ចៅក្រម​ស៊ើបសួរ​សាលាដំបូង​រាជ​ធានី​ភ្នំពេញ​សម្រេច​ឃុំ​ខ្លួន​លោក គិត ធាង ម្ចាស់​មជ្ឈមណ្ឌល​កម្សាន្ត រ៉ក់ (ROCK)

ដោយ សុ ជីវី
2019-03-12
អ៊ីម៉ែល
មតិ
Share
បោះពុម្ព
លោក គិត ធាង ម្ចាស់មជ្ឈ​មណ្ឌលកម្សាន្ត  Rock
លោក គិត ធាង ម្ចាស់មជ្ឈ​មណ្ឌលកម្សាន្ត Rock
Screenshot

ចៅក្រម​សាលា​ដំបូង​រាជធានី​ភ្នំពេញ សម្រេច​ឃុំ​ខ្លួន លោក គិត ធាង ម្ចាស់​អាជីវកម្ម​ក្លឹប​កម្សាន្ត​ រ៉ក់ បណ្ដោះអាសន្ន​ ពាក់ព័ន្ធ​សំណុំ​រឿង​គ្រឿងញៀន ជាង​ ៥០គីឡូក្រាម។ បណ្ដាញ​យុវជន និង​សង្គម​ស៊ីវិល​ គាំទ្រ​​ចំណាត់​ការ​តុលាការ​ និង​ទាមទារ​ឲ្យ​ស្រាវជ្រាវ​អ្នក​ពាក់ព័ន្ធ និង​ម្ចាស់​ក្លឹប​កម្សាន្ត​​ពេល​រាត្រី និង​បារ​បារាំង​ដទៃ​ទៀត។

លោក ឧកញ៉ា គិត ធាង​ត្រូវ​ចៅក្រម​ស៊ើប​សួរ លោក សេង លាង សម្រេច​ឃុំ​ខ្លួន​បណ្ដោះ​អាសន្ន នៅ​ពន្ធនាគារ​​ស្នងការ​នគរបាល​រាជធានី​ភ្នំពេញ ឬ​ហៅ​ថា ប៉េហ្ស៊ី (PJ)។ ប្រព័ន្ធ​ឃោសនា​ស្និទ្ធ​របប​ក្រុង​ភ្នំពេញ (ហ្វ្រេសញូវ) ចុះ​ផ្សាយ​ថា លោកគិត ធាង ត្រូវ​ចោទ​ប្រកាន់​ពីបទ​ចាត់ចែង​សម្រួល​ឲ្យ​មាន​ការ​ប្រើ​ប្រាស់​ដោយ​ខុស​ច្បាប់​នូវ​សារ​ជាតិ​ញៀន និង​បទ​សម​គំនិត តាម​មាត្រា៤២ និង​៤៤ នៃ​ច្បាប់​ស្តីពី​ការ ត្រួត​ពិនិត្យ​គ្រឿងញៀន និង​មាត្រា​២៩ នៃ​ក្រម​ព្រហ្មទណ្ឌ។

អាស៊ី​សេរី​មិន​អាច​សុំ​ការ​បញ្ជាក់​បន្ថែម​ពី​អ្នក​នាំ​ពាក្យ​ស្ថាប័ន​អយ្យការ​អម​សាលា​ដំបូង​រាជធានី​ភ្នំពេញ លោក លី សុផាន់ណា បាន​ទេ នៅ​ថ្ងៃ​ទី​១២ មីនា ដោយ​លោកមិន​ទទួល​ទូរស័ព្ទ។​

កាល​ពី​ព្រឹក​ថ្ងៃ​ទី​១២ មីនា នគរបាល​ព្រហ្មទណ្ឌ​កម្រិត​ស្រាល​ នៃ​ស្នងការដ្ឋាន​នគរបាល​រាជធានី​ភ្នំពេញ​ ​បាន​បញ្ជូន​លោក​ឧកញ៉ា​​ គិត​ ធាង​ ម្ចាស់​មជ្ឈមណ្ឌល​កម្សាន្ត​រ៉ក់ (ROCK) ទៅ​អយ្យការ​អម​សាលា​ដំបូង​រាជធានី​ភ្នំពេញ ដើម្បី​សាកសួរ​ករណី​​សមត្ថកិច្ច​រក​ឃើញ​គ្រឿងញៀន​ជាង ​៥០​គីឡូ​ក្រាម ក្នុង​មជ្ឈមណ្ឌល​កម្សាន្ត​រ៉ក់​ ​ស្ថិត​នៅ​តាម​បណ្ដោយ​មហាវិថី​ព្រះ​មុនីវង្ស សង្កាត់​ទន្លេ​បាសាក់ ជាប់​សាកល​វិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច កាល​ពី​វេលា​ទៀប​ភ្លឺ​ថ្ងៃទី២៣ ខែ​កុម្ភ:

លោក គិត ធាង ត្រូវ​បាន​ចាប់​ខ្លួន នៅ​ក្នុង​ភូមិគ្រឹះ​ក្នុង​សង្កាត់​បឹង​កក់ ខណ្ឌ​ទួលគោក នៅ​ព្រលប់​ថ្ងៃ​ទី១១ មីនា ក្រោយ​ពេល​មេដឹកនាំ​របប​ឯក​បក្ស លោក ហ៊ុន សែន បញ្ជា​ឲ្យ​សមត្ថកិច្ច​ស៊ើប​អង្កេត​រក​មេ​ក្លោង​​ជួញដូរ​គ្រឿងញៀន នៅ​ក្នុង​មជ្ឈមណ្ឌល​កម្សាន្ត​រ៉ក់ និង​បញ្ជា​ឲ្យ​តុលាការ​ដំណើរ​នីតិវិធី​ឲ្យ​បាន​ម៉ឺងម៉ាត់។

លោក គិត ធាង គឺ​ជា​​ឈ្មួញ​ល្បី​​ឈ្មោះ​ម្នាក់​នៅ​កម្ពុជា និង​ជា​បង​​ប្រុស​​​បង្កើត​របស់​លោ​ក ឧកញ៉ា គិត ម៉េង ម្ចាស់​អាជីវកម្ម​​ច្រើន​វិស័យ ​និង​​មាន​​ការ​ជួយ​ជ្រោមជ្រែង​ពី លោក ហ៊ុន សែន។ លោក គិត ធាង​ធ្លាប់​​ធ្វើ​កិច្ច​សន្យា​​ជាមួយ​អាជ្ញាធរ ចំនួន ​៣​ដង​រួចមក​ហើយ​ ដើម្បី​​ឈប់​ផ្ដល់​ទីតាំង​ក្លឹប​កម្សាន្ត​រ៉ក់​ សម្រាប់​ប្រមូលផ្ដុំ​ សេព​គ្រឿងញៀន និង​ជួញ​ដូរ​គ្រឿងញៀន។ នេះ​មិន​ទាន់​រាប់​បញ្ចូល​ករណី​បាញ់​បោះ ច្រើន​លើក​ច្រើន​សា និង​​​ករណី​បែក​ធ្លាយ​វីដេអូ អាសអាភាស​ជាច្រើន​ឃ្លីប​ ចេញ​ពី​ក្នុង​មជ្ឈមណ្ឌល​កម្សាន្ត​រ៉ក់ កន្លង​មក​នោះ​ទេ។ វីដេអូ​ខ្លះ មាន​ឃើញ យុវជន​ស្លៀក​សំលៀក​បំពាក់​សិស្ស​សាលា​​ទៀត​ផង។

ប្រធាន​មជ្ឈមណ្ឌល​ប្រជាពលរដ្ឋ​សម្រាប់​ការ​អភិវឌ្ឍន៍ និង​សន្ដិភាព លោក យង់ គឹមអេង ស្វាគមន៍​ចំណាត់​ការ​របស់​សមត្ថកិច្ច​ក្នុង​ការ​ស្វែង​រក​មេ​ក្លោង​គ្រឿងញៀន នៅ​មជ្ឈមណ្ឌល​កម្សាន្ត​រ៉ក់ និង​ស្នើ​សុំ​ឲ្យ​បន្ត​ស្រាវជ្រាវ​រក​អ្នក​ពាក់ព័ន្ធ​ផ្សេង​ទៀត ព្រោះ​ អាច​មាន​អ្នក​មាន​អំណាច​ ឬ​អាជ្ញាធរ​ខ្លះ​ ​ជួយ​ជ្រោមជ្រែង ឬ​លាក់​បាំង​ករណី​នេះ ទើប​​ករណី​គ្រឿងញៀន​នៅ​ក្លឹប​កម្សាន្ត​រ៉ក់ អាច​លាក់​បាំង​បាន​ច្រើន​ឆ្នាំ៖ «ពាក់ព័ន្ធ​ជាមួយ​នឹង​អាជ្ញាធរ ឬ​ក៏​សមត្ថកិច្ច​ដទៃ​ទៀត ក៏​ត្រូវ​តែ​រក​ដែរ​បាទ។ ម្យ៉ាង​វិញ​ទៀត ដើម្បី​កុំ​ឲ្យ​គេ​ចោទ​ប្រកាន់​ទៅ​ដល់​ អាជ្ញាធរ​ផង ហើយ​ម្យ៉ាង​វិញ​ទៀត ដើម្បី​ធ្វើ​ឲ្យ​អាជ្ញាធរ​មាន​សមត្ថកិច្ច​ហ្នឹង កាន់​តែ​មាន​កិត្តិយស​ផង ក្នុង​ការ​ធ្វើ​កិច្ចការ​បម្រើ​ជាតិ។»

នៅ​ក្រោយ​ពេល​សមត្ថកិច្ច​បង្ក្រាប​ក្លឹប​កម្សាន្ត​ រ៉ក់ និង​​ឃាត់​ខ្លួន​​មនុស្ស ៣១១នាក់ ទៅ​ស្នង​ការ​នគរបាល​រាជធានី​ភ្នំពេញ សមត្ថកិច្ច​អះអាង​ថា បាន​រក​ឃើញ​ក្លឹប​កម្សាន្ត​រាត្រី និង​បារ​បារាំង​ជាង​ ១​ពាន់ ​២រយ​កន្លែង​​នៅ​ភ្នំពេញ ​ជា​កន្លែង​ប្រមូល​ផ្ដុំ​របស់​យុវជន​សេព​គ្រឿងញៀន។ ​សមត្ថកិច្ច​មិន​បាន​ចាត់​វិធាន​ការ​ច្បាប់​ទេ គ្រាន់​តែ​ឲ្យ​ម្ចាស់​អាជីវកម្ម​ក្លឹប​កម្សាន្ត​រាត្រី និង​បារ​បារាំង​ទាំង​ជាង ១ពាន់ ២រយ​ កន្លែង​ធ្វើ​កិច្ច​សន្យា​បញ្ឈប់​ឲ្យ​មាន​គ្រឿងញៀន​ក្នុង​ទីតាំង​​ខ្លួន​ត​ទៅ​ទៀត។

អនុ​ប្រធាន​បណ្ដាញ​យុវជន​កម្ពុជា លោក ស ម៉ូរី យល់​ថា សមត្ថកិច្ច​គួរ​បង្ក្រាប​ទីតាំង​ទាំង​នោះ ដូច​ករណី​​នៅ​ក្លឹប​កម្សាន្ត ​រ៉ក់ ​ដែរ ដើម្បី​កុំ​ឲ្យ​ក្លាយ​ជា​កន្លែង​​ប្រមូល​ផ្ដុំ​សេព​គ្រឿងញៀន។ លោក ស ម៉ូរី បន្ត​ថា បើ​ត្រឹម​ធ្វើ​កិច្ច​សន្យា​​គ្មាន​ប្រសិទ្ធិ​ភាព​ទេ។ ក្រៅ​ពី​បង្ក្រាប​តាម​ច្បាប់ បណ្ដាញ​យុវជន​ស្នើ​សុំ​សមត្ថកិច្ច​​​ឲ្យ​អនុវត្ត​​តឹង​រ៉ឹង​បំផុត លើ​ក្លឹប​កម្សាន្ត​រាត្រី និង​បារ​បារាំង​​ទាំង​អស់ ​ចៀស​វាង​ករណី​មិន​រាង​ចាល៖ «រាជរដ្ឋាភិបាល គឺ​ត្រូវ​តែ​មាន​កងកម្លាំង​ឯករាជ្យ​របស់​ខ្លួន ​ហើយ​ចុះ​ធ្វើការ​ត្រួត​ពិនិត្យ​។ ចុះ​ធ្វើ​អធិការ​កិច្ច​ជា​ប្រចាំ​ចំពោះ​ក្លឹប​កម្សាន្ត​ទាំង​អស់ ហើយ​ករណី​ប្រសិន​ជា​រដ្ឋាភិបាល​ប្រទះ​ឃើញ​ក្លឹប​ណាមួយ មាន​ការ​ជួញ​ដូរ​គ្រឿង​ញៀន ត្រូវ​ចាប់​អ្នក​ជួញ​ដូរ និង​ម្ចាស់​អាជីវកម្ម​ផ្ដន្ទាទោស​តាម​ច្បាប់»

ច្បាប់​ស្ដីពី​ ការ​ត្រួតពិនិត្យ​គ្រឿងញៀន​ឆ្នាំ២០១២ មាត្រា៤៤ ចែង​ក្នុង​ន័យ​​ថា​ អំពើ​ជួល​ទីកន្លែង​ ផ្ដល់​ទី​កន្លែង​ ឬ​​អំពើ​ផ្សេង​ទៀត​ ដែល​បង្ក​លក្ខណៈ​ងាយស្រួល​ដល់​ការ​ប្រើប្រាស់​​ដោយ​ខុសច្បាប់​នូវ​សារធាតុ​ញៀន​ គឺ​​ជា​បទ​សម្រួល​ឱ្យ​ប្រើប្រាស់​ដោយ​ខុសច្បាប់​នូវ​សារធាតុ​ញៀន​ ត្រូវ​ផ្ដន្ទាទោស​ពី ​៥​ឆ្នាំទៅ ​១០​ឆ្នាំ​ និង​​ពិន័យ​ជា​ប្រាក់​ពី ​១០​លាន​រៀល​ទៅ ​២០​លាន​រៀល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល