មេធាវីការពារក្ដីឱ្យលោក កឹម សុខា មិនទាន់សម្រេចថា នឹងស្នើទៅសាលាដំបូងរាជធានីភ្នំពេញឱ្យបើកសវនាការរឿងក្តីនេះឡើយវិញ ឬមួយក៏យ៉ាងនោះទេ គិតត្រឹមចុងខែឧសភា នេះ។
សហមេធាវីការពារក្តីឱ្យលោក កឹម សុខា លោក អាង ឧត្តម ប្រាប់អាស៊ីសេរីនៅថ្ងៃទី៣០ ឧសភា ថា ជម្រើសមានពីរដើម្បីដំណើរការក្តីនេះឡើងវិញ គឺចៅក្រមអាចសម្រេចខ្លួនឯងដោយវាយតម្លៃពីស្ថានភាពជំងឺកូវីដ-១៩ ឬក៏មានការស្នើសុំពីខាងមេធាវី។ លោកថា មកដល់ពេលនេះ ពួកលោកមិនទាន់បានជំនុំគ្នាថា តើត្រូវស្នើទៅតុលាការ ឬមួយក៏អត់នោះទេ។ ទោះជាយ៉ាងណា លោកកត់សម្គាល់ថា ស្ថាប័ននានាចាប់ផ្ដើមបើកឡើងវិញហើយ ហើយសូម្បីតែការជម្រះក្តីរឿងទូទៅក៏មានដំណើរការឡើងវិញដែរ លើកលែងតែសំណុំរឿងវិសាមញ្ញមួយនេះ ដែលនៅស្ងប់ស្ងាត់។
ចំណែក ប្រធានក្រុមមេធាវីរដ្ឋាភិបាល លោក គី តិច វិញ ប្រាប់អាស៊ីសេរីថា ខាងលោកមិនមានបញ្ហាអ្វីនោះទេ ពោលបើតុលាការសម្រេចបែបណា ពួកលោកនឹងគោរពតាមសេចក្ដីសម្រេចនោះ។
អាស៊ីសេរីមិនអាចទាក់ទងអ្នកនាំពាក្យតុលាការក្រុងភ្នំពេញ លោក អ៊ី រិន្ទ ដើម្បីសាកសួរអំពីរឿងសវនាការលោក កឹម សុខា នេះបានទេនៅថ្ងៃទី៣០ ឧសភា ដោយលោកមិនលើកទូរស័ព្ទ។
ប្រធានក្រុមប្រឹក្សាជំនុំជម្រះតុលាការក្រុងភ្នំពេញ លោក កូយ សៅ បានផ្អាកសវនាការក្តីលោក កឹម សុខា តាំងពីថ្ងៃទី២៤ មីនា រហូតមក តាមសំណើរបស់ក្រុមមេធាវី ដែលបារម្ភខ្លាចមានករណីឆ្លងរាលដាលជំងឺកូវីដ-១៩ ក្នុងបន្ទប់សវនាការ។ ពេលនោះកម្ពុជាកំពុងកើនឡើងជាគំហុកនៃអ្នកឆ្លងជំងឺនេះ ប៉ុន្តែគិតត្រឹមចុងខែឧសភា កម្ពុជានៅសល់អ្នកជំងឺតែ ២នាក់ទេ ព្រោះអ្នកជំងឺ ១២៣នាក់ ក្នុងចំណោមអ្នកជំងឺសរុប ១២៥ នាក់ បានជាសះស្បើយអស់ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។