អាជ្ញាធរកម្ពុជានឹងបញ្ជូនខ្មាន់កាំភ្លើងប្រគល់ឱ្យសមត្ថកិច្ចថៃ នៅថ្ងៃទី១១ មករា
2025.01.10
ជនសង្ស័យជាខ្មាន់កាំភ្លើង ឈ្មោះ អេកាឡាក់ ផែណយ (Aekkalak Paenoi) ដែលបាញ់សម្លាប់អតីតតំណាងរាស្ត្រគណបក្សសង្គ្រោះជាតិ លោក លិម គិមយ៉ា ដែលអាជ្ញាធរចាប់បាន នៅស្រុកមោងឫស្សី ខេត្តបាត់ដំបង កាលពីថ្ងៃទី៨ ខែមករា ឆ្នាំ២០២៥។
រូប៖ ទូរទស្សន៍ AMARIN TV 2025-01-08
សមត្ថកិច្ចកម្ពុជានឹងបញ្ជូនជនសង្ស័យជាខ្មាន់កាំភ្លើង ឈ្មោះ អេកាឡាក់ ផែណយ (Aekkalak Paenoi) ដែលបាញ់សម្លាប់អតីតតំណាងរាស្ត្រ គណបក្សសង្គ្រោះជាតិ លោក លិម គិមយ៉ា ទៅឱ្យសមត្ថកិច្ចថៃ នៅវេលាម៉ោង ១២ថ្ងៃត្រង់ ថ្ងៃទី១១ ខែមករានេះ តាមការស្នើសុំរបស់ថៃ ដើម្បីផ្ដន្ទាទោសតាមច្បាប់ថៃ។
សមត្ថកិច្ចកម្ពុជានឹងបញ្ជូនខ្មាន់កាំភ្លើង ឈ្មោះ អេកាឡាក់ ផែណយ (Aekkalak Paenoi) ដែលបាញ់សម្លាប់អតីតតំណាងរាស្ត្រ គណបក្សសង្គ្រោះជាតិ លោក លិម គិមយ៉ា ទៅឱ្យសមត្ថកិច្ចថៃ នៅវេលាម៉ោង ១២ថ្ងៃត្រង់ ថ្ងៃទី១១ ខែមករានេះ តាមការស្នើសុំរបស់ថៃ ដើម្បីផ្ដន្ទាទោសតាមច្បាប់ថៃ។
អ្នកវិភាគនយោបាយសង្ស័យថា ករណីឃាតកម្មនេះ អាចជាគំនុំនយោបាយ ខណៈគណបក្សប្រឆាំងចោទថា ជារឿងនយោបាយ ដែលមានក្រុមគ្រួសារត្រកូល ហ៊ុន ជាអ្នករៀបចំនៅពីក្រោយ។
រដ្ឋាភិបាលកម្ពុជាហាក់នៅមានការលាក់លៀមព័ត៌មាន ដែលពាក់ព័ន្ធអំពីការបាញ់សម្លាប់អតីតតំណាងរាស្ត្រគណបក្សសង្គ្រោះជាតិ សញ្ជាតិបារាំងដើមកំណើតខ្មែរ គឺលោក លិម គិមយ៉ា ដែលកំពុងធ្វើកក្រើកពេញពីក្រុងបាងកក ប្រទេសថៃ និងកំពុងការតាមដានខ្លាំងសហគមន៍អន្តរជាតិជុំវិញរឿងឃាតកម្មមួយនេះ។
ចំណែកអាជ្ញាធរថៃបានផ្សាយចេញជាសាធារណៈគ្រប់ជំហានអំពីដំណើរការវែកមុខជនល្មើស និងជនសង្ស័យដទៃទៀត ដែលជាអ្នកពាក់ព័ន្ធទាំងនៅកម្ពុជា និងថៃ។
ព័ត៌មានចុងក្រោយ ដែលវិទ្យុអាស៊ីសេរីទទួលបាន នៅយប់ថ្ងៃទី១០ មករា តាមរយៈទូរទស្សន៍ប៉ុស្តិ៍លេខ៧ របស់ថៃឲ្យដឹងថា អាជ្ញាធរកម្ពុជានឹងបញ្ជូនខ្មាន់កាំភ្លើងប្រគល់ឱ្យសមត្ថកិច្ចថៃ នៅថ្ងៃទី១១មករា។
នាយប៉ូលិសជាន់ខ្ពស់ នៃអគ្គស្នងការនគរបាលជាតិថៃចំនួន ២នាក់ នឹងទៅទទួលជនសង្ស័យជាខ្មាន់កាំភ្លើងជនជាតិថៃរូបនេះផ្ទាល់ នៅច្រកទ្វារព្រំដែនអន្តរជាតិប៉ោយប៉ែតខេត្តបន្ទាយមានជ័យ រួចដឹកតាមឧទ្ធម្ភាគចក្រទៅចុះចតនៅវាលយន្តហោះប៉ូលិសនៅទីក្រុងបាងកក។
ចំណែកជនសង្ស័យទី២ ឈ្មោះ ពេជ្រ គឹមស្រ៊ិន ដែលគេស្គាល់ថា ជាប្អូនប្រុសបង្កើតរបស់ប្រធានគណបក្សយុវជនកម្ពុជា លោក ពេជ្រ ស្រស់ និងជាអនុប្រធានគណៈកម្មការផ្សារកណ្ដាល ដែលអាជ្ញាធរថៃស្នើសុំឲ្យកម្ពុជាបញ្ជូនខ្លួនទៅជំនុំជម្រះក្ដីនៅតុលាការប្រទេសថៃនោះ ក៏មិនមានការឆ្លើយតបថា យ៉ាងណានៅឡើយទេ។
មេបញ្ជាការស៊ើបអង្កេត នៃទីបញ្ជាការប៉ូលិសក្រុងបាងកក (Bangkok) ប្រទេសថៃ (Thai) លោក ធីរ៉ាដេត ថាំសុធី (Theeradej Thammasuthee) បានធ្វើសន្និសីទសារព័ត៌មាន កាលពីថ្ងៃទី៩ ខែមករា ថា ជនសង្ស័យទី២ ឈ្មោះ ពេជ្រ គឹមស្រ៊ិន ក្រុមស៊ើបអង្កេត បានកំណត់មុខសញ្ញាអ្នកពាក់ព័ន្ធ ដែលជាពលរដ្ឋខ្មែរជាច្រើនផ្សេងទៀត មានដូចជា អ្នកនាំខ្មាន់កាំភ្លើងឆ្លងដែន និងអ្នកផ្ទេរលុយឱ្យខ្មាន់កាំភ្លើងតាមរយៈគណនីធនាគារជាដើម។
វិទ្យុអាស៊ីសេរីមិនអាចទាក់ទងអគ្គស្នងការនគរបាលជាតិ លោក ស ថេត និងអ្នកនាំពាក្យ លោក ឆាយ គឹមខឿន ដើម្បីសុំការបកស្រាយជុំវិញរឿងនេះបានទេ នៅថ្ងៃទី១០ ខែមករា។
ប៉ុន្តែ កាលពីថ្ងៃទី៩ ខែមករា លោក ស ថេត ប្រាប់វិទ្យុអាស៊ីសេរីថា ភាគីកម្ពុជា ជនសង្ស័យទី២ ដែលជាជនជាតិខ្មែរ ឈ្មោះ ពេជ្រ គឹមស្រ៊ិន នោះ ខាងសមត្ថកិច្ចកម្ពុជា ក៏មិនទាន់ស្រាវជ្រាវចាប់ខ្លួនបាននៅឡើយ។
អ្នកឃ្លាំមើលសង្គមលើកឡើងថា សំណុំរឿងបាញ់សម្លាប់លោក លិម គិមយ៉ា អាជ្ញាធរ ថៃ ហាក់មានការស៊ើបអង្កេតរកអ្នកពាក់ព័ន្ធ និងបង្ហាញភស្តុតាង ច្បាស់ លាស់ ជាងអាជ្ញាធរកម្ពុជា ដែលបង្ហាញពីគោលជំហរមិនច្បាស់លាស់ ក្នុងការចាប់ខ្លួនអ្នកពាក់ព័ន្ធ ដែលជាជនជាតិខ្មែរ។
ជុំវិញសំណុំរឿងបាញ់សម្លាប់ លោក លិម គិមយ៉ា នៅចំកណ្ដាលទីក្រុងបាងកក ប្រទេសថៃ នេះដែរ អ្នកវិភាគ និងអ្នកអត្ថាធិប្បាយនយោបាយ បានផ្តល់នូវការវិភាគផ្សេងៗ គ្នា។
ទាក់ទងការចោទប្រកាន់ពីគណបក្សប្រឆាំង ដែលថា ជារឿងនយោបាយ ដោយមានក្រុមគ្រួសារត្រកូល ហ៊ុន ជាអ្នករៀបចំនៅពីក្រោយនោះ មកពេលពេលនេះ ក៏មិនទាន់មានប្រតិកម្មតបពីលោក ហ៊ុន សែន និងនាយករដ្ឋមន្ត្រី កូន គឺ លោក ហ៊ុន ម៉ាណែត នោះ នៅឡើយទេ។
ក្នុងនាទីវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃសុក្រ ទី១០ មករា អ្នកអត្ថាធិប្បាយនយោបាយ លោក គឹម សុខ បានផ្តល់នូវការវិភាគថា ការសង្ស័យបឋមរបស់លោកគឺ ការបាញ់សម្លាប់ លោក លិម គិមយ៉ា អាចមិនមែនជាការប្រកួតប្រជែងនយោបាយទេ តែវាអាចជាគំនុំនយោបាយ ដែលពាក់ព័ន្ធនឹងលោក ហ៊ុន សែន ផ្ទាល់ ដែលធ្លាប់ប៉ះទង្គិចពាក្យសម្ដីជាមួយគ្នា កាលពីលោក លិម គិមយ៉ា ជាប់ឆ្នោតជាតំណាងរាស្ត្រមកពីគណបក្សសង្គ្រោះជាតិ ឆ្នាំ២០១៣ និងក្រោយមកទៀត ថ្មីៗ នេះ អាចប៉ះជាមួយកូនប្រុសពៅរបស់លោក ហ៊ុន សែន គឺលោក ហ៊ុន ម៉ានី កើតឡើងក្រោយពេលលោកបានសរសេររិះគន់កូនប្រុសលោក ហ៊ុន សែន គឺ ហ៊ុន ម៉ានី ដែលបានរៀបចំកម្មវិធីឆ្លងឆ្នាំ២០២៤ បណ្ដាលឲ្យឆេះព្រះឆាយាល័ក្ខណ៍ព្រះមហាក្សត្រ និងចំណាយលុយខ្ជះខ្ជាយអត់ប្រយោជន៍ រៀបចំកម្មវិធីបំបែកឯកត្តកម្មមួយចំនួនកន្លងមកនោះជាដើម។
លោក គឹម សុខ៖ «គំនុំនយោបាយ ដែលខ្ញុំចង់និយាយនោះគឺ ទី១ លោក ហ៊ុន សែន ធ្លាប់ខឹង គំនុំនយោបាយ។ ទី២ ធ្លាប់រិះគន់លោក ហ៊ុន ម៉ានី លោក លិម គិមយ៉ា គាត់នៅតែរិះគន់ចំៗ ទៅលើគ្រួសារត្រកូល ហ៊ុន ដដែល ករណីគុំនុំនយោបាយបែបនេះ អាចថ្នាក់ក្រោមជាអ្នកធ្វើដែរ មេដឹកនាំកំពូលមិនអាចនិយាយថា កូនចៅខ្លួនជាអ្នកធ្វើទេ អ៊ីចឹង រួមគំនិតក្នុងការបិទបាំងអ៊ីចឹង យើងពិបាកថា លោក ហ៊ុន សែន ជាអ្នកធ្វើផ្ទាល់ ឬថ្នាក់ក្រោមខ្លាំងណាស់។ ប៉ុន្តែ បើយើងសរុបរឿងហ្នឹង មិនអាចគេចចេញពីការទទួលខុសត្រូវរបស់លោក ហ៊ុន សែន បានទេ»។
ចំណែកអ្នកសិក្សាផ្នែកអភិវឌ្ឍន៍សង្គម បណ្ឌិត សេង សារី ហាក់យល់ឃើញផ្ទុយពីនេះ ដោយលោកយល់ថា ការបាញ់សម្លាប់លោក លិម គិមយ៉ា អាចមិនមែនជាការភ្លាត់ស្នៀតរបស់គ្រួសារត្រកូល ហ៊ុន ឬលោក ហ៊ុន សែន ផ្ទាល់នោះទេ។
លោកចាត់ទុកករណីនេះថា លើសពីអំពើឃាតកម្មទូទៅ ហើយវាអាចផ្តល់សញ្ញាណបែបនយោបាយអ្វីម្យ៉ាងទៅប្រទេសថៃ ក្នុងនោះ អាចផ្ដើមចេញពីជម្លោះអំពីការគ្រប់គ្រងតំបន់កោះគជ់ ដែលកម្ពុជា និងថៃ កំពុងមានភាពតានតឹងដាក់គ្នា និងផ្ទុះរឿងឧក្រិដ្ឋកម្មអនឡាយ នៅក្រុងបោយបែត ដែលមេដឹកនាំថៃចេញមុខកកូរកកាយករណីនេះជាដើម។
សេង សារី៖ «ព្រោះបើករណីនេះ គ្រាន់តែចង់សម្លាប់លោក លិម គិមយ៉ា មិនបាច់ឲ្យលោក លិម គិមយ៉ា ទៅស្រុកថៃទេ។ បើពិតជាចេតនាចង់សម្លាប់លោក លិម គិមយ៉ា មែន សម្លាប់នៅស្រុកខ្មែរ មានផលប៉ះពាល់តិចជាង ដោយមិនចាំបាច់ប្រឈមជាមួយរដ្ឋាភិបាលថៃ និងរដ្ឋាភិបាលបារាំង»។
តែទោះជាយ៉ាងណាក្ដី លោកទាំងពីរថ្លែងថា ករណីនេះ ត្រូវការពេលសិក្សាស្រាវជ្រាវបន្ថែមទៀត ខណៈក្រុមអង្គការអន្តរជាតិ នាំគ្នាចេញសេចក្ដីថ្លែងការណ៍ជាបន្តបន្ទាប់ ថ្កោលទោស ករណីឃាតកម្មលោក លិម គិមយ៉ា និងទាមទារអាជ្ញាធរពាក់ព័ន្ធឱ្យធ្វើអន្តរាគមន៍រកយុត្តិធម៌ជូនជនរងគ្រោះ និងធានាឲ្យមានការស៊ើបអង្កេតរកមេខ្លោងពិតប្រាកដ ដែលនៅពីក្រោយឧក្រិដ្ឋកម្មនេះ៕
អត្ថបទនេះត្រូវបានធ្វើបច្ចុប្បន្នភាព នៅរសៀលថ្ងៃទី១០ ខែមករា ឆ្នាំ២០២៥ ដោយដាក់បញ្ចូលព័ត៌មានពិស្ដារ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋរិះគន់ថា ភ្លើងឆេះព្រះឆាយាល័ក្ខណ៍ព្រះមហាក្សត្រ ជាការធ្វេសប្រហែសរបស់អាជ្ញាធរក្រុងភ្នំពេញ
- ប៉ូលិសថៃស៊ើបអង្កេតឃើញថា ករណីធ្វើឃាតលើលោក លិម គិមយ៉ា មានការរៀបចំជាប្រព័ន្ធ ដោយមានមេខ្លោងនៅកម្ពុជា
- អតីតតំណាងរាស្ត្រគណបក្សសង្គ្រោះជាតិលោក លិម គិមយ៉ា ត្រូវឃាតកបាញ់សម្លាប់នៅប្រទេសថៃ
- អតីតតំណាងរាស្ត្រគណបក្សសង្គ្រោះជាតិ លោក លិម គិមយ៉ា ដែលរិះគន់រដ្ឋាភិបាលត្រកូល ហ៊ុន ត្រូវឃាតកបាញ់សម្លាប់នៅប្រទេសថៃ
- ជនសង្ស័យ ដែលបាញ់សម្លាប់លោក លិម គិមយ៉ា នៅបាងកក អាជ្ញាធរចាប់បាននៅក្នុងទឹកដីខ្មែរ
អត្ថបទពេញនិយម
នយោបាយ
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- កម្ពុជាបានប្រគល់ខ្លួនខ្មាន់កាំភ្លើងបាញ់សម្លាប់លោក លិម គិមយ៉ា ឱ្យភាគីថៃហើយ និងប្រកាសបទចោទភ្លាមៗ
- អាជ្ញាធរកម្ពុជានឹងបញ្ជូនខ្មាន់កាំភ្លើងប្រគល់ឱ្យសមត្ថកិច្ចថៃ នៅថ្ងៃទី១១ មករា
- អ្នកជំនាញច្បាប់ និងអ្នកតាមដាននយោបាយថា ឃាតកម្មលោក លិម គិមយ៉ា ជាប់ពាក់ព័ន្ធរដ្ឋាភិបាល ដែលរៀបចំជាប្រព័ន្ធ
- លោក ហ៊ុន សែន យកថ្ងៃ ៧មករា បន្តជំរុញកូនឱ្យធ្វើច្បាប់ដាក់អ្នករិះគន់ជា «ក្រុមភេរវករ»