ម្ចាស់​​សិប្បកម្ម​ឥដ្ឋ​នៅ​ខេត្ត​កណ្ដាល​ ត្រូវ​ផាក​ពិន័យ​ និង​ប្ដឹង​ទៅ​តុលាការ​ ករណី​ក្មេង​ស្រី​ម្នាក់​ដាច់​ដៃ​ស្ដាំ​ចូល​ក្នុង​ម៉ាស៊ីន​កិន​ដី

ដោយ សេក បណ្ឌិត
2019-03-12
អ៊ីម៉ែល
មតិ
Share
បោះពុម្ព
កុមារី ឆេង ស្រី​ភ័ក្រ អាយុ ៩ឆ្នាំ ដែល​ម៉ាស៊ីន​កិន​ដី​ធ្វើ​ឥដ្ឋ កិន​ដាច់​ដៃ​ម្ខាង ត្រូវ​បាន​សង្គ្រោះ​នៅ​មន្ទីរពេទ្យ គន្ធបុប្ផា។
កុមារី ឆេង ស្រី​ភ័ក្រ អាយុ ៩ឆ្នាំ ដែល​ម៉ាស៊ីន​កិន​ដី​ធ្វើ​ឥដ្ឋ កិន​ដាច់​ដៃ​ម្ខាង ត្រូវ​បាន​សង្គ្រោះ​នៅ​មន្ទីរពេទ្យ គន្ធបុប្ផា។
រូបថត៖ ហ្វេសប៊ុក Theuon Vuthy

ក្រសួង​ការងារ​សម្រេច​ផាក​ពិន័យ និង​កសាង​សំណុំរឿង​​ព្រហ្ម​ទណ្ឌ​ទៅ​តុលាការ ចំពោះ​ថៅកែ​សិប្បកម្ម​ឥដ្ឋ​លោក លាង ស៊្រុន ករណី​ប្រើ​ប្រាស់​កម្លាំង​ពលកម្ម​កុមារ ដែល​បណ្ដាល​ឲ្យ​ក្មេង​ស្រី​ម្នាក់​អាយុ ១០ឆ្នាំ ​ដាច់​ដៃ​ម្ខាង​ត្រឹម​គល់​ក្លៀក​ខាង​ស្ដាំ​ចូល​ក្នុង​ម៉ាស៊ីន​វាយ​ដី​ឥដ្ឋ។ អង្គការ​សង្គម​ស៊ីវិល​សាទរ​ចំណាត់​ការ​នេះ ប៉ុន្តែ​ស្នើ​អាជ្ញាធរ​និង​ក្រសួង​ពាក់​ព័ន្ធ​ចុះ​ធ្វើ​អធិការកិច្ច​ និង​អនុវត្ត​ច្បាប់​ឲ្យ​បាន​តឹង​រ៉ឹង​និង​មាន​ប្រសិទ្ធភាព ចំពោះ​ម្ចាស់​សិប្បកម្ម​ឥដ្ឋ​ទាំង​ឡាយ​ ដែល​នៅ​បន្ត​ប្រើប្រាស់​កម្លាំង​ពលរដ្ឋ​កុមារ ទៅ​ធ្វើ​ការ​តាម​ឪពុក​ម្ដាយ​ពួក​គេ។

ប្រធាន​គ្រប់គ្រង​ការិយាល័យ​ឃ្លាំ​មើល​សិទ្ធិ​មនុស្ស​នៃ​អង្គការ លីកាដូ លោក អំ សំអាត យល់​ឃើញ​ថា ​នេះ​ជា​ចំណាត់​ការ​ដ៏​ឆាប់​រហ័ស​ និង​ដំបូង​បង្អស់​ ដែល​ក្រសួង​ការងារ ងាក​មក​យកចិត្ត​ទុក​ជា​ខ្លាំង ករណី​ក្មេង​ស្រី ឈ្មោះ​ ឆេង ស្រីភ័ក្ត្រ អាយុ​ ១០ឆ្នាំ ​ត្រូវ​ជា​កូន​កម្មករ​ឡឥដ្ឋ ដែល​ជួប​គ្រោះថ្នាក់​ដាច់​ដៃ​ស្ដាំ​ត្រឹម​គល់​ក្លៀក នៅ​សិប្បកម្ម​ផលិត​ឥដ្ឋ​មួយ​កន្លែង​ នៅ​ភូមិ​ព្រះ​ប្រសប់ ឃុំ​ព្រះ​ប្រសប់ ស្រុក​ខ្សាច់​កណ្ដាល​ ខេត្ត​កណ្ដាល កាល​ពី​ថ្ងៃ​សៅរ៍ ទី៩ មីនា។

លោក​ អំ សំអាត រំលឹក​ថា អង្គការ​សិទ្ធិមនុស្ស​ លីកាដូ (LICADHO) ​រង​ការ​រិះគន់​យ៉ាង​ខ្លាំង​ពី​ក្រសួង​ការងារ ក្រោយ​បាន​ចេញ​ផ្សាយ​របាយការណ៍​​មួយ​ កាល​ពី​ខែ​ធ្នូ​ ឆ្នាំ​២០១៦ ​ផ្ដោត​ពី​អំពើ​ការ​អភិវឌ្ឍ​លើ​ទាសភាព​ ដោយ​ផ្ដោត​លើ​ការ​បញ្ចាំ​ខ្លួន​ដោះ​បំណុល និង​ពលកម្ម​កុមារ​ក្នុង​សិប្បកម្ម​ឡ​ឥដ្ឋ។

លោក​ អំ​ សំអាត យល់​ថា ​ករណី​ក្មេង​ស្រី​ ឆេង ស្រីភ័ក្ត្រ ដែល​រងគ្រោះ​នៅ​ពេល​នេះ ប្រហែល​ជា​មិន​អាច​កើត​មាន​ឡើយ ប្រសិន​បើ​ក្រសួង​ការងារ ចុះ​ធ្វើ​អធិការកិច្ច​ និង​ចាត់​វិធានការ​ឲ្យ​បាន​តឹងរ៉ឹង​នៅ​តាម​សិប្បកម្ម​ផលិត​ឥដ្ឋ​ទាំងអស់ ក្រោយ​ពី​អង្គការ​សិទ្ធិ​មនុស្ស​ លីកាដូ​ បាន​ចេញ​របាយការណ៍​អំពី ពលកម្ម​កុមារ​ក្នុង​សិប្បកម្ម​ឡ​ឥដ្ឋ​ចាប់​តាំង​ពី​ចុង​ឆ្នាំ២០១៦ មក​នោះ៖ «បញ្ហា​នេះ គឺ​ជា​មេរៀន​ហើយ។ ហើយ​រដ្ឋាភិបាល​ លោក​ត្រូវ​​បង្កើន​បន្ថែម​ទៀត។ ទី១ គឺ​ថា​ត្រូវ​បង្កើន​ថវិកា​ទៅ​លើ​អធិការកិច្ច​ ក្នុង​ការ​ចុះ​ត្រួត​ពិនិត្យ​នៅ​តាម​ឡឥដ្ឋ ហើយ​លុប​បំបាត់​នៅ​អំពើ​ពុក​រលួយ​ចេញ​ទាំង​អស់។ នោះ​បាន​ន័យ​ថា ឡ​ឥដ្ឋ​ណា​ក៏ដោយ​បើ​នៅ​តែ​ប្រើ​ប្រាស់​ទម្រង់​ពលកម្ម​កុមារ ត្រូវ​តែ​អនុវត្ត​ទៅ​តាម​ផ្លូវ​ច្បាប់។ ហើយ​នឹង​ត្រូវ​មាន​ចាត់​វិធានការណ៍​តាម​បែប​ព្រហ្មទណ្ឌ​អី ដើម្បី​ជា​ការ​ទប់​ស្កាត់​កុំ​ឲ្យ​មាន​គ្រោះ​ថ្នាក់​សម្រាប់​កុមារ ក្នុង​ការងារ​ពលកម្ម​ឡ​ឥដ្ឋ​នេះ​ត​ទៅ​ទៀត»

ម្ដាយ​កុមារី​រង​គ្រោះ​ និង​ជា​កម្មករ​នៅ​សិប្បកម្ម​ផលិត​ឡឥដ្ឋ លោកស្រី ឃឹម ចាន់​ណា ប្រាប់​អាស៊ី​សេរី ថា កូន​ស្រី​គាត់​នៅ​មាន​អាការៈ​ឈឺចាប់​ខ្លាំង​ដដែល៖ «ស្ថាន​ភាព​កូន​ខ្ញុំ​វា​នៅ វា​ដឹង​ខ្លួន​ហើយ​ តែ​វា​មិន​ទាន់​ប្រក្រតី។ វា​នៅ​ភ័យ​បារម្ភ។ វា​នៅ​ឈឺ​ចុកចាប់​ដៃ​វា​ហ្នឹង។ ឲ្យ​តែ​ដឹង​ខ្លួន​ម្ដងៗ ស្រែក​រហូត»

ករណី​កុមារី​ជួប​គ្រោះថ្នាក់​ដាច់​ដៃ​ម្ខាង​នៅ​សិប្បកម្ម​ផលិត​ក្នុង​ខេត្ត​កណ្ដាល​នេះ ក្រសួង​ការងារ និង​បណ្ដុះ​បណ្ដាល​វិជ្ជាជីវៈ ​សម្រេច​ពិន័យ​សិប្បកម្ម​ផលិត​ឥដ្ឋ​មួយ​នេះ​ស្របតាម​មាត្រា ៣៦៨​នៃ​ច្បាប់​ការងារ និង​កសាង​សំណុំរឿង​ព្រហ្មទណ្ឌ​លើ​ម្ចាស់​សិប្ប​កម្ម​នេះ ឈ្មោះ​ លាង ស៊្រុន ​ទៅ​តុលាការ អំពី​ករណី​ប្រើប្រាស់​ពលកម្ម​កុមារ និង​ខ្វះ​វិធានការ​ការពារ​សុវត្ថិភាព​កុមារ មិន​ឲ្យ​ចូល​កៀក​ទៅ​កន្លែង​ខ្សែ​សង្វាក់​ផលិតកម្ម។

តាមរយៈ​សេចក្ដី​ប្រកាស​ព័ត៌មាន​របស់​ក្រសួង​ការងារ កាល​ពី​ថ្ងៃ​ទី​១១ ខែ​មីនា ឲ្យ​ដឹង​ថា កុមារី​រង​គ្រោះ​ឈ្មោះ ឆេង ស្រីភ័ក្ត្រ ទទួល​បាន​ការ​គាំទ្រ​ពី​របប​សន្តិសុខ​សង្គម មាន​ដូចជា ការ​ព្យាបាល​របួស រហូត​ដល់​ជា​សះ​ស្បើយ​ដោយ​មិន​​បង់​ប្រាក់ ទទួល​បាន​ប្រាក់​ឧបត្ថម្ភ​អំឡុង​ពេល​ព្យាបាល​របួស និង​ប្រាក់ឧបត្ថម្ភ​សម្រាប់​ការបាត់បង់​សមត្ថភាព​អចិន្ត្រៃយ៍​មួយ​ជីវិត ហើយ​នឹង​សេវា​ស្ដារ​នីតិសម្បទា​ឡើង​វិញ។

ចំពោះ​បណ្ដឹង​ព្រហ្មទណ្ឌ​ទៅ​តុលាការ​វិញ អាស៊ី​សេរី​ព្យាយាម​ទាក់​ទង​អ្នក​នាំ​ពាក្យ​ក្រសួង​ការងារ លោក ហេង សួរ និង​អនុប្រធាន​ការិយាល័យ​គោល​នយោបាយ​នៃ​បេឡា​ជាតិ​របប​សន្តិសុខ​សង្គម លោក ស៊ុំ សុភ័ណ្ឌ ដោយ​ហៅ​ទូរស័ព្ទ​ចូល​តែ​ពុំ​មាន​អ្នក​ទទួល។

អាស៊ី​សេរី​ ក៏​មិន​អាច​សុំ​ការ​ឆ្លើយ​បំភ្លឺ​ពី​មេការ​សិប្បកម្ម​ផលិត​ឥដ្ឋ លោក ប៉េង លាង ករណី​បណ្ដឹង​ក្រសួង​ការងារ​ប្ដឹង​សិប្បកម្ម​មួយ​នេះ​ទៅ​តុលាការ​បាន​នៅ​ឡើយ​ ដោយ​ហៅ​ទូរស័ព្ទ​ចូល​ជាច្រើន​ដង​ តែ​មិន​មាន​អ្នក​ទទួល។

ក្នុង​របាយការណ៍​របស់​អង្គការ លីកាដូ​ ដែល​ចុះ​សិក្សា​ស្រាវ​ជ្រាវ​តំបន់​សិប្បកម្ម​ផលិត​ឥដ្ឋ​ចំនួន១១ នៅ​ក្នុង​ទី​ក្រុង​ភ្នំពេញ និង​ខេត្ត​កណ្ដាល កាល​ពី​ឆ្នាំ​២០១៦ រក​ឃើញ​ថា​ មាន​ករណី​ចំនួន៣ ដែល​ពាក់ព័ន្ធ​នឹង​កុមារ​ដាច់​ដៃ​ដោយ​សារ​ម៉ាស៊ីន​ផលិត​ឥដ្ឋ។ ករណី ទី១ គឺ​ពាក់​ព័ន្ធ​នឹង​កុមារ​ម្នាក់ អាយុ ៧ឆ្នាំ ដែល​លេង​នៅ​ក្បែរ​ម្ដាយ​របស់​គាត់ ខណៈ​ពេល​ម្ដាយ​គាត់​កំពុង​ធ្វើការ​ជាមួយ​ម៉ាស៊ីន​ផលិត​ឥដ្ឋ​ដែល​គ្មាន​គម្រប។ ករណី​ទី២ ក្មេង​ប្រុស​ម្នាក់​អាយុ ៩ឆ្នាំ ដែល​កំពុង​ធ្វើ​ការ​ដាក់​ដី​ចូល​ក្នុង​ម៉ាស៊ីន។ ក្រោយ​មក​កុមារា​ម្នាក់​នេះ បាន​បាត់​បង់​ជីវិត​ដោយ​សារ​តែ​របួស​របស់​គាត់។ ហើយ​នឹង​ករណី​ទី៣ គឺ​កើត​ចំពោះ​កុមារ​អាយុ ១៤ឆ្នាំ​ម្នាក់ ដែល​កំពុង​ធ្វើ​ការ​ដាក់​ដី​ចូល​ម៉ាស៊ីន​ផលិត​ឥដ្ឋ។

ក្រសួង​ការងារ​ព្រមាន​ថា ករណី​​នៅ​តែ​មាន​ប្រើប្រាស់​កម្លាំង​ពលកម្ម​កុមារ​នៅ​ក្នុង​សិប្បកម្ម​ផលិត​ឥដ្ឋ​ ក្រសួង​នឹង ចាត់​វិធានការ​តឹងរ៉ឹង​ទាំង​ផ្នែក​រដ្ឋប្បវេណី និង​ព្រហ្មទណ្ឌ​ចំពោះ​សិប្បកម្ម​ឡឥដ្ឋ​ សហគ្រាស​គ្រឹះស្ថាន ដែល​ល្មើស​នឹង​ប្រកាស​របស់​ក្រសួង​ដែល​បាន​ចុះ​ផ្សាយ​កាល​ពី​ខែ​ធ្នូ ឆ្នាំ២០០៧ ស្ដីពី​លក្ខខណ្ឌ​ការងារ និង​ជីវភាព​រស់​នៅ​ក្នុង​សហគ្រាស​ឡឥដ្ឋ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល