គណបក្សភ្លើងទៀន បន្តសកម្មភាពធ្វើយុទ្ធនាការឃោសនារកសំឡេងឆ្នោតនៅខេត្តកំពង់ស្ពឺ នៅថ្ងៃទី២៧ ឧសភា ដោយមានមនុស្សចូលរួមរាប់ពាន់នាក់។ រីឯគណបក្សកាន់អំណាច និងគណបក្សដទៃទៀត ពុំបានហែក្បូនឃោសនាបោះឆ្នោតទ្រង់ទ្រាយធំនោះទេ ដោយគ្រាន់តែផ្សព្វផ្សាយតាមមេក្រូចល័ត នៅមូលដ្ឋាន និងបញ្ជូនសកម្មជនចុះចួបពលរដ្ឋនៅតាមផ្ទះ។
យុទ្ធនាការឃោសនាបោះឆ្នោតក្នុងថ្ងៃទី៧ នេះ ថ្នាក់ដឹកនាំនៃគណបក្សភ្លើងទៀន បន្តសកម្មភាពធ្វើយុទ្ធនាការឃោសនារកសំឡេងឆ្នោតនៅស្រុកភ្នំស្រួច ខេត្តកំពង់ស្ពឺ ដោយចាក់មេក្រូ ចែកខិត្តប័ណ្ណ និងផ្សព្វផ្សាយពីគោលនយោបាយគណបក្សនៅតាមដងផ្លូវ។ ក្រុមអ្នកហែក្បូនភាគច្រើន ធ្វើដំណើរដោយម៉ូតូ និងរថយន្ត ពាក់អាវ និងមួកគណបក្ស ដោយចាក់បទចម្រៀង និងថ្លែងសារនយោបាយ នៅតាមផ្លូវសាធារណៈ។
បញ្ហាដីធ្លីជារឿងប្រឈមធ្ងន់ធ្ងរនៅខេត្តកំពង់ស្ពឺ ដែលថ្នាក់ដឹកនាំគណបក្សភ្លើងទៀន បានយកបញ្ហានេះ ជាប្រធានបទក្នុងការជជែកជាមួយពលរដ្ឋ ក្នុងពេលដែលពលរដ្ឋរស់នៅខេត្តនេះ កំពុងក្ដៅក្រហាយជាមួយអាជ្ញាធរ ដែលកាប់បំផ្លាញព្រៃសហគមន៍មេត្តាធម្មជាតិឱ្យរលាយនៅរយៈពេលជាង ៤ខែកន្លងទៅនេះ។
អនុប្រធានគណបក្សភ្លើងទៀន លោក ថាច់ សេដ្ឋា បានថ្លែងនៅចំពោះមុខអ្នកគាំទ្រ ដោយបង្ហាញគោលជំហរច្បាស់លាស់ ការពារព្រៃឈើ ដីធ្លី និងសិទ្ធិសេរីភាពពលរដ្ឋ ប្រកបដោយស្មារតីជាតិនិយម ស្មោះត្រង់ និងមិនពុករលួយ។ លោកថា បញ្ហាដីធ្លីជារឿងសំខាន់ ប្រសិនបើពលរដ្ឋបណ្ដែតបណ្ដោយបន្តទៀត នោះដីស្រែចម្ការកេរដូនតារបស់ពួកគាត់ នឹងពុំមានសុវត្ថិភាពនោះឡើយ។ ហេតុនេះគណបក្សរបស់លោក មានឆន្ទៈច្បាស់លាស់ ការពារសុវត្ថិភាពដីធ្លី ព្រៃឈើ និងដោះស្រាយបញ្ហាដីធ្លីជូនពលរដ្ឋដោយយុត្តិធម៌៖ «មានបញ្ហាដីធ្លី ខេត្តនេះកំពុងត្រូវប៉ាន់ឡើងថ្លៃ ព្រោះពលរដ្ឋអភិវឌ្ឍន៍ ហើយប្រសិនបើយើងបណ្ដែតបណ្ដោយ មិននាំគ្នាការពារទេ គេយកអស់ហើយ។ មានតែគណបក្សភ្លើងទៀនទេ ដែលការពារដីធ្លីពលរដ្ឋខ្មែរពិតប្រាកដ»។
រីឯគណបក្សប្រជាជនកម្ពុជាវិញ បានកំណត់ថ្ងៃបិទបញ្ចប់នៃយុទ្ធនាការឃោសនាបោះឆ្នោត ជាថ្ងៃហែក្បូនឃោសនាទ្រង់ទ្រាយធំ នៅទូទាំងរាជធានីខេត្ត/ក្រុង។ គណបក្សកាន់អំណាច បានជ្រើសយកយន្តការ ពង្រាយសកម្មជន និងគណៈកម្មការឃុំ/សង្កាត់នីមួយៗ នៅទូទាំងប្រទេស ចុះចួប និង ណែនាំពីគោលនយោបាយគណបក្ស ជាចំណុចស្នូល ដើម្បីរកសំឡេងឆ្នោត កំឡុងពេលឃោសនាបោះឆ្នោត។
អ្នកនាំពាក្យគណបក្សកាន់អំណាចលោក សុខ ឥសាន ប្រាប់វិទ្យុអាស៊ីសេរីថា គណបក្សរបស់លោក បានខិតខំអនុវត្តត្រឹមត្រូវតាមគោលការណ៍ច្បាប់ និងបទបញ្ញត្តិនានារបស់ គ.ជ.ប ដោយមិនឱ្យមានបញ្ហាកើតឡើងនោះឡើយ ដើម្បីរួមចំណែកឱ្យដំណើរការបោះឆ្នោត ប្រព្រឹត្តទៅដោយរលូន និងជោគជ័យ។ លោកបន្ថែមថា ក្នុងថ្ងៃយុទ្ធនាការឃោសនាបោះឆ្នោតកន្លងទៅនេះ សកម្មជនគណបក្សរបស់លោក បានដាក់ពាក្យប្ដឹងទៅ គ.ជ.ប ដើម្បីដោះស្រាយបញ្ហាមួយចំនួនតូចនៅថ្នាក់មូលដ្ឋាន ប៉ុន្តែពុំមានអំពើហិង្សា និងភាពមិនប្រក្រតីធ្ងន់ធ្ងរនោះទេ៖ «ធម្មតាទេ តែគណបក្សណាល្មើសច្បាប់ អាហ្នឹងភាគីម្ខាងទៀត គេមានសិទ្ធិប្ដឹងហើយ ប្រឹងទៅ គ.ជ.ប ដើម្បីឱ្យដោះស្រាយ។ ទូទាំងប្រទេស គណបក្សប្រជាជនកម្ពុជាខិតខំ អនុវត្តតាមគោលការណ៍ នីតិវិធី គ.ជ.ប មិនឱ្យមានបញ្ហាអ្វីកើតឡើង»។
រីឯគណបក្សយុវជនកម្ពុជាវិញ បានជូនដំណឹងរៀបចំហែក្បូនឃោសនារកសំឡេងឆ្នោតទ្រង់ទ្រាយធំ ដោយមានមនុស្សចូលរួម ២.០០០នាក់។ យុទ្ធនាការនេះ ដឹកនាំដោយប្រធានគណបក្សយុវជនកម្ពុជា លោក ពេជ្រ ស្រស់ ធ្វើឡើងនៅរាជធានីភ្នំពេញ នៅថ្ងៃទី២៩ ឧសភាខាងមុខនេះ។
ប្រធាននាយកដ្ឋានកិច្ចការនយោបាយនៃគណបក្សយុវជនកម្ពុជា លោក ឯម សុខសុវណ្ណ មានប្រសាសន៍ថា ក្នុងពេលឃោសនាបោះឆ្នោតកន្លងទៅនេះ សកម្មជនគណបក្សរបស់លោក មានបញ្ហាប្រឈមតិចតួច ជាមួយអាជ្ញាធរមូលដ្ឋាននៅខេត្តមួយចំនួន ប៉ុន្តែបានដោះស្រាយរួចរាល់ហើយ ពុំមានការប្ដឹងផ្តល់ទៅ គ.ជ.ប នោះទេ។ លោកថា សកម្មជនគណបក្សយុវជនកម្ពុជា ភាគច្រើនជាយុវជន ៩០ភាគរយ ជានិស្សិត និងបញ្ញវន្ត ពោរពេញដោយសមត្ថភាពគ្រប់គ្រាន់កសាងជាតិ និងអភិវឌ្ឍន៍ជាតិរុងរឿងនៅថ្ងៃអនាគត៖ «សូមលើកដៃម្រាមដប់ សូមពលរដ្ឋបោះឆ្នោតជូនគណបក្សប្រជាជនកម្ពុជា ដែលបម្រើពលរដ្ឋ ដោយឆន្ទៈ និងមនសិការខ្ពស់ជាតិនិយម ហើយសុទ្ធជាយុវជន ៩០ភាគរយ មានសមត្ថភាពគ្រប់គ្រាន់កសាងជាតិ និងអភិវឌ្ឍន៍ជាតិរុងរឿងនៅថ្ងៃអនាគត។ ស្នើសុំ គ.ជ.ប ធ្វើម៉េចឱ្យមានតម្លាភាព អព្យាក្រឹតភាព សេរី និងយុត្តិធម៌ទាំងអស់គ្នា»។
រីឯគណបក្សនយោបាយមួយចំនួនទៀត រួមមាន គណបក្សឆន្ទៈខ្មែរ គណបក្សខ្មែរស្រឡាញ់ជាតិ និងគណបក្សប្រជាធិបតេយ្យមូលដ្ឋាន ជាដើម មិនទាន់ប្រកាសថ្ងៃយុទ្ធនាការទ្រង់ទ្រាយធំនៅឡើយទេ ដោយសកម្មជនគណបក្សនយោបាយទាំងនេះបន្តធ្វើសកម្មភាពឃោសនារកសំឡេងឆ្នោតទ្រង់ទ្រាយតូចៗ នៅតាមឃុំ/សង្កាត់នាខេត្តមួយចំនួន។
អ្នកនាំពាក្យ គ.ជ.ប លោក ហង្ស ពុទ្ធា បដិសេធមិនអធិប្បាយរឿងនេះទេ លោកថា កំពុងជាប់រវល់។
ជុំវិញរឿងនេះ អ្នកសម្របសម្រួលផ្នែកអង្កេត និងតស៊ូមតិ នៃអង្គការខុមហ្រ្វែល លោក កន សាវាង្ស សង្កេតឃើញថា យុទ្ធនាការឃោសនាបោះឆ្នោតមួយរយៈនេះមានភាពមិនប្រក្រតីមួយចំនួន បានកើតឡើង ដូចជា នៅតាមបណ្ដាខេត្តមួយចំនួនរួមមានខេត្តកំពង់ចាម និងខេត្តកោះកុងជាដើម មន្ត្រីគណបក្សកាន់អំណាចបានប្ដឹងបេក្ខភាពឃុំ/សង្កាត់របស់គណបក្សភ្លើងទៀន នៅតែមិនទាន់ដោះស្រាយបញ្ចប់នៅឡើយទេ។ បញ្ហានេះលោកថា ដំណោះស្រាយនៅតែពន្យារពេល ដោយសារតែដើមបណ្ដឹងមិនដកពាក្យបណ្ដឹង និងមិនសម្របសម្រួល៖ «គណបក្សកាន់អំណាចជាអ្នកប្ដឹងទាក់ទងរឿង ការចែកអំណោយនៅខាងកំពង់ចាម ការប្រើប្រាស់សារ នៅខាងប៉ៃលិន កោះកុង និងបាត់ដំបងជាដើមភាគច្រើន កើតចេញពីគណបក្សកាន់អំណាច ទៅលើគណបក្សភ្លើងទៀន។ នេះជាដំណើរការប្ដឹង ដែលខ្ញុំមើលឃើញ»។
យុទ្ធនាការរកសំឡេងឆ្នោតរបស់គណបក្សនយោបាយទាំង១៧ ដែលចូលរួមការបោះឆ្នោតថ្នាក់ក្រោមជាតិថ្ងៃទី៥ ខែមិថុនាខាងមុខ មានរយៈ ១៤ថ្ងៃ ចាប់ផ្ដើមពីថ្ងៃទី២១ ខែឧសភា ដល់ថ្ងៃទី៣ ខែមិថុនាខាងមុខ។ ច្បាប់បោះឆ្នោតអនុញ្ញាតឱ្យគណបក្សនយោបាយហែក្បួនទ្រង់ទ្រាយធំនៅតាមមូលដ្ឋានរបស់ខ្លួនត្រឹមពីរដងប៉ុណ្ណោះ ក្នុងកំឡុងពេលឃោសនាបោះឆ្នោត តាមឃុំ/សង្កាត់នីមួយៗ។
កាលពីថ្ងៃទី២៥ ឧសភាកន្លងទៅ ប្រធានគណៈកម្មការជាតិរៀបចំការបោះឆ្នោត ហៅកាត់ថា គ.ជ.ប លោក ប្រាជ្ញ ចន្ទ បានចេញសេចក្ដីជូនដំណឹងមួយដោយណែនាំឱ្យគ្រប់គណបក្សនយោបាយទាំងអស់ មិនត្រូវធ្វើសកម្មទិញទឹកចិត្តម្ចាស់ឆ្នោត ដោយធ្វើសកម្មភាពផ្តល់ជាមធ្យោបាយថវិកា និងសម្ភារៈបរិក្ខារផ្សេងៗ។ លោករំឭកឱ្យគ្រប់គណបក្សនយោបាយទាំងអស់ ត្រូវគោរពឱ្យបានខ្ជាប់ខ្ជួននូវច្បាប់ និងបទបញ្ញត្តិរបស់ គ.ជ.ប ក្នុងថ្ងៃធ្វើយុទ្ធនាការនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។