ពលរដ្ឋ​នៅ​តែ​ចាត់​ទុក​ព្រះ​មហា​វីរក្សត្រ​ជា​តួអង្គ​សំខាន់​ក្នុង​ការ​សម្របសម្រួល​បញ្ហា​នយោបាយ

ដោយ អ៊ុំ រង្សី
2016-10-15
អ៊ីម៉ែល
មតិ
Share
បោះពុម្ព
ព្រះ​ករុណា​ព្រះ​បាទ​សម្ដេច​ព្រះ នរោត្តម សីហនុ អតីត​ព្រះមហាក្សត្រ​នៃ​ព្រះរាជាណាចក្រ​កម្ពុជា។
ព្រះ​ករុណា​ព្រះ​បាទ​សម្ដេច​ព្រះ នរោត្តម សីហនុ អតីត​ព្រះមហាក្សត្រ​នៃ​ព្រះរាជាណាចក្រ​កម្ពុជា។
AFP Photo

នៅ​ថ្ងៃ​ទី​១៥ ខែ​តុលា ឆ្នាំ​២០១៦ នេះ ជា​ខួប ៤​ឆ្នាំ​ហើយ​ដែល​ព្រះ​មហា​វីរក្សត្រ សម្ដេច​ព្រះ នរោត្ដម សីហនុ បាន​យាង​សោយ​ទិវង្គត។ មន្ត្រី​រដ្ឋាភិបាល​អះអាង​ថា រយៈពេល ៤​ឆ្នាំ ដែល​គ្មាន​សម្ដេច​ព្រះ​នរោត្តម សីហនុ ស្ថានការណ៍​នយោបាយ និង​ការ​អភិវឌ្ឍ​ប្រទេស​ជាតិ​មាន​ស្ថានភាព​ល្អ​ធម្មតា។ ប៉ុន្តែ​ពលរដ្ឋ សង្គម​ស៊ីវិល និង​មន្ត្រី​បក្ស​ប្រឆាំង​យល់​ថា ស្ថានការណ៍​នយោបាយ​ម្ដង​តឹង​ម្ដង​ធូរ ម្ដង​ក្ដៅ ម្ដង​ត្រជាក់ ព្រោះ​គ្មាន​អ្នក​សម្របសម្រួល ហើយ​ការ​ចាប់​ខ្លួន​សកម្មជន​បក្ស​ប្រឆាំង និង​មន្ត្រី​សិទ្ធិ​មនុស្ស​បន្ត​កើត​មាន​ដដែល។

ទោះ​ជា​សម្ដេច​ព្រះ នរោត្តម សីហនុ ឬ​ព្រះ​បរម​រតន​កោដ្ឋ បាន​សោយ​ទិវង្គត​អស់​រយៈពេល ៤​ឆ្នាំ​ទៅ​ហើយ​ក្ដី តែ​ព្រះ​កិត្តិនាម​របស់​ព្រះអង្គ​នៅ​តែ​ស្ថិត​ក្នុង​ចិត្ត​របស់​ប្រជាពលរដ្ឋ​ខ្មែរ​ជា​ច្រើន។ ពលរដ្ឋ សង្គម​ស៊ីវិល និង​អ្នក​នយោបាយ នៅ​តែ​ចាត់​ទុក​វត្តមាន​ព្រះអង្គ គឺ​តួអង្គ​សំខាន់​ជួយ​សម្របសម្រួល​ស្ថានការណ៍​នយោបាយ​កម្ពុជា។

​ការ​លើក​ឡើង​របស់​ពលរដ្ឋ សង្គម​ស៊ីវិល និង​អ្នក​នយោបាយ​បែប​នេះ ខណៈ​ដល់​ពិធី​គោរព​វិញ្ញាណក្ខន្ធ ព្រះ​បរម​រតន​កោដ្ឋ ព្រះបាទ​សម្ដេច​ព្រះ នរោត្តម សីហនុ គម្រប​ខួប ៤​ឆ្នាំ នៅ​ថ្ងៃ​ទី​១៥ ខែ​តុលា។

​ជាង​នេះ គឺ​ស្រប​ពេល​ដែល​ស្ថានភាព​នយោបាយ​រវាង​គ​ណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ រឹត​តែ​ឡើង​កម្ដៅ​ខ្លាំង​ឡើង។

​ស្ថិត​ក្នុង​សំលៀកបំពាក់​សំពត់​ស៊ឹង​បត់ អាវ​ក​ត្រង់ ដៃ​ម្ខាង​កាន់​ធូប និង​ដៃ​ម្ខាង​ទៀត​កាន់​ផ្កាឈូក លោកស្រី អ៊ិន ចំរើន និយាយ​ទាំង​ទឹក​មុខ​ស្រងូតស្រងាត់ ថា លោកស្រី​តែង​មក​អុជ​ធូប​គោរព​ព្រះ​វិញ្ញាណក្ខន្ធ​ព្រះបាទ​សម្ដេច​ព្រះ នរោត្តម សីហនុ ជា​រៀងរាល់​ឆ្នាំ។ លោកស្រី​បន្ត​ថា ជា​ច្រើន​ឆ្នាំ​មក​នេះ លោកស្រី​នៅ​តែ​នឹក​រលឹក និង​សោកស្ដាយ​ដល់​ស្នាម​ព្រះហស្ត​ព្រះអង្គ​កាល​ពី​នៅ​មាន​ព្រះជន្ម។

ស្ត្រី​វ័យ​ជាង ៨០​ឆ្នាំ​រូប​នេះ​យល់​ថា គំរូ​វីរភាព​របស់​សម្ដេច សីហនុ សំខាន់ៗ​ដូចជា ការ​ទាមទារ​ឯករាជ្យ ការ​រក្សា​សុខ​សន្តិភាព បង្រួបបង្រួម​ប្រទេស ការ​គិតគូរ​ពី​សុខទុក្ខ​ប្រជារាស្ត្រ​នៅ​តែ​ស្ថិត​ក្នុង​ដួង​ចិត្ត​លោកស្រី។ បន្ថែម​ពី​នេះ លោកស្រី​ថា ក្នុង​រយៈពេល ៤​ឆ្នាំ​ដែល​គ្មាន​សម្ដេច សីហនុ លោកស្រី​លើក​ឡើង​ថា ស្ថានភាព​នយោបាយ ហើយ​ការ​សាមគ្គីភាព​របស់​អ្នក​នយោបាយ​ខ្មែរ​នៅ​តែ​មាន​ជម្លោះ​នឹង​គ្នា«សម្ដេច​ឪ គាត់​គិតគូរ​កូន​ចៅ និង​ប្រជារាស្ត្រ​ណាស់ អត់​ដូច​ឥឡូវ​ទេ មិន​ដែល​គិតគូរ​រាស្ត្រ​ក្រីក្រ​នោះ​ទេ។ ខ្ញុំ​នឹក​សម្ដេច​ឪ​ណាស់ កាល​គាត់​នៅ​រស់ គាត់​មាន​មេត្តា​ណាស់»

ពិធី​ដាក់​កម្រង​ផ្កា​គោរព​ព្រះ​វិញ្ញាណក្ខន្ធ​ព្រះ​បរម​រតន​កោដ្ឋ សម្ដេច​ព្រះ នរោត្ដម សីហនុ នៅ​ព្រះ​បរម​រូប នៅ​ក្បែរ​វិមាន​ឯករាជ្យ នៅ​ថ្ងៃ​ទី​១៥ ខែ​តុលា ឆ្នាំ​២០១៦។ នៅ​ថ្ងៃ​ទី​១៥ ខែ​តុលា ឆ្នាំ​២០១៦ គឺ​ជា​ថ្ងៃ​គម្រប់​ខួប ៤​ឆ្នាំ​នៃ​ការ​សោយ​ទិវង្គត​របស់​ព្រះអង្គ។ RFA/Brach Chev
ពិធី​ដាក់​កម្រង​ផ្កា​គោរព​ព្រះ​វិញ្ញាណក្ខន្ធ​ព្រះ​បរម​រតន​កោដ្ឋ សម្ដេច​ព្រះ នរោត្ដម សីហនុ នៅ​ព្រះ​បរម​រូប នៅ​ក្បែរ​វិមាន​ឯករាជ្យ នៅ​ថ្ងៃ​ទី​១៥ ខែ​តុលា ឆ្នាំ​២០១៦។ នៅ​ថ្ងៃ​ទី​១៥ ខែ​តុលា ឆ្នាំ​២០១៦ គឺ​ជា​ថ្ងៃ​គម្រប់​ខួប ៤​ឆ្នាំ​នៃ​ការ​សោយ​ទិវង្គត​របស់​ព្រះអង្គ។ RFA/Brach Chev

​ទន្ទឹម​គ្នា​នេះ ពលរដ្ឋ​ម្នាក់​ទៀត លោក លុក សាវរៈ នៅ​រាជធានី​ភ្នំពេញ​ដែរ​នោះ យល់​ឃើញ​ថា ព្រះមហាក្សត្រ​គឺ​ជា​តួអង្គ​សំខាន់​តែមួយ​គត់​ក្នុង​ការ​ដោះស្រាយ​បញ្ហា​នយោបាយ ពិសេស​នៅ​ពេល​ដែល​អ្នក​នយោបាយ​ខ្មែរ​មិន​ចុះ​សម្រុង​គ្នា។ លោក​ថា កន្លង​មក​នៅ​ពេល​ដែល​មាន​បញ្ហា​កើត​ឡើង អ្នក​នយោបាយ​ខ្មែរ ពិសេស​រដ្ឋាភិបាល​ពុំ​សូវ​ទទួល​យក​មតិ​យោបល់​ពី​ភាគី​ដទៃ​ឡើយ ដូចជា​ពី​អង្គការ​សង្គម​ស៊ីវិល ឬ​សហគមន៍​អន្តរជាតិ​ជាដើម។ ជាង​នេះ​ទៀត បើ​មើល​លើ​ស្ថានភាព​នយោបាយ និង​ការ​អភិវឌ្ឍ​ប្រទេស​វិញ​នៅ​តែ​បង្ក​ក្តី​កង្វល់​ដល់​ពលរដ្ឋ​នៅ​ឡើយ«នឹក​រឭក​គាត់​ណាស់ និង​សោកស្ដាយ​គាត់​ណាស់ នឹក​ឃើញ​ស្នាដៃ​គាត់ បើ​គិត​ទៅ​ពី​សម័យ​សម្ដេច​ខុស​គ្នា​ពី​ឥឡូវ​ឆ្ងាយ ព្រោះ​វា​អត់​មាន​ការ​រីក​ចម្រើន។ កាល​គាត់​នៅ គាត់​បន្សល់​ទុក​ស្នាដៃ​ច្រើន ហើយ​ប្រជាជន​ក៏​អត់​មាន​ការ​ភ័យ​ខ្លាច​ដូច​ឥឡូវ​ដែរ។ ឥឡូវ​ឈ្លោះ​តែ​គ្នា ឯ​ប្រជាជន​វិញ​ទុក្ខ​វេទនា​អត់​ដែល​គិត»

​ការ​កោត​សរសើរ និង​ការ​គោរព​ព្រះ​វិញ្ញាណក្ខន្ធ​នេះ​ដែរ អ្នក​វិភាគ​ឯករាជ្យ លោក​បណ្ឌិត ឡៅ ម៉ុងហៃ មាន​ប្រសាសន៍​ថា ព្រះ​មហាវីរក្សត្រ ព្រះបាទ​សម្ដេច​ព្រះ នរោត្តម សីហនុ គឺ​ជា​មេដឹកនាំ​ដែល​មាន​លក្ខណៈ​ពិសេស​ជាង​គេ​នៅ​ប្រទេស​កម្ពុជា កន្លង​មក។ ជាង​នេះ លោក​ថា ព្រះអង្គ​គឺ​ជា​មហាក្សត្រ​ដែល​ធ្វើ​ឲ្យ​មាន​ការ​បង្រួបបង្រួម​ជាតិ«សម្ដេច​ឪ ក្នុង​ការ​គ្រប់គ្រង​រដ្ឋ គ្រប់គ្រង​សង្គម គឺ​លោក​មាន​សិល្បៈ​ក្នុង​ការ​គ្រប់គ្រង​សង្គម ប៉ិនប្រសព្វ​បាន​ល្អ ធ្វើ​ឲ្យ​សង្គម​រីក​ចម្រើន»

សំឡេង​ចម្រៀង «លា​ហើយ​កម្ពុជា»។

​ព្រះបាទ​សម្ដេច​ព្រះ​នរោត្ដម សីហនុ បាន​សោយ​ទិវង្គត​កាល​ពី​ថ្ងៃ​ទី​១៥ ខែ​តុលា ឆ្នាំ​២០១២ នាទី​ក្រុង​ប៉េកាំង ប្រទេស​ចិន ដោយ​រោគ​គាំង​បេះដូង ក្នុង​ព្រះជន្ម ៩០​ព្រះវស្សា។ នៅ​ក្នុង​ប្រតិទិន​ឈប់​សម្រាក​របស់​រដ្ឋាភិបាល បាន​កំណត់​យក​ថ្ងៃ​ទី​១៥ ខែ​តុលា ជា​ថ្ងៃ​ឈប់​សម្រាក​ក្នុង​ពិធី​គម្រប់​ខួប​នៃ​ការ​យាង​សោយ​ទិវង្គត​ព្រះ​បរម​រតន​កោដ្ឋ។ ស្នា​ព្រះហស្ត​សំខាន់ៗ​របស់​ព្រះ នរោត្ដម សីហនុ ដែល​ចារ​ទុក​ក្នុង​ប្រវត្តិសាស្ត្រ គឺ​ទាមទារ​ឯករាជ្យ​ពី​បារាំង ទាមទារ​ប្រាសាទ​ព្រះវិហារ ពី​ប្រទេស​ថៃ ធ្វើ​ឲ្យ​សេដ្ឋកិច្ច​ប្រទេស​មាន​ការ​រីកចម្រើន​ខ្លាំង​ក្នុង​ពេល​ព្រះអង្គ​ដឹកនាំ​ប្រទេស និង​បង្កើត​សន្ធិសញ្ញា​កិច្ច​ព្រមព្រៀង​សន្តិភាព​ក្រុង​ប៉ារីស ខែ​២៣ តុលា ជាដើម។ ប៉ុន្តែ​មាន​ការ​រិះគន់​ថា ព្រះអង្គ​ក៏​មាន​ជាប់​ពាក់ព័ន្ធ​របប​កម្ពុជា​ប្រជាធិបតេយ្យ ដែល​ជា​របប​មួយ​ធ្វើ​ឲ្យ​កម្ពុជា ធ្លាក់​ដល់​លេខ​សូន្យ និង​ពលរដ្ឋ​ខ្មែរ​រាប់​ម៉ឺន​នាក់​បាន​បាត់​បង់ជីវិត​នៅ​ក្នុង​របប​នោះ។

​ទន្ទឹម​នឹង​ការ​ប្រារព្ធ​វិញ្ញាណក្ខន្ធ ព្រម​ទាំង​ការ​នឹក​រលឹក​ដល់​អតីត​ព្រះមហាក្សត្រ​នេះ​ដែរ អ្នកនាំពាក្យ​គណបក្ស​សង្គ្រោះ​ជាតិ លោក យឹម សុវណ្ណ ឲ្យ​ដឹង​ថា គណបក្ស​សង្គ្រោះ​ជាតិ តែង​រៀបចំ​ប្រារព្ធ​ពិធី​បង្សុកូល​ឧទ្ទិស​កុសល និង​គោរព​ព្រះ​វិញ្ញាណក្ខន្ធ ព្រះ​បរម​រតន​កោដ្ឋ នៅ​ទីស្នាក់ការ​កណ្ដាល​របស់​ខ្លួន​ក្នុង​ក្រុង​ភ្នំពេញ ជា​រៀងរាល់​ឆ្នាំ។

លោក​លើក​ឡើង​ទៀត​ថា ក្រោយ​ការ​សោយ​ទិវង្គត​ព្រះ​បរម​រតន​កោដ្ឋ ហាក់​បី​ដូច​ជា​គ្មាន​និរន្តរភាព​មួយ​ដែល​មិន​បាន​យក​ច្បាប់​ធ្វើ​ជា​គោលការណ៍។ លោក​បន្ត​ថា ចំពោះ​ការ​ដោះស្រាយ​បញ្ហា​នយោបាយ​ដែល​គ្មាន​សម្ដេច សីហនុ ជា​អ្នក​សម្របសម្រួល​អ្នក​នយោបាយ​ខ្មែរ ពេល​ខ្លះ​មាន​ចេតនា​ចង់​ដោះស្រាយ​បញ្ហា ពេល​ខ្លះ​អ្នក​នយោបាយ​គ្មាន​ឆន្ទៈ​ក្នុង​ការ​ដោះស្រាយ​នោះ​ទេ«តាំង​ពី​ព្រះអង្គ​សោយ​ទិវង្គត​ទៅ គឺ​ថា​មិន​ដឹង​ជា​យ៉ាង​ម៉េច បាន​ជា​ស្ថានភាព​នយោបាយ និង​ប្រទេស​ជាតិ​កាន់​តែ​យ៉ាប់យ៉ឺន​ទៅៗ ហើយ​ជាពិសេស​អ្នក​ដែល​ទន់​ខ្សោយ​ដែល​គ្មាន​អំណាច ចេះ​ទទួល​រង​ភាព​អយុត្តិធម៌ និង​រងគ្រោះ​ជា​បន្តបន្ទាប់។ ដូច្នេះ​យើង​ទាំងអស់​គួរ​តែ​នឹក​ឃើញ​ដល់​ស្នាព្រះហស្ត​របស់​ព្រះអង្គ ហើយ​យើង​ជា​កូន​ជា​ចៅ​ត្រូវ​យក​គំរូ​ទ្រង់ នឹក​ឃើញ​ដល់​អ្វី​ដែល​ព្រះអង្គ​បាន​ធ្វើ​ដើម្បី​ជាតិ»

​ឆ្លើយ​តប​នឹក​ការ​លើក​ឡើង​នេះ​ដែរ អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន  ច្រាន​ចោល​ការ​លើក​ឡើង​នេះ។ លោក​ថា ស្ថានការណ៍​នយោបាយ និង​ការ​អភិវឌ្ឍ​ប្រទេស​ជាតិ​មាន​ស្ថានភាព​ល្អ​ធម្មតា។ ចំណែក​ការ​ចរចា ឬ​មិន​ចរចា គណបក្ស​ប្រជាជន​មាន​គោល​ជំហរ​ច្បាស់លាស់«គាត់​ថា​ស្ថានការណ៍​នយោបាយ​ក្តៅ ឬ​ត្រជាក់ អា​ហ្នឹង​ជា​រឿង​គាត់។ រដ្ឋាភិបាល​រាល់​ថ្ងៃ​នេះ​ខំ​ប្រឹង​ណាស់ ហើយ​ហេតុផល​រាល់​ថ្ងៃ​នេះ​មិន​អាច​ឲ្យ​គណបក្ស​ទាំង​ពីរ​អាច​ជួប​ចរចា​គ្នា​បាន ដោយសារ​តែ​អ្នក​ជាប់​ទោស​មួយ​ចំនួន​កំពុង​ជាប់​នីតិវិធី​របស់​តុលាការ ហើយ​គណបក្ស​ប្រជាជន​កម្ពុជា មាន​ជំហរ​ហើយ​ថា​មិន​អាច​មាន​ការ​ជួប​ចរចា​ណា​មួយ​ទេ ដើម្បី​កុំ​ឲ្យ​ប៉ះពាល់​ដល់​នីតិវិធី​របស់​តុលាការ»

សំឡេង​ចម្រៀង «លា​ហើយ​កម្ពុជា»។

​កាល​ពី​ពេល​ដែល​អតីត​ព្រះមហាក្សត្រ សម្ដេច​ព្រះ នរោត្តម សីហនុ ព្រះ​បរម​រតន​កោដ្ឋ នៅ​មាន​ព្រះជន្ម​ព្រះអង្គ​តែង​ចេញ​ព្រះ​ភក្ត្រ​ធ្វើ​ជា​អាជ្ញាកណ្ដាល​ក្នុង​ការ​ដោះស្រាយ​បញ្ហា​ជម្លោះ​នយោបាយ​រវាង​ខ្មែរ និង​ខ្មែរ ជាពិសេស​នៅ​ពេល​ដែល​មាន​បញ្ហា​ជាប់​គាំង​នយោបាយ​ក្រោយ​ការ​បោះឆ្នោត ឬ​នៅ​ពេល​មាន​កម្ដៅ​នយោបាយ​កើត​ឡើង​ម្តងៗ។

​នៅ​ពេល​មាន​បញ្ហា​មន្ទិល​សង្ស័យ​អ្វី​មួយ ព្រះអង្គ​តែង​កោះហៅ​មន្ត្រី​ពាក់ព័ន្ធ​ឲ្យ​ចូល​ជួប​ដើម្បី​សាកសួរ រាប់​តាំង​ពី​បញ្ហា​ព្រំដែន បញ្ហា​នយោបាយ ឬ​ការ​ផ្សះផ្សា​ជាតិ។ ព្រះអង្គ​តែង​ណែនាំ​ឲ្យ​អ្នក​នយោបាយ​ខ្មែរ​ចេះ​ស្រឡាញ់​រួប​រួម​គ្នា ដើម្បី​កសាង​ប្រទេស​ជាតិ។ នៅ​មុន​ពេល​ព្រះអង្គ​ចូល​ទិវង្គត​ព្រះអង្គ​ក៏​បាន​ថ្លែង​សារ​នយោបាយ​ជា​សាធារណៈ រំឭក​ជា​ចុង​ក្រោយ​ឲ្យ​ជន​រួម​ជាតិ ជាពិសេស​អ្នក​នយោបាយ​ខ្មែរ​ចេះ​សាមគ្គី​គ្នា​ជា​ធ្លុង​មួយ​ដើម្បី​កុំ​ឲ្យ​បរទេស​មើល​ងាយ។

​ប្រជាពលរដ្ឋ​ដែល​នឹករលឹក​ដល់​ព្រះ​បរម​រតន​កោដ្ឋ ឬ​អតីត​ព្រះមហាក្សត្រ នរោត្តម សីហនុ បាន​ប្រាថ្នា​ចង់​ឲ្យ​ប្រទេស​កម្ពុជា ក្លាយ​ទៅ​ជា​ប្រទេស​មាន​សុខ​សន្តិភាព និង​មាន​ការ​រួបរួម​គ្នា​រវាង​អ្នក​នយោបាយ​ខ្មែរ​ទាំង​អស់។ ជាង​នេះ​ទៀត ពលរដ្ឋ​ខ្មែរ​ក៏​ចង់​ឃើញ​ព្រះមហាក្សត្រ និង​អ្នក​នយោបាយ​បច្ចុប្បន្ន ដង្ហែ​ព្រះ​រាជតម្រិះ​តាម​អតីត​ព្រះមហាក្សត្រ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

ភវវ្ម័ន

ពី បាវិត ស្វាយ​រៀង​

ពេលនេះ សុខឥសានសូត្រជាទ្រឹស្ដីទៅហើយថា កម្ពុជាមិនមានបញ្ហានយោបាយ មិនបក្សកាន់អំណាចមិនចរចានឹងបក្សនយោបាយសង្រ្គោះជាតិទេ ខ្លាចរំលោភ ដំណើរការក្ដីតុលាការ ចោទបញ្រ្ចាសប្រមាថដដៃលៗឥតអៀនខ្មាស ថាមតិជាតិ មតិអន្ដរជាតិ មិនយល់ពីសភាពការពិតនៅកម្ពុជាស្អីគេនោះ ។
បើយើងសង្គេតសកម្មភាពរបស់បក្សប្រជាជន ជាលំដាប់ចាប់តាំងពីខែមករា ឆ្នាំ២០១៥មក គឺបក្សប្រជាជនលោកហ៊ុនសែន មានផែនការច្បាស់លាស់ បន្ទាប់ពី រៀបចំដាក់បញ្ចូលសមាជិកអចិន្រ្ដៃយ៍បក្ខជនពីគ្រប់ស្ថាប័នរដ្ឋ កងកម្លាំងប្រដាប់វុធ តុលាការ រួចហើយ បានចាត់តាំងប្រើប្រាស់គ្រប់សមាសភាព អង្គភាពទាំងនោះរាប់បញ្ចូលទាំង សម្ព័ន្ធយុវជន សេនានាគ ក្រុមនិស្សិតស្រី ចំរើន អង្គភាពប្រឆាំងអំពើពុករលួយ ឱមយិនទៀង ។ ល ។ ឲ្យធ្វើសកម្មភាព វាយសំពងក្បាលប្រជាពលរដ្ឋ រាប់ចាប់ពីសកម្មជនបក្សនយោបាយសង្គមស៊ីវិល អង្គការការពារសិទ្ធិមនុស្ស ……ដែលក្នុងនោះចាប់ផ្ដើមពីតុលាការកាត់ទោសឡើងវិញ នូវសកម្មជនបក្សសង្គ្រោះជាតិម្នាក់ៗដាក់គុកចាប់ ៥ឆ្នាំដល់២០ឆ្នាំ ! ចាប់តំណាងព្រឹទ្ធសភាដាក់គុករំលោភទាំងអភ័យឯកសិទ្ធិព្រឹទ្ធសភា ចេញដិកាពីបទបរិហាកេរ្ដិ៍ កាល៨ឆ្នាំមុន មកចាប់ឯកឧត្តម សម រង្ស៊ី ដោយបំពានលើព្រះរាជទានលើកលែងទោស របស់ព្រះមហាក្សត្រ ជាងនេះទៅទៀតនោះគឺតុលាការ និងតំណាងរាស្រ្ដបក្សប្រជាជនបានជាន់ឈ្លី ច្បាប់រដ្ឋធម្មនុញ្ញ មាត្រា ៧៧.- ដែលបានចែងថា៖ តំណាងរាស្ត្រក្នុងរដ្ឋសភា ជាតំណាងប្រជាជាតិខ្មែរទាំងមូល ពុំមែនគ្រាន់តែជាតំណាងប្រជាពលរដ្ឋក្នុងមណ្ឌលរបស់ខ្លួននោះទេ។
អាណត្តិអាជ្ញាបញ្ជាទាំងឡាយ ត្រូវទុកជាមោឃៈ។
បាតុកម្មហឺង្សាដឹកនាំដោយសម្ព័ន្ធយុវជនសេនានាគ និងក្រុមកងអង្គរក្សលោកហ៊ុនសែនវាយដំ តំណាងរាស្រ្ដបក្សសង្រ្គោះជាតិ រំលោភស្ថាប័នសភា ហើយបក្សប្រជាជននេះហើយដែលជាអ្នកដកតំណែងឯកឧត្តម កឹម សុខាជាអនុប្រធានសភា ទី១ ដោយយកលេសទាមទារទម្លាក់តំណែងអនុប្រធានសភា ទី១ ពីពួកបាតុករ អង្គរក្សរបស់លោកហ៊ុនសែនទាំងនោះ ។
ចាប់តំណាងរាស្រ្ដលោក អ៊ំ សំអាន ដាក់គុកទាំងនៅមានអភ័យឯកសិទ្ធិសភា ព្រោះតែគាត់បំពេញតួនាទីការពារទឹកដី បញ្ហាព្រំដែន និងបូរណភាពទឹកដី ។ តុលាការទើបតែកាត់ទោសលោក ឲ្យជាប់ឃុំ ៣០ខែ ដោយបំពានច្បាប់កំពូលជាតិ ច្បាប់រដ្ឋធម្មនុញ្ញ !
គឺតុលាការធ្វើតាមការបកស្រាយច្បាប់ របស់លោកហ៊ុនសែនអ្នកនយោបាយចង់ចោទគឺបកស្រាយយកគ្រប់ករណី របស់តំណាងរាស្រ្ដបក្សប្រឆាំងទាំងអស់ ឲ្យទៅជាបទល្មើសព្រហ្មទណ្ឌជាក់ស្ដែង ដើម្បី ចាប់សមាជិកតំណាងរាស្រ្ដបក្សសង្រ្គោះជាតិដាក់គុកជាបន្ដបន្ទាប់ ។
សុខឥសាន ឈាងវុន លោកហ៊ុនសែននិងតំណាងរាស្រ្ដបក្សប្រជាជន ទាំងអស់ កំពុងប្រើតុលាការអង្គភាព កងកម្លាំងប្រដាប់អាវុធឲ្យធ្វើតាមការបកសា្រយច្បាប់រដ្ឋធម្មនុញ្ញ ច្បាប់ ព្រហ្មទណ្ឌ ត្រឡប់ត្រឡិនខុសពីខ្លឹមសារច្បាប់ ធ្វើឲ្យប្រទេសចលាចល នយោបាយ ប្រទេស គ្មាន និតិរដ្ឋ ។ បក្សសង្រ្គោះជាតិគ្មានជម្រើសទេ ត្រូវតែទាមទារឲ្យព្រះមហាក្សត្រអនុវត្តន៍រាជាសិទ្ធិតាមច្បាប់រដ្ឋធម្មនុញ្ញមាត្រា ៨.-ព្រះមហាក្សត្រ ព្រះអង្គទ្រង់ជានិមិត្តរូបនៃឯកភាពជាតិ និង និរន្តរ៍ភាពជាតិ។
ព្រះមហាក្សត្រ ទ្រង់ជាអ្នកធានាឯករាជ្យជាតិ អធិបតេយ្យ និងបូរាណភាពទឹកដី នៃព្រះរាជាណាចក្រកម្ពុជា ទ្រង់ជាអ្នកធានាការគោរពសិទ្ធិ និងសេរីភាពរបស់ប្រជាពលរដ្ឋ និង ការគោរពសន្ធិសញ្ញាអន្តរជាតិ។
មាត្រា ៩.-ព្រះមហាក្សត្រ ទ្រង់មានតួនាទីខ្ពង់ខ្ពស់ជាអាជ្ញាកណ្ដាល ដើម្បីធានាការប្រព្រឹត្តទៅនៃអំណាចសាធារណៈឲ្យមានភាពទៀងទាត់។

Oct 16, 2016 12:57 AM

NEM MEX

ពី ​នេម មេច ) (Paris, France

មិនមែនគ្រាន់តែ ពលរដ្ឋខ្មែរប៉ុណ្ណោះទេ ដែលចាត់ទុកអតិត
មហាក្សត្រខ្មែរជាតួអង្គសំខាន់ក្នុងការសម្របសម្រួលបញ្ហ
នយោបាយ ។ អ្នកដឹកនាំអន្តរជាតិមួយភាគធំ ក្នុងពិភព
លោកក៏ គេសង្គេតឃើញដូច្នេះដែរ ។ ពេលវេលាចេះ
តែដើរទៅមុខ បានបង្ហាញអោយឃើញថាអតិតមហា
ក្សត្រខ្មែរ មាន​ការឈឺឆ្អាលខ្លាំងណាស់ ក្នុងការ​​​ ការពារ
បូរណភាព​ទឹកដីខ្មែរ ។ ប៉ុន្តែ ដោយមិនយល់ជម្រៅនយោ
បាយជាតិអោយបានគ្រប់គ្រាន់ បញ្ញាវ័ន្តខ្មែរមួយភាគធំ
មិនសូវមានការគោរពអតិតមហាក្សត្រទេ ។ហើយមានខ្លះ
រហូតដល់ជេរព្រះអតិតមហាក្សត្រផង ដើម្បីទុកខ្លួនឯង
ជាអ្នកគ្រាន់បើ ជាបញ្ញាវន្ត័ !!! ។ តែបញ្ញាវន្ត័ខ្លះ
បានត្រឹមតែ"គេងប្រវាញ់" ។សូមសង្កតមើល តើបញ្ញាវន្ត័
ខ្មែរ ដែលត្រឡប់ពីស្រុកបារាំង ឬ ពីសហរដ្ឋទៅមាតុភូមិ
វិញ មួយភាគធំ មិនរត់ទៅអោបជើង ហ៊ុន សែន ?
មានឈឺក្បាលពីរឿងជាតិអី? គិតតែពី"ជួញ"ជាតិទៅវិញ។
បញ្ញាវន្ត័ប្រេភទនេះ គួរអោយឈ្មោះថា :
" គេងប្រវាញ់ញ៉ាវន្ត័ "

Oct 15, 2016 05:23 AM

អ្នក​អាន​អនាមិក

New mix,
I don't blame them. First they try to do,but they could not because Sihanouk and Hun Sen kicked UN out ,so,if they cannot beat them,join them. Look at Keo Remy, Phay Siphan as example. If they don't do that, look at Meach Sovannara, Um SAm An. It was Hun Sen and Sihanouk should be blamed.

Oct 15, 2016 08:34 AM

កូនខ្មែរ

ពី ភព

អ្នកដែលមិនយល់ជម្រៅនយោបាយជាតិពិតប្រាកដនោះគឺជាសីហនុតែម្ដង។

Oct 15, 2016 01:49 PM

គេហទំព័រ​ទាំងមូល