យុទ្ធនាការឃោសនាបោះឆ្នោតក្នុងថ្ងៃទី៥ នេះ គណបក្សប្រជាជនកម្ពុជា និងគណបក្សភ្លើងទៀន បន្តសកម្មភាពធ្វើយុទ្ធនាការឃោសនារកសំឡេងឆ្នោតផ្សេង ដាច់ដោយឡែកពីគ្នា ដោយថ្នាក់ដឹកនាំនៃគណបក្សភ្លើងទៀន បន្តហែក្បួនទ្រង់ទ្រាយធំ នៅខេត្តឧត្តរមានជ័យ និងខេត្តកំពង់ធំ នៅថ្ងៃទី២៥ ឧសភានេះ។ រីឯគណបក្សកាន់អំណាចវិញ បានពង្រាយសកម្មជនរបស់ខ្លួនក្នុងឃុំ/សង្កាត់នីមួយៗ ដោយចុះចួបផ្ទាល់ជាមួយពលរដ្ឋតាមផ្ទះ ដើម្បីណែនាំពីរបៀបគូសសន្លឹកឆ្នោតឱ្យបានត្រឹមត្រូវ និងផ្សព្វផ្សាយគោលនយោបាយគណបក្សជាដើម។
យុទ្ធនាការឃោសនាបោះឆ្នោត ថ្ងៃទី៥ នេះ គណបក្សប្រជាជនកម្ពុជា គណបក្សភ្លើងទៀន និងគណបក្សឆន្ទៈខ្មែរ បន្តធ្វើសកម្មភាពឃោសនារកសំឡេងឆ្នោត នៅតាមបណ្តាខេត្តមួយចំនួន។ រីឯគណបក្សឆន្ទៈខ្មែរ ពុំបានហែក្បូនឃោសនារកសំឡេងឆ្នោតទ្រង់ទ្រាយធំទេ ដោយគ្រាន់តែចែកខិតបណ្ណ និងផ្សព្វផ្សាយពីគោលនយោបាយតាមឧបករណ៍បំពងសំឡេង ក្នុងឃុំ/សង្កាត់មួយចំនួន។
អនុប្រធានគណបក្សភ្លើងទៀន លោក ថាច់ សេដ្ឋា ប្រាប់វិទ្យុអាស៊ីសេរីថា ថ្នាក់ដឹកនាំគណបក្សភ្លើងទៀន បានចួបអ្នកគាំទ្រ និងហែក្បូនទ្រង់ទ្រាយធំ នៅថ្ងៃទី២៥ ឧសភានេះ នៅទីរួមខេត្តឧត្តរមានជ័យ ដោយមានមនុស្សចូលរួមជាង ១ពាន់នាក់ (១.០០០)។ លោកថា ក្រុមអ្នកគាំទ្រភាគច្រើនបានធ្វើដំណើរដោយម៉ូតូ និង រថយន្តដង្ហែក្បូន ក្នុងសង្កាត់មួយចំនួន នៅទីរួមខេត្តឧត្តរមានជ័យដោយពុំមានការរារាំង និងគំរាមកំហែង ពីសំណាក់អាជ្ញាធរនោះទេ។ លោកសង្ឃឹមថា គណបក្សរបស់លោក នឹងទទួលបានអាសនៈច្រើន ក្នុងខេត្តនេះ ព្រោះពលរដ្ឋជាច្រើន បានចូលរួមគាំទ្រ ទះដៃស្វាគមន៍ ក្បូនដង្ហែគណបក្សភ្លើងទៀននៅតាមដងផ្លូវនានា។
លោកបន្ថែមថា ថ្នាក់ដឹកនាំគណបក្សភ្លើងទៀន នឹងបន្តជួបជាមួយអ្នកគាំទ្រនៅខេត្តកំពង់ធំ នៅរសៀលថ្ងៃដដែលនេះ៖ «ពេលដង្ហែយើងបានសង្កេតឃើញ ពលរដ្ឋបានសាទរ លើកដៃសំពះ និងលើកដៃជាសញ្ញាគាំទ្រដល់គណបក្សភ្លើងទៀន»។
ក្រោយពីឃោសនា រកសំឡេងឆ្នោតនៅខេត្តជាប់ព្រំដែនថៃ ថ្នាក់ដឹកនាំនៃគណបក្សភ្លើងទៀន បានបន្តធ្វើដំណើរ ចួបអ្នកគាំទ្រ និងហែក្បូនទ្រង់ទ្រាយធំ នៅទីរួមខេត្តកំពង់ធំ ដោយមានមនុស្សចូលរួមរាប់ពាន់នាក់។ ក្រុមអ្នកគាំទ្រ និងសកម្មជនគណបក្សភ្លើងទៀន ភាគច្រើនហែក្បូនដោយជិះម៉ូតូ រថយន្ត និងម៉ូតូកង់បី ដោយពាក់អាវ និងអាវនិមិត្តសញ្ញាគណបក្សភ្លើងទៀនស្ទើរគ្រប់ៗ គ្នា។ ពួកគេចាក់បទចម្រៀង និងសារសំឡេងនយោបាយតាមមេក្រូ ដើម្បីបង្ហាញពីគោលជំហរ និងឆន្ទៈនយោបាយច្បាស់លាស់ប្រាប់ម្ចាស់ឆ្នោត ក្នុងក្រុងកំពង់ធំ៖ ជយោ ! គណបក្សភ្លើងទៀន ... ចម្រៀង ... មេឃុំ / ចៅសង្កាត់របស់គណបក្សភ្លើងទៀន ហ៊ានលាលែង បើសិនបើមិនអនុវត្តតាមអ្វីដូចការសន្យា»។
រីឯគណបក្សប្រជាជនកម្ពុជាវិញ បន្តធ្វើសកម្មភាពពង្រាយសកម្មជនគ្រប់ភូមិ ឃុំ/សង្កាត់ទាំងអស់នៅទូទាំងប្រទេស ដោយចែកខិតប័ណ្ណ ណែនាំប្រាប់ពលរដ្ឋ ពីរបៀបគូសសន្លឹកឆ្នោតឱ្យបានត្រឹមត្រូវ និងផ្សព្វផ្សាយពីគោលនយោបាយជាដើម។
អ្នកនាំពាក្យគណបក្សកាន់អំណាច លោក សុខ ឥសាន ប្រាប់វិទ្យុអាស៊ីសេរីថា ក្រុមសកម្មជន និងគណៈកម្មការឃុំ/សង្កាត់នីមួយៗ នៅទូទាំងប្រទេស កំពុងធ្វើសកម្មភាពចុះចួប និងសួរសុខទុក្ខ ពលរដ្ឋ នៅតាមស្នាក់ការភូមិ/ឃុំ ដើម្បីណែនាំពីរបៀបគូសសន្លឹកឆ្នោតប្រាប់មនុស្សចាស់ និងផ្សព្វផ្សាយពីគោលនយោបាយបក្សជាដើម។
លោកបដិសេធថា គណបក្សរបស់លោកពុំមានគោលការណ៍ណែនាំឱ្យសកម្មជនរបស់ខ្លួន បង្គាប់ឱ្យពលរដ្ឋណាម្នាក់ បោះឆ្នោតឱ្យគណបក្សប្រជាជន ដោយសន្យាអ្វីមួយនោះឡើយ ដោយគ្រាន់តែបង្រៀនពលរដ្ឋដែលមានវ័យចំណាស់ និងចាស់ជរា ពីរបៀបគូសសន្លឹកឆ្នោតឱ្យបានត្រឹមត្រូវតាមការពេញចិត្តរបស់ពួកគាត់តែប៉ុណ្ណោះ។
ចំពោះសំណួរថា តើគណបក្សកាន់អំណាចមានគោលការណ៍ ចែកអំណោយ និងលុយ ជូនពលរដ្ឋក្នុងថ្ងៃយុទ្ធនាការនេះទេ អ្នកនាំពាក្យរូបនេះឆ្លើយយ៉ាងខ្លីថា ច្បាប់របស់ គ.ជ.ប មិនអនុញ្ញាតឱ្យគណបក្សនយោបាយណាមួយ ចែកអំណោយ និងលុយ ក្នុងថ្ងៃយុទ្ធនាការនោះទេ៖ «ដើម្បីសួរសុខទុក្ខគ្នាលើកទឹកគ្នាឱ្យទៅបោះឆ្នោតហើយគូសឱ្យចំ ដែលបងប្អូនពេញចិត្ត។ នៅបងប្អូនយាយតាចាស់ៗ គាត់ភ្លេចភ្លាំង បើកក្មេងៗគ្មាននរណាបង្គាប់ទេ។ ការចោទប្រកាន់នេះ ជាការមូលបង្កាច់សភាពការពិត។
រីឯគណបក្សឆន្ទៈខ្មែរ បន្តធ្វើសកម្មភាពហែក្បួនឃោសនារកសំឡេងឆ្នោតទ្រង់ទ្រាយតូចៗ ដោយចាក់មេក្រូចល័ត បិទបដាតាមដើមឈើ និងចែកខិតបណ្ណ នៅតាមឃុំ/សង្កាត់មួយចំនួន ក្នុងខេត្ត/ក្រុងចំនួន១០ នៅទូទាំងប្រទេស។
ប្រធានគណបក្សឆន្ទៈខ្មែរ លោក គង់ មុនីកា ប្រាប់វិទ្យុអាស៊ីសេរីថា គណបក្សរបស់លោក បានបែងចែកក្រុមការងារ និងសកម្មជន ផ្សព្វផ្សាយគោលនយោបាយ របស់គណបក្ស នៅមូលដ្ឋាន ក្នុងឃុំ/សង្កាត់ចំនួន ដែលខ្លួនបានដាក់បេក្ខភាពប្រកួតប្រជែង។
លោកបញ្ជាក់ថា គណបក្សរបស់លោក បានដាក់បេក្ខភាពប្រកួតប្រជែងបោះឆ្នោតឃុំ/សង្កាត់ ក្នុងអាណត្តិទី៥ នេះ ចំនួន ៥៨ឃុំ/សង្កាត់ នៅទីទូទាំងប្រទេស។ លោកបន្ថែមថា យុទ្ធនាការឃោសនាបោះឆ្នោត ៥ថ្ងៃកន្លងទៅនេះ សកម្មជនគណបក្សរបស់លោក មានការរារាំងពីសំណាក់អាជ្ញាធរភូមិមួយចំនួន ដោយសារតែពួកគាត់ខ្វះការយល់ដឹង ពីនីតិវិធីការបោះឆ្នោត៖ «ខ្ញុំចង់ឱ្យ គ.ជ.ប លើក្រោយគាត់បង្ហាញ ឬពន្យល់នីតិវិធីប្រាប់ការឃោសនាបោះឆ្នោតឱ្យអាជ្ញាធរមូលដ្ឋាន មេភូមិអីហ្នឹងឱ្យ បានយល់ពីចម្ងាយបន្តិច កុំឱ្យកៀកពេលឃោសនាហើយ បានផលិតឯកសារណែនាំ យឺតពេល។ នេះជាចំណុចខ្វះខាត និងឆកល្វែង»។
ទាក់ទងរឿងនេះ អ្នកសម្របសម្រួលផ្នែកអង្កេត និងតស៊ូមតិ នៃអង្គការខុមហ្រ្វែល លោក កន សាវាង្ស ពន្យល់ថា ប្រសិនបើសកម្មជនគណបក្សនយោបាយណាមួយ គ្រាន់តែដើរបង្រៀនពលរដ្ឋតាមផ្ទះ ពីរបៀបគូសសន្លឹកឆ្នោត ជូនគណបក្សនយោបាយណាមួយ ឱ្យបានត្រឹមត្រូវ គឺពុំខុសឆ្គងនោះឡើយ។ ប៉ុន្តែប្រសិនបើសកម្មជនរបស់គណបក្សនយោបាយណាមួយ ដើរតាមផ្ទះពលរដ្ឋ ដោយតម្រូវឱ្យពលរដ្ឋបោះឆ្នោតឱ្យគណបក្សនយោបាយណាមួយ ហើយសន្យាជាមួយពលរដ្ឋធ្វើអ្វីមួយនោះ ទើបជាទង្វើខុសច្បាប់ របស់ គ.ជ.ប។
រីឯប្រធានគណៈកម្មការជាតិរៀបចំការបោះឆ្នោត ហៅកាត់ថា គ.ជ.ប មិថុនា ខាងមុខ មានរយៈ ១៤ថ្ងៃចាប់ផ្ដើមពីថ្ងៃទី២១ ខែឧសភា ដល់ថ្ងៃទី៣ ខែមិថុនាខាងមុខ។ ច្បាប់បោះឆ្នោតអនុញ្ញាតឱ្យគណបក្សនយោបាយហែក្បួនទ្រង់ទ្រាយធំនៅតាមមូលដ្ឋានរបស់ខ្លួនត្រឹមពីរថ្ងៃប៉ុណ្ណោះ គឺថ្ងៃចាប់ផ្ដើម និងថ្ងៃចុងបញ្ចប់នៃយុទ្ធនាការនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។