តុលាការខេត្តព្រះសីហនុសម្រេចបដិសេធបណ្ដឹងសុំនៅក្រៅ ឃុំរបស់អតីតមន្ត្រីគណបក្ស សង្គ្រោះជាតិ លោក ឆាយ រដ្ឋ។ ចំណែកមន្ត្រីសង្គមស៊ីវិលខេត្តព្រះសីហនុសង្កេតឃើញថា សំណុំរឿងដែលមានអតីតមន្ត្រីគណបក្សប្រឆាំងជាប់ពាក់ព័ន្ធពិបាកទទួលបានយុត្តិធម៌ពីតុលាការណាស់។
មេធាវីការពារក្តីលោក ឆាយ រដ្ឋ គ្រោងធ្វើដំណើរទៅខេត្តព្រះសីហនុ ដើម្បីយកឯកសាររបស់តុលាការខេត្តនេះមកពិនិត្យមើលអំពីការពន្យល់របស់តុលាការទាក់ទងមូលហេតុ ដែលបដិសេធបណ្ដឹងស្នើសុំនៅក្រៅឃុំរបស់លោក ឆាយ រដ្ឋ។
សហមេធាវីការពារក្តីឲ្យលោក ឆាយ រដ្ឋ លោក មេធាវី ឡោ ជុនធី ឲ្យអាស៊ីសេរីដឹងនៅថ្ងៃទី២៦ កុម្ភៈថា ទោះលោកបានដឹងថា តុលាការបដិសេធសំណើសុំនៅក្រៅឃុំនេះហើយក្តី ក៏លោកមិនទាន់ទទួលបានឯកសារពីតុលាការនៅឡើយទេ។ លោកឲ្យដឹងទៀតថា នៅពេលទទួលបានការបញ្ជាក់របស់តុលាការរួចហើយ លោកនឹងប្ដឹងទាស់ទៅសាលាឧទ្ធរណ៍៖ «យើងមិនទាន់ដឹងថា គេបដិសេធដោយមូលហេតុអី ព្រោះយើងអត់បានមើលហ្នឹង ដល់យើងទៅតុលាការផ្ទាល់»។
ក្រុមមន្ត្រីសង្គមស៊ីវិលធ្វើការងារផ្នែកសិទ្ធិមនុស្ស ដែលតាមដានដំណើររឿងនេះបានចាត់ទុកការចោទប្រកាន់លើអតីតមន្ត្រីគណបក្សប្រឆាំង លោក ឆាយ រដ្ឋ និងសកម្មជនសិទ្ធិការងារម្នាក់ទៀត លោក ទេព សុផា គឺជារឿងអយុត្តិធម៌ ព្រោះពួកគេសង្កេតឃើញថា អ្នកទាំងពីរមិនបានប្រព្រឹត្តិកំហុសដូចការចោទប្រកាន់ទេ។
អ្នកសម្របសម្រួលរបស់អង្គការសិទ្ធិមនុស្ស អាដហុក (Adhoc) នៅក្រុងព្រះសីហនុ លោកស្រី ជៀប សុធារី និយាយថា នៅពេលសំណុំរឿងទាក់ទងមន្រ្តីគណបក្សប្រឆាំងពួកគេកម្រទទួលបានយុត្តិធម៌ពីតុលាការណាស់ បើទោះបីលោកស្រីមើលឃើញថា លោក ឆាយ រដ្ឋ មានលក្ខខណ្ឌគ្រប់គ្រាន់អាចនៅក្រៅឃុំបានក្តី។ លោកស្រីយល់ថា សំណុំរឿងនេះជាប់ពាក់ព័ន្ធនឹងរឿងនយោបាយ ខណៈវិវាទនយោបាយរវាងគណបក្សកាន់អំណាច និងគណបក្សប្រឆាំងនៅតែក្ដៅគគុកដដែលនោះ៖ «ខ្ញុំអត់សូវមានទំនុកចិត្តថា តុលាការយើងឯងរាជ្យទេ ដោយសារយើងឃើញថា ដោយយើងមើលពីសមាសភាពគណៈកម្មការអចិន្ត្រៃយ៍គណបក្សប្រជាជនភាគច្រើនជាមន្ត្រីតុលាការ និងមន្ត្រីរាជការផ្សេងទៀត»។
កាលពីថ្ងៃទី២១ មករា អភិបាលរងខេត្តព្រះសីហនុលោក ស្រ៊ុន ស្រ៊ន បានបញ្ជាឲ្យចាប់ខ្លួនលោក ឆាយ រដ្ឋ ក្នុងពេលដែលអតីតចៅសង្កាត់រងទី២ គណបក្ស សម រង្ស៊ី រូបនេះ ដើរមកពីមើលដីរបស់ខ្លួនរួចទៅមើលកន្លែងកើតហេតុ។ ក្នុងពេលនោះសមត្ថកិច្ចក៏ចាប់ខ្លួនលោក ឆាយ រដ្ឋ និងលោក ទេព សុផា ដែលជាបុគ្គលិកក្រៅម៉ោង ឬសកម្មជនសិទ្ធិការងារនៃសម្ព័ន្ធសហជីព ស៊ីខៅដូ (C.CAWDU)។
កាលពីថ្ងៃទី២៣ ខែមករា តុលាការខេត្តព្រះសីហនុសម្រេចឃុំខ្លួន និងចោទប្រកាន់អតីតមន្ត្រី គណបក្ស សង្គ្រោះជាតិ លោក ឆាយ រដ្ឋ និងសកម្មជនសិទ្ធការងារលោក ទេព សុផា ថា ពួក គេបានបោះបង្គោលហ៊ុមព័ទ្ធដី ដាក់សញ្ញាសម្គាល់ក្នុងគោលបំណងកាន់កាប់ជាកម្មសិទ្ធិ និងរារាំងបង្កគ្រោះថ្នាក់របួសស្នាមដល់មន្ត្រីការពារនិងអភិរក្សធម្មជាតិក្នុងការចុះអនុវត្តមុខនាទី និងភារកិច្ចរបស់ខ្លួនតាមមាត្រា៦១នៃច្បាប់ស្ដីតំបន់ការពារធម្មជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។