹកនាំ​របប​ឯកបក្ស លោក ហ៊ុន សែន ប្រកាស​ជា​សាធារណៈ​ថា ការ​ចាត់​វិធានការ​ករណី​គ្រឿងញៀន​នៅ​ក្លឹប​កម្សាន្ត​រ៉ក់​នេះ​ជា​ជំហាន​ដំបូង ហើយ​អាជ្ញាធរ​នឹង​ឈាន​ទៅ​ចាត់ការ​នៅ​តាម​កន្លែង​ផ្សេងទៀត៖ «ក៏ប៉ុន្តែ​ករណី​រ៉ក់ គឺជា​ករណី​មិន​គួរ​លើកលែង​ទេ ករណី​រ៉ក់​ត្រូវ​ជីក​ទោះបីជា​ជីក​ជម្រៅ​ប៉ុន្មាន​រយ​ម៉ែត្រ ប៉ុន្មាន​ម៉ឺន​ម៉ែត្រ​ចុះទៅ​ក្រោម​ដី ដើម្បី​រក​មេ​ក្លោង​ក៏​ត្រូវ​នៅតែ​ត្រូវ​ជីក​ឱ្យ​ជ្រៅ រក​ឱ្យ​ឃើញ​ព្រោះ​ការ​បំផ្លិចបំផ្លាញ​ដែល​ចេញពី​កន្លែង​នេះ​គឺ​វា​ធំធេង​ពេក ធំធេង​ហួស។ បើ​តាម​ខ្ញុំ​ដឹង​នៅសល់​មួយ​កន្លែង​ទៀត ឥឡូវ​វា​សម្ងំ។ ពេលនោះ​បើ​បើក​ប្រតិបត្តិការ​ម្ដង​២​កន្លែង​គឺ​អាច​ចប់​។ អ៊ីចឹង​ឯកឧត្ដម កែ គឹមយ៉ាន នៅ​ទីនេះ​ស្រាប់​ដែល​ក្នុង​ប៉ុន្មាន​ថ្ងៃនេះ គឺថា​មានការ​ចាប់​រួចហើយ​មិន​ដឹង​ទៅ​ណា ត្រូវតែ​ឱ្យ ហ៊ុន សែន លូកដៃ​ហើយ ខ្ញុំ​ត្រូវ​លូកដៃ​ហើយ»

ចៅក្រម​ស៊ើបសួរ លោក សេង លាង សម្រេច​ឃុំខ្លួន​លោក ឧកញ៉ា គិត ធាង បណ្ដោះអាសន្ន នៅ​ពន្ធនាគារ​រាជធានី​ភ្នំពេញ ហៅ​កាត់​ថា ប៉េហ្ស៊ី (PJ)។ ប្រព័ន្ធ​ឃោសនា​ស្និទ្ធ​របប​ក្រុងភ្នំពេញ (​ហ្វ្រេសញូវ) ចុះផ្សាយ​ថា លោក គិត ធាង ត្រូវ​ចោទប្រកាន់​ពី​បទ​ចាត់ចែង​សម្រួល​ឱ្យ​មានការ​ប្រើប្រាស់​ដោយ​ខុសច្បាប់​នូវ​សារជាតិ​ញៀន និង​បទ​សមគំនិត តាម​មាត្រា​៤២ និង​៤៤ នៃ​ច្បាប់​ស្ដីពី​ការ ត្រួតពិនិត្យ​គ្រឿងញៀន និង​មាត្រា​២៩ នៃ​ក្រមព្រហ្មទណ្ឌ។

លោក គិត ធាង ត្រូវ​បាន​ចាប់ខ្លួន នៅ​ក្នុង​ភូមិគ្រឹះ​ក្នុង​សង្កាត់​បឹងកក់ ខណ្ឌ​ទួលគោក នៅ​ព្រលប់​ថ្ងៃ​ទី​១១ មីនា ក្រោយពេល​មេដឹកនាំ​របប​ឯកបក្ស លោក ហ៊ុន សែន បញ្ជា​ឱ្យ​សមត្ថកិច្ច​ស៊ើបអង្កេត​រក​មេខ្លោង​ជួញដូរ​គ្រឿងញៀន នៅ​ក្នុង​មជ្ឈមណ្ឌល​កម្សាន្ត​រ៉ក់ និង​បញ្ជា​ឱ្យ​តុលាការ​ដំណើរ​នីតិវិធី​ឱ្យ​បាន​ម៉ឺងម៉ាត់។

លោក គិត ធាង គឺជា​ឈ្មួញ​ល្បីឈ្មោះ​ម្នាក់​នៅ​កម្ពុជា និង​ជា​បងប្រុស​បង្កើត​របស់​លោក ឧកញ៉ា គិត ម៉េង ម្ចាស់​អាជីវកម្ម​ច្រើន​វិស័យ និង​មាន​ការ​ជួយជ្រោមជ្រែង​ពី លោក ហ៊ុន សែន។ លោក គិត ធាង​ធ្លាប់​ធ្វើ​កិច្ចសន្យា ជាមួយ​អាជ្ញាធរ ចំនួន​៣​ដង​រួច​មក​ហើយ ដើម្បី​ឈប់​ផ្ដល់ ទីតាំង​ក្លឹប​កម្សាន្ត​រ៉ក់ សម្រាប់​ប្រមូលផ្ដុំ សេព​គ្រឿងញៀន និង​ជួញដូរ​គ្រឿងញៀន។ នេះ​មិនទាន់​រាប់បញ្ចូល​ករណី​បាញ់​បោះ ច្រើន​លើក ច្រើន​សា និង​ករណី​បែក​ធ្លាយ​វីដេអូ អាសអាភាស ជាច្រើន​ឃ្លីប ចេញពី​ក្នុង​មជ្ឈមណ្ឌល​កម្សាន្ត​រ៉ក់ កន្លងមក​នោះ​ទេ​។ វីដេអូ​ខ្លះ មាន​ឃើញ យុវជន​ស្លៀក​សំលៀកបំពាក់​សិស្សសាលា​ទៀត​ផង។

លោក ហ៊ុន សែន បញ្ជាក់​ទៀត​ថា អ្វី​ដែល​ត្រូវ​ផ្ដោត​គឺ​កម្ទេច​ក្រុម​កាង​ការពារ​ឧក្រិដ្ឋកម្ម​គ្រឿងញៀន​នេះ៖ «បើ​ជាប់​ដល់​មន្ត្រី​ថ្នាក់​ប៉ុណ្ណា​ក៏​ត្រូវ​តែ​ធ្វើ​ដែរ នៅ​ទីនេះ​ខ្ញុំ​ធ្លាប់​និយាយ​ហើយ​ថា កុំ​អ្នក​សង្ឃឹមថា​ត្រឹម​ពាក់​ផ្កាយ​ដែល​ខ្ញុំ​ដក​មិនបាន អ្នកឯង​ពាក់​លោក​ខែ ក៏​ខ្ញុំ​ដក​បាន​ដែរ អត់​មានអំណាច​ណា​ឱ្យ​តែ​តុលាការ​ស៊ើបអង្កេត គ្រប់គ្រាន់​ហើយ កុំ​ឱ្យ​នរណា​មក​ជើងកាង​។ ទោះបី​ជើងកាង​ចេញ​ម៉ោ​មួយ​កងពល​ក៏ដោយ​ក៏​ត្រូវ​ខ្ញុំ​វាយ​កម្ទេច​ចោល​ទាំងអស់​។ ដូច្នេះ​ក្រុម​គ្រឿងញៀន​ត្រូវតែ​មើល​ឱ្យ​ច្បាស់ យើង​ត្រូវ​ចាប់ផ្ដើម​ពី​រ៉ក់​នេះ​មួយ ដើម្បី​បង្ហាញ​ថា មិនមែន​គ្រាន់តែ​ចាប់​អា​តូច​តាច​ទេ អា​មេខ្លោង​ធំ​ប៉ុណ្ណា​ក៏ដោយ ទោះបី​ក្នុង​វិស័យ​ឯកជន ឬ​ក្នុង​រដ្ឋ អ្ហែង​មាន​លុយ​ប៉ុណ្ណា​ក៏ដោយ​អ្ហែង​សក្ដិ​ធំ​ប៉ុណ្ណា​ក៏ដោយ​វាយ​ទាំងអស់»

ប្រធាន​មជ្ឈមណ្ឌល​ប្រជាពលរដ្ឋ​សម្រាប់​ការអភិវឌ្ឍន៍ និង​សន្តិភាព លោក យង់ គឹមអេង ស្វាគមន៍​ចំណាត់ការ​របស់​សមត្ថ​កិច្ច​ក្នុង​ការ​ស្វែងរក​មេខ្លោង​គ្រឿងញៀន​នៅ​មជ្ឈមណ្ឌល​កម្សាន្ត​រ៉ក់ និង​ស្នើសុំ​ឱ្យ​បន្ត​ស្រាវជ្រាវ​រក​អ្នក​ពាក់ព័ន្ធ​ផ្សេងទៀត​ព្រោះ អាច​មាន​អ្នក​មាន​អំណាច ឬ​អាជ្ញាធរ​ខ្លះ​ជួយ​ជ្រោមជ្រែង ឬ​លាក់បាំង​ករណី​នេះ ទើប​ករណី​គ្រឿងញៀន​នៅ​ក្លឹប​កម្សាន្ត​រ៉ក់ អាច​លាក់បាំង​បាន​ច្រើន​ឆ្នាំ៖ «ពាក់ព័ន្ធ​ជាមួយ​នឹង​អាជ្ញាធរ ឬក៏​សមត្ថកិច្ច​ដទៃ​ទៀត ក៏​ត្រូវ​តែ​រក​ដែរ​បាទ។ ម្យ៉ាងវិញទៀត ដើម្បី​កុំ​ឱ្យ​គេ​ចោទប្រកាន់​ទៅដល់ អាជ្ញាធរ​ផង ហើយ​ម្យ៉ាងវិញទៀត ដើម្បី​ធ្វើ​ឱ្យ​អាជ្ញា​ធរមាន​សមត្ថកិច្ច​ហ្នឹង កាន់​តែ​មាន​កិត្តិយស​ផង ក្នុង​ការ​ធ្វើ​កិច្ចការ​បម្រើ​ជាតិ»

នៅ​ក្រោយ​ពេល​សមត្ថកិច្ច​បង្ក្រាប​ក្លឹប​កម្សាន្ត​រ៉ក់ និង​ឃាត់ខ្លួន មនុស្ស​ជាង​៣​រយ (៣១១) នាក់ ទៅ​ស្នងការ​នគរបាល​រាជធានី​ភ្នំពេញ សមត្ថកិច្ច​អះអាង​ថា បាន​រក​ឃើញ​ក្លឹប​កម្សាន្ត​រាត្រី និង​បារ​បារាំង ជាង​១ពាន់ (.២០០)​កន្លែង នៅ​ភ្នំពេញ ជា​កន្លែង​ប្រមូលផ្ដុំ​របស់​យុវជន សេព​គ្រឿងញៀន​។ សមត្ថកិច្ច​មិនបាន​ចាត់វិធានការ​ច្បាប់​ទេ គ្រាន់តែ​ឱ្យ​ម្ចាស់​អាជីវកម្ម​ក្លឹប​កម្សាន្ត​រាត្រី និង​បារ​បារាំង​ទាំង​ជាង​១​ពាន់ ២​រយ កន្លែង​ធ្វើ​កិច្ចសន្យា​បញ្ឈប់​ឱ្យ​មាន​គ្រឿងញៀន ក្នុង​ទីតាំង​ខ្លួន តទៅទៀត​។

អនុប្រធាន​បណ្ដាញ​យុវជន​កម្ពុជា លោក ស ម៉ូរី យល់ថា សមត្ថកិច្ច​គួរ​បង្ក្រាប​ទីតាំង​ទាំងនោះ ដូច​ករណី​នៅ​ក្លឹប​កម្សាន្ត​រ៉ក់​ដែរ ដើម្បី​កុំ​ឱ្យ​ក្លាយ​ជា​កន្លែង​ប្រមូលផ្ដុំ​សេព​គ្រឿងញៀន​។ លោក ស ម៉ូរី បន្តថា បើ​ត្រឹម​ធ្វើ​កិច្ចសន្យា​គ្មាន​ប្រសិទ្ធភាព​ទេ។ ក្រៅពី​បង្ក្រាប​តាមច្បាប់ បណ្ដាញ​យុវជន ស្នើសុំ​ឱ្យ​ សមត្ថកិច្ច​អនុវត្ត​តឹងរ៉ឹង​បំផុត លើ​ក្លឹប​កម្សាន្ត​រាត្រី និង​បារ​បារាំង​ទាំងអស់ ជៀសវាង​ករណី​មិន​រាងចាល៖ «រាជរដ្ឋាភិបាល គឺ​ត្រូវតែ​មាន​កងកម្លាំង​ឯករាជ្យ​របស់​ខ្លួន ហើយ​ចុះ​ធ្វើការ​ត្រួតពិនិត្យ​។ ចុះ​ធ្វើ​អធិការកិច្ច​ជាប្រចាំ​ចំពោះ​ក្លឹប​កម្សាន្ត​ទាំងអស់ ហើយ​ករណី​ប្រសិនជា​រដ្ឋាភិបាល​ប្រទះឃើញ​ក្លឹប​ណាមួយ មានការ​ជួញដូរ​គ្រឿង​ញៀន ត្រូវ​ចាប់​អ្នក​ជួញដូរ និង​ម្ចាស់​អាជីវកម្ម​ផ្ដន្ទាទោស​តាមច្បាប់»

ច្បាប់​ស្ដីពី ការ​ត្រួតពិនិត្យ​គ្រឿងញៀន​ឆ្នាំ​២០១២ មាត្រា​៤៤ ចែង​ក្នុង​ន័យ​ថា អំពើ​ជួល​ទីកន្លែង ផ្ដល់​ទីកន្លែង ឬ អំពើ​ផ្សេងទៀត ដែល​បង្ក​លក្ខណៈ​ងាយស្រួល​ដល់​ការប្រើប្រាស់ ដោយ​ខុសច្បាប់​នូវ​សារធាតុ​ញៀន គឺ ជា​បទ​សម្រួល​ឱ្យ​ប្រើ​ប្រាស់​ដោយ​ខុសច្បាប់​នូវ​សារធាតុ​ញៀន ត្រូវ​ផ្ដន្ទាទោស​ពី​៥​ឆ្នាំទៅ​១០​ឆ្នាំ និង ពិន័យ​ជា​ប្រាក់​ពី ១០​លាន​រៀល​ទៅ ២០​លាន​រៀល។

ទាក់ទង​នឹង​សំណុំ​បង្ក្រាប​គ្រឿងញៀន​នៅ​មណ្ឌល​កម្សាន្ត​រ៉ក់ និង​ការ​ឃុំខ្លួន លោក គិត ធាង នេះ​អ្នកវិភាគ​នយោបាយ​លោក គឹម សុខ ចាត់​ទុក​រឿង​នេះ​ថា ជាប់​ពាក់ព័ន្ធ​នឹង​នយោបាយ និង​ថា​មិនមែន​ជា​ការអនុវត្ត​ច្បាប់​ពិតប្រាកដ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល