សមត្ថកិច្ច​បញ្ជូន​ជនសង្ស័យ ១៧​នាក់ ករណី​គ្រឿងញៀន​នៅ​ក្លឹប​កម្សាន្ត​រ៉ក់​ទៅ​តុលាការ

ដោយ មួង ណារ៉េត
2019-03-03
អ៊ីម៉ែល
មតិ
Share
បោះពុម្ព
អ្នកសង្ស័យ​ប្រើប្រាស់ និង​អ្នក​ចែក​ចាយ​គ្រឿង​ញៀន ជាង ៣០០នាក់ ដែល​អាជ្ញាធរ​រាជធានី​ភ្នំពេញ​​ឃាត់​ខ្លួន នៅ​មជ្ឈមណ្ឌល​ក្លឹប​កម្សាន្ត រ៉ក់ (Rock៌)  ម្ដុំ​បឹង​ត្របែក រាជធានី​ភ្នំពេញ កាល​ពី​រាត្រី​ថ្ងៃ​ទី២២ ចូល ២៣ ខែ​កុម្ភៈ ឆ្នាំ២០១៩។
អ្នកសង្ស័យ​ប្រើប្រាស់ និង​អ្នក​ចែក​ចាយ​គ្រឿង​ញៀន ជាង ៣០០នាក់ ដែល​អាជ្ញាធរ​រាជធានី​ភ្នំពេញ​​ឃាត់​ខ្លួន នៅ​មជ្ឈមណ្ឌល​ក្លឹប​កម្សាន្ត រ៉ក់ (Rock៌) ម្ដុំ​បឹង​ត្របែក រាជធានី​ភ្នំពេញ កាល​ពី​រាត្រី​ថ្ងៃ​ទី២២ ចូល ២៣ ខែ​កុម្ភៈ ឆ្នាំ២០១៩។
រូបថត៖ អគ្គស្នងការដ្ឋាន​នគរបាល​ជាតិ

សមត្ថកិច្ច​កាលពី​ថ្ងៃ​ទី​២ មីនា បានសម្រេច​បញ្ជូន​ខ្លួន​ជនសង្ស័យ នៃ​ករណី​បង្ក្រាប​គ្រឿងញៀន ទ្រង់ទ្រាយ​មជ្ឈមណ្ឌល​កម្សាន្ត​រ៉ក់ (Rock) ទៅ​តុលាការ ក្រោយពី​ធ្វើ​កោសល្យ​វិច័យ​ទឹកនោម និង​បាន​ប្រមូល​វត្ថុតាង​គ្រប់គ្រាន់។

សមត្ថកិច្ច បាន​បញ្ជូន​ជនសង្ស័យ ១៧ នាក់ ករណី​គ្រឿងញៀន​នៅ​ក្លឹប​កម្សាន្ត​រ៉ក់ ទៅ​តុលាការ​នោះ គឺ​ដោយសារតែ​អ្នក​ទាំងនោះ ជាប់​ពាក់ព័ន្ធ​បទល្មើស​ប្រើប្រាស់ សម្រួល និង ចាត់ចែង ដោយ​ខុសច្បាប់ នូវ​សារធាតុ​ញៀន។

ស្នងការដ្ឋាន​នគរបាល រាជធានី​ភ្នំពេញ បាន​ចុះផ្សាយ​ក្នុង​ទំព័រ​ហ្វេសប៊ុក​របស់​ខ្លួន​ថា សមត្ថកិច្ច​បាន​បញ្ជូន​ជនសង្ស័យ រួម​ទាំង​វត្ថុតាង ដែល​មាន​គ្រឿងញៀន​ជិត ៥០ គីឡូក្រាម (៤៩,៤៤ គីឡូក្រាម​) ទៅ​សាលាដំបូង​រាជធានី​ភ្នំពេញ ដើម្បី​ចាត់ការ​តាម​នីតិវិធី​តុលាការ។

ជនសង្ស័យ​ទាំង​ទាំង ១៧ នាក់​នោះ មាន​ស្ត្រី​ម្នាក់​ផង ភាគច្រើន​ជា​យុវជន និង​យុវតី មាន​អាយុ​ចាប់ពី ១៩ ដល់ ២១​ឆ្នាំ។

កាលពី​ដំបូង គឺ​នៅ​យប់​រំលង​អធ្រាត្រ ថ្ងៃទី២៣ ខែ​កុម្ភៈ សមត្ថកិច្ច បាន​ចុះ​ឃាត់ខ្លួន​មនុស្ស​សរុប ៣១១ នាក់ ពី​មជ្ឈមណ្ឌល​កម្សាន្ត​រ៉ក់ របស់​ឧកញ៉ា គិត ធាង ដែល​ជា​បងប្រុស​បង្កើត​របស់​ឧកញ៉ា គិត ម៉េង នៅ​ផ្លូវ​ព្រះ​មុនីវង្ស សង្កាត់​ទន្លេបាសាក់ ខណ្ឌ​ចំការមន រាជធានី​ភ្នំពេញ​។ ក្នុង​នោះ​មាន​ជនជាតិ​ចិន ១៣​នាក់ ដែល​បី​នាក់ គ្មាន​លិខិតឆ្លងដែន។ បច្ចុប្បន្ន​ជនជាតិ​ចិន ទាំង ១៣ នាក់​នោះ សមត្ថកិច្ច បាន​បញ្ជូន​ទៅ​ការិយាល័យ​ស៊ើបអង្កេត អនុវត្ត​នីតិវិធី នៃ​ស្នងការដ្ឋាន​នគរបាល​រាជធានី​ភ្នំពេញ ដើម្បី​ចាត់ការ​បន្ត។

សមត្ថកិច្ច បាន​ដោះលែង​មនុស្ស​ចំនួន ២៨១ នាក់ ផ្សេងទៀត ក្រោយ​ឱ្យ​អ្នក​ទាំងនោះ​ធ្វើ​កិច្ចសន្យា ជាមួយ​អាណាព្យាបាល ថា​យក​ទៅ​អប់រំ​បន្ត។

ករណី​ប្រើប្រាស់ និង​ជួញដូរ​គ្រឿងញៀន មានការ​កើន​ឡើង​គួរ​ឱ្យ​កត់សម្គាល់ ទោះ​មានការ​បង្ក្រាប​ជា​ហូរហែ​យ៉ាង​ណាក្តី​។ អាជ្ញាធរ​ក៏​ត្រូវ​ពង្រីក​ពន្ធនាគារ ដោយសារតែ​អ្នកទោស​ករណី​គ្រឿងញៀន កើន​ឡើង​ខ្លាំង​។ មិនតែប៉ុណ្ណោះ រដ្ឋ​ក៏​ត្រូវ​បន្ថែម​ថវិកា​ចំណាយ ដើម្បី​ពង្រីក​មជ្ឈមណ្ឌល​បន្សាប​គ្រឿងញៀន។

ភ្លាមៗ​ក្រោយ​ការ​បង្ក្រាប​ករណី​គ្រឿងញៀន នៅ​ក្លឹប​កម្សាន្ត​រ៉ក់​នេះ ស្នងការ​នគរបាល​រាជធានី​ភ្នំពេញ រក​ឃើញ​ថា ក្លឹប​កម្សាន្ត និង​បារ​បារាំង ចំនួន​ជាង ១.២០០ កន្លែង បាន​ប្រើប្រាស់​គ្រឿងញៀន​ដែរ​។ សមត្ថកិច្ច​មិនបាន​ចាត់ការ​ម្ចាស់​កន្លែង​ទាំងនេះ តាម​ផ្លូវ​ច្បាប់​ទេ គឺ​គ្រាន់តែ ឱ្យ​ពួកគាត់​ធ្វើ​កិច្ចសន្យា បញ្ឈប់​ការប្រើប្រាស់​គ្រឿងញៀន តែប៉ុណ្ណោះ។

មន្ត្រី​សង្គម​ស៊ីវិល នៅតែ​ព្រួយបារម្ភ ថា​ចំណាត់​ការ​បង្ក្រាប​គ្រឿងញៀន នៅតែ​មិន​ទាន់​មាន​ប្រសិទ្ធភាព និង​ស្នើ​ឱ្យ​អាជ្ញាធរ វែកមុខ​រក​ជន​ដែល​នៅ​ពីក្រោយ​ការ​នាំ​ចូល​គ្រឿងញៀន​នេះ និង ដាក់ទោស​ទណ្ឌ​ឱ្យ​បាន​តឹងរ៉ឹង​បំផុត ទើប​អាច​កាត់បន្ថយ​ករណី​គ្រឿងញៀន​នេះ​បាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល