សកម្មជន​បក្ស​ប្រឆាំង​ម្នាក់​នៅ​ខេត្ត​ពោធិ៍សាត់ ត្រូវ​អាជ្ញាធរ​ចាប់​ខ្លួន

ដោយ ទីន ហ្សាការីយ៉ា
2020-10-07
Share
ជុំ សារ៉ាត់ លោក ជុំ សារ៉ាត់ សកម្មជន​គណបក្ស​សង្គ្រោះ​ជាតិ ជំទប់​ទី២ ឃុំ​អន្លង់​រាប ស្រុក​វាលវែង ខេត្ត​ពោធិ៍សាត់។
រូប៖ ហ្វេសប៊ុក ក្រញូង ព្រៃឡង់

សកម្មជន​បក្ស​ប្រឆាំង​ម្នាក់​នៅ​ខេត្ត​ពោធិ៍សាត់​ ត្រូវ​អាជ្ញាធរ​ចាប់​ខ្លួន កាល​ថ្ងៃ​ទី៦ តុលា។ មក​ដល់​ថ្ងៃ​ទី៧ តុលា នេះ ​ អាជ្ញាធរ​មិនបាន​​ផ្តល់​ព័ត៌មាន​ជាក់​លាក់​ដល់​គ្រួសារ​សាច់​ញាតិ​របស់​សកម្មជន​បក្ស​ប្រឆាំង​រូប​នេះ​ទេ ដែល​ធ្វើ​ឲ្យ​ពួក​គេ​បារម្ភ​អំពី​សុវត្ថិភាព​ និង​សុខភាព​សកម្មជន​រូប​នេះ​យ៉ាង​ខ្លាំង។

ជំទប់​ទី២ ឃុំ​អន្លង់​រាប​ ស្រុក​វាលវែង​ ខេត្ត​ពោធិ៍សាត់​ លោក​ ជុំ សារ៉ាត់​ ត្រូវ​អាជ្ញាធរ​ចាប់​ខ្លួន​កាល​ពី​រសៀល​ថ្ងៃ​ទី៦ ខែ​តុលា​ ក្បែរ​ផ្ទះ​របស់​លោក។

កូន​ស្រី​ទី៣ របស់​លោក ជុំ សារ៉ាត់ លោក​ស្រី ចែម រំពៃ ប្រាប់​អាស៊ី​សេរី​ថា​ មាន​ឡាន​មួយ​គ្រឿង​ និង​ប៉ូលិស​ស្លៀកពាក់​ឯក​សណ្ឋាន​២-៣​នាក់​ បាន​មក​នាំ​ខ្លួន​ឪពុក​លោកស្រី​ គឺ​លោក ជុំ សារ៉ាត់ យក​ទៅ​ ដោយ​មិន​ផ្តល់​ព័ត៌មាន​លម្អិត​ឡើយ គ្រាន់​តែ​ប្រាប់​ថា បើ​​មាន​ការ​ត្រូវ​សួរ​នាំ អាច​ទៅ​សួរ​នៅប៉ុស្តិ៍​ប៉ូលិ​ស​ឃុំ​ប្រមោយ។ លោកស្រី​បន្ត​ថា​ រហូត​ដល់​ម៉ោង ៤ល្ងាច​ថ្ងៃ​ទី៦ តុលា នៅ​មិន​ឃើញ​លោក ជុំ សារ៉ាត់ ត្រឡប់​មក​ផ្ទះ ទើប​ក្រុម​គ្រួសារ​​នាំ​គ្នា​ទៅ​សួរ​នាំ​នៅ​ប៉ុស្តិ៍​ប៉ូលិស​ឃុំ​ប្រមោយ តែ​អាជ្ញាធរ​បាន​ប្រាប់​ថា លោក ជុំ សារ៉ាត់ ត្រូវ​បញ្ជូន​ទៅ​ស្នងការដ្ឋាន​នគរបាល​ខេត្ត​ពោធិ៍សាត់​បាត់​ទៅ​ហើយ។ លោកស្រី​អះអាង​ថា​ អាជ្ញាធរ​មិន​ប្រាប់​អំពី​មូល​ហេតុអ្វី​ដែល​ឪពុក​លោកស្រី​ត្រូវ​គេ​ចាប់​ខ្លួន​នោះ​ទេ៖ «ចាស៎! គាត់​មាន​ជំងឺ​ដែរ​តើ​ចែ ខ្ញុំ​បារម្ភ​ពី​គាត់​ដែរ​ហ្នឹង គាត់​ចាស់​ហើយ គេ​ធ្វើ​បាប​ម៉េច​ទៅ ហ្នឹង​ហើយ​ខ្ញុំ​ចង់​ឲ្យ​ពួក​ខាង​គេ​ហ្នឹង​ដោះ​លែង​ពុក​ខ្ញុំ​វិញ​មក ពុក​ខ្ញុំ​មាន​កំហុស​អី​បាន​ជា​ចាប់​គាត់​អ៊ីចឹង

លោកស្រី ចែម រំពៃ ឱ្យ​ដឹង​ថា រហូត​​មក​ដល់​ល្ងាច​ថ្ងៃ​ទី៧ តុលា ទើប​ក្រុម​គ្រួសារ​ទទួល​បាន​ដំណឹង​ថា លោក ជុំ​ សារ៉ាត់ ត្រូវ​បាន​សាកសួរ​ដោយ​​តុលាការ​ខេត្ត​ពោធិ៍សាត់ ប៉ុន្តែ​នៅ​មិន​ទាន់​ដឹង​អំពី​បទចោទប្រកាន់ និង​នីតិវិធី​បន្ត​ទៀត​របស់​តុលាការ​នោះ​ទេ។

អាស៊ី​សេរី​មិន​អាច​ទាក់ទង​ស្នងការ​ថ្មី​ខេត្ត​ពោធិ៍សាត់ លោក ស ថេង ដើម្បី​សាកសួរ​រឿង​នេះ​បាន​ទេ នៅ​ថ្ងៃ​ទី៧ តុលា។

ចំណែក អ្នកនាំពាក្យ​អគ្គស្នងការដ្ឋាន​នគរ​បាល​ជាតិ​លោក​ ឆាយ គឹមខឿន ថ្លែង​ថា លោក​មិន​ទាន់​អាច​ផ្តល់​ព័ត៌មាន​អំពី​ករណី​នេះ​បាន​ទេ ដោយ​ត្រូវ​ពិនិត្យ​រឿង​នេះ​ជាមុន​សិន។ នៅ​ពេល​អាស៊ីសេរី​ទាក់ទង​សួរ​នាំ​ម្ដង​ទៀត លោក​ ឆាយ គឹមខឿន បែរ​ជា​មិន​លើក​ទូរស័ព្ទ​វិញ។

នាយក​រង​ទទួល​បន្ទុក​ឃ្លាំ​មើល​សិទ្ធិ​មនុស្ស​នៃ​អង្គការ​លីកាដូ លោក​ អំ​ សំអាត​ ប្រាប់​អាស៊ីសេរី​ថា អង្គការ​របស់​លោក​កំពុង​តាម​ដាន​ករណី​នេះ​ដោយ​យកចិត្ត​ទុក​ដាក់។ លោក​ថា ​ អាជ្ញាធរ​ត្រូវ​តែ​បង្ហាញ​ដីកា​ និង​ប្រាប់​អំពី​មូលហេតុ​ជាក់លាក់​អំពី​ការ​ចាប់​ខ្លួន​ លើ​សកម្មជន​បក្ស​ប្រឆាំង​រូប​នេះ​ដល់​សាច់​ញាតិ មិន​អាច​ចាប់​មនុស្ស​ទៅ​ដោយ​គ្មាន​ដំណឹង​បែបនេះ​ទេ៖ «ទី១ ករណី​នេះ​យើង​ទទួល​បាន​ព័ត៌មាន​ពី​រឿង​ការ​ចាប់​ខ្លួន ហើយ​យើង​កំពុង​ធ្វើ​តែ​ស្វែង​រក​ព័ត៌មាន​បន្ថែម​ថា តើ​ការ​ចាប់​ខ្លួន​ហ្នឹង​វា​រឿង​អី​ឲ្យ​ពិត​ប្រាកដ ហើយ​បញ្ជូន​ទៅ​កន្លែង​ណា នេះ​យើង​កំពុង​ធ្វើ​ការ។ ហើយ​មួយ​ទៀត ទាក់ទង​នឹង​នីតិវិធី បើ​យើង​ពិនិត្យ​ទៅ​លើ​ផ្លូវ​ច្បាប់​វិញ ការ​ចាប់​ខ្លួន​ដោយ​គ្មាន​ដីកា​បែប​នេះ​ទៅ​បាន​វា​ទាល់​តែ​បទ​ល្មើស​ជាក់​ស្ដែង អា​ហ្នឹង​បាន​គេ​អាច​ធ្វើ​ការ​ចាប់​ខ្លួន​បាន ប៉ុន្តែ​បើ​សិន​ជា​មិនមែន​ជា​បទ​ល្មើស​ជាក់ស្ដែង​ទេ វា​ត្រូវ​តែ​ប្រាប់​ត្រូវ​តែ​មាន​ដីកា ឬ​បង្ហាញ​ដីកា ឬ​ប្រាប់​ព័ត៌មាន​ឲ្យ​ក្រុម​គ្រួសារ​បាន​ដឹង​ថា គេ​ចាប់​រឿង​អី»

សកម្មជន​គណបក្ស​សង្គ្រោះ​ជាតិ លោក ជុំ សារ៉ាត់ បាន​គេច​ខ្លួន​ពី​ការ​តាម​ចាប់​ទៅ​កន្លែង​មាន​សុវត្ថិភាព​មួយ​រយៈ​មក​ហើយ។ លោក​​ទើប​តែ​ត្រឡប់​មក​ផ្ទះ​ កាល​ពី​ថ្ងៃ​ទី​ ២​ តុលា ប៉ុន្តែ​ក៏​ត្រូវ​អាជ្ញាធរ​ចាប់​ខ្លួន​វិ​ញ​។​ ការ​ចាប់​ខ្លួន​សកម្មជន​បក្ស​ប្រឆាំង​ផ្ទុះ​ឡើង​ជា​ថ្មី ​បន្ទាប់​ពី​ប្រធាន​ស្ដីទី​គណបក្ស​សង្គ្រោះ​ជាតិ​ លោក សម រង្ស៊ី បាន​ប្រកាស​ថា នឹង​ធ្វើ​មាតុភូមិ​និវត្ត​លើក​ទី២ ដើម្បី​ចូល​ទៅ​ស្ដារ​ប្រជាធិបតេយ្យ​នៅ​កម្ពុជា​ឱ្យ​រស់​នៅ​ឡើង​វិញ។ ចាប់​តាំង​ពី​ខែ​មករា រហូត​ដល់​ដើម​ខែតុលា​នេះ មាន​សកម្មជន​​នយោបាយ​ ព្រះសង្ឃ​ និង​ សកម្មជន​សង្គម ជាង ៣០នាក់​ ហើយ​ ដែល​អាជ្ញាធរ​ចាប់​ខ្លួន​ដាក់​ពន្ធនាគារ​ព្រៃស ក្រោម​បទចោទប្រកាន់​ដែល​ត្រូវ​បាន​ក្រុម​អ្នក​សិទ្ធិមនុស្ស​វាយ​តម្លៃ​ថា ជា​បទ​ចោទ​ប្រកាន់​បែប​នយោបាយ ដើម្បី​បំបិទ​សំឡេង​អ្នក​រិះគន់​រដ្ឋាភិបាល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។