ភរិយា​សកម្មជន​បក្ស​ប្រឆាំង​ខេត្ត​ឧត្ដរមានជ័យ​ស្នើ​ឱ្យ​ជួយ​រក​យុត្តិធម៌​ដល់​ស្វាមី​ដែល​ត្រូវ​ចាប់​ខ្លួន​ពី​បទ​រួមគំនិត​ក្បត់ជាតិ

ដោយ ថន ថារ៉ូ
2019-10-18
អ៊ីម៉ែល
មតិ
Share
បោះពុម្ព
​សមាជិក​ក្រុមប្រឹក្សា​ស្រុក​ចុងកាល់ ជាប់​ឆ្នោត​គណបក្ស​សង្គ្រោះជាតិ គឺ​លោក ធីង សំបាន ដែល​ត្រូវ​បាន​ចាប់​ខ្លួន កាល​ពី​ថ្ងៃទី១៨ ខែ​តុលា​ ឆ្នាំ​២០១៩។
​សមាជិក​ក្រុមប្រឹក្សា​ស្រុក​ចុងកាល់ ជាប់​ឆ្នោត​គណបក្ស​សង្គ្រោះជាតិ គឺ​លោក ធីង សំបាន ដែល​ត្រូវ​បាន​ចាប់​ខ្លួន កាល​ពី​ថ្ងៃទី១៨ ខែ​តុលា​ ឆ្នាំ​២០១៩។
Photo Provided

ភរិយា​របស់​សកម្មជន​បក្ស​ប្រឆាំង​ម្នាក់​នៅ​ខេត្ត​​​​​​​​​​​​​​​​​​​​​​​​​​​​​​​​​ឧត្ដរមានជ័យ​អំពាវនាវ​ដល់​មន្ត្រី​អង្គការ​សង្គម​ស៊ីវិល​ឱ្យ​ជួយ​រក​យុត្តិធម៌​ជូន​ស្វាមី ដើម្បី​ឱ្យ​មាន​សេរីភាព​ឡើង​វិញ។ ការ​អំពាវនាវ​នេះ គឺ​បន្ទាប់​ពី​មន្ត្រី​ប៉ូលិស​ខេត្ត​ឧត្ដរមានជ័យ​ចាប់ខ្លួន​ស្វាមី​របស់​លោក​ស្រី​បញ្ជូន​ទៅ​ឃុំខ្លួន ដោយ​ចោទប្រកាន់​ពី​បទ​រួមគំនិត​ក្បត់ជាតិ កាលពី​ព្រឹក​ថ្ងៃ​ទី​១៨ តុលា។ ភរិយា​សកម្មជន​បក្ស​រូប​នេះ​ហៅ​ការ​ចាប់ខ្លួន​របស់​សមត្ថកិច្ច​នេះ​ថា ជា​ទង្វើ​អយុត្តិធម៌​មក​លើ​ពលរដ្ឋ​ស្លូតត្រង់ ដែល​មិន​អាច​ទទួលយក​បាន​ឡើយ។

មន្ត្រី​ប៉ូលិស​ខេត្ត​ឧត្ដរមានជ័យ​បាន​បញ្ជូន​សមាជិក​ក្រុមប្រឹក្សា​ស្រុក​ចុងកាល់ ជាប់​ឆ្នោត​គណបក្ស​សង្គ្រោះជាតិ គឺ​លោក ធីង សំបាន ទៅ​ឃុំខ្លួន​បណ្ដោះអាសន្ន​នៅ​ស្នងការ​នគរបាល​ខេត្ត នៅ​រសៀល​ថ្ងៃ​ទី​១៨ តុលា។

ភរិយា​លោក ធីង សំបាន គឺ​លោកស្រី គ្រឿន ផាន ប្រាប់​អាស៊ីសេរី​នៅ​រសៀល​ថ្ងៃ​ទី​១៨ តុលា ថា មន្ត្រី​ប៉ូលិស​នៃ​ស្នងការ​នគរបាល​ខេត្ត​ឧត្ដរមានជ័យ​ប្រមាណ ២០​នាក់ ព័ទ្ធ​ចាប់​ស្វាមី​ពេល​កំពុង​ជម្រះ​ស្មៅ​ចម្ការ​ដំបូង​មី នៅ​ក្បែរ​ផ្ទះ​នៅ​ស្រុក​ចុងកាល់។ លោកស្រី​បញ្ជាក់​ទៀត​ថា ប៉ូលិស​ចាប់​លោក ធីង សំបាន វ៉ៃ​ខ្នោះដៃ​ស្លាប​សេក​ដាក់​មក​ក្រោយ ដូច​ចាប់​ឃាតក​សម្លាប់​មនុស្ស ហើយ​រុញ​ស្វាមី​ឡើង​ឡាន​យ៉ាង​តក់ក្រហល់ ដោយ​មិន​ឱ្យ​សាច់ញាតិ​ចូល​ទៅ​ក្បែរ​បាន​ឡើយ។ លោកស្រី​ចាត់​ទុក​សកម្មភាព​ប៉ូលិស​ចាប់​ស្វាមី​លោកស្រី​នេះ​ថា ជា​ការ​ធ្វើទុក្ខបុកម្នេញ​ពលរដ្ឋ​ស្លូតត្រង់​ដោយ​អយុត្តិធម៌ ដែល​ធ្វើ​ឱ្យ​ប្រពន្ធ​កូន​ឈឺចាប់​មិន​អាច​បំភ្លេច​បាន​ឡើយ៖ «ប្ដី​ខ្ញុំ​គាត់​គ្រុន​ផង ថា​គាត់​ស្រេកទឹក​ហៅ​កូន​ឱ្យ​យក​ទឹក​ឱ្យ​គាត់​ផឹក ខ្ញុំ​ឃើញ​គាត់​កម្សត់ ណាស់​ខ្ញុំ​និយាយ​មិន​រួច​ទេ។ ខ្ញុំ​ឃើញ​សាហាវ ឃោរឃៅ​ណាស់​មក​ចាប់​ប្ដី​ខ្ញុំ​នេះ គេ​ថា​យក​សួរ​ណែនាំ​គាត់ ខ្ញុំ​ថាបើ​យក​ទៅ​ណែនាំ​ហេតុ​អី​ចាំបាច់​ដាក់​ខ្នោះដៃ​គាត់។ កូន​ខ្ញុំ និង​ខ្ញុំ​យំ​ស្រែ​គ្រប់គ្នា​ស្រណោះ​ប្ដី​ស្គម​ហើយ​មាន​ជំងឺ​ខ្ញុំ​ទ្រាំ​មិន​បាន​ក៏​នាំគ្នា​យំ​ទន្ទ្រាំ​ដី។ សូម​អស់លោក​ទាំងឡាយ​មេត្តា​ជួយ​ប្ដី​ខ្ញុំ​ផង»

លោកស្រី​អំពាវនាវ​ដល់​អង្គការ​សង្គម​ស៊ីវិល​នៅ​កម្ពុជា​ឱ្យ​ជួយ​រក​យុត្តិធម៌​ជូន​ស្វាមី ដើម្បី​ឱ្យ​តុលាការ​ដោះលែង​គាត់​ឱ្យ​មាន​សេរីភាព​ឡើងវិញ ពីព្រោះ​ស្វាមី​លោកស្រី​មាន​ជំងឺ​ប្រចាំ​កាយ ត្រូវ​លេប​ថ្នាំ​ទៀងទាត់​រាល់ថ្ងៃ ហើយ​លោក​មិនបាន​ប្រព្រឹត្ត​ខុសច្បាប់​អ្វី​ឡើយ។

អាស៊ីសេរី​មិន​អាច​ទាក់ទង​ស្នងការ​រង​នគរបាល​ខេត្ត​ឧត្ដរមានជ័យ​ទទួលបន្ទុក​ផ្នែក​ព្រហ្មទណ្ឌ លោក​ឡឹក សុខា ដើម្បី​សុំ​អត្ថាធិប្បាយ​ជុំវិញ​បញ្ហា​នេះ​បានទេ នៅ​ថ្ងៃ​ទី​១៨ តុលា ដោយ​អ្នកទទួល​ទូរស័ព្ទ​ប្រាប់​ថា លោក​ជាប់រវល់៖ «ខ្ញុំ​ជា​មន្ត្រី​ប៉ូលិស​នៅ​ជាមួយ​គាត់​ដែរ ហើយ​គាត់​ដោត​ថ្ម​បញ្ចូល​ទូរស័ព្ទ​ចោល​រួចហើយ​គាត់​ចេញទៅ​ហាត់ប្រាណ។ ខ្ញុំ​អត់​ដឹង​រឿង​ការ​ចាប់ខ្លួន​នេះ​ទេ»

តំណាង​អយ្យកា​អម​សាលាដំបូង​ខេត្ត​ឧត្ដរមានជ័យ លោក គង់ រតនា ចោទ​ប្រកាន់​សកម្មជន​បក្ស​ប្រឆាំង គឺ​លោក ធីង សំបាន អាយុ ៦០​ឆ្នាំ រស់នៅ​ស្រុក​ចុងកាល់ ពី​បទ​រួមគំនិត​ក្បត់ជាតិ តាម​មាត្រា​៤៥៣ នៃ​ក្រមព្រហ្មទណ្ឌ។ តុលាការ​ខេត្ត​ឧត្ដរមានជ័យ​បញ្ជាក់​នៅ​ក្នុង​ដីកា កាលពី​ថ្ងៃ​ទី​១៤ តុលា​ថា សកម្មជន​បក្ស​ប្រឆាំង​រូប​នេះ បាន​ប្រមូល និង​កៀរគរ​កម្លាំង​ឱ្យ​ទៅ​ចូលរួម​ចលនា​វិលត្រឡប់​របស់​ប្រធាន​ស្ដីទី​គណបក្ស​សង្គ្រោះជាតិ​លោក សម រង្ស៊ី ធ្វើ​មាតុភូមិនិវត្តន៍​នៅ​ថ្ងៃ​ទី​៩ វិច្ឆិកា ខាងមុខ។នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត មាន​ប្រសាសន៍​ថា ការ​ចាប់​សកម្មជន​បក្ស​ប្រឆាំង​នេះ គឺជា​គំរាមកំហែង​បំភិតបំភ័យ​ផ្នែក​នយោបាយ​ដល់​អ្នក​គាំទ្រ​គណបក្ស​ប្រឆាំង ច្រើនជាង​ការអនុវត្ត​ច្បាប់​។ មន្ត្រី​សង្គម​ស៊ីវិល​រូប​នេះ​បន្ត​ថា ការ​បង្ហោះ​សារ​ឈឺឆ្អាល​រឿង​នយោបាយ​មិន​ខុសច្បាប់​ឡើយ ព្រោះ​ជា​សិទ្ធិ​សេរីភាព​ក្នុង​ការ​សម្ដែង​មតិ​របស់​ប្រជាពលរដ្ឋ ដែល​មាន​ចែង​នៅ​ក្នុង​រដ្ឋធម្មនុញ្ញ។ លោក​ហៅ​វិធានការ​របស់​សមត្ថកិច្ច​នេះ​ថា ជា​ការ​រារាំង​ប្រជាពលរដ្ឋ​កុំ​ឱ្យ​ទៅ​ចូលរួម​អម​ដំណើរ​លោក សម រង្ស៊ី វិល​ចូល​ស្រុក​វិញ​នៅ​ពេល​ខាងមុខ៖ «ហើយ​អ្វី​ដែល​សំខាន់​គឺ​អាជ្ញាធរ​មិន​ចង់​ឱ្យ​មាន​ការ​ផ្សព្វផ្សាយ​ការ​បញ្ចេញមតិ​ណាមួយ​ដើម្បី​ឱ្យ​មានការ​គាំទ្រ​ទៅលើ​មេដឹកនាំ​គណបក្សប្រឆាំង​វិល​ចូល​ស្រុក​វិញ​ទេ។ អីចឹង​ហើយ​ឱ្យ​តែ​សកម្មជន​បក្ស​ប្រឆាំង​ដែល​សកម្ម​កន្លងមក ដោយ​មានការ​បង្ហោះ​សារ​គាំទ្រ​មេដឹកនាំ​បក្ស​ប្រឆាំង​គឺ​ត្រូវការ​បាន​ធ្វើ​ការ​ចោទប្រកាន់ និង​ចាប់ខ្លួន​ហើយ»

គិត​ត្រឹម​ម៉ោង​ផ្សាយ​នេះ​នៅ​សល់​តែ ២២​ថ្ងៃ​ទៀត​ទេ ដល់​ថ្ងៃ​កំណត់​ដែល​លោក សម រង្ស៊ី អះអាង​ពី​ការ​វិល​ចូល​កម្ពុជា​វិញ​។ ស្រប​ពេល​ជាមួយ​គ្នា​នេះ អាជ្ញាធរ​របប​ក្រុងភ្នំពេញ​ក៏បាន​បង្កើន​ការ​ចាប់​ខ្លួន​សកម្មជន​គណបក្សប្រឆាំង​ជា​បន្តបន្ទាប់​។ មាន​សកម្មជន​គណបក្ស​មួយ​ចំនួន​ចាប់ខ្លួន​យក​ទៅ​ឃុំ​ក្នុង​ពន្ធនាគារ ហើយ​ទើប​បង្ហាញ​ដីកា​បង្គាប់​ឱ្យ​ចាប់ខ្លួន​របស់​តុលាការ​តាម​ក្រោយ។

គិត​ត្រឹម​ថ្ងៃ​ទី​១៨ តុលា មាន​សកម្មជន​គណបក្ស​សង្គ្រោះ​ជាតិ​ចំនួន ៤៨​នាក់​ហើយ ដែល​ត្រូវ​របប​លោក ហ៊ុន សែន ចាប់ ​និង​ឃុំ​ក្នុង​ខ្លួន​ពន្ធនាគារ ហើយ​មាន​សកម្មជន​ចំនួន ១៨៤​នាក់​ផ្សេងទៀត ត្រូវ​បាន​កោះហៅ​ទៅ​បំភ្លឺ និង​សមត្ថកិច្ច​តាម​ចាប់ខ្លួន ដោយ​គ្មាន​មូលដ្ឋាន​ច្បាប់​ច្បាស់លាស់​។ ក្រៅ​ពី​នេះ​ក៏​មាន​សកម្មជន​​បក្ស​ប្រឆាំង​ជាច្រើន​នាក់​ទៀត បាន​រត់​ភៀសខ្លួន​រក​កន្លែង​មាន​សុវត្ថិភាព ដើម្បី​គេច​ចេញ​ពី​ការ​តាម​យាយី និង​ការ​ធ្វើទុក្ខបុកម្នេញ ឬ​ចាប់ខ្លួន​ពី​អាជ្ញាធរ​​របប​ក្រុងភ្នំពេញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល