អ្នកវិភាគ​រិះគន់​វិធានការ​ទប់ទល់​ការ​ដក​ប្រព័ន្ធ​អនុគ្រោះ​ពន្ធ​របស់​របប​ក្រុង​ភ្នំពេញ​ថា នឹង​គ្មាន​ប្រសិទ្ធភាព

ដោយ ថន ថារ៉ូ
2019-01-12
អ៊ីម៉ែល
មតិ
Share
បោះពុម្ព
លោក​ រ៉ុង ឈុន​ ប្រធាន​សហភាពសហជីពកម្ពុជា
លោក​ រ៉ុង ឈុន​ ប្រធាន​សហភាពសហជីពកម្ពុជា
រូប៖ ក្រសួង​ការងារ និង​បណ្ដុះបណ្ដាល​វិជ្ជាជីវៈ

អ្នកវិភាគ និង​អ្នកឃ្លាំមើល​កម្ពុជា​យល់​ថា វិធានការ​របស់​លោក ហ៊ុន សែន ដែល​មិន​ឱន​ក្បាល​នឹង​ការ​ដក​ប្រព័ន្ធ​អនុគ្រោះ​ពន្ធ​របស់​អាមេរិក និង​អឺរ៉ុប មិន​មាន​ប្រសិទ្ធភាព​នោះ​ទេ។ ពួកគេ​យល់​ថា វិធី​ល្អ​បំផុត​នោះ គឺ​លោក ហ៊ុន សែន គួរតែ​ចាប់ផ្ដើម​ស្ដារ​លទ្ធិប្រជាធិបតេយ្យ និង​គោរព​សិទ្ធិមនុស្ស​ឡើងវិញ​តាម​សំណូមពរ​របស់​សហគមន៍​អន្តរជាតិ​ទៅវិញ​ប្រសើរ​ជាង។

អ្នកវិភាគ និង​ឃ្លាំ​មើល​កម្ពុជា​លើកឡើង​ថា របប​ក្រុងភ្នំពេញ​មិន​គួរ​បណ្ដោយ​ឲ្យ​បាត់បង់​ប្រព័ន្ធ​អនុគ្រោះ​ពន្ធ​របស់​អាមេរិក និង​សហភាព​អឺរ៉ុប​នោះ​ទេ ព្រោះ​បាន​ធ្វើ​ឲ្យ​កម្ពុជា​ចំណេញ​ថវិកា​រាប់​រយ​លាន​ដុល្លារ​ក្នុង​មួយ​ឆ្នាំ។

ប្រធាន​សហភាព​សហជីព​កម្ពុជា និង​ជា​តំណាង​ក្រុមប្រឹក្សា​ឃ្លាំមើល​កម្ពុជា លោក រ៉ុង ឈុន យល់​ថា ការ​ប្រកាស​ពី​វិធានការ​របស់​លោក ហ៊ុន សែន នឹង​បរាជ័យ​ទៅវិញ និង​មិន​អាច​សង្គ្រោះ​នូវ​អ្វី ដែល​កម្ពុជា​បាត់បង់​ទេ ពេល​គ្មាន​ប្រព័ន្ធ​អនុគ្រោះ​ពន្ធ​របស់​អាមេរិក និង​សហភាព​អឺរ៉ុប​នោះ។ លោក​បន្ត​ថា លោក ហ៊ុន សែន គួរតែ​សម្របសម្រួល និង​ដោះស្រាយ​តាម​សំណូមពរ​របស់​សហគមន៍​អន្តរជាតិ ដែល​ចង់​ឃើញ​ថា កម្ពុជា​មាន​លទ្ធិប្រជាធិបតេយ្យ និង​ការ​គោរព​សិទ្ធិមនុស្ស តាមរយៈ​ដោះស្រាយ​វិបត្តិ​នយោបាយ​ជាមួយ​គណបក្ស​ សង្គ្រោះជាតិ៖ «បើ​សហភាព​អឺរ៉ុប ផ្តាច់​ប្រព័ន្ធ EBA ហើយ​អាមេរិក​ផ្តាច់​ប្រព័ន្ធ GSP គឺ​កម្ពុជា​យើង​នឹង​ប្រឈម​មុខ​ធ្ងន់ធ្ងរ​ណាស់។ លើស​ពី​នេះ​ទៀត បើ​យើង​មិន​កែ​លម្អ​ឲ្យ​ទាន់​ពេល​វេលា គឺ​នឹង​អាច​ឈាន​ដល់​គេ​ឡោម​ព័ទ្ធ​សេដ្ឋកិច្ច​ថែម​ទៀត ហើយ​កាន់​តែ​ធ្ងន់ធ្ងរ។ ក្នុង​នាម​ជា​សហជីព យើង​មាន​ការ​ព្រួយ​បារម្ភ​មែនទែន។ កម្មករ​បាត់បង់​​ការងារ​ច្រើន ហើយ​អ្នក​ទទួល​ផល​ប្រយោជន៍​ពី​កម្មករ ក៏​បាត់បង់​ផល​ប្រយោជន៍​ច្រើន​ដែរ ហើយ​នៅ​ពេល​នោះ ស្រុក​ទេស​យើង​នឹង​ច្របូកច្របល់»

លោក ហ៊ុន សែន បាន​ថ្លែង​កាលពី​រាត្រី ថ្ងៃ​ទី​១១ ខែ​មករា​ថា លោក​បាន​ជួបពិភាក្សា​ជាមួយ​រដ្ឋមន្ត្រី​ក្រសួង​សេដ្ឋកិច្ច​លោក អូន ព័ន្ធមុនីរ័ត្ន រួចហើយ ក្នុង​ការ​រៀប​យុទ្ធសាស្ត្រ​ថ្មីៗ ដើម្បី​ទប់ទល់​ទៅ​នឹង​ការ​ដក​ប្រព័ន្ធ​អនុគ្រោះ​ពន្ធ​របស់​អឺរ៉ុប និង​អាមេរិក។ លោក​បន្ត​ថា កម្ពុជា​ដល់​ពេល​ដែល​ត្រូវ​ពង្រឹង​ឯករាជ្យ​របស់​ខ្លួន ហើយ​ឈប់​ពឹង​លើ​ខ្យល់​ដកដង្ហើម​របស់​ប្រទេស​ដទៃ​ដើម្បី​រស់​តទៅទៀត៖ «យុទ្ធនាការ​ពង្រឹង​ឯករាជ្យ​របស់​កម្ពុជា មាន​ចំណុច​មួយ​ចំនួន​ អាច​នឹង​ជួយ​ឲ្យ​វិស័យ​ធុរៈកិច្ច​របស់​យើង ​បើ​ទោះ​បី​ជា​គ្មាន​ភាព​អនុគ្រោះ​ក៏​កម្ពុជា​ នៅ​តែ​រស់។ ឧទាហរណ៍ ខ្ញុំ​បាន​សម្រេច​អំបាញ់​មិញ នៅ​តាម​មាត់ច្រក​តាម​ព្រំ​ដែន ក្នុង​ការ​នាំ​ចេញ​នាំ​ចូល អត់​មាន​តម្រូវ​ការ​ឲ្យ​មាន​ស្ថាប័ន​ណា​ក្រៅ​ពីអន្តោប្រវេសន៍ និង​គយ​ទេ។ ឲ្យ​តែ​ពីរ​ហ្នឹង​ទេ! ក្រៅពី​នោះ ​ដក​ចេញ​ឲ្យ​អស់ ទាំង​កាំកុងត្រូល ទាំង​ស្អី​ ដក​ចេញ​ឲ្យ​អស់ ព្រោះ​អាហ្នឹង​ វា​កើត​ទៅ​ជា​ឧបសគ្គ​នៃ​ការ​រារាំង​ការ​ធ្វើ​ពាណិជ្ជកម្ម​ទៅ​វិញ​ទេ»

កាលពី​ថ្ងៃ​ទី​៩ ខែ​មករា សមាជិក​ព្រឹទ្ធសភា​សហរដ្ឋអាមេរិក​ពីររូប ដាក់​សេចក្ដី​ស្នើ​ច្បាប់​មួយ​ស្ដីពី​ពាណិជ្ជកម្ម​កម្ពុជា​ឆ្នាំ​២០១៩ ដើម្បី​ឲ្យ​រដ្ឋាភិបាល​សហរដ្ឋអាមេរិក ពិចារណា​ឡើងវិញ លើ​ការ​ផ្តល់​ការ​អនុគ្រោះ​ពន្ធ​ទូទៅ (GSP) ដល់​របប​លោក ហ៊ុន សែន។ ការ​ពិចារណា​ឡើងវិញ​នេះ រួមមាន ការ​ដក​ទាំងស្រុង ព្យួរ ឬ​កាត់បន្ថយ​ការ​ផ្ដល់​ការ​អនុគ្រោះ​ពន្ធ ដែល​ផ្ដល់​ដល់​កម្ពុជា ដោយសារ​តែ​របប​លោក ហ៊ុន សែន រំលោភ​សិទ្ធិ​មនុស្ស និង​បំផ្លាញ​ប្រជាធិបតេយ្យ​ធ្ងន់ធ្ងរ។ ជាមួយ​គ្នា​នេះ សហភាព​អឺរ៉ុប ដែល​ជា​បណ្ដុំ​ប្រទេស​ប្រជាធិបតេយ្យ​ធំៗ ក៏បាន​ជូនដំណឹង​ជា​ផ្លូវការ​ដល់​របប​លោក ហ៊ុន សែន តាំង​ពី​ដើម​ខែ​តុលា ឆ្នាំ​២០១៨ ថា នឹង​ដក​ការ​អនុគ្រោះ​ពន្ធ EBA នៅ​អំឡុង​ខែ​មីនា ឆ្នាំនេះ បើ​របប​លោក ហ៊ុន សែន មិន​ស្ដារ​សិទ្ធិមនុស្ស និង​ប្រជាធិបតេយ្យ​ឡើងវិញ។

អ្នកវិភាគ​សង្គម​យល់ថា វិធានការ​មិន​ឱន​ក្បាល​របស់​លោក មិនមែន​ជា​ដំណោះស្រាយ​រយៈពេល​វែង​និង​ផ្ដល់​ផលប្រយោជន៍​ដល់​ពលរដ្ឋ​ខ្មែរ​នោះ​ទេ។

លោក គឹម សុខ លើកឡើង​ថា វិធានការ​របស់​លោក ហ៊ុន សែន​ហាក់​ដូច​លោក​ទើបតែ ភ្ញាក់​ពី​ដេក។ លោក​ថា កន្លង​មក លោក ហ៊ុន សែន ពូកែ​តែ​បញ្ជូន​ប្រជាពលរដ្ឋ​ខ្មែរ​ឲ្យ​ចំណាកស្រុក​នៅ​បរទេស និង​ទៅ​ខ្ចី​បំណុល​បរទេស ដូចជា​ចិន​ជាដើម ដែល​នឹង​ធ្វើ​ឲ្យ​ប្រទេស​ជាតិ​ជំពាក់​បំណុល​វ័ណ្ឌក​បន្ថែម​ទៀត៖ «ប្រសិន​បើ​អាមេរិក និង​សហភាពអឺរ៉ុប ធ្វើ​មែន គឺ​ធ្វើ​វា​ប៉ះពាល់​ធំធេង​ណាស់​ដល់​ទំហំ​សេដ្ឋកិច្ច​កម្ពុជា ដូច​ជា កម្មករ​រាប់​ម៉ឺន​នាក់ បាត់បង់​ការងារ និង​ប៉ះពាល់​ដល់​ជីវភាព​កសិករ​ដែរ ព្រោះ​ទំនិញ​នាំ​ទៅ​អឺរ៉ុប គឺ​មាន​ទាំង​វិស័យ​កសិកម្ម។ ចំណុច​មួយ​ទៀត ការ​ទើប​តែ​ចាត់​វិធានការ​ថ្មី​នេះ មើល​ទៅ​មិន​អាច​ទប់ទល់​បាន​ទេ ដោយសារ​តែ​អំពើ​ពុករលួយ​នៅ​កម្ពុជា​មាន​ទម្ងន់​ស្ទើរ​លក់​ប្រទេស​ទៅ​ហើយ»

លោក គឹម សុខ បន្ត​ថា ប្រសិនបើ​លោក ហ៊ុន សែន ជា​មេដឹកនាំ​គិត​ជាតិ​ពិតប្រាកដ គួរតែ​ទាញ កម្ពុជា​ឲ្យ​មាន​លទ្ធិប្រជាធិបតេយ្យ និង​ការ​គោរព​សិទ្ធិមនុស្ស ដែល​ស្របតាម​ស្តង់ដារ​អន្តរជាតិ​វិញ ដើម្បី​គេច​ចេញ​ពី​ការ​ដាក់​ទណ្ឌកម្ម​របស់​អន្តរជាតិ នៅ​ពេល​ដ៏​ខ្លី​ខាងមុខ៖ «លោក ហ៊ុន សែន មិន​មែន​ជា​មេ​ដឹក​នាំ​គិត​ជាតិ ព្រោះ​អ្វី​ដែល​គាត់​ធ្វើ គឺ​ដើម្បី​តែ​ការពារ​អំណាច​របស់​គាត់​​ប៉ុណ្ណោះ។ បើ​មេ​ដឹក​នាំ​ជាតិ ត្រូវ​គិត​អំពី​ផល​ប្រយោជន៍ជាតិ។ ប្រព័ន្ធ​អនុគ្រោះ​ពន្ធ​របស់​អាមេរិក និង​សហភាព​អឺរ៉ុប​នេះ គឺ​ដូច​ជា​ទេវតា ជួយ​សង្គ្រោះ​សេដ្ឋកិច្ច​កម្ពុជា និង​ប្រជាជន​ក្រីក្រ»

សហរដ្ឋអាមេរិក និង​សហភាព​អឺរ៉ុប គឺជា​ទីផ្សារ​ពាណិជ្ជកម្ម​ដ៏​ធំ​មួយ​របស់​កម្ពុជា សម្រាប់​ការនាំចេញ​ផលិតផល​ក្នុងស្រុក ដែល​កម្ពុជា​ផលិត ក្នុង​នោះ​មាន​ដូចជា សំលៀកបំពាក់ ស្បែកជើង ផលិតផល​ធ្វើ​ពី​ស្បែក ប្លាស្ទិក ម្ហូបអាហារ និង​ផលិតផល​កសិកម្ម​ជាដើម។

សហរដ្ឋអាមេរិក ផ្ដល់​ការ​អនុគ្រោះ​ពន្ធ​ដល់​កម្ពុជា តាមរយៈ​ប្រព័ន្ធ​អនុគ្រោះ​ពន្ធ​ទូទៅ (GSP) តាំងពី​ឆ្នាំ​១៩៩៧។ កម្ពុជា​ទទួល​បាន​ការ​មិន​យកពន្ធ​សរុប​តម្លៃ ៤០០​លាន​ដុល្លារ ពី​សហរដ្ឋ​អាមេរិក តាមរយៈ​ការ​អនុគ្រោះ​ពន្ធ​នេះ។ ចំណែក​ឯ​សហភាព​អឺរ៉ុប ក៏​ផ្ដល់​ការ​អនុគ្រោះ​ពន្ធ តាមរយៈ​កម្មវិធី​អ្វីៗ​ទាំងអស់ លើកលែងតែ​អាវុធ (Everything But Arms, EBA) តាំងពី​ឆ្នាំ​២០១២។ ក្នុង​មួយឆ្នាំៗ កម្ពុជា​ទទួល​បាន​ការ​មិន​យកពន្ធ សរុប​តម្លៃ​ជិត ៧០០​លាន​ដុល្លារ ពី​សហភាព​អឺរ៉ុប៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

ភវ​វ័រ្មន

ពី បាវិត ស្វាយ​រៀង​

ប្រសិនជាទស្សនៈខ្ញុំខុស សុំលោកអ្នក ជួយកែណែនាំ ដោយអនុគ្រោះ!
លោកហ៊ុន សែន ប្រធាន បក្សប្រជាជនកម្ពុជា បានរំឭក សហគមន៍ប្រទេសប្រកាន់លិទ្ធិប្រជាធិបតេយ្យ ជាថ្មីទៀតថា មិនគួរប្រព្រឹត្តកំហុសជាលើកទី៣ ជាពិសេសមិនត្រូវយកប្រព័ន្ធអនុគ្រោះពន្ធ EBA ធ្វើជាចំណាប់ខ្មាំង! ខ្ញុំយល់ថា ជាការមួលបង្កាច់ បំភាន់សាធារណៈមតិ បំពានការពិតទាំងស្រុង ។ ប្រទេសសហគមន៍ប្រកាន់លិទ្ធិប្រជាធិបតេយ្យ សហរដ្ឋអាមេរិក មិនដែលដាក់ទណ្ឌកម្មសេដ្ឋកិច្ចម្ដងណាឡើយ ចំពោះប្រទេស កម្ពុជានៅពេលដែលប្រទេសកម្ពុជាប្រកាន់យកលិទ្ធិប្រជាធិបតេយ្យ គោរពសិទ្ធិមនុស្ស! ជាងនេះទៅទៀតចំពោះប្រព័ន្ធអនុគ្រោះពន្ធ EBA និងជំនួយរបស់សហរដ្ឋអាមេរិកផ្សេងៗ គឺជាវិធីយុទ្ធសាស្ដ្រជួយស្ដារសេដ្ឋកិច្ចប្រទេសកម្ពុជានៅពេលដែលប្រទេសកម្ពុជាបានបង្រួបបង្រួមគ្នាក្រោមកិច្ចព្រមព្រៀងសន្ដិភាព២៣តុលា ១៩៩១ បញ្ចប់ សង្គ្រាមរ៉ាំរ៉ៃជាង០២ទសវត្សរ៍ ហើយបានប្រកាន់យកលិទ្ធិប្រជាធិបតេយ្យ សេរីពហុបក្ស ។
ផ្ទុយទៅវិញ វាប្រាកដណាស់ គឺនយោបាយ សង្គ្រាមពង្រីកទឹកដីនិងដណ្ដើមគ្រប់គ្រងសេដ្ឋកិច្ច របស់ វៀតណាម និងចិនកុំមុយនីសនេះហើយ ដែល បានកាត់ផ្ដាច់ប្រទេសកម្ពុជាពី ប្រទេសសហគមន៍ប្រកាន់លិទ្ធិប្រជាធិបតេយ្យ ធ្វើឲ្យប្រទេសកម្ពុជាធ្លាក់ក្នុងរបបប្រល័យពូជសាសន៍ ពីឆ្នាំ១៩៧៥ ដល់ ១៩៧៩ ធ្លាក់ក្រោមរបបអាណានិគមន៍សង្គមនិយមវៀតណាម សម្លាប់ប្រជាជនខ្មែរដោយប្រយោលជាបន្ដទៀត(ផែនការ ក៥) ពីឆ្នាំ១៩៧៩ ដល់ ១៩៨៩ ។
គួរ រំឭកថា វៀតណាម មិនគ្រាន់តែកាត់ផ្ដាច់កម្ពុជាពីប្រទេសសហគមន៍ប្រកាន់លិទ្ធិប្រជាធិបតេយ្យ សហរដ្ឋអាមេរិក ប៉ុណ្ណោះទេ វៀតណាមថែមទាំង បិទសេដ្ឋកិច្ចកម្ពុជាគ្រប់វិស័យទាំងអស់ ស្រូវអង្ករផលកសិកម្មខ្មែរត្រូវលក់ជួនរដ្ឋ គឺលក់ឲ្យវៀតណាម ។ អាណានិគមយួន បានហាមប្រជាជនខ្មែរ រៀនភាសា បរទេស បារាំង អង់គ្លេស គឺជាយុទ្ធសាស្ដ្រកាត់ផ្ដាច់ប្រជាជនខ្មែរពីប្រទេសសហគមន៍ប្រកាន់លិទ្ធិប្រជាធិបតេយ្យ សហរដ្ឋអាមេរិក យូរអង្វែង ។ ល ។

Jan 13, 2019 10:35 PM

គេហទំព័រ​ទាំងមូល