លោក សុន ឆ័យ សម្រេច​ប្ដឹង​សាទុក្ខ​ទៅ​តុលាការ​កំពូល​ករណី​ចាញ់ក្ដី​បក្ស​កាន់​អំណាច និង​គ.ជ.ប

ដោយ យន់ សាមៀន
2022.12.20
លោក សុន ឆ័យ សម្រេច​ប្ដឹង​សាទុក្ខ​ទៅ​តុលាការ​កំពូល​ករណី​ចាញ់ក្ដី​បក្ស​កាន់​អំណាច និង​គ.ជ.ប អនុប្រធាន​គណបក្ស​ភ្លើងទៀន លោក សុន ឆ័យ ក្នុង​​សវនាការ​នៅសាលាដំបូង​រាជធានី​ភ្នំពេញ កាលពីថ្ងៃទី១៥ ខែ​កក្កដា ឆ្នាំ​២០២២។
រូប៖ ពលរដ្ឋផ្ដល់ឱ្យ

អនុ​ប្រធាន​គណបក្ស​ភ្លើង​ទៀន លោក សុន ឆ័យ សម្រេច​ប្រគល់​សិទ្ធិ​ឱ្យ​មេធាវី​ការពារ​ក្ដី​របស់​លោក​ប្ដឹង​សាទុក្ខ​ទៅ​តុលាការ​កំពូល​ករណី​លោក​ចាញ់​ក្ដី​គណបក្ស​ប្រជាជន​កម្ពុជា និង គ..ប ក្នុង​សំណុំរឿង​បរិហារកេរ្តិ៍។ ចំណែក អ្នក​នាំ​ពាក្យ​គណបក្ស​កាន់​អំណាច ចោទ​ប្រកាន់​ថា បញ្ហា ដែល​កើត​ឡើង​នេះ ព្រោះ​លោក សុន ឆ័យ មិន​បាន​រក្សា​ការ​ស្ងៀមស្ងាត់ ហើយ​ចេះ​តែ​ដើរ​និយាយ​បរិហារកេរ្តិ៍ គណបក្ស​ប្រជាជន​កម្ពុជា។

អនុប្រធាន​គណបក្ស​ភ្លើង​ទៀន លោក សុន ឆ័យ នៅ​តែ​បន្ត​ជំហរ​រក​យុត្តិធម៌ តាម​យន្តការ​របស់​តុលាការ​ត​ទៅ​ទៀត បើទោះជា​លោក​ពុំ​សូវ​មាន​សង្ឃឹម​ថា តុលាការ​អាច​លាង​ភាព​ស្អាតស្អំ​ឱ្យ​លោក​បាន​ក្ដី។ ចំណែក​មន្ត្រី​សិទ្ធិមនុស្ស ដែល​តាមដាន​ដំណើរ​រឿង​នេះ នៅ​តែ​ទទូច​ទៅ​តុលាការ គួរ​ហ៊ាន​សម្រេច​ក្ដី​ដោយ​ឈរ​លើ​សំណុំរឿង​នេះ ដោយ​ឈរ​គោលជំហរ​ឯករាជ្យ ដោយ​កុំ​ស្ថិត​ក្រោម​ឥទ្ធិពល​ពី​អ្នក​មាន​អំណាច ទើប​តុលាការ អាច​សម្រេច​ក្ដី​ដោយ​យុត្តិធម៌។

មេធាវី​ការពារ​លោក សុន ឆ័យ លោក​មេធាវី ជូង ជូងី ឱ្យ​វិទ្យុ​អាស៊ី​សេរី​ដឹង​នៅ​ថ្ងៃ​ទី២០ ខែធ្នូ​ថា កូន​ក្ដី​របស់​លោក សម្រេច​ឱ្យ​លោក​រៀបចំ​ប្ដឹង​សាទុក្ខ​ប្ដឹង​ទៅ​តុលាការ​កំពូល​ប្រឆាំង​ការ​សម្រេច​របស់​សាលា​ឧទ្ធរណ៍ ដែល​បាន​កាត់ក្ដី​ឱ្យ​លោក សុន ឆ័យ ចាញ់​ក្ដី​គណបក្ស​ប្រជាជន​កម្ពុជា និង គ..ប។ លោក​មេធាវី មិន​ទាន់​បង្ហាញ​ក្ដី​រំពឹង​បែប​ណា​លើ​ការ​សម្រេច​ក្ដី​របស់​តុលាការ​កំពូល​នោះ​ទេ ដោយ​លោក​ថា ត្រូវ​រង់ចាំ​ការ​សម្រេច​ក្ដី​ជាក់ស្ដែង​នា​ពេល​ខាង​មុខ​នេះ​សិន។
មេធាវី ជូង ជូងី៖ «អត់​ទាន់​ជាក់លាក់​ដែរ​ព្រោះ​ថា កិច្ចការ​អ៊ីចឹង ខ្ញុំ​រវល់ ប៉ុន្តែ បើ​លៃ​បាន​មួយ​ថ្ងៃ​ពីរ​ថ្ងៃ​ដាក់​ប្លុក​ភ្លាម (ដាក់​ពាក្យ​ប្ដឹង​សាទុក្ខ»

លោក​មេធាវី ជូង ជូងី ឱ្យ​ដឹង​ដែរ​ថា មក​ដល់​ពេល​នេះ លោក​មិន​ទាន់​ដាក់​ពាក្យ​ប្ដឹង​ទៅ​តុលាការ​កំពូល​ជា​ផ្លូវការ​នៅ​ឡើយ​ទេ ព្រោះ​លោក​មាន​ធុរៈ​ចាំបាច់​មួយ​ចំនួន ប៉ុន្តែ​លោក​ថា លោក​នឹង​ដាក់​បណ្ដឹង​សាទុក្ខ​នោះ​ឱ្យ​ស្រប​តាម​នីតិវិធី​របស់​តុលាការ ដែលមានរយៈពេល១ខែ ចាប់​ពី​ពេល​សាលាឧទ្ធរណ៍​ប្រកាស​សាលដីកា​លើ​សំណុំ​រឿង​នេះ។

សាលា​ឧទ្ធរណ៍​ភ្នំពេញ កាល​ពី​ថ្ងៃ​ទី១៤ ខែធ្នូ បាន​រក្សា​ការ​សម្រេច​របស់​តុលាការ​ក្រុង​ភ្នំពេញ​ទុក​ជា​បាន​ការ។ តុលាការ​ជាន់​ខ្ពស់​មួយ​នៅ​តែ​សម្រេច​ឱ្យ​គណបក្ស​ប្រជាជន​កម្ពុជា និង គណៈកម្មាធិការ​ជាតិ​រៀបចំ​ការ​បោះ​ឆ្នោត (..) បន្ត​ឈ្នះ​ក្ដី​លោក សុន ឆ័យ ដដែល។ សាលាឧទ្ធរណ៍​ក៏​សម្រេច​ឱ្យ​លោក សុន ឆ័យ បន្ថែម​ប្រាក់​សំណង​ជំងឺ​ចិត្ត​ទៅ​គណបក្ស​កាន់​អំណាច​ប្រមាណ ៣០ម៉ឺន​ដុល្លារ បន្ថែម​ទៀត លើ​ប្រាក់​ជំងឺ​ប្រមាណ ៧៥ម៉ឺន​ដុល្លារ ដែល​តុលាការ​ក្រុង​ភ្នំពេញ​សម្រេច​ឱ្យ​លោក សុន ឆ័យ បង់​ជូន​ទៅ​គណបក្ស​ប្រជាជន​កម្ពុជា។

បក្ស​កាន់​អំណាច និង គ..ប បាន​ប្ដឹង​លោក សុន ឆ័យ ពី​បទ​បរិហារកេរ្តិ៍ កាល​ពី​ខែមិថុនា ក្រោយ​ពេល​លោក សុន ឆ័យ បាន​រិះគន់​ថា ការបោះឆ្នោត​ឃុំ​សង្កាត់​អាណត្តិ​ទី៥ កន្លង​ទៅ មិន​បាន​ឆ្លុះ​បញ្ចាំង​ពី​ឆន្ទៈ​ប្រជាពលរដ្ឋ មាន​ការ​បំភិតបំភ័យ និង​លួច​បន្លំ​សន្លឹក​ឆ្នោត​ជា​ដើម។

ទាក់ទងរឿងនេះ ភាគី​ដើម​បណ្ដឹង គឺ​អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន និយាយ​ហាក់​ដឹង​លទ្ធផល​មុន​ថា ពេល​តុលាការ​កំពូល​សម្រេច​ក្ដី​រួច​ហើយ លោក​ស្នើសុំ​ទៅ​លោក សុន ឆ័យ គួរ​យល់ព្រម​ទទួល​យក​ការ​សម្រេច​ក្ដី​របស់​តុលាការ​កំពូល។ អ្នក​នាំ​ពាក្យ​គណបក្ស​កាន់​អំណាច​រូប​នេះ នៅតែ​លើក​ឡើង​ដដែលៗ ថា គ្មាន​ការ​ចរចា​ណា​មួយ ដើម្បី​បញ្ចប់​សំណុំរឿង​នេះ​ទេ។

លោក សុខ ឥសាន៖ «បើ សុន ឆ័យ គាត់​ពឹង​ផ្អែក​តុលាការ​កំពូល នៅ​ពេល​តុលាការ​កំពូល​គាត់​សម្រេច​យ៉ាង​ម៉េច សុំ​ឱ្យ សុន ឆ័យ គោរព​តាម​ការ​សម្រេច​គោរព​តាម​ការ​សម្រេច​របស់​តុលាការ​ទៅ កុំ​ឡាំប៉ា​ត​ទៅ​ទៀត អត់​មាន​ពាក់ព័ន្ធ​នឹង​នយោបាយ​អី​ទេ បើ សុន ឆ័យ កុំ​ជេរ​គេ​ទៅ អត់​មាន​បញ្ហា​អី​ទេ កុំ​និយាយ​បរិហារកេរ្តិ៍​គេ»

ពាក់ព័ន្ធសំណុំរឿង​នេះ​ដែរ មតិ​ជាតិ និង​អន្តរជាតិ តែងតែ​រិះគន់​ថា ប្រព័ន្ធ​តុលាការ​កម្ពុជា សម្រេច​ក្ដី​ដោយ​ស្ថិត​ក្រោម​ឥទ្ធិពល​អ្នក​មាន​អំណាច ហើយ​បើ​លោក ហ៊ុន សែន ចង់​បាន​បែប​ណា តុលាការ​ក៏​តែងតែ​សម្រេច​ដូច្នោះ​ដែរ។

អ្នក​នាំ​ពាក្យ​សមាគម​ការពារ​សិទ្ធិមនុស្ស អាដហុក លោក ស៊ឹង សែនរុណា ស្នើ​ទៅ​តុលាការ​កំពូល គួរ​សម្រេច​ក្ដី​ដោយ​ឈរ​លើ​អង្គហេតុ អង្គ​ច្បាប់ និង​ភស្តុតាង។ លោក​យល់​ថា បើ​តុលាការ​មាន​សុភវិនិច្ឆ័យ តុលាការ​អាច​នឹង​ផ្ដល់​យុត្តិធម៌​ដល់​លោក សុន ឆ័យ ព្រោះ​លោក​សង្កេត​ឃើញ​ថា អ្វី​ដែល​លោក សុន ឆ័យ លើក​ឡើង​ជា​សេរីភាព​នៃ​ការ​បញ្ចេញ​មតិ។

លោក ស៊ឹង សែនរុណា៖ «សកម្មជន​សង្គម​អ៊ី​ជា​ដើម​ហ្នឹង អ៊ីចឹង មាន​ការ​ផ្ដល់​យុត្តិធម៌​បែប​ហ្នឹង​មាន​ផល​ចំណេញ​ទៅ​រដ្ឋាភិបាល បក្ស​កាន់​អំណាច​ទៅ​វិញ ដោយសារ​តែ​សហគមន៍​អន្តរជាតិ​គេ​អាច​យល់​ឃើញ​ថា ជា​រឿង​ល្អ​មួយ ដែល​គេ​ពិនិត្យ​អាច​ជា​ការ​បើក​លំហ​នូវ​សិទ្ធិ​សេរីភាព ហើយ​បញ្ឈប់​ការ​ធ្វើ​ទុក្ខ​បុក​ម្នេញ និង​ងាក​មក​គោរព​សិទ្ធិមនុស្ស និង​គោលការណ៍​លទ្ធិ​ប្រជាធិបតេយ្យ»

ប្រសិន​បើ​តុលាការ​កំពូល​កាត់​ក្ដី​ឱ្យ​លោក សុន ឆ័យ ចាញ់​ក្ដី​បក្ស​កាន់​អំណាច និង គ...ដដែល​នោះ តុលាការ​អាច​រឹប​អូស​ដី​ផ្ទះ​របស់​លោក សុន ឆ័យ នៅ​រាជធានី ភ្នំពេញ​មួយ​កន្លែង និង​នៅ​ខេត្ត​សៀមរាប​មួយ​កន្លែង​ទៀត ដែល​តុលាការ​ក្រុង​ភ្នំពេញ​បាន​ចេញ​ដីកា​ឱ្យ​អាជ្ញាធរ​ត្រៀម​ចាំ​រឹបអូស​អចលនទ្រព្យ​របស់​លោក សុន ឆ័យ ទាំង​ពីរ​កន្លែង​នេះ​រួច​ហើយ។

ទោះយ៉ាងណា មន្ត្រី​សង្គម​ស៊ីវិល​លើក​ឡើង​ថា បើ​តុលាការ​មិន​បាន​ផ្ដល់​យុត្តិធម៌​ដល់​លោក សុន ឆ័យ ទេ ជា​ការ​បញ្ជាក់​ថា ការ​ប្រកួតប្រជែងការបោះឆ្នោតឆ្នាំ២០២៣ ខាងមុខ គឺ​ពោរពេញ​ដោយ​ការ​គំរាម​កំហែង ធ្វើ​ទុក្ខ​បុក​ម្នេញ​លើ​គណបក្ស​នយោបាយ ដែល​ជា​គូ​ប្រកួត​ប្រជែង​ជាមួយ​គណបក្ស​កាន់​អំណាច៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។