មន្ត្រីម៉ាឡេស៊ីដដែលបញ្ជាក់ថា ជាធម្មតាម្ចាស់កសិដ្ឋានតែងបញ្ជូនសត្វជ្រូកដែលមានសុខភាពល្អទៅមណ្ឌលសត្តឃាត ឬកន្លែងសម្លាប់សត្វ ប៉ុន្តែមានកសិករម៉ាឡេស៊ីខ្លះលួចបន្លំបញ្ជូនជ្រូកឈឺទៅកាប់យកសាច់លក់។ បញ្ហានេះ ច្រើនកើតមានឡើងនៅភូមិភាគកណ្ដាលនៃប្រទេស ក្នុងនោះរួមមាននៅខេត្ត Selangor និងខេត្ត Negri Sembilan។ មន្ត្រីក្រសួងសុខាភិបាលម៉ាឡេស៊ី មានប្រសាសន៍ប្រាប់ទីភ្នាក់ងារព័ត៌មាន RFP ថា វិធានការថ្មីនៃការបង្កប់ឧបករណ៍តាមដានសុខភាពជ្រូករស់ នឹងត្រូវផ្ដើមនៅពាក់កណ្ដាលឆ្នាំ២០១១ នេះ។ គឺថាប្រសិនបើលេខសំគាល់ដែលមន្ត្រីបសុសត្វបង្កប់ក្រោមស្បែកសត្វជ្រូក មិនត្រូវគ្នានឹងលេខកូដដែលតម្កល់នៅមណ្ឌលសត្តឃាត ដែលមានអាជ្ញាប័ណ្ណពីរដ្ឋទេនោះ សត្វជ្រូកនោះនឹងត្រូវរងការសង្ស័យថា មានបញ្ហា។
វិធានការថ្មីនេះ ធ្វើឡើងក្នុងបំណងតាមដានទប់ស្កាត់កុំឲ្យមានការចរាចរលក់សាច់ជ្រូកមានជំងឺ ដែលជាបទល្មើសខុសច្បាប់ មិនឲ្យមាននៅតាមទីផ្សារនៅទូទាំងប្រទេសម៉ាឡេស៊ី៕