នាទី​កិច្ចការ​អន្តរជាតិ​ប្រចាំ​សប្ដាហ៍​៖ សេចក្ដី​ពន្យល់​ស្ដីពី EBA របស់​​អឺរ៉ុប (​ភាគ​បញ្ចប់)

ដោយ មាន ឫទ្ធិ
2019-02-17
អ៊ីម៉ែល
មតិ
Share
បោះពុម្ព
អ្នកស្រី Federica Mogherini នាយិកា​រង​គណៈកម្មការ​អឺរ៉ុប ឬ​តំណាង​ជាន់ខ្ពស់​របស់​សហភាព​អឺរ៉ុប សម្រាប់​កិច្ចការ​ការបរទេស និង​គោលនយោបាយ​សន្តិសុខ និង​ជា​តំណាង​ពិសេស​របស់​សហភាព​អឺរ៉ុប ដើម្បី​សិទ្ធិមនុស្ស។
អ្នកស្រី Federica Mogherini នាយិកា​រង​គណៈកម្មការ​អឺរ៉ុប ឬ​តំណាង​ជាន់ខ្ពស់​របស់​សហភាព​អឺរ៉ុប សម្រាប់​កិច្ចការ​ការបរទេស និង​គោលនយោបាយ​សន្តិសុខ និង​ជា​តំណាង​ពិសេស​របស់​សហភាព​អឺរ៉ុប ដើម្បី​សិទ្ធិមនុស្ស។
Photo courtesy of European parliament

គណៈកម្មការ​អឺរ៉ុប បាន​ប្រកាស​កាលពី​ថ្ងៃ​ទី១២ កុម្ភៈ អំពី​ការ​ចាប់ផ្ដើម​ដំណើរការ​ជា​ផ្លូវការ នៃ​នីតិវិធី​ដកហូត​ប្រព័ន្ធ​អនុគ្រោះ​ពន្ធ «​គ្រប់​មុខទំនិញ​ទាំងអស់​លើកលែងតែ​អាវុធ​» EBA ពី​កម្ពុជា។ ហេតុការណ៍​នេះ អាច​បណ្ដាល​ឱ្យ​កម្ពុជា ត្រូវ​ខាតបង់​ជិត ៧០០​លាន​ដុល្លារ​អាមេរិក ក្នុង​មួយឆ្នាំៗ ដោយសារតែ​ការ​តម្រូវ​ឱ្យ​បង់ពន្ធ​ផលិតផល​នាំចេញ​ទៅកាន់​ទីផ្សារ​សហ​ភាព​អឺរ៉ុប។

ក្នុង​នាទី «​កិច្ចការ​អន្តរជាតិ​» សប្ដាហ៍​នេះ យើង​មាន​សេចក្ដី​ពន្យល់​ពិស្ដារ ភាគ​ទី២ ដែល​ជា​ភាគ​បញ្ចប់ ស្ដីពី​ប្រព័ន្ធ​អនុគ្រោះ​ពន្ធ «​គ្រប់​មុខទំនិញ​ទាំងអស់​លើកលែងតែ​អាវុធ​» EBA របស់​សហភាព​អឺរ៉ុប​។ ខ្លឹមសារ​ដើម​នៃ​សេចក្ដី​ពន្យល់​នេះ ដកស្រង់​ចេញពី​អត្ថបទ​ផ្សាយ​ទាំងស្រុង​របស់​គណៈកម្មការ​អឺរ៉ុប កាលពី​ថ្ងៃទី១១ កុម្ភៈ ឆ្នាំ២០១៩។

នេះ​ជា​ការ​ពន្យល់​ភាគ​បញ្ចប់​តាម​ការសាកសួរ​និង​ឆ្លើយឆ្លង​របស់ លោក មាន ឫទ្ធិ និង​លោក សេក បណ្ឌិត ដូចតទៅ​៖

សំណួរ​៖ តើ​អ្វី​កម្ពុជា​ត្រូវ​ធ្វើ​ចំណាត់​ការ​អ្វីខ្លះ ដើម្បី​បញ្ចៀស​ពី​ការ​ដកហូត​ប្រព័ន្ធ​អនុគ្រោះ​ពន្ធ EBA ពី​សហភាព​អឺរ៉ុប​នេះ​?

ចម្លើយ​៖ សេចក្ដី​សន្និដ្ឋាន​របស់​ក្រុមប្រឹក្សា​កិច្ចការ​បរទេស​របស់​សហភាព​អឺរ៉ុប ចុះ​ថ្ងៃទី២៦ កុម្ភៈ ឆ្នាំ ២០១៨ និង​ការ​ប្រាស្រ័យ​ទាក់ទង​ផ្ទាល់​របស់​សហភាព​អឺរ៉ុប ជាមួយ​ភាគី​កម្ពុជា មាន​លើកឡើង​ច្បាស់​ណាស់​អំពី​បញ្ហា​នានា ដែល​ចាំបាច់​ត្រូវតែ​ដោះស្រាយ។ បញ្ហា​សំខាន់ៗ ដែល​បាន​បណ្ដាល​ឱ្យ​ឈាន​ទៅ​សម្រេច​ចាប់ផ្ដើម​ដំណើរ​ការ​ដកហូត​ប្រព័ន្ធ​អនុគ្រោះ​ពន្ធ​នេះ ផ្ដោត​លើ​ការ​បដិសេធ​នូវ​សិទ្ធិ​នយោបាយ ចំណាត់​ការ​បែប​រឹតត្បិត​មក​លើ​អង្គការ​សង្គម​ស៊ីវិល និង​សហជីព ការ​ផ្ដល់​ដី​សម្បទាន​សេដ្ឋកិច្ច ជាពិសេស​ពាក់ព័ន្ធ​នឹង​ការផលិត​ស្ករអំពៅ​។ សហភាព​អឺរ៉ុប បាន​បញ្ជាក់​ពី​ជំ​ហាន​មួយ​ចំនួន ដែល​ខ្លួន​រំពឹង​ចង់បាន​ពី​ភាគី​កម្ពុជា​វិញ ដើម្បី​ធានា​ឱ្យ​បាន​នូវ​បរិយាកាស​នយោបាយ​មួយ ដែល​គណបក្សប្រឆាំង សង្គម​ស៊ីវិល សហជីព និង​ប្រព័ន្ធ​ផ្សព្វផ្សាយ អាច​ដំណើរការ​បាន​ដោយ​សេរី និង​ដើម្បី​ដោះស្រាយ​បញ្ហា​ដទៃ​ទៀត រាប់​ចាប់​តាំង​ពី​ការ​ផ្តល់​សំណង​ដោយ​តម្លាភាព និង​ដោយមាន​ការចូលរួម​ពី​គ្រប់​ភាគី ពាក់ព័ន្ធ​នឹង​ការ​ផ្ដល់​ដី​សម្បទាន​សេដ្ឋកិច្ច ជាពិសេស​ស្ករអំពៅ។

សំណួរ​៖ តើ​កម្ពុជា​បាន​ចាត់​វិធានការ​ជា​វិជ្ជមាន​ណាមួយ​ហើយ​ឬ​នៅ ក្រោយពី​មានការ​ប្រកាស​ពី​លទ្ធភាព​នៃ​ការ​ដកហូត​ប្រព័ន្ធ​អនុគ្រោះ​ពន្ធ​នេះ​ជា​បណ្ដោះអាសន្ន​នោះ​?

ចម្លើយ​៖ ក្នុង​រយៈពេល​ប៉ុន្មាន​ខែ​ថ្មីៗ​នេះ រដ្ឋាភិបាល​កម្ពុជា បាន​ចាត់​វិធានការណ៍​ជា​ជំហាន​វិជ្ជមាន​មួយ​ចំនួន​។ ជំហាន​ទាំងនោះ រួមមាន​ការ​ដោះលែង អ្នក​ទោស​នយោបាយ សកម្មជន​អង្គការ​សង្គម​ស៊ីវិល និង​អ្នកកាសែត កាលពី​ខែ​សីហា និង​កញ្ញា ឆ្នាំ​២០១៨ ការ​ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ អនុញ្ញាត​ឱ្យ​បុគ្គល​ដែល​ត្រូវ​ហាមប្រាម​មិន​ឱ្យ​ធ្វើ​សកម្មភាព​នយោបាយ មាន​សិទ្ធិ​ធ្វើ​នយោបាយ​ឡើងវិញ និង​ជំហាន​មួយ​ចំនួន​ទៀត ក្នុង​ការ​ដោះស្រាយ​លើ​ការ​រឹតត្បិត​លើ​សកម្មភាព​អង្គការ​សង្គម​ស៊ីវិល និង​សហជីព​។ យ៉ាងណាក៏ដោយ ទាំងអស់​នេះ មិន​ទាន់​គ្រប់គ្រាន់​នៅឡើយ​ទេ ដើម្បី​ឆ្លើយតប​ទៅ​នឹង​កង្វល់​របស់​សហ​ភាព​អឺរ៉ុប ជុំវិញ​កង្វះខាត​ធ្ងន់ធ្ងរ ដែល​បាន​កើតមានឡើង​ក្នុង​វិស័យ​ទាំងអស់​នេះ។

សំណួរ​៖ តើ​ប្រព័ន្ធ​អនុគ្រោះ​ពន្ធ EBA នេះ មាន​សារសំខាន់​ខ្លាំង​ប៉ុណ្ណា ចំពោះ​សេដ្ឋកិច្ច​កម្ពុជា?

ចម្លើយ​៖ សហភាព​អឺរ៉ុប​គឺជា​ដៃគូ​ពាណិជ្ជកម្ម​ធំ​ជាងគេ​បង្អស់​មួយ​របស់​កម្ពុជា ស្មើនឹង ៤៥ ភាគរយ​នៃ​ការនាំចេញ​សរុប​របស់​កម្ពុជា ក្នុង​ឆ្នាំ២០១៨ ។ ការ​នាំ​ចេញពី​កម្ពុជា​ទៅកាន់​ទីផ្សារ​តែមួយ​របស់​សហភាព​អឺរ៉ុប មានតម្លៃ ៤,៦ ប៊ី​លាន​យូរ៉ូ ឬ​ជាង ៥,២ ប៊ី​លាន​ដុល្លារ​អាមេរិក ក្នុង​ឆ្នាំ ២០១៨ ពោលគឺ​ស្ទើរ​តែ​ទ្វេដង​នៃ​តម្លៃ​នាំចេញ​សរុប​កាលពី​ឆ្នាំ ២០១៣ ដែល​ស្មើនឹង ២,៥ ប៊ី​លាន​អឺរ៉ូ ឬ ជាង ២,៨ ប៊ី​លាន​ដុល្លារ​អាមេរិក​។ ៩៥,៧ ភាគរយ នៃ​ការនាំចេញ​ទាំងនេះ ចូល​ទៅ​កាន់​ទីផ្សារ​សហ​ភាព​អឺរ៉ុប ស្ថិត​ក្រោម​ប្រព័ន្ធ​អនុគ្រោះ​ពន្ធ EBA នេះ ដែល​មានន័យថា មិន​ចាំបាច់​បង់ពន្ធ​។ នេះ​ជា​កម្រិត​មួយ​ខ្ពស់​បំផុត​ក្នុងចំណោម​ប្រទេស​ទទួល​បាន​អត្ថប្រយោជន៍​ពី​ប្រព័ន្ធ​អនុគ្រោះ​ពន្ធ EBA ទាំងអស់​។ ជា​រួម​កម្ពុជា គឺជា​ប្រទេស​ទទួល​បាន​អត្ថប្រយោជន៍​ធំជាង​គេ​បំផុត​ទី​ពីរ នៃ​ប្រព័ន្ធ​អនុគ្រោះ​ពន្ធ EBA នេះ គឺ​ឈរ​នៅ​ក្រោយ​តែ​ប្រទេស​បង់ក្លាដេស​តែប៉ុណ្ណោះ។

សំណួរ៖ ហេតុអ្វី​បានជា​សហភាព​អឺរ៉ុប ផ្ដោត​តែ​ទៅលើ​ប្រទេស​កម្ពុជា ក្នុង​ការ​ដកហូត​ប្រព័ន្ធ​អនុគ្រោះ​ពន្ធ​នេះ ហើយ​មិន​ផ្ដោត​លើ​ប្រទេស​ទទួល​អត្ថប្រយោជន៍​ប្រព័ន្ធ​អនុគ្រោះ​ពន្ធ​ទូទៅ​ដទៃ​ទៀត ដែល​មាន​ប្រវត្តិ​អាក្រក់​ខាង​អំពើ​រំលោភ​សិទ្ធិមនុស្ស ដូចគ្នា​ដែរ​នោះ?

ចម្លើយ​៖ សេចក្ដី​សន្និដ្ឋាន​របស់​ក្រុមប្រឹក្សា​កិច្ចការ​បរទេស​សហភាព​អឺរ៉ុប ខែ​កុម្ភៈ ឆ្នាំ ២០១៨ កំណត់​ថា ប្រទេស​កម្ពុជា និង​ប្រទេស​មីយ៉ាន់យ៉ា ឬ​ភូមា ត្រូវ​ចូលរួម​ពិគ្រោះ​យោបល់​កែ​លម្អ ក្រោម​ប្រព័ន្ធ​អនុគ្រោះ​ពន្ធ EBA នេះ ផ្អែកលើ​ភាព​ធ្ងន់ធ្ងរ​នៃ​ការចោទប្រកាន់​ពី​ការ​រំលោភបំពាន​នេះ (​ដូចដែល​បាន​កំណត់​ដោយ​របាយការណ៍​អង្គការសហប្រជាជាតិ និង​អង្គការ​ពលកម្ម​អន្តរជាតិ​ថ្មីៗ​នេះ​) និង​ផ្អែកលើ​ពាណិជ្ជកម្ម​ជា​រួម​ជាមួយ​សហភាព​អឺរ៉ុប​។ ប្រទេស​បង់ក្លាដេស ក៏​ធ្លាប់​ត្រូវ​បាន​កំណត់ ក្នុង​របាយការណ៍​ប្រព័ន្ធ​អនុគ្រោះ​ពន្ធ​ទូទៅ​ចេញផ្សាយ​ពីរ​ឆ្នាំ​ម្ដង សម្រាប់​ឆ្នាំ២០១៦ - ២០១៧ របស់​គណៈកម្មការ​អឺរ៉ុប ដោយសារតែ​ហេតុផល​ដូចគ្នា​នេះ​ដែរ។

សហភាព​អឺរ៉ុប តាមដាន​ជា​ប្រក្រតី​នូវ​ស្ថានភាព​សិទ្ធិមនុស្ស និង​សិទ្ធិ​ការងារ​របស់​គ្រប់​ប្រទេស​ទទួល​អត្ថប្រយោជន៍​ទាំង​អស់​នៃ​ប្រព័ន្ធ​អនុគ្រោះ​ពន្ធ​ទូទៅ GSP របស់​ខ្លួន​។ ក៏ប៉ុន្តែ គួរ​បញ្ជាក់​ថា ឧបករណ៍​ពាណិជ្ជកម្ម គឺជា​មធ្យោបាយ​តែមួយគត់​ដើម្បី​ដោះស្រាយ​បញ្ហា​ទាំងនេះ​។ សហភាព​អឺរ៉ុប ប្រើប្រាស់​មធ្យោបាយ​ដទៃ​ទៀត ដើម្បី​ចូលរួម​កែ​លម្អ​ជាមួយ​ដៃគូ​របស់​ខ្លួន រាប់​ចាប់​តាំង​ពី​កិច្ច​សន្ទនា​អំពី​សិទ្ធិមនុស្ស ការពិគ្រោះ​យោបល់​បែប​ការទូត កិច្ចព្រមព្រៀង​អំពី​និរន្តរភាព (​ក្នុង​ករណី​នៅ​បង់ក្លាដេស​) កិច្ចព្រមព្រៀង​ភាពជា​ដៃគូ និង​កិច្ច​សហប្រតិបត្តិការ រួម​ទាំង​ឧបករណ៍​ដទៃៗ​ទៀត។ ជម្រើស​ថា តើ​ត្រូវ​ប្រើ​ឧបករណ៍​បែប​ណាមួយ​ដើម្បី​ដោះស្រាយ​បញ្ហា គឺ​អាស្រ័យ​តាម​កម្រិត​នៃ​ការ​ធ្វើ​ពាណិជ្ជកម្ម​ទ្វេភាគី រវាង​សហភាព​អឺរ៉ុប និង​ប្រទេស​ដៃគូ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

ជូនចំពោះអ្នកនៅក្នុងគណបក្សប្រជាជន។ តើអ្នកទាំងអស់គ្នាគិតថាលោកហ៊ុនសែននឹងរស់នៅរហូតទេ? ពេលវេលានឹងមកដល់ឆាប់ៗ បើសិនជាលោកហ៊ុនសែនបាត់ខ្លួនបាត់អំណាចទៅនោះគណបក្សប្រជាជនកម្ពុជានឹងត្រូវបាត់បង់ដែរ តើអ្នកសប្បាយចិត្តទេ?។ ឬ ប្រសិនបើលោកហ៊ុនសែនបាត់ខ្លួនបាត់អំណាច, គណបក្សប្រជាជននៅតែដំណើរការដដែល។ តើអ្នកជ្រើសរើសមួយណា? ជាពិសេសអ្នកនៅក្នុងគណបក្សប្រជាជន គ្រួសារអ្នកមាននិងគ្រួសាររដ្ឋាភិបាលនិងគ្រួសារទាហាន។ អ្នកមិនអាចផ្លាស់ប្តូរការគាំទ្រក្រោយពីហ៊ុន - សែនបានបាត់បង់អំណាច អ្នក​ផ្សេងមិនទទួលស្គាល់ទេ។ អ្នកត្រូវជ្រើសរើសមុនពេលគាត់បាត់អំណាចដើម្បីជួយសង្គ្រោះជីវិតអ្នក។

Feb 17, 2019 03:25 AM

គេហទំព័រ​ទាំងមូល