អ្នកឃ្លាំមើលលើកឡើងថា ជំនួបរវាងរដ្ឋមន្ត្រីការពារជាតិកម្ពុជាជាមួយ រដ្ឋមន្ត្រីការពារជាតិចិន គឺបង្ហាញឱ្យឃើញថា កម្ពុជានៅតែប្រកាន់ខ្ជាប់និងយ៉ាង ម៉ឺងម៉ាត់នូវទំនាក់ទំនងជាមួយប្រទេសចិនខ្លាំងជាងប្រទេសដទៃ។
ការលើកឡើងនេះ ធ្វើឡើងបន្ទាប់ពីរដ្ឋមន្ត្រីការពារជាតិកម្ពុជាជួបទ្វេភាគីជាមួយរដ្ឋមន្ត្រីការពារជាតិចិន កាលពីថ្ងៃទី២ ខែមិថុនា មុនពេលមានដំណើរទស្សនកិច្ច របស់រដ្ឋមន្ត្រីការពារជាតិអាមេរិកលោក ឡយ អូស្ទីន (Lloyd Austin) មកកាន់កម្ពុជានៅថ្ងៃទី៤ ខែមិថុនា។
អ្នកឃ្លាំមើលលើកឡើងថា ជំនួបរវាងរដ្ឋមន្ត្រីការពារជាតិកម្ពុជាជាមួយចិន មុនពេលដំណើរទស្សនកិច្ចលោក ឡយ អូស្ទីន នេះ គឺបង្ហាញពីទំនាក់ទំនងជិតដិត រវាងប្រទេសទាំងពីរ ហើយកម្ពុជានៅតែប្រកាន់ខ្ជាប់យ៉ាងម៉ឺងម៉ាត់ នូវទំនាក់ទំនងរបស់ខ្លួនជាមួយប្រទេសចិន ខ្លាំងជាងប្រទេសដទៃរួមទាំងអាមេរិក។
កាលពីថ្ងៃទី២ខែមិថុនា រដ្ឋមន្ត្រីការពារជាតិកម្ពុជា លោក ទៀ សីហា បានជួបប្រជុំទ្វេភាគីជាមួយរដ្ឋមន្ត្រីក្រសួងការពារជាតិ នៃសាធារណៈរដ្ឋប្រជាមានិតចិនលោក តុង ជុន (Dong Jun) អំឡុងពេលចូលរួមក្នុងកិច្ចប្រជុំកំពូលសន្តិសុខអាស៊ីលើកទី២១ នៅប្រទេសសិង្ហបុរី ចាប់ពីថ្ងៃទី៣១ ខែឧសភា ដល់ថ្ងៃទី២ មិថុនា។
ទំព័រហ្វេសប៊ុកក្រសួងការពារជាតិកម្ពុជាឱ្យដឹង នៅរសៀលថ្ងៃទី៣ ខែមិថុនា ថា ក្នុងជំនួបនោះ លោក ទៀ សីហា សន្យាជាមួយលោក តុង ជុន ថា នឹងរឹតចំណងមិត្តភាព និងកិច្ចសហប្រតិបត្តិការរវាងកងទ័ពប្រទេសទាំងពីរ ហើយបន្តពង្រឹងពង្រីកកិច្ចទំនាក់ទំនងដែលមានស្រាប់ និងបង្កើននូវទំនាក់ទំនងនេះ ឱ្យបានកាន់ តែល្អប្រសើរឡើងបន្ថែមទៀត។
ឆ្លើយតបនឹងការលើកឡើងនេះ រដ្ឋមន្ត្រីការពារជាតិចិន លោក តុង ជុន បានវាយតម្លៃខ្ពស់ ចំពោះទំនាក់ទំនងកិច្ចសហប្រតិបត្តិការរវាងកងទ័ពនៃប្រទេសទាំងពីរ និងចាត់ទុកលោក ទៀ សីហា ជាអ្នកដឹកនាំបន្តវេន ដែលនឹងបន្តធ្វើឱ្យ កិច្ចសហប្រតិបត្តិការ រវាងកងទ័ពប្រទេសទាំងពីរកាន់តែល្អប្រសើរ។
ជុំវិញរឿងនេះ អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី ប្រាប់វិទ្យុអាស៊ីសេរីនៅថ្ងៃទី៣ ខែមិថុនា ថា ជំនួបរវាងរដ្ឋមន្ត្រីការពារជាតិកម្ពុជានិងចិននេះ គឺបង្ហាញពីទំនាក់ទំនងស្អិតល្មួតនៃប្រទេសទាំងពីរ ហើយក៏បញ្ជាក់ឱ្យឃើញពីបំណងប្រាថ្នារបស់ចិន ដែលចង់ឱ្យកម្ពុជានៅជាប់ជាមួយនឹងខ្លួន។
លោកបន្តថា កិច្ចប្រតិបត្តិការរវាងប្រទេសទាំងពីរនេះ កម្ពុជាប្រហែលពិបាកគេចផុតពីឥទ្ធិពលផ្នែកសន្តិសុខ និងផ្នែកយោធាចិន ទោះបីជាមានដំណើរទស្សនកិច្ចរបស់រដ្ឋមន្ត្រីការពារជាតិអាមេរិកមកកាន់កម្ពុជាក៏ដោយ។
ជាងនេះទៅទៀត លោកថា ជំនួបពិភាក្សារវាងរដ្ឋមន្ត្រីការពារជាតិអាមេរិកជាមួយមេដឹកនាំកម្ពុជាប្រហែលជាចិនក៏បានដឹងពីរបៀបវារដែរ។
លោក សេង វណ្ណលី៖«ជាសារបង្ហាញឱ្យឃើញថា ទោះក្នុងកាលៈទេសៈណាក៏ដោយ ចិនតែមានទំនាក់ទំនងជិតដិតជាមួយកម្ពុជា មិនថាដំណើរទស្សនកិច្ចមេដឹកនាំការពារអាមេរិកមកកាន់កម្ពុជានៅថ្ងៃស្អែកនេះក៏ដោយ។ វាក៏បង្ហាញឱ្យឃើញថា កម្ពុជានៅតែប្រកាន់ខ្ជាប់យ៉ាងម៉ឺងម៉ាត់នូវទំនាក់ទំនងរបស់ខ្លួនជាមួយប្រទេសចិនខ្លាំងជាងកិច្ចសហប្រតិបត្តិការផ្នែកយោធា និងសន្តិសុខជាមួយប្រទេសដទៃរួមទាំងអាមេរិកផង»។
លោក សេង វណ្ណលី បន្តថា ដំណើរទស្សនកិច្ចរបស់លោក ឡយ អូស្ទីនេះ មាន ទាំងសារវិជ្ជមាន និងអវិជ្ជមាន។ លោកថា រដ្ឋមន្ត្រីការពារជាតិអាមេរិលើកឡើង ពីហានិភ័យ អំពីទំនាក់ទំនងជិតដិតផ្នែកសន្តិសុខ និងយោធារបស់កម្ពុជាជាមួយចិននេះ ទៅលើប្រទេសមួយចំនួនក្នុងតំបន់អាស៊ាន ដើម្បីឱ្យរដ្ឋាភិបាលកម្ពុជា ពិចារណាឱ្យបានដិតដល់ចំពោះសកម្មភាព និងកិច្ចសហប្រតិបត្តិការណាមួយ ដែលជាហានិភ័យដល់ស្ថិរភាព និងវិបុលភាពក្នុងតំបន់ជាពិសេសឆ្លើយតបនឹងកង្វល់របស់សមាជិកអាស៊ាន ដែលមានទំនាស់នៅសមុទ្រចិនខាងត្បូង។
វិទ្យុអាស៊ីសេរី មិនអាចសុំការអត្ថាធិប្បាយចំពោះបញ្ហានេះ ពីអ្នកនាំពាក្យ ក្រសួងការពារជាតិលោក ឈុំ សុជាតិ បានទេ នៅថ្ងៃទី០៣ ខែមិថុនា ដោយសារហៅទូរស័ព្ទចូល តែគ្មានអ្នកទទួល។
រដ្ឋមន្ត្រីការពារជាតិអាមេរិកលោក ឡយ អូស្ទីន (Lloyd Austin) គ្រោងនឹងមក បំពេញទស្សនកិច្ចនៅកម្ពុជានៅថ្ងៃទី៤ ខែមិថុនា។ ដំណើរទស្សនកិច្ចលើកទី២ របស់រដ្ឋមន្ត្រីការពារជាតិអាមេរិកលោក ឡយ អូស្ទីន នេះ ធ្វើឡើងស្របពេលកម្ពុជា ត្រូវបានគេមើលឃើញថា កំពុងរងឥទ្ធិពលនិងបង្កើនទំនាក់ទំនងកាន់តែជិតស្និទ្ធលើវិស័យយោធាជាមួយប្រទេសចិនកុម្មុយនិស្ត។
ជាក់ស្ដែង សមយុទ្ធយោធានាគមាសលើកទី៦ ដែលបញ្ចប់កាលពីថ្ងៃទី៣០ ខែឧសភាថ្មីៗ នេះ ភាគីកម្ពុជា និងចិនបានឯកភាព ក្នុងការបន្តបង្កើនការធ្វើសមយុទ្ធយោធារួមគ្នាជាបន្តបន្ទាប់ ខណៈសមយុទ្ធយោធាឆ្មាំអង្គរជាមួយសហរដ្ឋ អាមេរិក និងសមយុទ្ធដនគោព្រៃជាមួយអូស្ត្រាលី ត្រូវបានកម្ពុជាលុបចោលតាំងពីចុងឆ្នាំ២០១៧។
ជាងនេះទៅទៀត កម្ពុជាក៏រងការរិះគន់ថា បានរួមចំណែកបង្កឱ្យមានភាពតានតឹង តាមរយៈការបង្កើនទំនាក់ទំនងផ្នែកយោធាកាន់តែជិតស្និទ្ធជាមួយចិន (China) ដែលបង្កការគំរាមកំហែងដល់សន្តិសុខប្រទេសក្នុងតំបន់ ពាក់ព័ន្ធនឹងបញ្ហាចម្រូងចម្រាសនៅកំពង់ផែរាម និងវត្តមាននាវាចម្បាំងចិននៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។