ប្រធានរណសិរ្សរំដោះជាតិខ្មែរថាប្អូនប្រុសលោកស្លាប់ក្នុងគុកដោយសារថ្នាំពុលក្នុងអាហារ
ជនជាប់ចោទ យាន យឿប (ស្ដាំ) ដែលតុលាការហៅថា យ៉ាន យឿន ក្នុងចំណោមជនជាប់ចោទទាំង ៧នាក់ ដែលត្រូវរដ្ឋាភិបាលចោទប្រកាន់ពីបទរួមគំនិតក្បត់ជាតិ នាសាលាដំបូងរាជធានីភ្នំពេញ នៅថ្ងៃទី២៨ ខែមីនា ឆ្នាំ២០១៤។ RFA/Yeang Socheametta
RFA/Yeang Socheametta
ប្រធានរណសិរ្សរំដោះជាតិខ្មែរ លោក សម សេរី អះអាងថា ប្អូនប្រុសរបស់លោកដែលត្រូវបានតុលាការក្រុងភ្នំពេញកាត់ទោសឲ្យជាប់ពន្ធនាគារចំនួន ៨ឆ្នាំកាលពីឆ្នាំ២០១៤ បានស្លាប់ក្នុងពន្ធនាគារព្រៃស នៅថ្ងៃទី១៤ ធ្នូ ដោយសង្ស័យថាមានថ្នាំពុលនៅក្នុងអាហារដែលប្អូនលោកបរិភោគ។ ទោះជាយ៉ាងណា អគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ ឲ្យដឹងថា លោកមិនទាន់ទទួលបានព័ត៌មាននៃការស្លាប់នេះនៅឡើយទេ។
ប្រធានរណសិរ្សរំដោះជាតិខ្មែរ លោក សម សេរី សម្ដែងក្តីតក់ស្លុតក្រោយពីទទួលដំណឹងថា ប្អូនប្រុសរបស់លោកបានស្លាប់ក្នុងពន្ធនាគារព្រៃស កាលពីថ្ងៃទី១៤ ធ្នូ។
បន្ថែមទៅលើសេចក្តីថ្លែងការណ៍របស់ខ្លួនចុះថ្ងៃទី១៧ ខែធ្នូ លោក សម សេរី ឲ្យអាស៊ីសេរី ដឹងតាមទូរស័ព្ទពីប្រទេសដាណឺម៉ាក (Denmark) នៅថ្ងៃទី១៩ ធ្នូ ថា ប្អូនប្រុសលោកឈ្មោះ យាន យឿប ដែលលោកថាកាលពីពេលកាត់ទោស តុលាការហៅថា យ៉ាន យឿន នោះ បានស្លាប់ដោយសារថ្នាំពុល ក្រោយពីប្អូនលោកបានបរិភោគអាហារដែលផ្តល់ដោយមន្ត្រីពន្ធនាគារ។
លោក សម សេរី បញ្ជាក់ថា ក្រោយពេលប្អូនប្រុសលោកស្លាប់ អាជ្ញាធរមិនបានអនុញ្ញាតឲ្យនរណាម្នាក់ចូលពិនិត្យ ឬធ្វើកោសល្យវិច័យសាកសពប្អូនប្រុសលោកឡើយ។ លើសពីនេះ លោកថា អាជ្ញាធរមិនអនុញ្ញាតឲ្យឪពុករបស់លោកដែលធ្វើដំណើរមកពីខេត្តព្រះវិហារ យកសពប្អូនទៅធ្វើបុណ្យទៅតាមប្រពៃណីនោះទេ ប៉ុន្តែអាជ្ញាធរបានចាត់ចែងយកសពប្អូនប្រុសលោកទៅបូជានៅវត្តក្នុងរាជធានីភ្នំពេញយ៉ាងតក់ក្រហល់ គឺនៅថ្ងៃទី១៥ ធ្នូ៖ «នៅក្នុងគុកហ្នឹង គឺសមាជិករបស់ខ្ញុំ ហើយអ្នកដែលនៅជិតៗហ្នឹងគេបានប្រាប់ ព្រោះថាពេលល្ងាចឡើងប្អូនខ្ញុំបានរត់ហាត់ប្រាណនិយាយជាមួយសមាជិកធម្មតា អត់មានបញ្ហាអ្វីទេ ប៉ុន្តែក្រោយពីហូបម្ហូបដែលអាជ្ញាធរឲ្យហ្នឹង ស្រាប់តែស្ទះដង្ហើមភ្លាមៗតែម្តង ដកដង្ហើមអត់ចេញ ហើយប្រកាច់ស្លាប់តែម្តង ហើយក្រោយពីការស្លាប់ទៅ អាជ្ញាធរអត់មានឲ្យនរណាទៅជិត ឬទៅមើលនោះទេ ទុកទាល់តែព្រឹកគេយកសាកសពមកដុតតែម្តង»។
កាលពីខែមេសា ឆ្នាំ២០១៤ ប្អូនប្រុសលោក សម សេរី គឺលោក យាន យឿប ត្រូវបានតុលាការក្រុងភ្នំពេញកាត់ទោសឲ្យជាប់ពន្ធនាគារចំនួន ៨ឆ្នាំពីបទរួមគំនិតក្បត់ ចូលរួមក្នុងចលនារណសិរ្សរំដោះជាតិខ្មែរដើម្បីផ្ដួលរំលំរដ្ឋាភិបាលលោកនាយករដ្ឋមន្ត្រី ហ៊ុន សែន ក្រោយពីលោកត្រូវបានអាជ្ញាធរខ្មែរសហការជាមួយអាជ្ញាធរថៃ ចាប់បញ្ជូនខ្លួនមកកម្ពុជា វិញកាលពីឆ្នាំ២០១៣។
ក្រៅពីលោក យាន យឿប មនុស្សចំនួន ១២នាក់ផ្សេងទៀត ក្នុងនោះក៏មានលោក សម សេរី ប្រធានរណសិរ្សរំដោះជាតិខ្មែរ ក៏ត្រូវបានតុលាការកាត់ទោសឲ្យជាប់ពន្ធនាគារចន្លោះពី ៥ឆ្នាំដល់ ៩ឆ្នាំ ពីបទរួមគំនិតក្បត់ដូចគ្នា។ ក្នុងចំណោមមនុស្សទាំង ១៣នាក់ដែលត្រូវបានតុលាការកាត់ទោសនោះ ៦នាក់គឺជាពលរដ្ឋខ្មែរក្រោម។
ទោះជាយ៉ាងណា ចំពោះការស្លាប់របស់ប្អូនប្រុសពេលនេះ លោក សម សេរី ទាមទារឲ្យរដ្ឋាភិបាលបើកការស៊ើបអង្កេតឲ្យបានច្បាស់លាស់៖ «រដ្ឋាភិបាល និងអាជ្ញាធរគួរណាស៊ើបអង្កេត និងផ្តល់របាយការណ៍ជាក់លាក់ដើម្បីផ្តល់យុត្តិធម៌ដល់ប្អូនប្រុសខ្ញុំ បើសិនរដ្ឋាភិបាលមិនផ្តល់របាយការណ៍ណាពិតប្រាកដ គឺពួកគេហ្នឹងហើយដែលសម្លាប់ប្អូនប្រុសខ្ញុំ ព្រោះក្រោយពីខ្ញុំប្រារព្ធខួបទី៤ រណសិរ្សរំដោះជាតិខ្មែរ ខ្ញុំបានថ្លែងសុន្ទរកថា ហើយក្រោយពី ២ថ្ងៃហ្នឹងស្រាប់តែប្អូនប្រុសខ្ញុំស្លាប់តែម្តង។ អ៊ីចឹងខ្ញុំគិតថា វាជាហេតុផលនយោបាយដែលគេសម្លាប់ប្អូនប្រុសខ្ញុំ ដើម្បីបំបាក់ស្មារតីលើក្រុមរណសិរ្សរំដោះជាតិខ្មែរ ហើយខ្ញុំមានការខ្វាយខ្វល់ គេនឹងធ្វើទុក្ខបុកម្នេញអ្នកដែលនៅក្នុងគុកបន្តទៀត។ សមាជិកខ្ញុំជិត ១៧នាក់»។
អាស៊ីសេរី មិនអាចទាក់ទងប្រធានពន្ធនាគារព្រៃស លោក ស៊ុន លាន ដើម្បីបញ្ជាក់ពីការស្លាប់នេះបានឡើយនៅថ្ងៃទី១៩ ធ្នូ។ ចំណែកអគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ លោក គុយ ប៊ុនសន បញ្ជាក់ដោយខ្លីថា លោកមិនទាន់ទទួលបានព័ត៌មានពីថ្នាក់ក្រោមនៅឡើយ៖ «សួរខាងក្រោមមើលសិន មិនទាន់មានព័ត៌មានដល់ខ្ញុំផង អធ្យាស្រ័យតិច»។
រីឯប្រធានផ្នែកអង្កេតនៃអង្គការលីកាដូ (LICADHO) លោក អំ សំអាត មានប្រសាសន៍ថា ផ្អែកលើច្បាប់ពន្ធនាគារ នៅពេលមានមនុស្សស្លាប់នៅក្នុងពន្ធនាគារដែលមានចំណុចសង្ស័យ គេត្រូវបង្កើតគណៈកម្មការស៊ើបអង្កេតឲ្យបានច្បាស់លាស់ និងផ្តល់ព័ត៌មានជាក់លាក់ដល់ក្រុមគ្រួសារអ្នកស្លាប់៖ «ការស៊ើបអង្កេត គឺជាការល្អមួយ។ ទី១ គឺបំបាត់មន្ទិលសង្ស័យ ហើយបង្កើនទំនុកចិត្តអ្នកទោសដទៃទៀត។ ទី២ បំបាត់មន្ទិលសង្ស័យដែលនាំឲ្យមានការរិះគន់ថាស្លាប់ហ្នឹងមកពីរឿងផ្សេងទៀត ការស៊ើបអង្កេត និងបង្ហាញលទ្ធផលនៃការស៊ើបអង្កេត វាជាតម្លាភាពមួយ បើរកទៅឃើញបទល្មើស ត្រូវចាត់វិធានការ»។
រដ្ឋាភិបាលកម្ពុជា ចាត់ទុករណសិរ្សរំដោះជាតិខ្មែរថាជាចលនាប្រឆាំងបង្កើតឡើងដើម្បីផ្ដួលរំលំរដ្ឋាភិបាល។ ទោះជាយ៉ាងណា កន្លងទៅ អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) បានទាមទារឲ្យអាជ្ញាធរកម្ពុជា ទម្លាក់បទចោទប្រកាន់ប្រឆាំងនឹងជនជាប់ចោទទាំង ១៣នាក់ដែលត្រូវបានតុលាការខ្មែរកាត់ទោសជាប់ពន្ធនាគារ។ យូមែន រ៉ៃត៍ វ៉ច្ឆ បានកត់សម្គាល់ថា អាជ្ញាធរកម្ពុជា មិនបានបង្ហាញភស្តុតាងគួរឲ្យជឿជាក់បានចំពោះការចោទប្រកាន់នេះឡើយ ហើយថាការចោទប្រកាន់អំពីការផ្ដួលរំលំរដ្ឋាភិបាលលោក ហ៊ុន សែន គឺមានពាក់ព័ន្ធនឹងរឿងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
- ស្ដាប់ផ្ទាល់ (ព្រឹក ៥:៣០-៦:៣០ ល្ងាច ៧:៣០-៨:៣០)
- សំឡេង
- ពលរដ្ឋរិះគន់រដ្ឋាភិបាលលោក ហ៊ុន សែន ដែលយកលុយជាតិទៅផលិតភាពយន្តស្ដីពីការតស៊ូរបស់លោក ហ៊ុន សែន
- លោក ហ៊ុន សែន ទទួលស្គាល់ថា មិនទាន់ដឹងពីប្រសិទ្ធភាពវ៉ាក់សាំងចិន តែយល់ព្រមទទួលយកចាក់ឱ្យពលរដ្ឋខ្មែរ
- លោក សម រង្ស៊ី ស្នើអ.ស.បរៀបចំគណៈកម្មការអន្តរជាតិមួយស៊ើបអង្កេតករណីសង់មូលដ្ឋានទ័ពចិននៅកម្ពុជា
- ក្រុមហ៊ុនយន្តហោះមិនអនុញ្ញាតឲ្យអ្នកស្រី មូរ សុខហួរ ឡើងយន្តហោះចាកចេញពីអាមេរិក
- អ្នកវិភាគថា ផែនការរបស់លោក ហ៊ុន សែន ផ្ទេរមរតកអំណាចឲ្យកូននៅមានឧបសគ្គច្រើន
