អ្នក​​​ឃ្លាំ​មើល​​​ថា ​​គណ​បក្ស​​ភ្លើង​​ទៀន បង្ហាញ​​ភាព​​លេច​ធ្លោ​​​​ក្នុង​​ការ​​ធ្វើ​​សកម្មភាព​​តាម​​​មូលដ្ឋាន​

0:00 / 0:00

អ្ន​ក​​​ឃ្លាំមើល​​យល់​​​ថា ​​គណ​បក្ស​ភ្លើង​ទៀន​​ហាក់​​បង្ហាញ​ភាព​លេច​ធ្លោ​​​​ក្នុង​ការ​​ទាក់ទាញ​អ្នក​គាំទ្រ​​នៅ​តាម​មូលដ្ឋាន​ តាម​រយៈ​​ការ​ធ្វើ​សកម្ម​ភាព​​​ និង​លើ​ស្លាក​បក្ស​យ៉ាង​ផុសផុល​​​នៅ​តាម​​​ភូមិ​ ឃុំ មួយ​ចំនួន។ មេដឹកនាំ​បក្ស​ភ្លើង​ទៀន ប្ដេជ្ញា​ខិតខំ​សកម្មភាព​ថែម​ទៀត​ ដើម្បី​​សំដៅ​ទៅ​រក​ការ​បោះឆ្នោត​នៅ​ពេល​ខាង​មុខ។​​​​​​​

បន្ទាប់​ពី​បាន​​​លើក​ស្លាក​នៅ​ថ្នាក់​ខេត្ត និង​ស្រុក​រួច​ហើយ​មក​ គណបក្ស​ភ្លើង​ទៀន ​ហាក់​បង្កើន​​សកម្មភាព​សម្បើម​ណាស់ ​​ដើម្បី​​លើក​ស្លាក​បក្ស​នៅ​តាម​​​ឃុំ និង​ភូមិ​។

អ្នក​សិក្សា​ផ្នែក​ច្បាប់យុវជន ពុធ កុលកា​ ​យល់​ថា​ ការ​បង្កើន​សកម្មភាព​នេះ​ នឹង​ធ្វើ​ឲ្យ​គណបក្ស​ភ្លើង​ទៀន​អូសទាញ​សមាជិក​តាម​មូលដ្ឋាន និង​អ្នកគាំទ្រ​​​​​អតីត​គណបក្ស​​ប្រឆាំង​ឲ្យ​ចូលរួម​ជាមួយ​ខ្លួន​កាន់​តែ​ច្រើន​។ លោក​​មាន​ជំនឿ​ថា​ ក្រោយ​ពេល​ប្រមូល​គ្នីគ្នា​ឡើងវិញ​រួច​ គណបក្ស​​នេះ នឹង​អាច​ចូលរួម​ការ​បោះឆ្នោត​ក្រុម​ប្រឹក្សា​ឃុំ​សង្កាត់​ឆ្នាំ​២០២២ ដើម្បី​ធ្វើតេស្ដ​សមត្ថភាព​របស់​ខ្លួន​។

យុវជន​រូប​នេះ​យល់​ថា វត្តមាន​របស់​គណបក្ស​ភ្លើង​ទៀន មិន​ទាន់​អាច​ធ្វើ​ឲ្យ​ស្ថានភាព​នយោបាយ​នៅ​កម្ពុជា​មាន​ភាព​ល្អប្រសើរ​ឡើងវិញ​ទេ ព្រោះ​វិបត្តិ​ជាតិ​ធំៗ​មួយ​​ចំនួន​​មិន​ទាន់​ត្រូវ​បាន​ដោះស្រាយ ដូចជា​ ករណី​មេបក្ស​ប្រឆាំងលោក កឹម សុខា មិន​ទាន់​​មាន​សេរីភាព​ពេញ​ទី​ជាដើម​​។ តែ​យ៉ាង​ណា លោក​យល់​ថា វត្តមាន​គណបក្ស​ភ្លើង​ទៀន នឹង​អាច​ជួយ​​ឲ្យ​​​សកម្មជន​នយោបាយ មាន​សិទ្ធិ​ធ្វើ​នយោបាយ​ឡើងវិញ៖ « ប្រជាពលរដ្ឋ​មួយ​ចំនួន គាត់​នៅ​តែ​ជឿ​ជាក់​​ព្រោះ​គាត់​ជឿ​លើ​អតីត​​គណបក្ស​សង្គ្រោះ​ជាតិ​​​ដែល​ត្រូវ​បាន​រំលាយ។ ដូច្នេះ​ការ​ចងចាំ​នូវ​រូប​សញ្ញា ប្រវត្តិ​សាស្ត្រ​របស់​គណបក្ស​ គឺ​ជា​អ្វី​ដែល​ប្រជាពលរដ្ឋ​នៅ​តែ​គាំទ្រ​គណបក្ស​ភ្លើង​ទៀន​​ហ្នឹង»។

ចាប់​តាំង​ពី​ធ្វើ​សមាជ​​កាល​ពី​​ចុង​វិច្ឆិកា​ ឆ្នាំ​២០២១​មក គណបក្ស​ភ្លើង​ទៀន បាន​ធ្វើ​សកម្ម​ភាព​យ៉ាង​ផុលផុស​ទាំង​ការ ជួបជុំ​សមាជិក អ្នកគាំទ្រ​ផ្ទាល់ និង​តាម​បណ្ដាញ​សង្គម​ហ្វេសប៊ុក (Facebook)។ ​តំណាង​បក្ស​​ភ្លើង​ទៀន នៅ​តាម​ខេត្ត​​​​នានា​ ដែល​ជា​អតីត​អ្នក​ជាប់​ឃុំ​ផ្នែក​នយោបាយ​នៃ​គណបក្ស​សង្គ្រោះ​ជាតិ​ ​បាន​ធ្វើ​សកម្មភាព​លើកស្លា​ក កៀរគរ និង​ប្រមូល​អ្នកគាំទ្រ​បក្ស​តាម​ស្រុក ​ឃុំ​ និង​ភូមិ​ ជា​បន្ត​បន្ទាប់​។ ខេត្ត​ដែល​កំពុង​ធ្វើ​សកម្មភាព​លើក​ស្លាក​​បក្ស​នៅ​តាម​ភូមិ ​ឃុំ​​ មាន​ដូច​ជា នៅ​ខេត្ត​​កំពង់​ធំ សៀមរាប កណ្ដាល តាកែវ ត្បូងឃ្មុំ ​​កំពង់ចាម​ ជាដើម​។​

ប្រធាន​ស្ដីទី​គណបក្ស​ភ្លើង​ទៀនលោក ថាច់ សេដ្ឋា បញ្ជាក់​ថា​ គណបក្ស​កំពុង​ខិតខំ​ប្រមូល​ធនធាន​មនុស្ស​ពី​គ្រប់​ទិសទី និង​​រៀប​ចំ​រចនា​សម្ព័ន្ធ​បក្ស​ឲ្យ​បាន​គ្រប់​​ ឃុំ​សង្កាត់​ទាំង​អស់ ​ដើម្បី​​ត្រៀម​ចូលរួម​ប្រកួត​ប្រជែង​ការ​បោះឆ្នោត​ឆ្នាំ​២០២២ និង​ឆ្នាំ​២០២៣។ លោកឲ្យ​ដឹង​ថា​ គិត​ត្រឹម​​ដើម​ឆ្នាំ​២០២២​នេះ ​លោក​បាន​ដឹកនាំ​​សមាជិក​​ លើក​ស្លាក​​​បក្ស​បាន​ជាង​ដប់ ​(១៣) ​ខេត្ត​ហើយ ហើយ​​កំពុង​បន្ត​សកម្មភាព​លើក​ស្លាក​ឲ្យ​គ្រប់​ ២៥ ​រាជ​ធានី​-ខេត្ត​​៖ « អ៊ីចឹង​ !​ យើង​សង្ឃឹម​ថា ប្រសិន​បើ​មាន​ការ​​ចូល​រួម​ការ​បោះឆ្នោត ក៏​យើង​​នឹង​មាន​​ក្រុម​ប្រឹក្សា​យើង​គ្រប់គ្រាន់ ហើយ​បើ​ទោះ​បី​ជា​មាន​រចនា​សម្ព័ន្ធ​​យើង​នៅ​ក្នុង​ឃុំ​សង្កាត់​​គ្រប់​ឃុំ​សង្កាត់​យើង​នៅ​ទូទាំង​ប្រទេស​ដែរ»។

​ជុំវិញ​ការ​វិវត្តន៍​ និង​សកម្មភាព​ផុសផុល​របស់​គណបក្ស​ភ្លើង​ទៀន​នេះ វិទ្យុ​អាស៊ី​សេរី មិន​អាច​សុំ​ការ​​បញ្ជាក់​ពី​អ្នក​នាំ​ពាក្យ​គណបក្ស​ប្រជាជន​កម្ពុជាលោក សុខ ឥសាន ​បាន​ទេ​ នៅ​ថ្ងៃ​ទី​២ ខែមករា។ តែ​យ៉ាង​ណា លោក​ធ្លាប់​ប្រាប់​វិទ្យុអាស៊ីសេរីថា គណបក្ស​​​ភ្លើង​ទៀន​​មាន​សិទ្ធិ​ធ្វើ​​​សកម្មភាព​ស្រប​ច្បាប់​ទាំង​ឡាយ ដូច​គណបក្ស​​ផ្សេង​ទៀត​ ​ដែល​បាន​ចុះ​បញ្ជី​ត្រឹមត្រូវ​​នៅ​ក្រសួង​មហាផ្ទៃ។

​​​​គណបក្ស​ភ្លើងទៀន មាន​ឈ្មោះ​ដើម​មក​ពី​គណបក្ស​ជាតិខ្មែរ​ ដែល​ត្រូវ​បាន​បង្កើត​ដោយ​លោក សម រង្ស៊ី នៅ​ឆ្នាំ​១៩៩៥។ ក្រោយ​មក​រដ្ឋាភិបាល​បាន​កែ​​ច្បាប់​ចាប់បង្ខំ​ឲ្យ​បក្ស​នេះ​ប្ដូរ​ឈ្មោះ​ជា​គណបក្ស សម រង្ស៊ី នៅ​ឆ្នាំ​១៩៩៨។ នៅ​ឆ្នាំ​២០១៧ ​រដ្ឋាភិបាល​បាន​​វិសោធនកម្ម​​ច្បាប់​នយោបាយ​ម្ដងទៀត ដែល​បង្ខំ​ឲ្យ​គណបក្ស​នេះ​សម្រេច​ប្ដូរ​ឈ្មោះ​ទៅ​តាម​រូប​សញ្ញា​ គឺ​គណបក្ស​ភ្លើងទៀន​រហូតដល់​សព្វ​ថ្ងៃ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។