"សកម្មជន​គណបក្ស​ប្រឆាំង​បន្ត​រង​ការ​ធ្វើទុក្ខបុកម្នេញ និង​រឹតត្បិត​លំហ​សេរីភាព​នយោបាយ"

ដោយ យន់ សាមៀន
2022.11.26
Share on WhatsApp
Share on WhatsApp
"សកម្មជន​គណបក្ស​ប្រឆាំង​បន្ត​រង​ការ​ធ្វើទុក្ខបុកម្នេញ និង​រឹតត្បិត​លំហ​សេរីភាព​នយោបាយ" កញ្ញា សេង ធារី នៅ​ថ្ងៃ​​ប្រកាសសាលក្រម​របស់​សាលាដំបូងរាជធានី​ភ្នំពេញ កាល​ពីថ្ងៃទី១៤ ខែ​មិថុនា ឆ្នាំ​២០២២។
រូប៖ ពលរដ្ឋផ្ដល់ឱ្យ

ការ​រឹតត្បិត​លំហ​សេរីភាព​នយោបាយ ភាព​មិន​ប្រក្រតី និង​ការ​ធ្វើទុក្ខបុកម្នេញ​សកម្មជន​គណបក្ស​ប្រឆាំង បន្ត​កើត​មាន​ឡើង​នៅ​មុន​ការ​បោះឆ្នោត ក្នុង​ពេល​បោះឆ្នោត និង​ក្រោយ​ពេល​បោះឆ្នោត​ក្រុម​ប្រឹក្សាឃុំ​/​សង្កាត់​អាណត្តិ​ទី​ប្រាំ កាល​ពី​ខែ​មិថុនា ឆ្នាំ​២០២២។ នេះ​បាន​តាម​របាយការណ៍​ឃ្លាំមើល​ការ​បោះឆ្នោត​របស់​សមាគម​ការពារ​សិទ្ធិមនុស្ស​អាដហុក (ADHOC) ផ្សាយ​កាលពី​ថ្ងៃទី​២៣ វិច្ឆិកា។

របាយការណ៍​ដែល​មាន​ចំណងជើង​ថា​៖ បរិយាកាស​នយោបាយ​ការបោះឆ្នោត ២០២២ រក​ឃើញ​ថា នៅមុន​ការបោះឆ្នោត​មាន ករណី​រឹតត្បិត​លំហ​សេរីភាព​នយោបាយ​ចំនួន ៨១​ករណី កើតឡើង នៅតាម​បណ្តា​ឃុំ​-​សង្កាត់​ចំនួន​៦០ នៃ​ស្រុក-ខណ្ឌ​ចំនួន​៥០ ស្ថិត​នៅ​ក្នុង​ខេត្ត​ចំនួន​១៧ ។ ក្នុង​នោះ​មាន​៣៥​ករណី ជា​ការ​គំរាម​ឲ្យ​សកម្មជន​បក្ស​ប្រឆាំង ក្នុង​នោះ​មាន​គណបក្ស​ភ្លើងទៀន ឲ្យ​លាឈប់​ពី​បញ្ជី​ឈរ​ឈ្មោះ​បេក្ខភាព​គណបក្ស។ ការ​គំរាម​នោះ មាន​ដូចជា អាជ្ញាធរ​ដែនដី​កោះហៅ​សកម្មជន​បក្ស​ប្រឆាំង​ឲ្យ​ទៅ​ជួប​នៅ​សាលាឃុំ ឬ​/​និង​ស្នាក់​ការ​គណបក្ស​ឃុំ បង្ខំ​ឲ្យ​ស្បថ និង​ថតរូប​នៅ​ពេល​ទទួល​អំណោយ ឬ​ថវិកា ជិះ​ម៉ូតូ​កៀរ​ផ្តួល គប់​ដុំ​ថ្ម​ចូលក្នុង​ផ្ទះ ជាដើម​។ របាយការណ៍​បន្ត​ទៀត​ថា អាជ្ញាធរ​មូលដ្ឋាន​ក៏បាន បញ្ឈប់​ផ្តល់​ប្រាក់​ឧបត្ថម្ភ​ជន​ក្រីក្រ​ប្រចាំខែ បញ្ឈប់​-​មិន​ផ្តល់​ប័ណ្ណ​ក្រីក្រ កាត់​ផ្តាច់​អាហារ​រូបករណ៍ មិន​ផ្តល់​ប័ណ្ណកម្មសិទ្ធិ​លើ​អចលនវត្ថុ ដេញ​មិន​ឲ្យ​នៅក្នុង​ភូមិ គំរាម​ចាប់ខ្លួន​ថ្ងៃក្រោយ និង​ដក​ឈ្មោះ​ចេញ​ពី​ក្របខ័ណ្ឌ​មន្ត្រីរាជការ​។ ដោយឡែក ក្នុង​នៅ​អំឡុង​ពេល​បោះឆ្នោត​វិញ របាយការណ៍​ក៏​រក​ឃើញ​មាន​ភាព​មិន​ប្រក្រតី​មួយចំនួន​ដូចជា​៖ អាជ្ញាធរ​មាន​វត្តមាន​-​ឈរ​នៅមុខ​បរិវេណ​ការិយាល័យ​បោះឆ្នោត ចាំ​កត់ត្រា​ឈ្មោះ​អ្នក​មក​ចូលរួម​បោះឆ្នោត រារាំង​អ្នកសង្កេតការណ៍​មិន​ឲ្យ​ចូល និង​ថត​ដំណើរការ​រាប់​សន្លឹកឆ្នោត​នៅ​តាម​ការិយាល័យ​បោះឆ្នោត​ភាគច្រើន​។ បន្ថែម​លើ​នេះ​ទៅទៀត អ្នក​រៀបចំ​ការបោះឆ្នោត​ក៏​មិន​អនុញ្ញាត​ឱ្យ​ប្រជាពលរដ្ឋ​មើល​ការ​រាប់​សន្លឹកឆ្នោត​ដែរ។

របាយការណ៍​រក​ឃើញ​ទៀត​ថា នៅ​ក្រោយ​ការបោះឆ្នោត​មិន​បាន​ដប់​ថ្ងៃ​ផង មាន​ព្រឹត្តិការណ៍​នយោបាយ​ធំៗ​កើតឡើង​គួរ​ឲ្យ​កត់សម្គាល់​ដូចជា​៖ ការប្រកាស​ផ្ដន្ទាទោស​អ្នកនយោបាយ និង​សកម្មជន​សិទ្ធិមនុស្ស​ទ្រង់ទ្រាយ​ធំ​រហូតដល់​ចំនួន​៦១​នាក់ ការ​ប្តឹង​អនុប្រធាន​គណបក្ស​ភ្លើងទៀន ការ​ចាប់​មេឃុំ​គណបក្ស​ភ្លើងទៀន និង​ករណី​ធ្វើទុក្ខបុកម្នេញ​មន្ត្រី​បក្ស​ភ្លើងទៀន​ផ្សេងទៀត។

សមាគម​អាដហុក​ផ្តល់​អនុសាសន៍​មួយចំនួន​ដោះស្រាយ​ពី​ភាព​មិន​ប្រក្រតី​កើតឡើង​កាលពី​បោះឆ្នោត​ឃុំ​សង្កាត់​កន្លង​ទៅ​។

អនុសាសន៍​ទាំងនោះ​រួមមាន៖ ដាក់​ទោសទណ្ឌ​តាមច្បាប់ ជា​ធរមាន​ចំពោះ​ជន​ណា ឬ​អាជ្ញាធរ​មូលដ្ឋាន​ណា ដែល​អនុវត្ត​មិន​បាន​ត្រឹមត្រូវ​តាមច្បាប់ និង​លិខិត​បទដ្ឋាន​គតិយុត្តិ​ជា​ធរមាន​នានា ។ គណៈកម្មាធិការ​ជាតិ​រៀបចំ​ការបោះឆ្នោត (​គ​.​ជ​.​) ត្រូវ​រក​ដំណោះស្រាយ​នូវ​រាល់​វិវាទ​ពាក់ព័ន្ធ​កើត​មានឡើង ដោយ​ឈរ​លើ​គោលការណ៍ ឯករាជ្យ អព្យាក្រិត និង​ដោយ​មិន​រើសអើង​បក្ស​នយោបាយ​។ ចំពោះ​វិវាទ​ទាក់ទង​ការបោះឆ្នោត គប្បី​ត្រូវតែ​ដោះស្រាយ​ដោយ​ច្បាប់​បោះឆ្នោត និង​ក្រសួង​មហាផ្ទៃ​ត្រូវ​ត្រួតពិនិត្យ និង​ដោះស្រាយ​ជាបន្ទាន់ ឲ្យ​បញ្ឈប់​ការរើសអើង​គ្រប់​ទម្រង់​គណបក្ស​នយោបាយ​ដែល​បាន​ជាប់ឆ្នោត ដោយ​រៀបចំ​ឲ្យ​បេក្ខជន​ជាប់ឆ្នោត គ្រប់​គណបក្ស​នយោបាយ​អាច​ចូល​បំពេញ​តួនាទី ភារកិច្ច​កិច្ច​តាម​ច្បាប់​កំណត់។ មន្ត្រី​រដ្ឋាភិបាល និង (..) មិនទាន់​ឆ្លើយតប​នឹង​របាយការណ៍​របស់​សមាគម​អាដហុក​នៅ​ឡើយ កាល​ពី​ថ្ងៃទី​២៣ វិច្ឆិកា ទោះបីជា​យ៉ាងណា​ទាំង (..) និង​គណបក្សកាន់អំណាច​បាន​ដាក់​ពាក្យ​បណ្តឹង​ប្រឆាំង​នឹង​ការ​រិះគន់ ពី​ភាព​មិន​ប្រក្រតី​ដែល​កើត​ឡើង ក្នុង​ការ​បោះឆ្នោត​ឃុំ​សង្កាត់ កាល​ពី​ខែ​មិថុនា កន្លង​ទៅ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។