កំណាព្យ៖ មោទនភាព​ជាតិ​ខ្មែរ

ដោយ​ យី អ៊ីលីង
2018-02-17
អ៊ីម៉ែល
មតិ
Share
បោះពុម្ព

កំណាព្យ៖ មោទនភាព​ជាតិ​ខ្មែរ (បទ​ពាក្យ​ប្រាំពីរ)

ប្រទេស​កម្ពុជា​តូច​មែន​ពិត             តែ​ល្អ​ប្រណិត​ហួសការ​ស្មាន
ធនធាន​ធម្មជាតិ​ភោគផល​បាន        ប្រាង្គ​ប្រាសាទ​មាន​ច្រើន​ពេក​ក្រៃ។

មាន​ភ្នំ​សមុទ្រ​កោះ​ទន្លេ                 ខ្ពង់រាប​ដី​រ៉ែ ខ្សាច់ ថ្ម ព្រៃ
​ចម្លាក់ អក្សរ ច្រើន​វិស័យ              វប្បធម៌​ប្រពៃ​ថ្លៃ​លើសលន់។

ដំណាំ​ហូប​ផ្លែ​មាន​ឥត​ខ្វះ                ចេញ​ផ្លែ​ស្អេកស្កះ​ច្រើន​ពេកពន់
វាល​ស្រូវ​ពណ៌​មាស​គួរ​គយគន់        គឺ​ជា​ទ្រព្យធន​ល្អ​អស្ចារ្យ។

ប្រទេស​ខ្មែរ​យើង​សម្បូរ​សត្វ           ហិចហើរ​ឆ្លងកាត់​ពេញ​មេឃា
​ត្រី​ហែល​ឆ្វែលឆ្វាត់​ក្នុង​គង្គា            ខ្លះ​ដើរ​រេរា​ក្នុង​ព្រឹក្សា។

កន្លែង​ទេសចរណ៍​ច្រើន​អនេក        ល្អគន់​គាប់​ភ្នែក​គួរ​ចេតនា
​មាន​ជ្រោះ​ជ្រលង​ភ្នំ​ជលសា            សត្វ​យំ​ខ្ញៀវខ្ញារ​រណ្ដំ​ចិត្ត។

​ប្រទេស​ខ្មែរ​យើង​ល្អ​អស្ចារ្យ            ទាក់ទាញ​នេត្រា​ភ្ញៀវ​ជុំជិត
​វក់​នឹង​សម្រស់​ល្អ​វិចិត្រ                  ជា​កេរ​ល្អ​ពិត​ខ្មែរ​មោទនៈ។

​និពន្ធ​ដោយ​កុមារី យី អ៊ីលីង សិស្ស​ថ្នាក់​ទី​៨ សាលា​អនុវិទ្យាល័យ សុវណ្ណភូមិ ក្រុង​ភ្នំពេញ
សម្រួល​ជើង​កាព្យ​ដោយ យី ឆេងអ៊ួ

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

គេហទំព័រ​ទាំងមូល