អាជ្ញាធរ​បញ្ជូន​លោក អ៊ូច ឡេង និង​សហគមន៍​ព្រៃ​ឡង់ ៣​នាក់​ទៀត ទៅ​តុលាការ​ខេត្ត​ក្រចេះ

ដោយ ជី វិតា
2020-03-15
អ៊ីម៉ែល
មតិ
Share
បោះពុម្ព
ក្រុម​អ្នក​ស្រឡាញ់​បរិស្ថាន​ជាង ១០​នាក់ ធ្វើ​យុទ្ធនាការ​ទាមទារ​ឱ្យ​ដោះលែង លោក អ៊ូច ឡេង និង​សហគមន៍​ព្រៃឡង់ ខេត្ត​ក្រចេះ នៅ​មុខ​សាលាដំបូង​ខេត្ត​ក្រចេះ នៅ​ព្រឹក​ថ្ងៃ​ទី​១៥ មីនា។
ក្រុម​អ្នក​ស្រឡាញ់​បរិស្ថាន​ជាង ១០​នាក់ ធ្វើ​យុទ្ធនាការ​ទាមទារ​ឱ្យ​ដោះលែង លោក អ៊ូច ឡេង និង​សហគមន៍​ព្រៃឡង់ ខេត្ត​ក្រចេះ នៅ​មុខ​សាលាដំបូង​ខេត្ត​ក្រចេះ នៅ​ព្រឹក​ថ្ងៃ​ទី​១៥ មីនា។
Photo Provided

អាជ្ញាធរ​ខេត្ត​ក្រចេះ​បាន​បញ្ជូន លោក អ៊ូច ឡេង ប្រធាន​អង្គការ​កិច្ចការ​ពិសេស​សិទ្ធិមនុស្ស​កម្ពុជា និង អ្នក​សហគមន៍​ព្រៃ​ឡង់ ៣​នាក់​ទៀត ទៅ​សាលាដំបូង ខេត្ត​ក្រចេះ នៅ​ព្រឹក​ថ្ងៃ​ទី១៥ ខែ​មីនា។

ចំណែក​ក្រុម​អ្នក​ស្រឡាញ់​បរិស្ថាន រួម​ទាំង​ព្រះសង្ឃ​ប្រមាណ​ជាង ១០​នាក់ កំពុង​ធ្វើ​យុទ្ធនាការ កាន់​បដា នៅមុខ​សាលាដំបូង ខេត្ត​ក្រចេះ ដើម្បី​ទាមទារ​ឱ្យ​ដោះលែង អ្នក​ទាំង​បួន​នាក់​នោះ។

ពួកគេ​បាន​ស្រែក​ទាមទារ​ឱ្យ​មាន​ការ​ដោះលែង អ្នក​ទាំង​បួន​នាក់​នោះ នៅមុខ​ខ្លោងទ្វារ​សាលាដំបូង ខេត្ត​ក្រចេះ អម​ដោយ​បដា បង្ហាញ​ខ្លឹមសារ​ថា សកម្មជន​បរិស្ថាន គឺជា​វីរជន អ្នកការពារ​បរិស្ថាន មិនមែន​ជា​ឧក្រិដ្ឋជន សូម​ឱ្យ​មានការ​ដោះលែង​អ្នក​ទាំង ៤​នាក់​នោះ​ជាបន្ទាន់ គ្មាន​ការ​ចាប់ចង និង​គ្មាន​ការ​ធ្វើ​ទារុណកម្ម ធ្វើទុក្ខបុកម្នេញ​អ្នកការពារ​បរិស្ថាន។

ប្រធាន​បណ្ដាញ​យុវជន​កម្ពុជា (CYN) លោក ទឹម ម៉ាឡៃ ដែល​ចុះ​ឃ្លាំមើល​រឿង​នេះ​ឱ្យ​ដឹង នៅ​ថ្ងៃ​ទី ១៥ មីនា​ថា តំណាង​អយ្យការ​ខេត្ត​ក្រចេះ កំពុង​ធ្វើ​ការ​សាកសួរ លោក អ៊ូច ឡេង និង​អ្នក​សហគមន៍​ព្រៃ​ឡង់ ៣​នាក់​ទៀត គឺ​លោក ស្រី ថី លោក ខេម សុឃី និង​លោក ម៉េត មាត់ បន្ទាប់​ពី​ពួកគេ​ទាំងនោះ ត្រូវ​បាន​ឃាត់ខ្លួន​អស់​រយៈពេល​ជាង ២៤​ម៉ោង​មក​ហើយ គិត​ត្រឹម​ម៉ោង ១១ ព្រឹក​ថ្ងៃ​ទី១៥ ខែ​មីនា នេះ​។ លោក​ថា តំណាង​ក្រុម​អង្គការ​សង្គម​ស៊ីវិល​ចំនួន ៥​ស្ថាប័ន និង​ក្រុម​អ្នក​ស្រឡាញ់​បរិស្ថាន​ជាង ១០​នាក់​ទៀត កំពុង​តាមដាន និង​ឃ្លាំមើល​រឿង​នេះ និង​បន្ត​ធ្វើ​យុទ្ធនាការ ទាមទារ​ឱ្យ​មាន​ការ​ដោះលែង​អ្នក​ទាំងនោះ។

ម្ចាស់​ពានរង្វាន់​វីរជន​បរិស្ថាន Goldman Environmental Prize លោក អ៊ូច ឡេង និង​អ្នក​សហគមន៍​ព្រៃ​ឡង់ ៣​នាក់​ផ្សេងទៀត ត្រូវ​បាន​កង​សន្តិសុខ​របស់​ក្រុមហ៊ុន ស៊ីង បាយអូថេក (Think Biotech) ចាប់​ឃាត់ខ្លួន​កាលពី​ព្រឹក​ថ្ងៃ​ទី​១៣ ខែ​មីនា នៅ​គ្រា​ដែល​ពួកគេ​ចុះ​ស៊ើបអង្កេត​អាជីវកម្ម​ឈើ​ខុសច្បាប់ ក្នុង​តំបន់​ព្រៃឡង់៕

សូម​លោក​អ្នកនាង​រង់ចាំ​ស្ដាប់​ព័ត៌មាន​ពិស្ដារ​នៅ​រាត្រី​នេះ...

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល