ប៉ូលិស​ខេត្ត​រតនគិរី​ចាប់ខ្លួន​សកម្មជន​បក្ស​ប្រឆាំង​២​នាក់​សាកសួរ

ដោយ ទីន ហ្សាការីយ៉ា
2019-09-22
អ៊ីម៉ែល
មតិ
Share
បោះពុម្ព
​ប្រធាន​ប្រតិបត្តិ​គណបក្ស​សង្គ្រោះជាតិ ក្រុង​បានលុង លោក ធឿន ប៊ុនធន ដែល​ត្រូវ​អាជ្ញាធរ​ចាប់​ខ្លួន។
​ប្រធាន​ប្រតិបត្តិ​គណបក្ស​សង្គ្រោះជាតិ ក្រុង​បានលុង លោក ធឿន ប៊ុនធន ដែល​ត្រូវ​អាជ្ញាធរ​ចាប់​ខ្លួន។
Photo Provided

មន្ត្រី​គណបក្ស​សង្គ្រោះជាតិ​ខេត្ត​រតនគិរី អះអាង​ថា មន្ត្រី​ប៉ូលិស​ខេត្ត​នេះ បាន​ចាប់​ខ្លួន​សកម្មជន​គណបក្ស​ប្រឆាំង ២​នាក់ គឺ​លេខាធិការ​គណបក្ស​សង្គ្រោះជាតិ​ខេត្ត លោក ងិន សុផាត និង​ប្រធាន​ប្រតិបត្តិ​ក្រុង​បានលុង លោក ធឿន ប៊ុនធន បញ្ជូន​ទៅ​សាកសួរ​នៅ​ស្នងការ​នគរបាល​ខេត្ត ដោយ​មិន​ដឹង​មូលហេតុ កាល​ពី​ថ្ងៃ​ទី​២១ កញ្ញា កន្លង​ទៅ។

ភរិយា​មន្ត្រី​គណបក្ស​សង្គ្រោះជាតិ ក្រុង​បាន​លុង អ្នកស្រី យ៉ាន់ ណារី ប្រាប់​អាស៊ីសេរី​នៅ​រសៀល​ថ្ងៃ​ទី​២២ កញ្ញា​ថា មន្ត្រី​ប៉ូលិស​ជាច្រើន​នាក់​បាន​ចូល​ទៅ​ចាប់​ស្វាមី​របស់​លោក​ស្រី នៅ​ក្នុង​ហាង​លក់​បាយ​មួយ​កន្លែង​នៅ​ភូមិ​១ សង្កាត់​កាចាញ ក្រុង​បានលុង កាល​ពី​ព្រឹក​ថ្ងៃ​ទី២១ កញ្ញា។ លោកស្រី​បន្ត​ថា ការ​ចាប់ខ្លួន​នេះ​ ​គឺ​ជា​រឿង​អយុត្តិធម៌​បំផុត ពីព្រោះ​មន្ត្រី​ប៉ូលិស​ចាប់​ស្វាមី​របស់​លោក​ស្រី​ដោយ​ពុំបាន​ប្រព្រឹត្ត​ខុសច្បាប់​ឡើយ៖ «ខ្ញុំ​ចង់​ប៉ូលិស​ដោះលែង​គាត់​មកវិញ ព្រោះ​ប្ដី​ខ្ញុំ​អត់​មាន​ទោស​ត្រូវ​ជាប់គុក​នោះ​ទេ។ គេ​ថា​ប្ដី​ខ្ញុំ​បង្ហោះ​ព័ត៌មាន​ប្រមូល​ប្រជាពលរដ្ឋ​ទៅ​ចូលរួម​ទទួល​លោក សម រង្ស៊ី វិល​ចូល​ស្រុក​វិញ។ ខ្ញុំ​យល់ថា​អត់​ត្រឹម​ត្រូវ​ទេ ព្រោះ​នេះ​ជា​ការ​សម្ដែង​មតិ​របស់​ប្រជាពលរដ្ឋ»

មន្ត្រី​គណបក្ស​សង្គ្រោះជាតិ​ម្នាក់​សុំ​មិន​ឱ្យ​បញ្ចេញ​ឈ្មោះ និង​សំឡេង​ឱ្យ​ដឹង​ថា មន្ត្រី​ប៉ូលិស​បាន​បញ្ជូន​លោក ងិន សុផាត និង លោក ធឿន ប៊ុនធន ទៅ​ឃុំខ្លួន​ស្នងការដ្ឋាន​នគរបាល​ខេត្ត​រតនគិរី រហូត​មក​ទល់​រសៀល​ថ្ងៃ​ទី​២២ កញ្ញា មិន​ទាន់​ដោះលែង​វិញ​នៅ​ឡើយ​ទេ។

អាស៊ីសេរី​ពុំ​អាច​ទាក់ទង​ស្នងការ​នគរបាល​ខេត្ត​​រតនគិរី ដើម្បី​សុំ​អត្ថាធិប្បាយ​ជុំវិញ​បញ្ហា​នេះ​ទេ​នៅ​ថ្ងៃ​ទី​២២ កញ្ញា។

គិត​ត្រឹម​រសៀល​ថ្ងៃ​ទី​២២ កញ្ញា មាន​សកម្មជន​គណបក្ស​សង្គ្រោះជាតិ​ចំនួន ២៩​នាក់​ហើយ ដែល​ត្រូវ​របប​លោក ហ៊ុន សែន ចាប់ខ្លួន និង​កំពុង​ស្ថិត​នៅ​ក្នុង​ពន្ធនាគារ និង​ច្រើន​នាក់​ទៀត​បាន​រត់​ភៀសខ្លួន​ទៅ​ក្រៅ​ប្រទេស ដោយសារតែ​ពួកគេ​ធ្វើ​សកម្មភាព​នយោបាយ​គាំទ្រ​នយោបាយ​របស់​គណបក្ស​ប្រឆាំង ដែល​ច្បាប់​កម្ពុជា​អនុញ្ញាត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល