ក្រុមប្រឹក្សាក្រុងឡូវែល(Lowell) ដែលមានសមាជិក ៩រូប ក្នុងរដ្ឋ ម៉ាស្សាឈូស៊ែត (Massachusetts) សហរដ្ឋអាមេរិក ឯកភាពគាំទ្រសេចក្ដីស្នើច្បាប់ ស្ដីពី «ប្រជាធិបតេយ្យនៅកម្ពុជាឆ្នាំ២០១៨» (លេខH.R. 5754) នៅថ្ងៃទី១៤ សីហា បន្ទាប់ពីត្រូវបានរដ្ឋសភាសហរដ្ឋអាមេរិកអនុម័តកាលពីថ្ងៃទី២៦ ខែកក្កដា ដើម្បីដាក់ទណ្ឌកម្មលើលោក ហ៊ុន សែន និងបុគ្គលស្និទ្ធនឹងលោក ហ៊ុន សែនចំនួន ១៦នាក់ទៀត ចំពោះការបំផ្លាញប្រជាធិបតេយ្យនៅកម្ពុជា។ នេះបើតាមការចុះផ្សាយរបស់សារព័ត៌មានក្នុងក្រុងឡូវែល (lowellsun.com)។
ក្រុង ឡូវែល (Lowell) នៃរដ្ឋម៉ាស្សាឈូស៊ែត (Massachusetts) ជាទីក្រុងដែលមានសហគមន៍ខ្មែរធំជាងគេលំដាប់ទី២ ដែលមានពលរដ្ឋខ្មែររស់នៅប្រមាណ ៣ម៉ឺននាក់។
អភិបាលរងក្រុងឡូវែលដែលមានដើមកំណើតខ្មែរ លោក នួន វាសនា ថ្លែងក្នុងកម្មវិធីទូរទស្សន៍អាស៊ីសេរី កាលពីថ្ងៃទី១៣ ខែសីហាថា នៅពេលក្រុមប្រឹក្សាក្រុងឡូវែលឯកភាពគាំទ្រសេចក្ដីស្នើច្បាប់លេខ H.R. 5754 នេះហើយ ក្រុមប្រឹក្សាទាំង ៩រូបនឹងបន្តស្វែងរកការគាំទ្រពីសមាជិកព្រឹទ្ធសភាអាមេរិកពីររូប នៃរដ្ឋ ម៉ាស្សាឈូសេតស៍ គឺអ្នកស្រី អេលីហ្សាប៊ែត វ៉ារែន (Elizabeth Warren) និងលោក អ៊ែតវើត ម៉ាកឃី (Edward Markey) ដើម្បីជំរុញឲ្យអ្នកទាំងពីរគាំទ្រការអនុម័តសេចក្ដីស្នើច្បាប់នេះនៅព្រឹទ្ធសភា។
អ្នកច្បាប់អន្តរជាតិ និងជាមេធាវីជនជាតិអង់គ្លេសលោក រីឆាត រ៉យជើរ (Richard Rogers) ពន្យល់ថាសេចក្ដីស្នើច្បាប់ ស្ដីពី «ប្រជាធិបតេយ្យនៅកម្ពុជាឆ្នាំ២០១៨» អាចត្រូវការពេលប្រាំមួយខែ ឬ ក៏ឆាប់ជាងនេះ អាស្រ័យទៅលើភាពបន្ទាន់ និងឆន្ទានុសិទ្ធិរបស់ប្រធានាធិបតីអាមេរិក លោក ដូណាល់ ត្រាំ ដែលត្រូវចុះហត្ថលេខាដាក់ឲ្យប្រើប្រាស់៖ « ពេលដែលសំណើច្បាប់នេះ ត្រូវបានអនុម័ត និងដាក់ឲ្យចូលជាធរមានរួច ច្បាស់ណាស់ វានឹងមានឥទ្ធិពលខ្លាំង។ ប៉ុន្តែឥទ្ធិពលនេះ គឺចាំរហូតដល់ ១៨០ថ្ងៃក្រោយចេញច្បាប់នេះសិន ទើបឃើញច្បាស់។ ពេលនោះ យើងនឹងឃើញបញ្ជីរាយនាមបុគ្គល ដែលត្រូវរងទណ្ឌកម្ម។ ទណ្ឌកម្មទាំងនោះរួមមាន ការបង្កកទ្រព្យសម្បត្តិរបស់មន្ត្រីទាំងនោះ ដែលមាននៅសហរដ្ឋអាមេរិក ទាំងជាទ្រព្យបុគ្គល ឬជាក្រុមហ៊ុន និងការហាមឃាត់ទិដ្ឋាការធ្វើដំណើរមកកាន់ទឹកដីអាមេរិក។ មានន័យថា មន្ត្រីរបបលោក ហ៊ុន សែន មិនអាចជាន់ដីអាមេរិកបានទេ លើកលែងតែក្នុងករណីមកប្រជុំអង្គការសហប្រជាជាតិប៉ុណ្ណោះ។ ទណ្ឌកម្មនេះ គឺដាក់លើជនទាំងឡាយណា ដែលបានចូលដៃចូលជើង ក្នុងការបំផ្លាញប្រជាធិបតេយ្យនៅកម្ពុជា និងជនដែលរំលោភសិទ្ធិមនុស្ស ដែលពាក់ព័ន្ធនឹងការបំផ្លាញប្រជាធិបតេយ្យនេះដែរ។ បើនិយាយពីជនដែលជាប់ពាក់ព័ន្ធវិញ គឺមានច្រើនស្អេកស្កះ នៅស្រុកខ្មែរ។ ដូច្នេះ បញ្ជីខ្មៅច្បាស់ជាវែងខ្លាំងណាស់ហើយ »។
បុគ្គលទាំង ១៧រូប ដែលត្រូវបានរាយនាមក្នុងបញ្ជីដាក់ទណ្ឌកម្មនោះ រួមមាន លោក ហ៊ុន សែន លោក ស ខេង ជារដ្ឋមន្រ្តីក្រសួងមហាផ្ទៃចាំផ្ទះ លោក ទៀ បាញ់ រដ្ឋមន្រ្តីក្រសួងការពារជាតិ និងមន្ត្រីសំខាន់ៗ ដែលស្និទ្ធនឹងលោក ហ៊ុន សែន មួយចំនួនទៀត។
ជុំវិញការប្រឈមនឹងការដាក់ទណ្ឌកម្មនេះ អ្នកនាំពាក្យរបបលោក ហ៊ុន សែន លោក ផៃ ស៊ីផាន ធ្លាប់អះអាងថា ទណ្ឌកម្មនេះមិនប៉ះពាល់អ្វីដល់កម្ពុជាទេ ព្រោះកម្ពុជាជារដ្ឋឯករាជ្យ មិនចំណុះក្រោមឥទ្ធិពលសហរដ្ឋអាមេរិកនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។