"មហាជន​អាច​ប្ដឹង​ឱ្យ​មាន​ការ​ស៊ើបអង្កេត​ករណី​តុលាការ​ដោះលែង​កញ្ញា យិន ម៉ាណា"

ដោយ ស្ងួន អមរា
2019-05-17
អ៊ីម៉ែល
មតិ
Share
បោះពុម្ព
យុវតី យិន ម៉ាណា (រូប​ស្ដាំ​កណ្ដាល) និង​ក្រុម​គ្រួសារ ពេល​មក​បង្ហាញ​ខ្លួន​នា​ការិយាល័យ​ចរាចរណ៍​ផ្លូវ​គោក រាជធានី​ភ្នំពេញ នៅ​ព្រឹក​ថ្ងៃ​ទី២៩ ខែ​មីនា ឆ្នាំ​២០១៩។
យុវតី យិន ម៉ាណា (រូប​ស្ដាំ​កណ្ដាល) និង​ក្រុម​គ្រួសារ ពេល​មក​បង្ហាញ​ខ្លួន​នា​ការិយាល័យ​ចរាចរណ៍​ផ្លូវ​គោក រាជធានី​ភ្នំពេញ នៅ​ព្រឹក​ថ្ងៃ​ទី២៩ ខែ​មីនា ឆ្នាំ​២០១៩។
រូប​គេហទំព័រ​អគ្គស្នងការ​នគរបាល​ជាតិ

សង្គម​ស៊ីវិល​យល់​ថា មហាជន អាច​នឹង​ប្ដឹង​ទៅ​អង្គភាព​ប្រឆាំង​អំពើពុករលួយ និង​ឧត្ដមក្រុមប្រឹក្សា​អង្គចៅក្រម ដើម្បី​ស៊ើបអង្កេត​ភាព​មិន​ប្រក្រតី​របស់​ចៅក្រម​សាលាដំបូង​រាជធានី​ភ្នំពេញ លោក អ៊ុក សុវណ្ណារិទ្ធិ ដែល​សម្រួល​ឱ្យ​កញ្ញា យិន ឃុនម៉ី ហៅ យិន ម៉ាណា អនុវត្ត​ទោស​ត្រឹម​២​ខែ ក្នុង​ករណី​បើក​ឡាន​ក្នុង​ល្បឿន​លឿន បុក​និស្សិត​ស្រី​ម្នាក់​ស្លាប់ កាលពី​ចុងខែ​មីនា។

នាយក​ប្រតិបត្តិ​អង្គការ​សម្ព័ន្ធ​គណនេយ្យភាព​សង្គម លោក សន ជ័យ សង្កេត​ឃើញ​ថា ករណី​ផ្ដន្ទាទោស​កូនស្រី​របស់​សមាជិក​ក្រុមប្រឹក្សា​អាជ្ញាធរ​អប្សរា​ម្នាក់ ឈ្មោះ យិន ម៉ាណា មាន​ភាព​មិន​ប្រក្រតី​តាំងពី​ដំបូង​មក​ម្ល៉េះ​។ ប៉ុន្តែ ដោយសារ​មាន​ចលនា​​ជំរុញ​របស់​មហាជន​តាម​បណ្ដាញ​សង្គម ធ្វើ​ឱ្យ​ស្ថាប័ន​អនុវត្ត​ច្បាប់ បន្ត​នីតិវិធី​រហូត​ដល់​តុលាការ។

លោក​អះអាង​ថា នៅ​ពេល​ចៅក្រម​សាលាដំបូង​រាជធានី​ភ្នំពេញ សម្រេច​បែបនេះ មហាជន​នឹង​មិន​សុខចិត្ត​ទេ ហើយ​អាច​នឹង​មាន​បណ្ដឹង​ទាមទារ​ឱ្យ​ស៊ើបអង្កេត​ជុំវិញ​ការសម្រេច​នេះ៖ «ខ្ញុំ​មើល​ទៅ ទំហំ​នៃ​ការ​អំពាវនាវ​ហ្នឹង​ធំធេង ហើយ​គេ​ចង់បាន​នូវ​យុត្តិធម៌​ពិតប្រាកដ ហើយ​គេ​ចង់បាន​ករណី​នេះ​មួយ ជា​ការ​អនុវត្ត​ច្បាប់ ដែល​ត្រឹមត្រូវ ដែល​ម៉ត់ចត់។ ក៏ប៉ុន្តែ​ខ្ញុំ​គិត​ថា សេចក្ដី​សម្រេច​របស់​តុលាការ (​ផ្សាយ​តាម​សារព័ត៌មាន​ក្នុងស្រុក​មួយ​ចំនួន​) ខ្ញុំ​គិត​ថា ជា​ការ​បង្ហាញ​អាច​ថា វា​ជា​ការ​អស់​សង្ឃឹម​​របស់​​អ្នក ​ដែល​ឈឺ​ឆ្អើរ​រឿង​អយុត្តិធម៌ ឬ​ក៏​មនុស្ស​ស្លាប់​ដោយសារ​គ្រោះថ្នាក់​ចរាចរណ៍»

ប្រព័ន្ធ​ឃោសនា​ស្និទ្ធ​របប​ក្រុងភ្នំពេញ (Freshnews) អះអាង​ថា មាន​មន្ត្រី​ជាន់ខ្ពស់​សាលាដំបូង​រាជធានី​ភ្នំពេញ​ប្រាប់​ថា ប្រធាន​ក្រុមប្រឹក្សា​ជំនុំជម្រះ លោក អ៊ុក សុវណ្ណារិទ្ធិ នៅ​ថ្ងៃ​ទី​១៧ ឧសភា បាន​សម្រេច​ឱ្យ​កញ្ញា យិន ម៉ាណា អនុវត្ត​ទោស​ត្រឹម ២​ខែ​គត់ ហើយ​ទោស​សល់​ ៨​ខែ​ទៀត គឺ​ត្រូវ​ព្យួរ។ អាស៊ីសេរី មិន​អាច​សុំ​ការ​បញ្ជាក់​បន្ថែម​ពី​អ្នកនាំពាក្យ​សាលាដំបូង​រាជធានី​ភ្នំពេញ លោក អ៊ី រិន្ទ និង​អ្នកនាំពាក្យ​អគ្គពន្ធនាយកដ្ឋាន​ពន្ធនាគារ លោក នុត សាវនា បានទេ នៅ​ថ្ងៃ​ទី​១៧ ឧសភា ដោយ​សារ​​មិន​ទទួល​ទូរស័ព្ទ។

កាលពី​ថ្ងៃ​ទី​២៦ ខែ​មីនា កញ្ញា យិន ម៉ាណា បាន​បើក​រថយន្ត​សេរី​ទំនើប (Rang rover) ក្នុង​ល្បឿន​យ៉ាង​លឿន បុក​និស្សិត​ស្រី​ម្នាក់ បណ្ដាល​ឱ្យ​ប៉ើង​ផ្ទប់ នឹង​របង​ផ្ទះ​ពលរដ្ឋ​នៅ​ខណ្ឌ​ទួលគោក ស្លាប់​ភ្លាមៗ នៅ​នឹង​កន្លែង​កើតហេតុ។ បន្ទាប់​ពី​កើត​ហេតុ ជន​បង្ក​មិនបាន​ចុះ​មើល ឬ​ជួយសង្គ្រោះ​ជនរងគ្រោះ​ទេ ប៉ុន្តែ បាន​បន្ថែម​ល្បឿន​គេច​ខ្លួន រហូត​ដល់​មាន​បញ្ជា​របស់​មេដឹកនាំ​របប​ក្រុងភ្នំពេញ លោក ហ៊ុន សែន និង​ទុក​ពេលវេលា​ឱ្យ​ច្រើន​ថ្ងៃ ក្នុង​ការ​ចូលខ្លួន​សារភាព។

ទោះ​ធ្លាប់​ទទួល​បាន​សំណង​រដ្ឋប្បវេណី និង​ថវិកា​ចូល​បុណ្យ​សព​ច្រើន​ម៉ឺន​ដុល្លារ តែ​ក្រុម​គ្រួសារ​ជនរងគ្រោះ ធ្លាប់​ទាមទារ​ឱ្យ​សមត្ថកិច្ច​ផ្ដន្ទាទោស​ជន​បង្ក​តាម​ផ្លូវ​ច្បាប់។

មាត្រា​៨៥ នៃ​ច្បាប់​ចរាចរណ៍​ថ្មី ចែងថា ជន​ណា​បើកបរ​ដោយ​ធ្វេស​ប្រហែល​ខ្ជីខ្ជា មិន​ប្រុងប្រយ័ត្ន​បណ្ដាល​ឱ្យ​អ្នកដទៃ​ស្លាប់​ត្រូវ​ផ្ដន្ទាទោស​ពី ១​ឆ្នាំ ទៅ ៣​ឆ្នាំ និង​ពិន័យ​ជា​ប្រាក់​ ៤​លាន​រៀល​ទៅ​ ១០​លាន​រៀល​។ ក្នុង​ករណី​ជន​បង្ក​បើកបរ​ដោយ​គ្មាន​ប័ណ្ណបើកបរ និង​បើកបរ​ក្នុង​ស្ថានភាព​ស្រវឹង​ហើយ​បណ្ដាល​ឱ្យ​ស្លាប់​ច្រើន​នាក់ ឬ​បើក​រត់គេច​ពី​កន្លែង​កើត​ហេតុ ដើម្បី​គេច​ពី​ការទទួលខុសត្រូវ​គឺ​ត្រូវ​ផ្ដន្ទាទោស​ពី ២​ឆ្នាំ ទៅ ៥​ឆ្នាំ និង​ពិន័យ​ជា​ប្រាក់​ពី​ ១០​លាន​រៀល ទៅ​ ២៥​លាន​រៀល ព្រមទាំង​ហាម​​បើកបរ​​រយៈពេល ៥​ឆ្នាំ។

ក្នុង​ករណី​កញ្ញា យិន ម៉ាណា បើ​ទោះ​ជា សមត្ថកិច្ច​រកឃើញ​ថា ក្រោយ​បើក​បុក​ជនរងគ្រោះ ជន​​បង្ក​​បាន​​បើក​​រថយន្ត​គេចខ្លួន​ពី​កន្លែង​កើតហេតុ តែ​ចៅក្រម​សាលាដំបូង​រាជធានី​ភ្នំពេញ សម្រេច​ផ្ដន្ទាទោស​តែ ១​ឆ្នាំ​គត់។

មេធាវី​របស់​គ្រួសារ​ជនរងគ្រោះ និង​ជា​សមាជិក​ក្រុម​មេធាវី​ជួយ​ជន​ក្រីក្រ​របស់​លោក ហ៊ុន សែន គឺ​លោក​មេធាវី សុខ អួង បដិសេធ​ផ្ដល់​បទសម្ភាសន៍​ជុំវិញ​ករណី​នេះ ដោយសារ​ជាប់រវល់​ដើរ​ហាត់ប្រាណ​ពេល​ព្រលប់។ តែ​លោក​បាន​ផ្ដល់​បទ​សម្ភាសន៍​​ឱ្យ​​សារព័ត៌មាន​​ក្នុង​ស្រុក (ថ្មីៗ) ក្រោយ​ការ​ប្រកាស​សាលក្រម​ថា តុលាការ​ទុក​សិទ្ធិ​​ឱ្យ​​ខាង នាង យិន ម៉ាណា ប្ដឹង​ទៅ​សាលាឧទ្ធរណ៍ ប្រសិនបើ​មិន​​សុខ​ចិត្ត នឹង​ការ​សម្រេច​ឱ្យ​ជាប់ឃុំ​ ២​ខែ​នេះ។

អាស៊ីសេរី មិនទាន់​អាច​ទាក់ទង​សុំ​ការ​បញ្ជាក់​ពី​ក្រុម​គ្រួសារ កញ្ញា យិន ម៉ាណា និង​ក្រុម​គ្រួសារ​របស់​ជនរងគ្រោះ សព​និស្សិត​ឆ្នើម ឌុំ រីដា បាន​នៅឡើយ​ទេ។

អនុប្រធាន​វិទ្យាស្ថាន​សុវត្ថិភាព​ចរាចរណ៍ លោក គង់ រតនៈ យល់ថា ការសម្រេច​ឱ្យ​កញ្ញា យិន ម៉ាណា អនុវត្ត​ទោស​តែ ២​ខែ ហាក់​បី​រាង​ស្រាល​ខ្លាំង បើ​ធៀប​នឹង​ច្បាប់​ចែង និង​ករណី​ជន​បង្ក​ផ្សេងទៀត​។ លោក​ថា ការអនុវត្ត​ទោស​ស្រាល​បែប​នេះ មិន​​ស្មើនឹង​ទំហំ​ទឹកចិត្ត​របស់​មហាជន​ឡើយ៖ «សម្រាប់​ខ្ញុំ​ទោស​ដែល​តុលាការ​សម្រេច (​អនុវត្ត​ទោស​ ២​ខែ សល់​ ១០​ខែ​ព្យួរ​) វា​រាង​ស្រាល​។ ខ្ញុំ​គិត​ថា វា​មាន​ករណី​យោង​ជាច្រើន​ទៀត ដែល​យក​មក​សំអាង​អ៊ីចឹង​ណា។ ប៉ុន្តែ​សម្រាប់​ទឹកចិត្ត ខ្ញុំ​ចង់​ឱ្យ​បាន (ដាក់​ឃុំ​)​ ច្រើនជាង​ហ្នឹង​។ ប៉ុន្តែ​បើ​តុលាការ​សម្រេច​អ៊ីចឹង​ទៅ​ហើយ យើង​ក៏​មិន​មាន​អ្វី​ទៅ​តវ៉ា​ទៀត​ដែរ​។ យើង​គ្រាន់​​តែ​ថា​ យ៉ាងហោចណាស់ ក៏​គាត់​បាន​ជាប់ទោស ឯ​ការ​ផ្សះផ្សា​យ៉ាងណា​ទៀត​នោះ យើង​គិត​តាម​ក្រោយ​ទៀត ទៅតាម​ទំហំ​នៃ​ការផ្សះផ្សា​ផ្លូវចិត្ត​តាម​ក្រោយ​ទៀត​ណា»

ក្នុង​រយៈពេល​​​កន្លះ​ខែ​ចុង​ក្រោយនេះ ករណី​ដោះលែង​កញ្ញា យិន ម៉ាណា គឺជា​ករណី​ទី​២ បន្ទាប់ពី​ចៅក្រម​សាលាដំបូង​ខេត្ត​កំពង់ចាម ដោះលែង​ប៉េអិម សក្ដិ​៤ ខេត្ត​ក្រចេះ​ម្នាក់ ឈ្មោះ សាន្ត សុខុម ត្រូវជា​កូន​ប្រុស​ឧត្ដមសេនីយ៍ត្រី សាន្ត ប៊ុនថាន មេ​ប៉េអិម​ខេត្ត​ក្រចេះ ឱ្យ​នៅ​ក្រៅ​ឃុំ​បណ្ដោះអាសន្ន​ដោយ​ស្ងាត់ៗ ក្រោយ​ឃុំខ្លួន​បាន ​២៥​ថ្ងៃ។ កូនប្រុស ស្រី របស់​អ្នក​មាន​អំណាច​ទាំងពីរ​នាក់ ដែល​តុលាការ​សម្រេច​ដោះលែង​មុន​ការអនុវត្ត​ទោស​នេះ សុទ្ធតែ​ចូលខ្លួន​សារភាព ដោយ​សារ​​មាន​បញ្ជា​របស់​លោក ហ៊ុន សែន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល