អឺរ៉ុប និង​អាមេរិក​នឹង​ចេញ​វិធានការ​ដាក់​ទណ្ឌកម្ម​របប​លោក ហ៊ុន សែន ក្នុង​ពេល​ឆាប់ៗ​នេះ

ទីន ហ្សាការីយ៉ា
2018-09-09
អ៊ីម៉ែល
មតិ
Share
បោះពុម្ព
ឯកអគ្គរដ្ឋទូត​សហភាព​អឺរ៉ុប លោក ច្សច អេដហ្គា (George EDGAR) [រូប​ពី​ស្ដាំ​] និង​ឯកអគ្គរដ្ឋទូត​សហរដ្ឋ​អាមេរិក​ប្រចាំ​កម្ពុជា លោក វីល្លៀម ហៃដ្ដ៍ (William A. Heidt) [ឆ្វេង] ផ្ដល់​បទសម្ភាសន៍​ដល់​អ្នក​កាសែត​ក្រោយ​ជំនួប​ជាមួយ គ.ជ.ប នៅ​ថ្ងៃ​ទី​៣១ ខែ​ឧសភា ឆ្នាំ​២០១៧។
ឯកអគ្គរដ្ឋទូត​សហភាព​អឺរ៉ុប លោក ច្សច អេដហ្គា (George EDGAR) [រូប​ពី​ស្ដាំ​] និង​ឯកអគ្គរដ្ឋទូត​សហរដ្ឋ​អាមេរិក​ប្រចាំ​កម្ពុជា លោក វីល្លៀម ហៃដ្ដ៍ (William A. Heidt) [ឆ្វេង] ផ្ដល់​បទសម្ភាសន៍​ដល់​អ្នក​កាសែត​ក្រោយ​ជំនួប​ជាមួយ គ.ជ.ប នៅ​ថ្ងៃ​ទី​៣១ ខែ​ឧសភា ឆ្នាំ​២០១៧។
Photo: RFA

របប​លោក ហ៊ុន សែន នឹង​រង​ទណ្ឌកម្ម​ពី​សហរដ្ឋអាមេរិក និង​សហគមន៍​អឺរ៉ុប នៅ​ក្នុង​ខែ​កញ្ញា​នេះ ដរាបណា របប​នេះ មិន​ដោះលែង​លោក កឹម សុខា និង​ស្ដារ​លទ្ធិប្រជាធិបតេយ្យ​វិញ​ទេ​នោះ។ ក៏ប៉ុន្តែ​របប​លោក ហ៊ុន សែន អះអាង​ថា មិន​ខ្វល់​អំពី​ការ​ដាក់​ទណ្ឌកម្ម​ណាមួយ​ពី​ប្រទេស​លោក​ខាងលិច​ឡើយ។ អ្នកនាំពាក្យ​គណបក្ស​ប្រជាជន​កម្ពុជា លើកឡើង​ថា របប​លោក ហ៊ុន សែន នៅតែ​បោះជំហាន​ទៅមុខ ទោះបីជា​មានការ​គំរាម កំហែង​ពី​សហគមន៍​អន្តរជាតិ​យ៉ាងណាក្ដី។

ថ្ងៃ​ទី​១៣ កញ្ញា ខាងមុខនេះ អាច​ជា​ថ្ងៃ​ដែល​សហភាព​អឺរ៉ុប នឹង​សម្រេច​ថា តើ​នឹង​ចាត់វិធានការ​ដាក់ទណ្ឌកម្ម​លើ​របប​លោក ហ៊ុន សែន ដោយ​របៀប​ណា ដើម្បី​ឲ្យ​របប លោក ហ៊ុន សែន ដោះលែង លោក កឹម សុខា វិញ និង​គោរព​គោលការណ៍​ប្រជាធិបតេយ្យ​ឡើ​វិញ។

តំណាង​សហគមន៍​ខ្មែរ​នៅ​ប្រទេស​បារាំង លោក ថៃ មករា ឲ្យ​ដឹង​កាលពី​ថ្ងៃ​ទី​៩ កញ្ញា​ថា សភា​សហភាព​អឺរ៉ុប ដែល​មាន​សមាជិក​ចំនួន​២៨​ប្រទេស នឹង​បញ្ចេញ​វិធានការ​របស់​ខ្លួន នៅ​ក្នុង​កិច្ចប្រជុំ​មួយ ដែល​គេ​លើក​យក​របៀបវារៈ​អំពី​ការ បំផ្លាញ​លទ្ធិប្រជាធិបតេយ្យ​នៅ​កម្ពុជា មក​ពិភាក្សា​ក្នុងចំណោម​របៀបវារៈ​ផ្សេងទៀត។ លោក​អះអាង​ថា សហភាព​អឺរ៉ុប​នឹង​សម្រេច​ពី​វិធានការ​ដាក់ទណ្ឌកម្ម​នេះ នៅ​ពេល​នោះ​តែម្ដង៖ «យើង​នឹង​បកអាក្រាត​ឲ្យ​អន្តរជាតិ​ដឹង អំពី​ការបោះឆ្នោត​ដោយ​ខុសច្បាប់ ហើយ​យើង​នឹង​មិន​ទទួលស្គាល់​រដ្ឋាភិបាល​ខុសច្បាប់ សុំ​ឲ្យ​រដ្ឋាភិបាល​ចិន​ដក​ការ​គាំទ្រ​រដ្ឋាភិបាល​ខុសច្បាប់»

សភា​សហភាព​អឺរ៉ុប នឹង​កោះ​ប្រជុំ​បន្ទាន់​មួយ នៅ​ថ្ងៃ​ទី​១៣ ខែ​កញ្ញា ខាងមុខ។ ការ​បើក​កោះ​ប្រជុំ​បន្ទាន់ ដើម្បី​ពិភាក្សា អំពី​បញ្ហា​សិទ្ធិមនុស្ស និង​លទ្ធិ​ប្រជាធិបតេយ្យ​នៅ​កម្ពុជា ពិសេស​ការ​ឃុំខ្លួន​លោក កឹម សុខា ដែល​អូស​បន្លាយពេល​ជាង​មួយ​ឆ្នាំ​មកនេះ គឺជា​ប្រធានបទ​មួយ ក្នុង​ប្រធានបទ​បី​សំខាន់ៗ ដែល​សភា​សហភាព​អឺរ៉ុប ត្រូវ​លើក​មក​ពិភាក្សា និង​សម្រេច​អនុម័ត​ដោយ​ការបោះឆ្នោត។

ប្រធានបទ ពីរ​ផ្សេងទៀត​គឺ ការ​ចាប់ខ្លួន​សមាជិក​សភា​បក្ស​ប្រឆាំង​ក្នុង​ប្រទេស អ៊ូហ្គាន់ដា (Uganda) និង​ការ​ឃុំខ្លួន​អ្នក​កាសែត​ជនជាតិ​ភូមា ២​នាក់ ដែល​ធ្វើការ​ឲ្យ​ទីភ្នាក់ងារ​សារព័ត៌មាន​អង់គ្លេស រ៉យទ័រ (Reuters) នៅ​ក្នុង​ប្រទេស​ភូមា។

ក្រៅ​ពី​នេះ​ទៀត លោក ថៃ មករា បញ្ជាក់​ថា លោក និង​អ្នកស្រី រ៉ូណា ស្មីត (Rhona Smith) អ្នករាយការណ៍​ពិសេស​នៃ​អង្គការសហប្រជាជាតិ នឹង​ទៅ​ចូលរួម​ក្នុង​កិច្ចប្រជុំ​នៅ​ក្រុមប្រឹក្សាសន្តិសុខ​នៃ​អង្គការសហប្រជាជាតិ​នៅ​ពេល​ខាងមុខ នៅ​ទីក្រុង​ប្រ៊ុចសែល ប្រទេស​ប៊ែលហ្សិក ដើម្បី​រាយការណ៍​ជាក់ស្ដែង​បន្ថែម នូវ​អ្វី​ដែល​កំពុង​កើតឡើង​នៅ​កម្ពុជា។

ទោះជា​យ៉ាងណាក៏ដោយ របប​លោក ហ៊ុន សែន ក្រោយ​ការបោះឆ្នោត​កាលពី​ថ្ងៃ​ទី​២៩ កក្កដា ដែល​គេ​ចាត់ទុកថា ជា​ការ​បោះឆ្នោត​ក្លែងក្លាយ​នោះ របប​ឯក​បក្ស បាន​បន្ធូរ​ស្ថានការណ៍​នយោបាយ​បន្តិច ដោយ​បាន​ដោះលែង​មន្ត្រី និង​សកម្មជន​គណបក្សប្រឆាំង​ជាង ១០​នាក់ អ្នកវិភាគ​ពី​បញ្ហា​សង្គម នយោបាយ និង​សកម្មជន​ដីធ្លី​អ្នក​តំបន់​បឹងកក់ ព្រមទាំង​អតីត​អ្នកយកព័ត៌មាន​អាស៊ីសេរី​ពីរ​រូប​ទៀត។ ក៏ប៉ុន្តែ​ចំពោះ​លោក កឹម សុខា វិញ លោក ហ៊ុន សែន បាន​ប្រកាស​ថា សំណុំរឿង​លោក កឹម សុខា គឺជា​ទោស​ក្បត់ជាតិ មិន​អាច​លើកលែង​ឲ្យ​បាន​ឡើយ។

បន្ថែម​ពី​នេះ​ទៀត ថ្វី​ដ្បិត​តែ​លោក ហ៊ុន សែន ប្រកាស​ជា​ញឹកញយ​ថា របប​លោក គ្មាន​ឥទ្ធិពល​អ្វី​ទៅលើ​ស្ថាប័ន​តុលាការ​ក្ដី ប៉ុន្តែ​នៅ​ទន្ទឹម​នឹង​នេះ លោក ហ៊ុន សែន ក៏​ប្រកាស​ក្ដែងៗ​ថា ការ​លើកលែង​ទោស​ឲ្យ​អ្នកណាម្នាក់ ឬ​មិន​លើកលែង​នោះ គឺជា​សិទ្ធិ​របស់​លោក​ទៅវិញ។

ទោះបីជា​យ៉ាង​នេះ​ក្ដី លោក សម រង្ស៊ី ប្រធាន​ចលនា​សង្គ្រោះជាតិ​វិញ សម្ដែង​សុទិដ្ឋិនិយម​ថា របប​លោក ហ៊ុន សែន មិន​អាច​បន្ត​ឃុំខ្លួន​លោក កឹម សុខា បន្ត​ទៀត​ឡើយ។ លោក សម រង្ស៊ី ឲ្យ​ដឹង​ថា លោក​ក៏​នឹង​ទៅ​ចូលរួម​កិច្ចប្រជុំ​ជាមួយ​សភា​សហភាព​អឺរ៉ុប​ដែរ នៅ​ថ្ងៃ​ទី​១៣ កញ្ញា ខាងមុខ។ លោក​មាន​ជំនឿ​ថា សភា​សហភាព​អឺរ៉ុប​នឹង​បោះឆ្នោត​គាំទ្រ​ញត្តិ​មួយ ដាក់ទណ្ឌកម្ម​លើ​របប​លោក ហ៊ុន សែន នៅ​ក្នុង​កិច្ចប្រជុំ​នោះ ដើម្បី​ឲ្យ​រដ្ឋាភិបាល​របស់​សហភាព​អឺរ៉ុប​អនុវត្ត​លើ​ញត្តិ​ទណ្ឌកម្ម​នោះ។

លោក សម រង្ស៊ី ក៏​បង្ហើប​ប្រាប់​ពី​លទ្ធផល​របស់​លោក នៅ​សហរដ្ឋអាមេរិក ដែល​លោក បាន​ជួប​សមាជិក​រដ្ឋសភា ព្រឹទ្ធសភា និង​តំណាង​រដ្ឋាភិបាល​អាមេរិក​នេះ​ថា ព្រឹទ្ធសភា​សហរដ្ឋអាមេរិក នឹង​បោះឆ្នោត​សម្រេច​លើ​សេចក្ដី​ស្នើ​ច្បាប់ ស្ដីពី «​ប្រជាធិបតេយ្យ​នៅ​កម្ពុជា​ឆ្នាំ​២០១៨» (លេខ​H.R. 5754) នៅ​ក្នុង​ពេល​ឆាប់ៗ​នេះ​៖ «ឥលូវ​នេះ យើង​នៅ​ចាំតែ​ព្រឹទ្ធសភា​នឹង​អនុម័ត ខ្ញុំ​បាន​ជួប​សហការី​របស់​ពួកគាត់​សុំ​ឲ្យ​ពន្លឿន​អនុម័ត​ឲ្យ​បាន​ឆាប់»

អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន បាន​សរសេរ​លើ​តេឡេក្រាម (Telegram) របស់លោក កាលពី​ថ្ងៃ​ទី​៩ កញ្ញា ថា របប​ក្រុងភ្នំពេញ​បាន​បង្កើត​សភា និង​រដ្ឋាភិបាល ក្រោយ​ការ​បោះឆ្នោត​នេះ គឺជា​ការ​ជោគជ័យ​ដ៏​ត្រចះត្រចង់​របប​ឯកបក្ស ដែល​ជា​ការ​បង្ហាញ​ឲ្យ​ឃើញ​ថា ជា​ការ​បរាជ័យ​របស់​ក្រុម​ប្រឆាំង និង​លោក សម រង្ស៊ី ដែល​អំពាវនាវ​មិន​ឲ្យ​ពលរដ្ឋ​ទៅ​បោះឆ្នោត​នោះ។ លោក សុខ ឥសាន អះអាង​ថា ក្រោយពី​បង្កើត​រដ្ឋាភិបាល​បានសម្រេច​ហើយ​នោះ របប​ឯក​បក្ស​នេះ គឺ​មាន​ការ​គាំទ្រ​ពី​រដ្ឋាភិបាល​ជា​មិត្ត​ជា​បន្តបន្ទាប់​ដែរ។

ប្រទេស​ដែល​ចេញ​សារ​គាំទ្រ​របប​ឯក​បក្ស​នេះ ភាគច្រើន គឺ​ទេស​ដែល​ប្រកាន់​របប​កុម្មុយនិស្ត ដូចជា​ចិន និង​វៀតណាម​ជាដើម។ ចិន​ប្រកាស​ជំហរ​ថា របប​ក្រុង​ប៉េកាំង​នៅតែ​បន្ត​គាំទ្រ​ដល់​របប​លោក ហ៊ុន សែន ទាំង​ជំនួយ​ថវិកា និង​នយោបាយ។

ទាក់ទង​នឹង​បញ្ហា​នេះ លោក ថៃ មករា អះអាងថា របប​ក្រុងភ្នំពេញ​មិន​អាច​យក​ចិន និង​ប្រទេស​ផ្សេងទៀត​ជា​ខ្នងបង្អែក​បាន​ឡើយ ព្រោះថា ទាំង​របប​ក្រុងភ្នំពេញ​ខ្លួនឯង ទាំង​របប​ក្រុង​ប៉េកាំង​ផង ត្រូវការ​ទីផ្សារ​នាំចេញ​ផលិតផល​របស់​ខ្លួន​ទៅកាន់​ទីផ្សារ​អឺរ៉ុប៖ «អ្នកនាំពាក្យ​គាត់​ថា មិន​ប៉ះពាល់​អី​ទេ មិន​អ៊ីចឹង​ទេ ច្បាស់​ជា​ប៉ះពាល់ ចាំ​មើល​ថ្ងៃទី​១៣ បើ​គេ​ផ្ដាច់ការ​អនុគ្រោះ​ពន្ធ នោះ គឺ​ចិន នឹង​ស្រែក​មុនគេ»

មុន​ការ​បោះឆ្នោតជាតិ​ថ្ងៃ​ទី​២៩ កក្កដា ដែល​គេ​ចាត់ទុកថា​ជា​បោះឆ្នោត​ក្លែងក្លាយ និង​មិន​ឆ្លុះបញ្ចាំង​ពី​ឆន្ទៈ​ម្ចាស់​ឆ្នោត​នោះ សហភាព​អឺរ៉ុប​បាន​បញ្ជូន​ក្រុម​បេសកកម្ម​ពិសេស​របស់​ខ្លួន​មក​កម្ពុជា ដើម្បី​ធ្វើការ​វាយតម្លៃ​ពី​ស្ថានភាព​សិទ្ធិមនុស្ស និង​លទ្ធិប្រជាធិបតេយ្យ។

ក្រោយ​បញ្ចប់​បេសកកម្ម​ហើយ ក្រុម​តំណាង​សហភាព​អឺរ៉ុប​បាន​ព្រមាន​ថា ពួកគេ​នឹង​ពិចារណា ថា​តើ​នឹង​ដក ឬ​បន្ត​ផ្ដល់​ឲ្យ​របប​ក្រុងភ្នំពេញ នូវ​ប្រព័ន្ធ​អនុគ្រោះ​ពន្ធ​លើ​មុខទំនិញ​លើកលែងតែ​អាវុធ​ចូល​អឺរ៉ុប ប្រសិនបើ​កិច្ច​ខិតខំ​របស់​ពួកគេ មិន​ទទួល​បាន​ជោគជ័យ។

ក្រៅពី​សហគមន៍​អឺរ៉ុប ក៏​មាន​ការ​ដាក់​ទណ្ឌកម្ម​ពី​សហរដ្ឋអាមេរិក​ដែរ ដូចជា ការ​បង្កក​ទ្រព្យសម្បត្តិ​ដែល​មាន​នៅ​ក្រៅ​ប្រទេស និង​មិន​ផ្ដល់​ទិដ្ឋាការ​ឲ្យ​មន្ត្រី​ជំនិត​លោក ហ៊ុន សែន រួម​ទាំង​កូនលោក ហ៊ុន សែន ផង ដែល​រួមដៃ​គ្នា​សម្លាប់​ប្រជាធិបតេយ្យ និង​រំលោភ​សិទ្ធិមនុស្ស​នៅ​កម្ពុជា ដោយ​ចាប់​មេ​បក្ស​ប្រឆាំង​ដាក់គុក និង​រំលាយ​បក្ស​ប្រឆាំង​ដ៏​ធំ​នៅ​កម្ពុជា។

ក៏ប៉ុន្តែ អ្វី​ដែល​សហគមន៍​អន្តរជាតិ ចង់បាន​ពី​របប​ក្រុងភ្នំពេញ​នោះ គឺ​តម្រូវ​ឲ្យ​លោក ហ៊ុន សែន ស្ដារ​លទ្ធិប្រជាធិបតេយ្យ​ឡើងវិញ ដោយ​ត្រូវ​ដោះលែង លោក កឹម សុខា ឲ្យ​មាន​សេរីភាព​វិញ ហើយ​បើកផ្លូវ​ឲ្យ​គណបក្ស​សង្គ្រោះ​ជាតិ និង​អ្នកនយោបាយ​បក្ស​ប្រឆាំង​ទាំង​១១៨​នាក់ មាន​សិទ្ធិ​ធ្វើ​នយោបាយ​ឡើងវិញ និង​ឈាន​ទៅ​រក​ការបោះឆ្នោត​មួយ ដោយ​ត្រឹមត្រូវ សេរី និង​យុត្តិធម៌ តាម​គន្លង​លទ្ធិប្រជាធិបតេយ្យ។

លោក ថៃ មករា បញ្ជាក់​ពី​ផែនការ​របស់​ពលរដ្ឋ​ខ្មែរ​នៅ​អឺរ៉ុប​ថា សហគមន៍​ខ្មែរ​នៅ​អឺរ៉ុប មិន​ខុស​ពី​ពលរដ្ឋខ្មែរ​នៅ​អូស្ត្រាលី ជប៉ុន កូរ៉េ និង​សហរដ្ឋអាមេរិក​ឡើយ ពួកគាត់​នឹង​នាំគ្នា​ធ្វើបាតុកម្ម​ប្រឆាំង​លោក ហ៊ុន សែន បើសិនជា​លោក ហ៊ុន សែន ជាន់​ទឹកដី​អឺរ៉ុប ដើម្បី​ចូលរួម​កិច្ចប្រជុំ​នានា​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

watchout do a business with Chinese commies mainland

Chinese mainland garment factories employers starting to run away without leave a notice or untold what's the hell going on to its businesses?,"without pay of hundreds to thousands workers lost their salary for several months,most of Chinese businessmen scans with comrade Hun Sen fascist govm't during the West course of amnesty"tax tariff"free tax exports to the west,but most Chinese mainland business scammers took advantaged over weakest dictator Hun Sen's rogue govm't in billions us$ with imported its fabrics to labeled in Cambodia with the named"Made In Cambodia...is not Made In China",to avoided the west taxing goods"import",and now some of those Chinese business scams just run away without pay their employees or some tried to trick employees told them just to move its equipment to somewhere else or some didin't tell nothing,but at nightfall they used heavy trucks loaded to move it around to avoid its employees catch up,or some factory we can seen hundreds of employees slept blocked in front the factory entrance"most Chinese businessmen doesn't care a long term investment..just quick grab the business and run right away with their faster money making"bye bye...see u alligator.

Sep 12, 2018 10:33 AM

អ្នក​អាន​អនាមិក

អឺរ៉ុបនិងអាមេរិកឆោតល្ងង់ខ្លៅអ្វីម្លេះ ចាញ់បោកចឹនរហូត អ្នកដែលចំណេញជាងគេក្នុងការបន្ធូរពន្ធនៅកម្ពុជាគឺចឹន។

Sep 10, 2018 11:43 AM

គេហទំព័រ​ទាំងមូល